3.4.4 ပဉ္စပုဗ္ဗနိမိတ္တသုတ္တ
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
“ယဒါ, ဘိက္ခဝေ, ဒေဝေါ ဒေဝကာယာ စဝနဓမ္မော ဟောတိ, ပဉ္စဿ ပုဗ္ဗနိမိတ္တာနိ ပါတုဘဝန္တိ— မာလာ မိလာယန္တိ, ဝတ္ထာနိ ကိလိဿန္တိ, ကစ္ဆေဟိ သေဒါ မုစ္စန္တိ, ကာယေ ဒုဗ္ဗဏ္ဏိယံ ဩက္ကမတိ, သကေ ဒေဝေါ ဒေဝါသနေ နာဘိရမတီတိ. တမေနံ, ဘိက္ခဝေ, ဒေဝါ ‘စဝနဓမ္မော အယံ ဒေဝပုတ္တော’တိ ဣတိ ဝိဒိတွာ တီဟိ ဝါစာဟိ အနုမောဒေန္တိ— ‘ဣတော, ဘော, သုဂတိံ ဂစ္ဆ. (1)
သုဂတိံ ဂန္တွာ သုလဒ္ဓလာဘံ လဘ. (2)
သုလဒ္ဓလာဘံ လဘိတွာ သုပ္ပတိဋ္ဌိတော ဘဝါဟီ’”တိ. (3)
ဧဝံ ဝုတ္တေ, အညတရော ဘိက္ခု ဘဂဝန္တံ ဧတဒဝေါစ— “ကိံ နု ခေါ, ဘန္တေ, ဒေဝါနံ သုဂတိဂမနသင်္ခါတံ. (1)
ကိဉ္စ, ဘန္တေ, ဒေဝါနံ သုလဒ္ဓလာဘသင်္ခါတံ. (2)
ကိံ ပန, ဘန္တေ, ဒေဝါနံ သုပ္ပတိဋ္ဌိတသင်္ခါတန်”တိ? (3)
“မနုဿတ္တံ ခေါ, ဘိက္ခု, ဒေဝါနံ သုဂတိဂမနသင်္ခါတံ. (1)
ယံ မနုဿဘူတော သမာနော တထာဂတပ္ပဝေဒိတေ ဓမ္မဝိနယေ သဒ္ဓံ ပဋိလဘတိ; ဣဒံ ခေါ, ဘိက္ခု, ဒေဝါနံ သုလဒ္ဓလာဘသင်္ခါတံ. (2)
သာ ခေါ ပနဿ သဒ္ဓါ နိဝိဋ္ဌာ ဟောတိ မူလဇာတာ ပတိဋ္ဌိတာ ဒဠှာ အသံဟာရိယာ သမဏေန ဝါ ဗြာဟ္မဏေန ဝါ ဒေဝေန ဝါ မာရေန ဝါ ဗြဟ္မုနာ ဝါ ကေနစိ ဝါ လောကသ္မိံ; ဣဒံ ခေါ, ဘိက္ခု, ဒေဝါနံ သုပ္ပတိဋ္ဌိတသင်္ခါတန်”တိ. (3)
ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
“ယဒါ ဒေဝေါ ဒေဝကာယာ,
စဝတိ အာယုသင်္ခယာ;
တယော သဒ္ဒါ နိစ္ဆရန္တိ,
ဒေဝါနံ အနုမောဒတံ.
‘ဣတော ဘော သုဂတိံ ဂစ္ဆ,
မနုဿာနံ သဟဗျတံ; (1)
မနုဿဘူတော သဒ္ဓမ္မေ,
လဘ သဒ္ဓံ အနုတ္တရံ. (2)
သာ တေ သဒ္ဓါ နိဝိဋ္ဌဿ,
မူလဇာတာ ပတိဋ္ဌိတာ;
ယာဝဇီဝံ အသံဟီရာ,
သဒ္ဓမ္မေ သုပ္ပဝေဒိတေ. (3)
ကာယဒုစ္စရိတံ ဟိတွာ,
ဝစီဒုစ္စရိတာနိ စ;
မနောဒုစ္စရိတံ ဟိတွာ,
ယဉ္စညံ ဒေါသသဉှိတံ.
ကာယေန ကုသလံ ကတွာ,
ဝါစာယ ကုသလံ ဗဟုံ;
မနသာ ကုသလံ ကတွာ,
အပ္ပမာဏံ နိရူပဓိံ.
တတော ဩပဓိကံ ပုညံ,
ကတွာ ဒါနေန တံ ဗဟုံ;
အညေပိ မစ္စေ သဒ္ဓမ္မေ,
ဗြဟ္မစရိယေ နိဝေသယ’.
ဣမာယ အနုကမ္ပာယ,_
ဒေဝါ ဒေဝံ ယဒါ ဝိဒူ;
စဝန္တံ အနုမောဒေန္တိ,
ဧဟိ ဒေဝ ပုနပ္ပုနန်”တိ.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
စတုတ္ထံ.