1.1.19 ဓမ္မနာနတ္တဉာဏနိဒ္ဒေသ
- ဉာဏကထာ
ကထံ နဝဓမ္မဝဝတ္ထာနေ ပညာ ဓမ္မနာနတ္တေ ဉာဏံ? ကထံ ဓမ္မေ ဝဝတ္ထေတိ? ကာမာဝစရေ ဓမ္မေ ကုသလတော ဝဝတ္ထေတိ, အကုသလတော ဝဝတ္ထေတိ, အဗျာကတတော ဝဝတ္ထေတိ. ရူပါဝစရေ ဓမ္မေ ကုသလတော ဝဝတ္ထေတိ, အဗျာကတတော ဝဝတ္ထေတိ. အရူပါဝစရေ ဓမ္မေ ကုသလတော ဝဝတ္ထေတိ, အဗျာကတတော ဝဝတ္ထေတိ. အပရိယာပန္နေ ဓမ္မေ ကုသလတော ဝဝတ္ထေတိ, အဗျာကတတော ဝဝတ္ထေတိ.
ကထံ ကာမာဝစရေ ဓမ္မေ ကုသလတော ဝဝတ္ထေတိ, အကုသလတော ဝဝတ္ထေတိ, အဗျာကတတော ဝဝတ္ထေတိ? ဒသ ကုသလကမ္မပထေ ကုသလတော ဝဝတ္ထေတိ, ဒသ အကုသလကမ္မပထေ အကုသလတော ဝဝတ္ထေတိ, ရူပဉ္စ ဝိပါကဉ္စ ကိရိယဉ္စ အဗျာကတတော ဝဝတ္ထေတိ— ဧဝံ ကာမာဝစရေ ဓမ္မေ ကုသလတော ဝဝတ္ထေတိ, အကုသလတော ဝဝတ္ထေတိ, အဗျာကတတော ဝဝတ္ထေတိ.
ကထံ ရူပါဝစရေ ဓမ္မေ ကုသလတော ဝဝတ္ထေတိ, အဗျာကတတော ဝဝတ္ထေတိ? ဣဓဋ္ဌဿ စတ္တာရိ ဈာနာနိ ကုသလတော ဝဝတ္ထေတိ, တတြူပပန္နဿ စတ္တာရိ ဈာနာနိ အဗျာကတတော ဝဝတ္ထေတိ— ဧဝံ ရူပါဝစရေ ဓမ္မေ ကုသလတော ဝဝတ္ထေတိ, အဗျာကတတော ဝဝတ္ထေတိ.
ကထံ အရူပါဝစရေ ဓမ္မေ ကုသလတော ဝဝတ္ထေတိ, အဗျာကတတော ဝဝတ္ထေတိ? ဣဓဋ္ဌဿ စတဿော အရူပါဝစရသမာပတ္တိယော ကုသလတော ဝဝတ္ထေတိ, တတြူပပန္နဿ စတဿော အရူပါဝစရသမာပတ္တိယော အဗျာကတတော ဝဝတ္ထေတိ— ဧဝံ အရူပါဝစရေ ဓမ္မေ ကုသလတော ဝဝတ္ထေတိ, အဗျာကတတော ဝဝတ္ထေတိ.
ကထံ အပရိယာပန္နေ ဓမ္မေ ကုသလတော ဝဝတ္ထေတိ, အဗျာကတတော ဝဝတ္ထေတိ? စတ္တာရော အရိယမဂ္ဂေ ကုသလတော ဝဝတ္ထေတိ, စတ္တာရိ စ သာမညဖလာနိ နိဗ္ဗာနဉ္စ အဗျာကတတော ဝဝတ္ထေတိ— ဧဝံ အပရိယာပန္နေ ဓမ္မေ ကုသလတော ဝဝတ္ထေတိ, အဗျာကတတော ဝဝတ္ထေတိ. ဧဝံ ဓမ္မေ ဝဝတ္ထေတိ.
