1.1.2 သီလမယဉာဏနိဒ္ဒေသ
- ဉာဏကထာ
ကထံ သုတွာန သံဝရေ ပညာ သီလမယေ ဉာဏံ? ပဉ္စ သီလာနိ— ပရိယန္တပါရိသုဒ္ဓိသီလံ, အပရိယန္တပါရိသုဒ္ဓိသီလံ, ပရိပုဏ္ဏပါရိသုဒ္ဓိသီလံ, အပရာမဋ္ဌပါရိသုဒ္ဓိသီလံ, ပဋိပ္ပဿဒ္ဓိပါရိသုဒ္ဓိသီလန္တိ.
တတ္ထ ကတမံ ပရိယန္တပါရိသုဒ္ဓိသီလံ? အနုပသမ္ပန္နာနံ ပရိယန္တသိက္ခာပဒါနံ— ဣဒံ ပရိယန္တပါရိသုဒ္ဓိသီလံ.
ကတမံ အပရိယန္တပါရိသုဒ္ဓိသီလံ? ဥပသမ္ပန္နာနံ အပရိယန္တသိက္ခာပဒါနံ— ဣဒံ အပရိယန္တပါရိသုဒ္ဓိသီလံ.
ကတမံ ပရိပုဏ္ဏပါရိသုဒ္ဓိသီလံ? ပုထုဇ္ဇနကလျာဏကာနံ ကုသလဓမ္မေ ယုတ္တာနံ သေက္ခပရိယန္တေ ပရိပူရကာရီနံ ကာယေ စ ဇီဝိတေ စ အနပေက္ခာနံ ပရိစ္စတ္တဇီဝိတာနံ— ဣဒံ ပရိပုဏ္ဏပါရိသုဒ္ဓိသီလံ.
ကတမံ အပရာမဋ္ဌပါရိသုဒ္ဓိသီလံ? သတ္တန္နံ သေက္ခာနံ— ဣဒံ အပရာမဋ္ဌပါရိသုဒ္ဓိသီလံ.
ကတမံ ပဋိပ္ပဿဒ္ဓိပါရိသုဒ္ဓိသီလံ? တထာဂတသာဝကာနံ ခီဏာသဝါနံ ပစ္စေကဗုဒ္ဓါနံ တထာဂတာနံ အရဟန္တာနံ သမ္မာသမ္ဗုဒ္ဓါနံ— ဣဒံ ပဋိပ္ပဿဒ္ဓိပါရိသုဒ္ဓိသီလံ.
အတ္ထိ သီလံ ပရိယန္တံ, အတ္ထိ သီလံ အပရိယန္တံ.
တတ္ထ ကတမံ တံ သီလံ ပရိယန္တံ? အတ္ထိ သီလံ လာဘပရိယန္တံ, အတ္ထိ သီလံ ယသပရိယန္တံ, အတ္ထိ သီလံ ဉာတိပရိယန္တံ, အတ္ထိ သီလံ အင်္ဂပရိယန္တံ, အတ္ထိ သီလံ ဇီဝိတပရိယန္တံ.
ကတမံ တံ သီလံ လာဘပရိယန္တံ? ဣဓေကစ္စော လာဘဟေတု လာဘပစ္စယာ လာဘကာရဏာ ယထာသမာဒိန္နံ သိက္ခာပဒံ ဝီတိက္ကမတိ— ဣဒံ တံ သီလံ လာဘပရိယန္တံ.
ကတမံ တံ သီလံ ယသပရိယန္တံ? ဣဓေကစ္စော ယသဟေတု ယသပစ္စယာ ယသကာရဏာ ယထာသမာဒိန္နံ သိက္ခာပဒံ ဝီတိက္ကမတိ— ဣဒံ တံ သီလံ ယသပရိယန္တံ.
ကတမံ တံ သီလံ ဉာတိပရိယန္တံ? ဣဓေကစ္စော ဉာတိဟေတု ဉာတိပစ္စယာ ဉာတိကာရဏာ ယထာသမာဒိန္နံ သိက္ခာပဒံ ဝီတိက္ကမတိ— ဣဒံ တံ သီလံ ဉာတိပရိယန္တံ.
ကတမံ တံ သီလံ အင်္ဂပရိယန္တံ? ဣဓေကစ္စော အင်္ဂဟေတု အင်္ဂပစ္စယာ အင်္ဂကာရဏာ ယထာသမာဒိန္နံ သိက္ခာပဒံ ဝီတိက္ကမတိ— ဣဒံ တံ သီလံ အင်္ဂပရိယန္တံ.
