1.1.15 ဝတ္ထုနာနတ္တဉာဏနိဒ္ဒေသ
- ဉာဏကထာ
ကထံ အဇ္ဈတ္တဝဝတ္ထာနေ ပညာ ဝတ္ထုနာနတ္တေ ဉာဏံ? ကထံ အဇ္ဈတ္တဓမ္မေ ဝဝတ္ထေတိ? စက္ခုံ အဇ္ဈတ္တံ ဝဝတ္ထေတိ, သောတံ အဇ္ဈတ္တံ ဝဝတ္ထေတိ, ဃာနံ အဇ္ဈတ္တံ ဝဝတ္ထေတိ, ဇိဝှံ အဇ္ဈတ္တံ ဝဝတ္ထေတိ, ကာယံ အဇ္ဈတ္တံ ဝဝတ္ထေတိ, မနံ အဇ္ဈတ္တံ ဝဝတ္ထေတိ.
ကထံ စက္ခုံ အဇ္ဈတ္တံ ဝဝတ္ထေတိ? စက္ခု အဝိဇ္ဇာသမ္ဘူတန္တိ ဝဝတ္ထေတိ, စက္ခု တဏှာသမ္ဘူတန္တိ ဝဝတ္ထေတိ, စက္ခု ကမ္မသမ္ဘူတန္တိ ဝဝတ္ထေတိ, စက္ခု အာဟာရသမ္ဘူတန္တိ ဝဝတ္ထေတိ, စက္ခု စတုန္နံ မဟာဘူတာနံ ဥပါဒါယာတိ ဝဝတ္ထေတိ, စက္ခု ဥပ္ပန္နန္တိ ဝဝတ္ထေတိ, စက္ခု သမုဒါဂတန္တိ ဝဝတ္ထေတိ. စက္ခု အဟုတွာ သမ္ဘူတံ, ဟုတွာ န ဘဝိဿတီတိ ဝဝတ္ထေတိ. စက္ခုံ အန္တဝန္တတော ဝဝတ္ထေတိ, စက္ခု အဒ္ဓုဝံ အသဿတံ ဝိပရိဏာမဓမ္မန္တိ ဝဝတ္ထေတိ, စက္ခု အနိစ္စံ သင်္ခတံ ပဋိစ္စသမုပ္ပန္နံ ခယဓမ္မံ ဝယဓမ္မံ ဝိရာဂဓမ္မံ နိရောဓဓမ္မန္တိ ဝဝတ္ထေတိ. စက္ခုံ အနိစ္စတော ဝဝတ္ထေတိ, နော နိစ္စတော; ဒုက္ခတော ဝဝတ္ထေတိ, နော သုခတော; အနတ္တတော ဝဝတ္ထေတိ, နော အတ္တတော; နိဗ္ဗိန္ဒတိ, နော နန္ဒတိ; ဝိရဇ္ဇတိ, နော ရဇ္ဇတိ; နိရောဓေတိ, နော သမုဒေတိ; ပဋိနိဿဇ္ဇတိ, နော အာဒိယတိ. အနိစ္စတော ဝဝတ္ထေန္တော နိစ္စသညံ ပဇဟတိ, ဒုက္ခတော ဝဝတ္ထေန္တော သုခသညံ ပဇဟတိ, အနတ္တတော ဝဝတ္ထေန္တော အတ္တသညံ ပဇဟတိ, နိဗ္ဗိန္ဒန္တော နန္ဒိံ ပဇဟတိ, ဝိရဇ္ဇန္တော ရာဂံ ပဇဟတိ, နိရောဓေန္တော သမုဒယံ ပဇဟတိ, ပဋိနိဿဇ္ဇန္တော အာဒါနံ ပဇဟတိ. ဧဝံ စက္ခုံ အဇ္ဈတ္တံ ဝဝတ္ထေတိ.
