1.1.16 ဂေါစရနာနတ္တဉာဏနိဒ္ဒေသ
- ဉာဏကထာ
ကထံ ဗဟိဒ္ဓါ ဝဝတ္ထာနေ ပညာ ဂေါစရနာနတ္တေ ဉာဏံ? ကထံ ဗဟိဒ္ဓါ ဓမ္မေ ဝဝတ္ထေတိ? ရူပေ ဗဟိဒ္ဓါ ဝဝတ္ထေတိ, သဒ္ဒေ ဗဟိဒ္ဓါ ဝဝတ္ထေတိ, ဂန္ဓေ ဗဟိဒ္ဓါ ဝဝတ္ထေတိ, ရသေ ဗဟိဒ္ဓါ ဝဝတ္ထေတိ, ဖောဋ္ဌဗ္ဗေ ဗဟိဒ္ဓါ ဝဝတ္ထေတိ, ဓမ္မေ ဗဟိဒ္ဓါ ဝဝတ္ထေတိ.
ကထံ ရူပေ ဗဟိဒ္ဓါ ဝဝတ္ထေတိ? ရူပါ အဝိဇ္ဇာသမ္ဘူတာတိ ဝဝတ္ထေတိ ရူပါ တဏှာသမ္ဘူတာတိ ဝဝတ္ထေတိ, ရူပါ ကမ္မသမ္ဘူတာတိ ဝဝတ္ထေတိ, ရူပါ အာဟာရသမ္ဘူတာတိ ဝဝတ္ထေတိ, ရူပါ စတုန္နံ မဟာဘူတာနံ ဥပါဒါယာတိ ဝဝတ္ထေတိ, ရူပါ ဥပ္ပန္နာတိ ဝဝတ္ထေတိ, ရူပါ သမုဒါဂတာတိ ဝဝတ္ထေတိ. ရူပါ အဟုတွာ သမ္ဘူတာ, ဟုတွာ န ဘဝိဿန္တီတိ ဝဝတ္ထေတိ. ရူပေ အန္တဝန္တတော ဝဝတ္ထေတိ, ရူပါ အဒ္ဓုဝါ အသဿတာ ဝိပရိဏာမဓမ္မာတိ ဝဝတ္ထေတိ. ရူပါ အနိစ္စာ သင်္ခတာ ပဋိစ္စသမုပ္ပန္နာ ခယဓမ္မာ ဝယဓမ္မာ ဝိရာဂဓမ္မာ နိရောဓဓမ္မာတိ ဝဝတ္ထေတိ. ရူပေ အနိစ္စတော ဝဝတ္ထေတိ, နော နိစ္စတော; ဒုက္ခတော ဝဝတ္ထေတိ, နော သုခတော; အနတ္တတော ဝဝတ္ထေတိ, နော အတ္တတော; နိဗ္ဗိန္ဒတိ, နော နန္ဒတိ; ဝိရဇ္ဇတိ, နော ရဇ္ဇတိ; နိရောဓေတိ, နော သမုဒေတိ; ပဋိနိဿဇ္ဇတိ, နော အာဒိယတိ. အနိစ္စတော ဝဝတ္ထေန္တော နိစ္စသညံ ပဇဟတိ, ဒုက္ခတော ဝဝတ္ထေန္တော သုခသညံ ပဇဟတိ, အနတ္တတော ဝဝတ္ထေန္တော အတ္တသညံ ပဇဟတိ, နိဗ္ဗိန္ဒန္တော နန္ဒိံ ပဇဟတိ, ဝိရဇ္ဇန္တော ရာဂံ ပဇဟတိ, နိရောဓေန္တော သမုဒယံ ပဇဟတိ, ပဋိနိဿဇ္ဇန္တော အာဒါနံ ပဇဟတိ. ဧဝံ ရူပေ ဗဟိဒ္ဓါ ဝဝတ္ထေတိ.
ကထံ သဒ္ဒေ ဗဟိဒ္ဓါ ဝဝတ္ထေတိ? သဒ္ဒါ ( ) စတုန္နံ မဟာဘူတာနံ ဥပါဒါယာတိ ဝဝတ္ထေတိ, သဒ္ဒါ ဥပ္ပန္နာတိ ဝဝတ္ထေတိ, သဒ္ဒါ သမုဒါဂတာတိ ဝဝတ္ထေတိ. သဒ္ဒါ အဟုတွာ သမ္ဘူတာ, ဟုတွာ န ဘဝိဿန္တီတိ ဝဝတ္ထေတိ. သဒ္ဒေ အန္တဝန္တတော ဝဝတ္ထေတိ, သဒ္ဒါ အဒ္ဓုဝါ အသဿတာ ဝိပရိဏာမဓမ္မာတိ ဝဝတ္ထေတိ, သဒ္ဒါ အနိစ္စာ သင်္ခတာ ပဋိစ္စသမုပ္ပန္နာ ခယဓမ္မာ ဝယဓမ္မာ ဝိရာဂဓမ္မာ နိရောဓဓမ္မာတိ ဝဝတ္ထေတိ. သဒ္ဒေ အနိစ္စတော ဝဝတ္ထေတိ, နော နိစ္စတော …ပေ… ဧဝံ သဒ္ဒေ ဗဟိဒ္ဓါ ဝဝတ္ထေတိ.
