3.5.8 ကမ္မဖလအတ္ထိဘာဝပဉှ
Review
80.
383
ရာဇာ အာဟ— “ဘန္တေ နာဂသေန, ဣမိနာ နာမရူပေန ကမ္မံ ကတံ ကုသလံ ဝါ အကုသလံ ဝါ, ကုဟိံ တာနိ ကမ္မာနိ တိဋ္ဌန္တီ”တိ? “အနုဗန္ဓေယျုံ ခေါ, မဟာရာဇ, တာနိ ကမ္မာနိ ဆာယာဝ အနပါယိနီ”တိ. “သက္ကာ ပန, ဘန္တေ, တာနိ ကမ္မာနိ ဒဿေတုံ ‘ဣဓ ဝါ ဣဓ ဝါ တာနိ ကမ္မာနိ တိဋ္ဌန္တီ’”တိ? “န သက္ကာ, မဟာရာဇ, တာနိ ကမ္မာနိ ဒဿေတုံ ‘ဣဓ ဝါ ဣဓ ဝါ တာနိ ကမ္မာနိ တိဋ္ဌန္တီ’”တိ.
384
“ဩပမ္မံ ကရောဟီ”တိ. “တံ ကိံ မညသိ, မဟာရာဇ, ယာနိမာနိ ရုက္ခာနိ အနိဗ္ဗတ္တဖလာနိ, သက္ကာ တေသံ ဖလာနိ ဒဿေတုံ ‘ဣဓ ဝါ ဣဓ ဝါ တာနိ ဖလာနိ တိဋ္ဌန္တီ’”တိ. “န ဟိ, ဘန္တေ”တိ. “ဧဝမေဝ ခေါ, မဟာရာဇ, အဗ္ဗောစ္ဆိန္နာယ သန္တတိယာ န သက္ကာ တာနိ ကမ္မာနိ ဒဿေတုံ ‘ဣဓ ဝါ ဣဓ ဝါ တာနိ ကမ္မာနိ တိဋ္ဌန္တီ’”တိ.
385
“ကလ္လောသိ, ဘန္တေ နာဂသေနာ”တိ.
386
ကမ္မဖလအတ္ထိဘာဝပဉှော အဋ္ဌမော.