4.1.1 ဗြာဟ္မဏဓမ္မယာဂသုတ္တ
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
“အဟမသ္မိ, ဘိက္ခဝေ, ဗြာဟ္မဏော ယာစယောဂေါ သဒါ ပယတပါဏိ အန္တိမဒေဟဓရော အနုတ္တရော ဘိသက္ကော သလ္လကတ္တော. တဿ မေ တုမှေ ပုတ္တာ ဩရသာ မုခတော ဇာတာ ဓမ္မဇာ ဓမ္မနိမ္မိတာ ဓမ္မဒါယာဒါ, နော အာမိသဒါယာဒါ.
ဒွေမာနိ, ဘိက္ခဝေ, ဒါနာနိ— အာမိသဒါနဉ္စ ဓမ္မဒါနဉ္စ. ဧတဒဂ္ဂံ, ဘိက္ခဝေ, ဣမေသံ ဒွိန္နံ ဒါနာနံ ယဒိဒံ— ဓမ္မဒါနံ.
ဒွေမေ, ဘိက္ခဝေ, သံဝိဘာဂါ— အာမိသသံဝိဘာဂေါ စ ဓမ္မသံဝိဘာဂေါ စ. ဧတဒဂ္ဂံ, ဘိက္ခဝေ, ဣမေသံ ဒွိန္နံ သံဝိဘာဂါနံ ယဒိဒံ— ဓမ္မသံဝိဘာဂေါ.
ဒွေမေ, ဘိက္ခဝေ, အနုဂ္ဂဟာ— အာမိသာနုဂ္ဂဟော စ ဓမ္မာနုဂ္ဂဟော စ. ဧတဒဂ္ဂံ, ဘိက္ခဝေ, ဣမေသံ ဒွိန္နံ အနုဂ္ဂဟာနံ ယဒိဒံ— ဓမ္မာနုဂ္ဂဟော.
ဒွေမေ, ဘိက္ခဝေ, ယာဂါ— အာမိသယာဂေါ စ ဓမ္မယာဂေါ စ. ဧတဒဂ္ဂံ, ဘိက္ခဝေ, ဣမေသံ ဒွိန္နံ ယာဂါနံ ယဒိဒံ— ဓမ္မယာဂေါ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
“ယော ဓမ္မယာဂံ အယဇီ အမစ္ဆရီ,
တထာဂတော သဗ္ဗဘူတာနုကမ္ပီ;
တံ တာဒိသံ ဒေဝမနုဿသေဋ္ဌံ,
သတ္တာ နမဿန္တိ ဘဝဿ ပါရဂုန်”တိ.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
ပဌမံ.