8 နိဂမန
ဣတိ ဆသု ကဏ္ဍေသု ဗာဝီသတိဝဂ္ဂပတိမဏ္ဍိတေသု ဒွါသဋ္ဌိအဓိကာ ဒွေသတာ ဣမသ္မိံ ပေါတ္ထကေ အာဂတာ မိလိန္ဒပဉှာ သမတ္တာ, အနာဂတာ စ ပန ဒွါစတ္တာလီသာ ဟောန္တိ, အာဂတာ စ အနာဂတာ စ သဗ္ဗာ သမောဓာနေတွာ စတူဟိ အဓိကာ တိသတပဉှာ ဟောန္တိ, သဗ္ဗာဝ မိလိန္ဒပဉှာတိ သင်္ခံ ဂစ္ဆန္တိ.
ရညော စ ထေရဿ စ ပုစ္ဆာဝိသဇ္ဇနာဝသာနေ စတုရာသီတိသတသဟဿယောဇနဗဟလာ ဥဒကပရိယန္တံ ကတွာ အယံ မဟာပထဝီ ဆဓာ ကမ္ပိတ္ထ, ဝိဇ္ဇုလ္လတာ နိစ္ဆရိံသု, ဒေဝတာ ဒိဗ္ဗပုပ္ဖဝဿံ ပဝဿိံသု, မဟာဗြဟ္မာ သာဓုကာရမဒါသိ, မဟာသမုဒ္ဒကုစ္ဆိယံ မေဃတ္ထနိတနိဂ္ဃေါသော ဝိယ မဟာဃောသော အဟောသိ, ဣတိ သော မိလိန္ဒော ရာဇာ စ ဩရောဓဂဏာ စ သိရသာ အဉ္ဇလိံ ပဏာမေတွာ ဝန္ဒိံသု.
မိလိန္ဒော ရာဇာ အတိဝိယ ပမုဒိတဟဒယော သုမထိတမာနဟဒယော ဗုဒ္ဓသာသနေ သာရမတိနော ရတနတ္တယေ သုနိက္ကင်္ခေါ နိဂ္ဂုမ္ဗော နိတ္ထဒ္ဓေါ ဟုတွာ ထေရဿ ဂုဏေသု ပဗ္ဗဇ္ဇာသု ပဋိပဒါဣရိယာပထေသု စ အတိဝိယ ပသန္နော ဝိဿတ္ထော နိရာလယော နိဟတမာနတ္ထမ္ဘော ဥဒ္ဓဋဒါဌော ဝိယ ဘုဇဂိန္ဒော ဧဝမာဟ— “သာဓု, ဘန္တေ နာဂသေန, ဗုဒ္ဓဝိသယော ပဉှော တယာ ဝိသဇ္ဇိတော, ဣမသ္မိံ ဗုဒ္ဓသာသနေ ဌပေတွာ ဓမ္မသေနာပတိံ သာရိပုတ္တတ္ထေရံ အညော တယာ သဒိသော ပဉှဝိသဇ္ဇနေ နတ္ထိ, ခမထ, ဘန္တေ နာဂသေန, မမ အစ္စယံ, ဥပါသကံ မံ, ဘန္တေ နာဂသေန, ဓာရေထ အဇ္ဇတဂ္ဂေ ပါဏုပေတံ သရဏံ ဂတန်”တိ.
တဒါ ရာဇာ သဟ ဗလကာယေဟိ နာဂသေနတ္ထေရံ ပယိရုပါသိတွာ မိလိန္ဒံ နာမ ဝိဟာရံ ကာရေတွာ ထေရဿ နိယျာတေတွာ စတူဟိ ပစ္စယေဟိ နာဂသေနံ ကောဋိသတေဟိ ဘိက္ခူဟိ သဒ္ဓိံ ပရိစရိ, ပုနပိ ထေရဿ ပညာယ ပသီဒိတွာ ပုတ္တဿ ရဇ္ဇံ နိယျာတေတွာ အဂါရသ္မာ အနဂါရိယံ ပဗ္ဗဇိတွာ ဝိပဿနံ ဝဍ္ဎေတွာ အရဟတ္တံ ပါပုဏိ, တေန ဝုတ္တံ—
“ပညာ ပသတ္ထာ လောကသ္မိံ,
ကတာ သဒ္ဓမ္မဋ္ဌိတိယာ;
ပညာယ ဝိမတိံ ဟန္တွာ,
သန္တိံ ပပ္ပေါန္တိ ပဏ္ဍိတာ.
ယသ္မိံ ခန္ဓေ ဌိတာ ပညာ,
သတိ တတ္ထ အနူနကာ;
ပူဇာ ဝိသေသဿာဓာရော,
အဂ္ဂေါ သေဋ္ဌော အနုတ္တရော;
တသ္မာ ဟိ ပဏ္ဍိတော ပေါသော,
သမ္ပဿံ ဟိတမတ္တနော;
ပညဝန္တံဘိပူဇေယျ,
စေတိယံ ဝိယ သာဒရော”တိ.
လင်္ကာယံ ဒေါဏိနဂရေ,
ဝသတာ ဒေါဏိနာမိနာ;
မဟာထေရေန လေခိတွာ,
သုဋ္ဌပိတံ ယထာသုတံ;
မိလိန္ဒရာဇပဉှော စ,
နာဂသေနဝိသဇ္ဇနံ;
မိလိန္ဒော ဟိ မဟာပညော,
နာဂသေနော သုပဏ္ဍိတော.
ဣမိနာ ပုညကမ္မေန,_
ဣတော ဂစ္ဆာမိ တုဿိတံ;_
မေတ္တေယျံနာဂတေ ပဿေ,
သုဏေယျံ ဓမ္မမုတ္တမန္တိ.
မိလိန္ဒပဉှော နိဋ္ဌိတော.