7.3.8 သူရိယင်္ဂပဉှ
“ဘန္တေ နာဂသေန, ‘သူရိယဿ သတ္တ အင်္ဂါနိ ဂဟေတဗ္ဗာနီ’တိ ယံ ဝဒေသိ, ကတမာနိ တာနိ သတ္တ အင်္ဂါနိ ဂဟေတဗ္ဗာနီ”တိ? “ယထာ, မဟာရာဇ, သူရိယော သဗ္ဗံ ဥဒကံ ပရိသောသေတိ; ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗကိလေသာ အနဝသေသံ ပရိသောသေတဗ္ဗာ. ဣဒံ, မဟာရာဇ, သူရိယဿ ပဌမံ အင်္ဂံ ဂဟေတဗ္ဗံ.
ပုန စပရံ, မဟာရာဇ, သူရိယော တမန္ဓကာရံ ဝိဓမတိ; ဧဝမေဝ ခေါ, မဟာရာဇ, ယောဂိနာ ယောဂါဝစရေန သဗ္ဗံ ရာဂတမံ ဒေါသတမံ မောဟတမံ မာနတမံ ဒိဋ္ဌိတမံ ကိလေသတမံ သဗ္ဗံ ဒုစ္စရိတတမံ ဝိဓမယိတဗ္ဗံ. ဣဒံ, မဟာရာဇ, သူရိယဿ ဒုတိယံ အင်္ဂံ ဂဟေတဗ္ဗံ.
ပုန စပရံ, မဟာရာဇ, သူရိယော အဘိက္ခဏံ စရတိ; ဧဝမေဝ ခေါ, မဟာရာဇ, ယောဂိနာ ယောဂါဝစရေန အဘိက္ခဏံ ယောနိသော မနသိကာရော ကာတဗ္ဗော. ဣဒံ, မဟာရာဇ, သူရိယဿ တတိယံ အင်္ဂံ ဂဟေတဗ္ဗံ.
ပုန စပရံ, မဟာရာဇ, သူရိယော ရံသိမာလီ; ဧဝမေဝ ခေါ, မဟာရာဇ, ယောဂိနာ ယောဂါဝစရေန အာရမ္မဏမာလိနာ ဘဝိတဗ္ဗံ. ဣဒံ, မဟာရာဇ, သူရိယဿ စတုတ္ထံ အင်္ဂံ ဂဟေတဗ္ဗံ.
ပုန စပရံ, မဟာရာဇ, သူရိယော မဟာဇနကာယံ သန္တာပေန္တော စရတိ; ဧဝမေဝ ခေါ, မဟာရာဇ, ယောဂိနာ ယောဂါဝစရေန အာစာရသီလဂုဏဝတ္တပ္ပဋိပတ္တိယာ ဈာနဝိမောက္ခသမာဓိသမာပတ္တိဣန္ဒြိယဗလဗောဇ္ဈင်္ဂသတိပဋ္ဌာနသမ္မပ္ပဓာနဲဒ္ဓိပါဒေဟိ သဒေဝကော လောကော သန္တာပယိတဗ္ဗော. ဣဒံ, မဟာရာဇ, သူရိယဿ ပဉ္စမံ အင်္ဂံ ဂဟေတဗ္ဗံ.
ပုန စပရံ, မဟာရာဇ, သူရိယော ရာဟုဘယာ ဘီတော စရတိ; ဧဝမေဝ ခေါ, မဟာရာဇ, ယောဂိနာ ယောဂါဝစရေန ဒုစ္စရိတဒုဂ္ဂတိဝိသမကန္တာရဝိပါကဝိနိပါတကိလေသဇာလဇဋိတေ ဒိဋ္ဌိသင်္ဃာဋပဋိမုက္ကေ ကုပထပက္ခန္ဒေ ကုမ္မဂ္ဂပဋိပန္နေ သတ္တေ ဒိသွာ မဟတာ သံဝေဂဘယေန မာနသံ သံဝေဇေတဗ္ဗံ. ဣဒံ, မဟာရာဇ, သူရိယဿ ဆဋ္ဌံ အင်္ဂံ ဂဟေတဗ္ဗံ.
ပုန စပရံ, မဟာရာဇ, သူရိယော ကလျာဏပါပကေ ဒဿေတိ; ဧဝမေဝ ခေါ, မဟာရာဇ, ယောဂိနာ ယောဂါဝစရေန ဣန္ဒြိယဗလဗောဇ္ဈင်္ဂသတိပဋ္ဌာနသမ္မပ္ပဓာနဲဒ္ဓိပါဒလောကိယလောကုတ္တရဓမ္မာ ဒဿေတဗ္ဗာ. ဣဒံ, မဟာရာဇ, သူရိယဿ သတ္တမံ အင်္ဂံ ဂဟေတဗ္ဗံ. ဘာသိတမ္ပေတံ, မဟာရာဇ, ထေရေန ဝင်္ဂီသေန—
‘ယထာပိ သူရိယော ဥဒယန္တော,
ရူပံ ဒဿေတိ ပါဏိနံ;
သုစိဉ္စ အသုစိဉ္စာပိ,
ကလျာဏဉ္စာပိ ပါပကံ.
တထာ ဘိက္ခု ဓမ္မဓရော,
အဝိဇ္ဇာပိဟိတံ ဇနံ;
ပထံ ဒဿေတိ ဝိဝိဓံ,
အာဒိစ္စောဝုဒယံ ယထာ’”တိ.
သူရိယင်္ဂပဉှော အဋ္ဌမော.