1 အာရမ္ဘကထာ
မိလိန္ဒော နာမ သော ရာဇာ,
သာဂလာယံ ပုရုတ္တမေ;
ဥပဂဉ္ဆိ နာဂသေနံ,_
ဂင်္ဂါ စ ယထာ သာဂရံ.
အာသဇ္ဇ ရာဇာ စိတြကထိံ,
ဥက္ကာဓာရံ တမောနုဒံ;_
အပုစ္ဆိ နိပုဏေ ပဉှေ,
ဌာနာဋ္ဌာနဂတေ ပုထူ.
ပုစ္ဆာ ဝိသဇ္ဇနာ စေဝ,
ဂမ္ဘီရတ္ထူပနိဿိတာ;
ဟဒယင်္ဂမာ ကဏ္ဏသုခါ,
အဗ္ဘုတာ လောမဟံသနာ.
အဘိဓမ္မဝိနယောဂါဠှာ,
သုတ္တဇာလသမတ္တိတာ;
နာဂသေနကထာ စိတြာ,
ဩပမ္မေဟိ နယေဟိ စ.
တတ္ထ ဉာဏံ ပဏိဓာယ,
ဟာသယိတွာန မာနသံ;
သုဏာထ နိပုဏေ ပဉှေ,
ကင်္ခါဋ္ဌာနဝိဒါလနေတိ.
တံ ယထာနုသူယတေ— အတ္ထိ ယောနကာနံ နာနာပုဋဘေဒနံ သာဂလံ နာမ နဂရံ နဒီပဗ္ဗတသောဘိတံ ရမဏီယဘူမိပ္ပဒေသဘာဂံ အာရာမုယျာနောပဝနတဠာကပေါက္ခရဏိသမ္ပန္နံ နဒီပဗ္ဗတဝနရာမဏေယျကံ သုတဝန္တနိမ္မိတံ နိဟတပစ္စတ္ထိကံ ပစ္စာမိတ္တာနုပပီဠိတံ ဝိဝိဓဝိစိတြဒဠှမဋ္ဋာလကောဋ္ဌကံ ဝရပဝရဂေါပုရတောရဏံ ဂမ္ဘီရပရိခါပဏ္ဍရပါကာရပရိက္ခိတ္တန္တေပုရံ. သုဝိဘတ္တဝီထိစစ္စရစတုက္ကသိင်္ဃာဋကံ သုပ္ပသာရိတာနေကဝိဓဝရဘဏ္ဍပရိပူရိတန္တရာပဏံ ဝိဝိဓဒါနဂ္ဂသတသမုပသောဘိတံ ဟိမဂိရိသိခရသင်္ကာသဝရဘဝနသတသဟဿပ္ပဋိမဏ္ဍိတံ ဂဇဟယရထပတ္တိသမာကုလံ အဘိရူပနရနာရိဂဏာနုစရိတံ အာကိဏ္ဏဇနမနုဿံ ပုထုခတ္တိယဗြာဟ္မဏဝေဿသုဒ္ဒံ ဝိဝိဓသမဏဗြာဟ္မဏသဘာဇနသင်္ဃဋိတံ ဗဟုဝိဓဝိဇ္ဇာဝန္တ နရစိရနိသေဝိတံ ကာသိကကောဋုမ္ဗရိကာဒိနာနာဝိဓဝတ္ထာပဏသမ္ပန္နံ သုပ္ပသာရိတရုစိရဗဟုဝိဓပုပ္ဖဂန္ဓာပဏံ ဂန္ဓဂန္ဓိတံ အာသီသနီယဗဟုရတနပရိပူရိတံ ဒိသာမုခသုပ္ပသာရိတာပဏံ သိင်္ဂါရဝါဏိဇဂဏာနုစရိတံ ကဟာပဏရဇတသုဝဏ္ဏကံသပတ္ထရပရိပူရံ ပဇ္ဇောတမာနနိဓိနိကေတံ ပဟူတဓနဓညဝိတ္တူပကရဏံ ပရိပုဏ္ဏကောသကောဋ္ဌာဂါရံ ဗဟွန္နပါနံ ဗဟုဝိဓခဇ္ဇဘောဇ္ဇလေယျပေယျသာယနီယံ ဥတ္တရကုရုသင်္ကာသံ သမ္ပန္နသဿံ အာဠကမန္ဒာ ဝိယ ဒေဝပုရံ.
ဧတ္ထ ဌတွာ တေသံ ပုဗ္ဗကမ္မံ ကထေတဗ္ဗံ, ကထေန္တေန စ ဆဓာ ဝိဘဇိတွာ ကထေတဗ္ဗံ. သေယျထိဒံ— ပုဗ္ဗယောဂေါ မိလိန္ဒပဉှံ လက္ခဏပဉှံ မေဏ္ဍကပဉှံ အနုမာနပဉှံ ဩပမ္မကထာပဉှန္တိ.
တတ္ထ မိလိန္ဒပဉှော လက္ခဏပဉှော, ဝိမတိစ္ဆေဒနပဉှောတိ ဒုဝိဓော. မေဏ္ဍကပဉှောပိ မဟာဝဂ္ဂေါ, ယောဂိကထာပဉှောတိ ဒုဝိဓော.