3.4.7 ဓမ္မာနုဓမ္မပဋိပန္နသုတ္တ
Review
86.
597
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
598
“ဓမ္မာနုဓမ္မပဋိပန္နဿ ဘိက္ခုနော အယမနုဓမ္မော ဟောတိ ဝေယျာကရဏာယ— ဓမ္မာနုဓမ္မပဋိပန္နောယန္တိ ဘာသမာနော ဓမ္မညေဝ ဘာသတိ နော အဓမ္မံ, ဝိတက္ကယမာနော ဝါ ဓမ္မဝိတက္ကညေဝ ဝိတက္ကေတိ နော အဓမ္မဝိတက္ကံ, တဒုဘယံ ဝါ ပန အဘိနိဝေဇ္ဇေတွာ ဥပေက္ခကော ဝိဟရတိ သတော သမ္ပဇာနော”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
599
“ဓမ္မာရာမော ဓမ္မရတော,
ဓမ္မံ အနုဝိစိန္တယံ;
ဓမ္မံ အနုဿရံ ဘိက္ခု,
သဒ္ဓမ္မာ န ပရိဟာယတိ.
600
စရံ ဝါ ယဒိ ဝါ တိဋ္ဌံ,
နိသိန္နော ဥဒ ဝါ သယံ;
အဇ္ဈတ္တံ သမယံ စိတ္တံ,
သန္တိမေဝါဓိဂစ္ဆတီ”တိ.
601
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
602
သတ္တမံ.