ကထံ သောတံ အဇ္ဈတ္တံ ဝဝတ္ထေတိ? သောတံ အဝိဇ္ဇာသမ္ဘူတန္တိ ဝဝတ္ထေတိ …ပေ… ဧဝံ သောတံ အဇ္ဈတ္တံ ဝဝတ္ထေတိ.
ကထံ ဃာနံ အဇ္ဈတ္တံ ဝဝတ္ထေတိ? ဃာနံ အဝိဇ္ဇာသမ္ဘူတန္တိ ဝဝတ္ထေတိ …ပေ… ဧဝံ ဃာနံ အဇ္ဈတ္တံ ဝဝတ္ထေတိ.
ကထံ ဇိဝှံ အဇ္ဈတ္တံ ဝဝတ္ထေတိ? ဇိဝှါ အဝိဇ္ဇာသမ္ဘူတာတိ ဝဝတ္ထေတိ, ဇိဝှါ တဏှာသမ္ဘူတာတိ ဝဝတ္ထေတိ, ဇိဝှါ ကမ္မသမ္ဘူတာတိ ဝဝတ္ထေတိ, ဇိဝှါ အာဟာရသမ္ဘူတာတိ ဝဝတ္ထေတိ, ဇိဝှါ စတုန္နံ မဟာဘူတာနံ ဥပါဒါယာတိ ဝဝတ္ထေတိ, ဇိဝှါ ဥပ္ပန္နာတိ ဝဝတ္ထေတိ, ဇိဝှါ သမုဒါဂတာတိ ဝဝတ္ထေတိ. ဇိဝှါ အဟုတွာ သမ္ဘူတာ, ဟုတွာ န ဘဝိဿတီတိ ဝဝတ္ထေတိ. ဇိဝှံ အန္တဝန္တတော ဝဝတ္ထေတိ, ဇိဝှါ အဒ္ဓုဝါ အသဿတာ ဝိပရိဏာမဓမ္မာတိ ဝဝတ္ထေတိ, ဇိဝှါ အနိစ္စာ သင်္ခတာ ပဋိစ္စသမုပ္ပန္နာ ခယဓမ္မာ ဝယဓမ္မာ ဝိရာဂဓမ္မာ နိရောဓဓမ္မာတိ ဝဝတ္ထေတိ. ဇိဝှံ အနိစ္စတော ဝဝတ္ထေတိ, နော နိစ္စတော …ပေ… ပဋိနိဿဇ္ဇတိ, နော အာဒိယတိ. အနိစ္စတော ဝဝတ္ထေန္တော နိစ္စသညံ ပဇဟတိ …ပေ… ပဋိနိဿဇ္ဇန္တော အာဒါနံ ပဇဟတိ. ဧဝံ ဇိဝှံ အဇ္ဈတ္တံ ဝဝတ္ထေတိ.
ကထံ ကာယံ အဇ္ဈတ္တံ ဝဝတ္ထေတိ? ကာယော အဝိဇ္ဇာသမ္ဘူတောတိ ဝဝတ္ထေတိ, ကာယော တဏှာသမ္ဘူတောတိ ဝဝတ္ထေတိ, ကာယော ကမ္မသမ္ဘူတောတိ ဝဝတ္ထေတိ, ကာယော အာဟာရသမ္ဘူတောတိ ဝဝတ္ထေတိ, ကာယော စတုန္နံ မဟာဘူတာနံ ဥပါဒါယာတိ ဝဝတ္ထေတိ, ကာယော ဥပ္ပန္နောတိ ဝဝတ္ထေတိ, ကာယော သမုဒါဂတောတိ ဝဝတ္ထေတိ. ကာယော အဟုတွာ သမ္ဘူတော, ဟုတွာ န ဘဝိဿတီတိ ဝဝတ္ထေတိ. ကာယံ အန္တဝန္တတော ဝဝတ္ထေတိ, ကာယော အဒ္ဓုဝေါ အသဿတော ဝိပရိဏာမဓမ္မောတိ ဝဝတ္ထေတိ, ကာယော အနိစ္စော သင်္ခတော ပဋိစ္စသမုပ္ပန္နော ခယဓမ္မော ဝယဓမ္မော ဝိရာဂဓမ္မော နိရောဓဓမ္မောတိ ဝဝတ္ထေတိ. ကာယံ အနိစ္စတော ဝဝတ္ထေတိ, နော နိစ္စတော; ဒုက္ခတော ဝဝတ္ထေတိ, နော သုခတော …ပေ… ပဋိနိဿဇ္ဇတိ, နော အာဒိယတိ. အနိစ္စတော ဝဝတ္ထေန္တော နိစ္စသညံ ပဇဟတိ, ဒုက္ခတော ဝဝတ္ထေန္တော သုခသညံ ပဇဟတိ …ပေ… ပဋိနိဿဇ္ဇန္တော အာဒါနံ ပဇဟတိ. ဧဝံ ကာယံ အဇ္ဈတ္တံ ဝဝတ္ထေတိ.
