1.1.18 ဘူမိနာနတ္တဉာဏနိဒ္ဒေသ
- ဉာဏကထာ
ကထံ စတုဓမ္မဝဝတ္ထာနေ ပညာ ဘူမိနာနတ္တေ ဉာဏံ? စတဿော ဘူမိယော— ကာမာဝစရာ ဘူမိ, ရူပါဝစရာ ဘူမိ, အရူပါဝစရာ ဘူမိ, အပရိယာပန္နာ ဘူမိ. ကတမာ ကာမာဝစရာ ဘူမိ? ဟေဋ္ဌတော အဝီစိနိရယံ ပရိယန္တံ ကရိတွာ ဥပရိတော ပရနိမ္မိတဝသဝတ္တီ ဒေဝေ အန္တောကရိတွာ ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ ခန္ဓဓာတုအာယတနာ ရူပံ ဝေဒနာ သညာ သင်္ခါရာ ဝိညာဏံ— အယံ ကာမာဝစရာ ဘူမိ.
ကတမာ ရူပါဝစရာ ဘူမိ? ဟေဋ္ဌတော ဗြဟ္မလောကံ ပရိယန္တံ ကရိတွာ ဥပရိတော အကနိဋ္ဌေ ဒေဝေ အန္တောကရိတွာ ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ သမာပန္နဿ ဝါ ဥပပန္နဿ ဝါ ဒိဋ္ဌဓမ္မသုခဝိဟာရိဿ ဝါ စိတ္တစေတသိကာ ဓမ္မာ— အယံ ရူပါဝစရာ ဘူမိ.
ကတမာ အရူပါဝစရာ ဘူမိ? ဟေဋ္ဌတော အာကာသာနဉ္စာယတနူပဂေ ဒေဝေ ပရိယန္တံ ကရိတွာ ဥပရိတော နေဝသညာနာသညာယတနူပဂေ ဒေဝေ အန္တောကရိတွာ ယံ ဧတသ္မိံ အန္တရေ ဧတ္ထာဝစရာ ဧတ္ထ ပရိယာပန္နာ သမာပန္နဿ ဝါ ဥပပန္နဿ ဝါ ဒိဋ္ဌဓမ္မသုခဝိဟာရိဿ ဝါ စိတ္တစေတသိကာ ဓမ္မာ— အယံ အရူပါဝစရာ ဘူမိ.
ကတမာ အပရိယာပန္နာ ဘူမိ? အပရိယာပန္နာ မဂ္ဂါ စ မဂ္ဂဖလာနိ စ အသင်္ခတာ စ ဓာတု— အယံ အပရိယာပန္နာ ဘူမိ. ဣမာ စတဿော ဘူမိယော.
အပရာပိ စတဿော ဘူမိယော စတ္တာရော သတိပဋ္ဌာနာ စတ္တာရော သမ္မပ္ပဓာနာ, စတ္တာရော ဣဒ္ဓိပါဒါ, စတ္တာရိ ဈာနာနိ, စတဿော အပ္ပမညာယော, စတဿော အရူပသမာပတ္တိယော, စတဿော ပဋိသမ္ဘိဒါ, စတဿော ပဋိပဒါ, စတ္တာရိ အာရမ္မဏာနိ, စတ္တာရော အရိယဝံသာ, စတ္တာရိ သင်္ဂဟဝတ္ထူနိ, စတ္တာရိ စက္ကာနိ, စတ္တာရိ ဓမ္မပဒါနိ— ဣမာ စတဿော ဘူမိယော. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “စတုဓမ္မဝဝတ္ထာနေ ပညာ ဘူမိနာနတ္တေ ဉာဏံ”.
ဘူမိနာနတ္တဉာဏနိဒ္ဒေသော အဋ္ဌာရသမော.