နဝ ပါမောဇ္ဇမူလကာ ဓမ္မာ. အနိစ္စတော မနသိကရောတော ပါမောဇ္ဇံ ဇာယတိ, ပမုဒိတဿ ပီတိ ဇာယတိ, ပီတိမနဿ ကာယော ပဿမ္ဘတိ, ပဿဒ္ဓကာယော သုခံ ဝေဒေတိ, သုခိနော စိတ္တံ သမာဓိယတိ. သမာဟိတေ စိတ္တေ ယထာဘူတံ ပဇာနာတိ ပဿတိ. ယထာဘူတံ ဇာနံ ပဿံ နိဗ္ဗိန္ဒတိ, နိဗ္ဗိန္ဒံ ဝိရဇ္ဇတိ, ဝိရာဂါ ဝိမုစ္စတိ. ဒုက္ခတော မနသိကရောတော ပါမောဇ္ဇံ ဇာယတိ …ပေ… အနတ္တတော မနသိကရောတော ပါမောဇ္ဇံ ဇာယတိ …ပေ…
ရူပံ အနိစ္စတော မနသိကရောတော ပါမောဇ္ဇံ ဇာယတိ …ပေ… ရူပံ ဒုက္ခတော မနသိကရောတော …ပေ… ဝေဒနံ… သညံ… သင်္ခါရေ… ဝိညာဏံ… စက္ခုံ …ပေ… ဇရာမရဏံ အနိစ္စတော မနသိကရောတော ပါမောဇ္ဇံ ဇာယတိ …ပေ… ဇရာမရဏံ ဒုက္ခတော မနသိကရောတော ပါမောဇ္ဇံ ဇာယတိ …ပေ… ဇရာမရဏံ အနတ္တတော မနသိကရောတော ပါမောဇ္ဇံ ဇာယတိ, ပမုဒိတဿ ပီတိ ဇာယတိ, ပီတိမနဿ ကာယော ပဿမ္ဘတိ, ပဿဒ္ဓကာယော သုခံ ဝေဒေတိ, သုခိနော စိတ္တံ သမာဓိယတိ. သမာဟိတေ စိတ္တေ ယထာဘူတံ ပဇာနာတိ ပဿတိ. ယထာဘူတံ ဇာနံ ပဿံ နိဗ္ဗိန္ဒတိ, နိဗ္ဗိန္ဒံ ဝိရဇ္ဇတိ, ဝိရာဂါ ဝိမုစ္စတိ. ဣမေ နဝ ပါမောဇ္ဇမူလကာ ဓမ္မာ.
နဝ ယောနိသော မနသိကာရမူလကာ ဓမ္မာ. အနိစ္စတော ယောနိသော မနသိကရောတော ပါမောဇ္ဇံ ဇာယတိ, ပမုဒိတဿ ပီတိ ဇာယတိ, ပီတိမနဿ ကာယော ပဿမ္ဘတိ, ပဿဒ္ဓကာယော သုခံ ဝေဒေတိ, သုခိနော စိတ္တံ သမာဓိယတိ. သမာဟိတေန စိတ္တေန “ဣဒံ ဒုက္ခန်”တိ ယထာဘူတံ ပဇာနာတိ, “အယံ ဒုက္ခသမုဒယော”တိ ယထာဘူတံ ပဇာနာတိ, “အယံ ဒုက္ခနိရောဓော”တိ ယထာဘူတံ ပဇာနာတိ, “အယံ ဒုက္ခနိရောဓဂါမိနီ ပဋိပဒါ”တိ ယထာဘူတံ ပဇာနာတိ. ဒုက္ခတော ယောနိသော မနသိကရောတော ပါမောဇ္ဇံ ဇာယတိ, ပမုဒိတဿ ပီတိ ဇာယတိ, ပီတိမနဿ ကာယော ပဿမ္ဘတိ, ပဿဒ္ဓကာယော သုခံ ဝေဒေတိ, သုခိနော စိတ္တံ သမာဓိယတိ. သမာဟိတေန စိတ္တေန “ဣဒံ ဒုက္ခန်”တိ ယထာဘူတံ ပဇာနာတိ, “အယံ ဒုက္ခသမုဒယော”တိ ယထာဘူတံ ပဇာနာတိ, “အယံ ဒုက္ခနိရောဓော”တိ ယထာဘူတံ ပဇာနာတိ, “အယံ ဒုက္ခနိရောဓဂါမိနီ ပဋိပဒါ”တိ ယထာဘူတံ ပဇာနာတိ. အနတ္တတော ယောနိသော မနသိကရောတော ပါမောဇ္ဇံ ဇာယတိ …ပေ… .
