5.3.7 ဗုဒ္ဓပူဇနပဉှ
“ဘန္တေ နာဂသေန, ဘာသိတမ္ပေတံ တထာဂတေန ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ. ပုန စ ဘဏိတံ—
‘ပူဇေထ နံ ပူဇနိယဿ ဓာတုံ,
ဧဝံ ကိရ သဂ္ဂမိတော ဂမိဿထာ’တိ.
ယဒိ, ဘန္တေ နာဂသေန, တထာဂတေန ဘဏိတံ— ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ, တေန ဟိ ‘ပူဇေထ နံ ပူဇနိယဿ ဓာတုံ, ဧဝံ ကရာ သဂ္ဂမိတော ဂမိဿထာ’တိ ယံ ဝစနံ, တံ မိစ္ဆာ. ယဒိ တထာဂတေန ဘဏိတံ— ‘ပူဇေထ နံ ပူဇနိယဿ ဓာတုံ, ဧဝံ ကရာ သဂ္ဂမိတော ဂမိဿထာ’တိ, တေန ဟိ ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ တမ္ပိ ဝစနံ မိစ္ဆာ. အယမ္ပိ ဥဘတော ကောဋိကော ပဉှော တဝါနုပ္ပတ္တော, သော တယာ နိဗ္ဗာဟိတဗ္ဗော”တိ.
“ဘာသိတမ္ပေတံ, မဟာရာဇ, ဘဂဝတာ ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ, ပုန စ ဘဏိတံ— ‘ပူဇေထ နံ ပူဇနိယဿ ဓာတုံ, ဧဝံ ကရာ သဂ္ဂမိတော ဂမိဿထာ’တိ, တဉ္စ ပန န သဗ္ဗေသံ ဇိနပုတ္တာနံယေဝ အာရဗ္ဘ ဘဏိတံ— ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ. အကမ္မံ ဟေတံ, မဟာရာဇ, ဇိနပုတ္တာနံ ယဒိဒံ ပူဇာ, သမ္မသနံ သင်္ခါရာနံ, ယောနိသော မနသိကာရော, သတိပဋ္ဌာနာနုပဿနာ, အာရမ္မဏသာရဂ္ဂါဟော, ကိလေသယုဒ္ဓံ, သဒတ္ထမနုယုဉ္ဇနာ, ဧတံ ဇိနပုတ္တာနံ ကရဏီယံ, အဝသေသာနံ ဒေဝမနုဿာနံ ပူဇာ ကရဏီယာ.
ယထာ, မဟာရာဇ, မဟိယာ ရာဇပုတ္တာနံ ဟတ္ထိအဿရထဓနုထရုလေခမုဒ္ဒါသိက္ခာခဂ္ဂမန္တသုတိသမ္မုတိယုဒ္ဓယုဇ္ဈာပနကိရိယာ ကရဏီယာ, အဝသေသာနံ ပုထုဝေဿသုဒ္ဒါနံ ကသိ ဝဏိဇ္ဇာ ဂေါရက္ခာ ကရဏီယာ; ဧဝမေဝ ခေါ, မဟာရာဇ, အကမ္မံ ဟေတံ ဇိနပုတ္တာနံ ယဒိဒံ ပူဇာ, သမ္မသနံ သင်္ခါရာနံ, ယောနိသော မနသိကာရော, သတိပဋ္ဌာနာနုပဿနာ, အာရမ္မဏသာရဂ္ဂါဟော, ကိလေသယုဒ္ဓံ, သဒတ္ထမနုယုဉ္ဇနာ, ဧတံ ဇိနပုတ္တာနံ ကရဏီယံ, အဝသေသာနံ ဒေဝမနုဿာနံ ပူဇာ ကရဏီယာ.
ယထာ ဝါ ပန, မဟာရာဇ, ဗြာဟ္မဏမာဏဝကာနံ ဣရုဝေဒံ ယဇုဝေဒံ သာမဝေဒံ အထဗ္ဗဏဝေဒံ လက္ခဏံ ဣတိဟာသံ ပုရာဏံ နိဃဏ္ဍု ကေဋုဘံ အက္ခရပ္ပဘေဒံ ပဒံ ဝေယျာကရဏံ ဘာသမဂ္ဂံ ဥပ္ပါတံ သုပိနံ နိမိတ္တံ ဆဠင်္ဂံ စန္ဒဂ္ဂါဟံ သူရိယဂ္ဂါဟံ သုက္ကရာဟုစရိတံ ဥဠုဂ္ဂဟယုဒ္ဓံ ဒေဝဒုန္ဒုဘိဿရံ ဩက္ကန္တိ ဥက္ကာပါတံ ဘူမိကမ္မံ ဒိသာဒါဟံ ဘုမ္မန္တလိက္ခံ ဇောတိသံ လောကာယတိကံ သာစက္ကံ မိဂစက္ကံ အန္တရစက္ကံ မိဿကုပ္ပါဒံ သကုဏရုတရဝိတံ သိက္ခာ ကရဏီယာ, အဝသေသာနံ ပုထုဝေဿသုဒ္ဒါနံ ကသိ ဝဏိဇ္ဇာ ဂေါရက္ခာ ကရဏီယာ; ဧဝမေဝ ခေါ, မဟာရာဇ, အကမ္မံ ဟေတံ ဇိနပုတ္တာနံ ယဒိဒံ ပူဇာ, သမ္မသနံ သင်္ခါရာနံ, ယောနိသော မနသိကာရော, သတိပဋ္ဌာနာနုပဿနာ, အာရမ္မဏသာရဂ္ဂါဟော, ကိလေသယုဒ္ဓံ, သဒတ္ထမနုယုဉ္ဇနာ, ဧတံ ဇိနပုတ္တာနံ ကရဏီယံ, အဝသေသာနံ ဒေဝမနုဿာနံ ပူဇာ ကရဏီယာ, တသ္မာ, မဟာရာဇ, တထာဂတော ‘မာ ဣမေ အကမ္မေ ယုဉ္ဇန္တု, ကမ္မေ ဣမေ ယုဉ္ဇန္တူ’တိ— အာဟ— ‘အဗျာဝဋာ တုမှေ, အာနန္ဒ, ဟောထ တထာဂတဿ သရီရပူဇာယာ’တိ. ယဒေတံ, မဟာရာဇ, တထာဂတော န ဘဏေယျ, ပတ္တစီဝရမ္ပိ အတ္တနော ပရိယာဒါပေတွာ ဘိက္ခူ ဗုဒ္ဓပူဇံယေဝ ကရေယျုန်”တိ. “သာဓု, ဘန္တေ နာဂသေန, ဧဝမေတံ တထာ သမ္ပဋိစ္ဆာမီ”တိ.
ဗုဒ္ဓပူဇနပဉှော သတ္တမော.