3.3.10 ပရိဟာနသုတ္တ
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
“တယောမေ, ဘိက္ခဝေ, ဓမ္မာ သေခဿ ဘိက္ခုနော ပရိဟာနာယ သံဝတ္တန္တိ. ကတမေ တယော? ဣဓ, ဘိက္ခဝေ, သေခေါ ဘိက္ခု ကမ္မာရာမော ဟောတိ, ကမ္မရတော, ကမ္မာရာမတမနုယုတ္တော; ဘဿာရာမော ဟောတိ, ဘဿရတော, ဘဿာရာမတမနုယုတ္တော; နိဒ္ဒါရာမော ဟောတိ, နိဒ္ဒါရတော, နိဒ္ဒါရာမတမနုယုတ္တော. ဣမေ ခေါ, ဘိက္ခဝေ, တယော ဓမ္မာ သေခဿ ဘိက္ခုနော ပရိဟာနာယ သံဝတ္တန္တိ.
တယောမေ, ဘိက္ခဝေ, ဓမ္မာ သေခဿ ဘိက္ခုနော အပရိဟာနာယ သံဝတ္တန္တိ. ကတမေ တယော? ဣဓ, ဘိက္ခဝေ, သေခေါ ဘိက္ခု န ကမ္မာရာမော ဟောတိ, န ကမ္မရတော, န ကမ္မာရာမတမနုယုတ္တော; န ဘဿာရာမော ဟောတိ, န ဘဿရတော, န ဘဿာရာမတမနုယုတ္တော; န နိဒ္ဒါရာမော ဟောတိ, န နိဒ္ဒါရတော, န နိဒ္ဒါရာမတမနုယုတ္တော. ဣမေ ခေါ, ဘိက္ခဝေ, တယော ဓမ္မာ သေခဿ ဘိက္ခုနော အပရိဟာနာယ သံဝတ္တန္တီ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
“ကမ္မာရာမော ဘဿာရာမော,
နိဒ္ဒါရာမော စ ဥဒ္ဓတော;
အဘဗ္ဗော တာဒိသော ဘိက္ခု,
ဖုဋ္ဌုံ သမ္ဗောဓိမုတ္တမံ.
တသ္မာ ဟိ အပ္ပကိစ္စဿ,
အပ္ပမိဒ္ဓေါ အနုဒ္ဓတော;
ဘဗ္ဗော သော တာဒိသော ဘိက္ခု,
ဖုဋ္ဌုံ သမ္ဗောဓိမုတ္တမန်”တိ.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
ဒသမံ.
တတိယော ဝဂ္ဂေါ.
တဿုဒ္ဒါနံ
ဒွေ ဒိဋ္ဌီ နိဿရဏံ ရူပံ,
ပုတ္တော အဝုဋ္ဌိကေန စ;
သုခါ စ ဘိဒုရော ဓာတု,
ပရိဟာနေန တေ ဒသာတိ.