ကထံ မနံ အဇ္ဈတ္တံ ဝဝတ္ထေတိ? မနော အဝိဇ္ဇာသမ္ဘူတောတိ ဝဝတ္ထေတိ, မနော တဏှာသမ္ဘူတောတိ ဝဝတ္ထေတိ, မနော ကမ္မသမ္ဘူတောတိ ဝဝတ္ထေတိ, မနော အာဟာရသမ္ဘူတောတိ ဝဝတ္ထေတိ, မနော ဥပ္ပန္နောတိ ဝဝတ္ထေတိ, မနော သမုဒါဂတောတိ ဝဝတ္ထေတိ. မနော အဟုတွာ သမ္ဘူတော, ဟုတွာ န ဘဝိဿတီတိ ဝဝတ္ထေတိ. မနံ အန္တဝန္တတော ဝဝတ္ထေတိ, မနော အဒ္ဓုဝေါ အသဿတော ဝိပရိဏာမဓမ္မောတိ ဝဝတ္ထေတိ, မနော အနိစ္စော သင်္ခတော ပဋိစ္စသမုပ္ပန္နော ခယဓမ္မော ဝယဓမ္မော ဝိရာဂဓမ္မော နိရောဓဓမ္မောတိ ဝဝတ္ထေတိ. မနံ အနိစ္စတော ဝဝတ္ထေတိ, နော နိစ္စတော; ဒုက္ခတော ဝဝတ္ထေတိ, နော သုခတော; အနတ္တတော ဝဝတ္ထေတိ, နော အတ္တတော; နိဗ္ဗိန္ဒတိ, နော နန္ဒတိ; ဝိရဇ္ဇတိ, နော ရဇ္ဇတိ; နိရောဓေတိ, နော သမုဒေတိ; ပဋိနိဿဇ္ဇတိ, နော အာဒိယတိ. အနိစ္စတော ဝဝတ္ထေန္တော နိစ္စသညံ ပဇဟတိ, ဒုက္ခတော ဝဝတ္ထေန္တော သုခသညံ ပဇဟတိ, အနတ္တတော ဝဝတ္ထေန္တော အတ္တသညံ ပဇဟတိ, နိဗ္ဗိန္ဒန္တော နန္ဒိံ ပဇဟတိ, ဝိရဇ္ဇန္တော ရာဂံ ပဇဟတိ, နိရောဓေန္တော သမုဒယံ ပဇဟတိ, ပဋိနိဿဇ္ဇန္တော အာဒါနံ ပဇဟတိ. ဧဝံ မနံ အဇ္ဈတ္တံ ဝဝတ္ထေတိ. ဧဝံ အဇ္ဈတ္တဓမ္မေ ဝဝတ္ထေတိ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “အဇ္ဈတ္တဝဝတ္ထာနေ ပညာ ဝတ္ထုနာနတ္တေ ဉာဏံ”.
ဝတ္ထုနာနတ္တဉာဏနိဒ္ဒေသော ပန္နရသမော.