4.1.3 အာသဝက္ခယသုတ္တ
ဝုတ္တဉှေတံ ဘဂဝတာ ဝုတ္တမရဟတာတိ မေ သုတံ—
“ဇာနတောဟံ, ဘိက္ခဝေ, ပဿတော အာသဝါနံ ခယံ ဝဒါမိ, နော အဇာနတော နော အပဿတော. ကိဉ္စ, ဘိက္ခဝေ, ဇာနတော, ကိံ ပဿတော အာသဝါနံ ခယော ဟောတိ? ဣဒံ ဒုက္ခန္တိ, ဘိက္ခဝေ, ဇာနတော ပဿတော အာသဝါနံ ခယော ဟောတိ. အယံ ဒုက္ခသမုဒယောတိ, ဘိက္ခဝေ, ဇာနတော ပဿတော အာသဝါနံ ခယော ဟောတိ. အယံ ဒုက္ခနိရောဓောတိ, ဘိက္ခဝေ, ဇာနတော ပဿတော အာသဝါနံ ခယော ဟောတိ. အယံ ဒုက္ခနိရောဓဂါမိနီ ပဋိပဒါတိ, ဘိက္ခဝေ, ဇာနတော ပဿတော အာသဝါနံ ခယော ဟောတိ. ဧဝံ ခေါ, ဘိက္ခဝေ, ဇာနတော ဧဝံ ပဿတော အာသဝါနံ ခယော ဟောတီ”တိ. ဧတမတ္ထံ ဘဂဝါ အဝေါစ. တတ္ထေတံ ဣတိ ဝုစ္စတိ—
“သေခဿ သိက္ခမာနဿ,
ဥဇုမဂ္ဂါနုသာရိနော;_
ခယသ္မိံ ပဌမံ ဉာဏံ,
တတော အညာ အနန္တရာ.
တတော အညာ ဝိမုတ္တဿ,
ဝိမုတ္တိဉာဏမုတ္တမံ;
ဥပ္ပဇ္ဇတိ ခယေ ဉာဏံ,_
ခီဏာ သံယောဇနာ ဣတိ.
န တွေဝိဒံ ကုသီတေန,
ဗာလေနမဝိဇာနတာ;
နိဗ္ဗာနံ အဓိဂန္တဗ္ဗံ,
သဗ္ဗဂန္ထပ္ပမောစနန်”တိ.
အယမ္ပိ အတ္ထော ဝုတ္တော ဘဂဝတာ, ဣတိ မေ သုတန္တိ.
တတိယံ.