ကထံ ဂန္ဓေ ဗဟိဒ္ဓါ ဝဝတ္ထေတိ? ဂန္ဓာ အဝိဇ္ဇာသမ္ဘူတာတိ ဝဝတ္ထေတိ, ဂန္ဓာ တဏှာသမ္ဘူတာတိ ဝဝတ္ထေတိ …ပေ… ဧဝံ ဂန္ဓေ ဗဟိဒ္ဓါ ဝဝတ္ထေတိ. ကထံ ရသေ ဗဟိဒ္ဓါ ဝဝတ္ထေတိ? ရသာ အဝိဇ္ဇာသမ္ဘူတာတိ ဝဝတ္ထေတိ, ရသာ တဏှာသမ္ဘူတာတိ ဝဝတ္ထေတိ …ပေ… ဧဝံ ရသေ ဗဟိဒ္ဓါ ဝဝတ္ထေတိ.
ကထံ ဖောဋ္ဌဗ္ဗေ ဗဟိဒ္ဓါ ဝဝတ္ထေတိ? ဖောဋ္ဌဗ္ဗာ အဝိဇ္ဇာသမ္ဘူတာတိ ဝဝတ္ထေတိ, ဖောဋ္ဌဗ္ဗာ တဏှာသမ္ဘူတာတိ ဝဝတ္ထေတိ, ဖောဋ္ဌဗ္ဗာ ကမ္မသမ္ဘူတာတိ ဝဝတ္ထေတိ, ဖောဋ္ဌဗ္ဗာ အာဟာရသမ္ဘူတာတိ ဝဝတ္ထေတိ, ဖောဋ္ဌဗ္ဗာ ဥပ္ပန္နာတိ ဝဝတ္ထေတိ. ဖောဋ္ဌဗ္ဗာ သမုဒါဂတာတိ ဝဝတ္ထေတိ …ပေ… ဧဝံ ဖောဋ္ဌဗ္ဗေ ဗဟိဒ္ဓါ ဝဝတ္ထေတိ.
ကထံ ဓမ္မေ ဗဟိဒ္ဓါ ဝဝတ္ထေတိ? ဓမ္မာ အဝိဇ္ဇာသမ္ဘူတာတိ ဝဝတ္ထေတိ, ဓမ္မာ တဏှာသမ္ဘူတာတိ ဝဝတ္ထေတိ, ဓမ္မာ ကမ္မသမ္ဘူတာတိ ဝဝတ္ထေတိ, ဓမ္မာ အာဟာရသမ္ဘူတာတိ ဝဝတ္ထေတိ, ဓမ္မာ ဥပ္ပန္နာတိ ဝဝတ္ထေတိ, ဓမ္မာ သမုဒါဂတာတိ ဝဝတ္ထေတိ. ဓမ္မာ အဟုတွာ သမ္ဘူတာ, ဟုတွာ န ဘဝိဿန္တီတိ ဝဝတ္ထေတိ. ဓမ္မေ အန္တဝန္တတော ဝဝတ္ထေတိ, ဓမ္မာ အဒ္ဓုဝါ အသဿတာ ဝိပရိဏာမဓမ္မာတိ ဝဝတ္ထေတိ, ဓမ္မာ အနိစ္စာ သင်္ခတာ ပဋိစ္စသမုပ္ပန္နာ ခယဓမ္မာ ဝယဓမ္မာ ဝိရာဂဓမ္မာ နိရောဓဓမ္မာတိ ဝဝတ္ထေတိ. ဓမ္မေ အနိစ္စတော ဝဝတ္ထေတိ, နော နိစ္စတော; ဒုက္ခတော ဝဝတ္ထေတိ, နော သုခတော; အနတ္တတော ဝဝတ္ထေတိ, နော အတ္တတော; နိဗ္ဗိန္ဒတိ, နော နန္ဒတိ; ဝိရဇ္ဇတိ, နော ရဇ္ဇတိ; နိရောဓေတိ, နော သမုဒေတိ; ပဋိနိဿဇ္ဇတိ, နော အာဒိယတိ …ပေ… အနိစ္စတော ဝဝတ္ထေန္တော နိစ္စသညံ ပဇဟတိ, ဒုက္ခတော ဝဝတ္ထေန္တော သုခသညံ ပဇဟတိ, အနတ္တတော ဝဝတ္ထေန္တော အတ္တသညံ ပဇဟတိ, နိဗ္ဗိန္ဒန္တော နန္ဒိံ ပဇဟတိ, ဝိရဇ္ဇန္တော ရာဂံ ပဇဟတိ, နိရောဓေန္တော သမုဒယံ ပဇဟတိ, ပဋိနိဿဇ္ဇန္တော အာဒါနံ ပဇဟတိ. ဧဝံ ဓမ္မေ ဗဟိဒ္ဓါ ဝဝတ္ထေတိ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “ဗဟိဒ္ဓါ ဝဝတ္ထာနေ ပညာ ဂေါစရနာနတ္တေ ဉာဏံ”.
ဂေါစရနာနတ္တဉာဏနိဒ္ဒေသော သောဠသမော.