3.7.8 ဇာနန္တာဇာနန္တပါပကရဏပဉှ
Review
101.
481
ရာဇာ အာဟ— “ဘန္တေ နာဂသေန, ယော ဇာနန္တော ပါပကမ္မံ ကရောတိ, ယော အဇာနန္တော ပါပကမ္မံ ကရောတိ, ကဿ ဗဟုတရံ အပုညန်”တိ? ထေရော အာဟ “ယော ခေါ, မဟာရာဇ, အဇာနန္တော ပါပကမ္မံ ကရောတိ, တဿ ဗဟုတရံ အပုညန်”တိ. “တေန ဟိ, ဘန္တေ နာဂသေန, ယော အမှာကံ ရာဇပုတ္တော ဝါ ရာဇမဟာမတ္တော ဝါ အဇာနန္တော ပါပကမ္မံ ကရောတိ, တံ မယံ ဒိဂုဏံ ဒဏ္ဍေမာ”တိ? “တံ ကိံ မညသိ, မဟာရာဇ, တတ္တံ အယောဂုဠံ အာဒိတ္တံ သမ္ပဇ္ဇလိတံ သဇောတိဘူတံ ဧကော ဇာနန္တော ဂဏှေယျ, ဧကော အဇာနန္တော ဂဏှေယျ, ကတမော ဗလဝတရံ ဍယှေယျာ”တိ. “ယော ခေါ, ဘန္တေ, အဇာနန္တော ဂဏှေယျ, သော ဗလဝတရံ ဍယှေယျာ”တိ. “ဧဝမေဝ ခေါ, မဟာရာဇ, ယော အဇာနန္တော ပါပကမ္မံ ကရောတိ, တဿ ဗဟုတရံ အပုညန်”တိ.
482
“ကလ္လောသိ, ဘန္တေ နာဂသေနာ”တိ.
483
ဇာနန္တာဇာနန္တပါပကရဏပဉှော အဋ္ဌမော.