3.2.9 ပဌမရာဂသုတ္တ
Review
68.
435
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
436
“ယဿ ကဿစိ, ဘိက္ခဝေ, ရာဂေါ အပ္ပဟီနော, ဒေါသော အပ္ပဟီနော, မောဟော အပ္ပဟီနော— အယံ ဝုစ္စတိ, ဘိက္ခဝေ, ‘ဗဒ္ဓေါ မာရဿ ပဋိမုက္ကဿ မာရပါသော ယထာကာမကရဏီယော ပါပိမတော’. ယဿ ကဿစိ, ဘိက္ခဝေ, ရာဂေါ ပဟီနော, ဒေါသော ပဟီနော, မောဟော ပဟီနော— အယံ ဝုစ္စတိ, ဘိက္ခဝေ, ‘အဗဒ္ဓေါ မာရဿ ဩမုက္ကဿ မာရပါသော န ယထာကာမကရဏီယော ပါပိမတော’”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
437
“ယဿ ရာဂေါ စ ဒေါသော စ,
အဝိဇ္ဇာ စ ဝိရာဇိတာ;
တံ ဘာဝိတတ္တညတရံ,
ဗြဟ္မဘူတံ တထာဂတံ;
ဗုဒ္ဓံ ဝေရဘယာတီတံ,
အာဟု သဗ္ဗပ္ပဟာယိနန်”တိ.
438
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
439
နဝမံ.