ရူပံ အနိစ္စတော ယောနိသော မနသိကရောတော ပါမောဇ္ဇံ ဇာယတိ …ပေ… ရူပံ ဒုက္ခတော ယောနိသော မနသိကရောတော ပါမောဇ္ဇံ ဇာယတိ …ပေ… ရူပံ အနတ္တတော ယောနိသော မနသိကရောတော ပါမောဇ္ဇံ ဇာယတိ …ပေ… ဝေဒနံ… သညံ… သင်္ခါရေ… ဝိညာဏံ… စက္ခုံ …ပေ… ဇရာမရဏံ အနိစ္စတော ယောနိသော မနသိကရောတော ပါမောဇ္ဇံ ဇာယတိ …ပေ… ဇရာမရဏံ ဒုက္ခတော ယောနိသော မနသိကရောတော ပါမောဇ္ဇံ ဇာယတိ …ပေ… ဇရာမရဏံ အနတ္တတော ယောနိသော မနသိကရောတော ပါမောဇ္ဇံ ဇာယတိ, ပမုဒိတဿ ပီတိ ဇာယတိ, ပီတိမနဿ ကာယော ပဿမ္ဘတိ, ပဿဒ္ဓကာယော သုခံ ဝေဒေတိ, သုခိနော စိတ္တံ သမာဓိယတိ. သမာဟိတေန စိတ္တေန “ဣဒံ ဒုက္ခန်”တိ ယထာဘူတံ ပဇာနာတိ, “အယံ ဒုက္ခသမုဒယော”တိ ယထာဘူတံ ပဇာနာတိ, “အယံ ဒုက္ခနိရောဓော”တိ ယထာဘူတံ ပဇာနာတိ, “အယံ ဒုက္ခနိရောဓဂါမိနီ ပဋိပဒါ”တိ ယထာဘူတံ ပဇာနာတိ. ဣမေ နဝ ယောနိသော မနသိကာရမူလကာ ဓမ္မာ.
နဝ နာနတ္တာ— ဓာတုနာနတ္တံ ပဋိစ္စ ဥပ္ပဇ္ဇတိ ဖဿနာနတ္တံ, ဖဿနာနတ္တံ ပဋိစ္စ ဥပ္ပဇ္ဇတိ ဝေဒနာနာနတ္တံ, ဝေဒနာနာနတ္တံ ပဋိစ္စ ဥပ္ပဇ္ဇတိ သညာနာနတ္တံ, သညာနာနတ္တံ ပဋိစ္စ ဥပ္ပဇ္ဇတိ သင်္ကပ္ပနာနတ္တံ, သင်္ကပ္ပနာနတ္တံ ပဋိစ္စ ဥပ္ပဇ္ဇတိ ဆန္ဒနာနတ္တံ, ဆန္ဒနာနတ္တံ ပဋိစ္စ ဥပ္ပဇ္ဇတိ ပရိဠာဟနာနတ္တံ, ပရိဠာဟနာနတ္တံ ပဋိစ္စ ဥပ္ပဇ္ဇတိ ပရိယေသနာနာနတ္တံ, ပရိယေသနာနာနတ္တံ ပဋိစ္စ ဥပ္ပဇ္ဇတိ လာဘနာနတ္တံ— ဣမေ နဝ နာနတ္တာ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “နဝဓမ္မဝဝတ္ထာနေ ပညာ ဓမ္မနာနတ္တေ ဉာဏံ”.
ဓမ္မနာနတ္တဉာဏနိဒ္ဒေသော ဧကူနဝီသတိမော.