ကတမံ တံ သီလံ ဇီဝိတပရိယန္တံ? ဣဓေကစ္စော ဇီဝိတဟေတု ဇီဝိတပစ္စယာ ဇီဝိတကာရဏာ ယထာသမာဒိန္နံ သိက္ခာပဒံ ဝီတိက္ကမတိ— ဣဒံ တံ သီလံ ဇီဝိတပရိယန္တံ. ဧဝရူပါနိ သီလာနိ ခဏ္ဍာနိ ဆိဒ္ဒါနိ သဗလာနိ ကမ္မာသာနိ န ဘုဇိဿာနိ န ဝိညုပ္ပသတ္ထာနိ ပရာမဋ္ဌာနိ အသမာဓိသံဝတ္တနိကာနိ န အဝိပ္ပဋိသာရဝတ္ထုကာနိ န ပါမောဇ္ဇဝတ္ထုကာနိ န ပီတိဝတ္ထုကာနိ န ပဿဒ္ဓိဝတ္ထုကာနိ န သုခဝတ္ထုကာနိ န သမာဓိဝတ္ထုကာနိ န ယထာဘူတဉာဏဒဿနဝတ္ထုကာနိ န ဧကန္တနိဗ္ဗိဒါယ န ဝိရာဂါယ န နိရောဓာယ န ဥပသမာယ န အဘိညာယ န သမ္ဗောဓာယ န နိဗ္ဗာနာယ သံဝတ္တန္တိ— ဣဒံ တံ သီလံ ပရိယန္တံ.
ကတမံ တံ သီလံ အပရိယန္တံ? အတ္ထိ သီလံ န လာဘပရိယန္တံ, အတ္ထိ သီလံ န ယသပရိယန္တံ, အတ္ထိ သီလံ န ဉာတိပရိယန္တံ, အတ္ထိ သီလံ န အင်္ဂပရိယန္တံ, အတ္ထိ သီလံ န ဇီဝိတပရိယန္တံ.
ကတမံ တံ သီလံ န လာဘပရိယန္တံ? ဣဓေကစ္စော လာဘဟေတု လာဘပစ္စယာ လာဘကာရဏာ ယထာသမာဒိန္နံ သိက္ခာပဒံ ဝီတိက္ကမာယ စိတ္တမ္ပိ န ဥပ္ပါဒေတိ, ကိံ သော ဝီတိက္ကမိဿတိ. ဣဒံ တံ သီလံ န လာဘပရိယန္တံ.
ကတမံ တံ သီလံ န ယသပရိယန္တံ? ဣဓေကစ္စော ယသဟေတု ယသပစ္စယာ ယသကာရဏာ ယထာသမာဒိန္နံ သိက္ခာပဒံ ဝီတိက္ကမာယ စိတ္တမ္ပိ န ဥပ္ပါဒေတိ, ကိံ သော ဝီတိက္ကမိဿတိ. ဣဒံ တံ သီလံ န ယသပရိယန္တံ.
ကတမံ တံ သီလံ န ဉာတိပရိယန္တံ? ဣဓေကစ္စော ဉာတိဟေတု ဉာတိပစ္စယာ ဉာတိကာရဏာ ယထာသမာဒိန္နံ သိက္ခာပဒံ ဝီတိက္ကမာယ စိတ္တမ္ပိ န ဥပ္ပါဒေတိ, ကိံ သော ဝီတိက္ကမိဿတိ. ဣဒံ တံ သီလံ န ဉာတိပရိယန္တံ.
ကတမံ တံ သီလံ န အင်္ဂပရိယန္တံ? ဣဓေကစ္စော အင်္ဂဟေတု အင်္ဂပစ္စယာ အင်္ဂကာရဏာ ယထာသမာဒိန္နံ သိက္ခာပဒံ ဝီတိက္ကမာယ စိတ္တမ္ပိ န ဥပ္ပါဒေတိ, ကိံ သော ဝီတိက္ကမိဿတိ. ဣဒံ တံ သီလံ န အင်္ဂပရိယန္တံ.
ကတမံ တံ သီလံ န ဇီဝိတပရိယန္တံ? ဣဓေကစ္စော ဇီဝိတဟေတု ဇီဝိတပစ္စယာ ဇီဝိတကာရဏာ ယထာသမာဒိန္နံ သိက္ခာပဒံ ဝီတိက္ကမာယ စိတ္တမ္ပိ န ဥပ္ပါဒေတိ, ကိံ သော ဝီတိက္ကမိဿတိ. ဣဒံ တံ သီလံ န ဇီဝိတပရိယန္တံ. ဧဝရူပါနိ သီလာနိ အခဏ္ဍာနိ အစ္ဆိဒ္ဒါနိ အသဗလာနိ အကမ္မာသာနိ ဘုဇိဿာနိ ဝိညုပ္ပသတ္ထာနိ အပရာမဋ္ဌာနိ သမာဓိသံဝတ္တနိကာနိ အဝိပ္ပဋိသာရဝတ္ထုကာနိ ပါမောဇ္ဇဝတ္ထုကာနိ ပီတိဝတ္ထုကာနိ ပဿဒ္ဓိဝတ္ထုကာနိ သုခဝတ္ထုကာနိ သမာဓိဝတ္ထုကာနိ ယထာဘူတဉာဏဒဿနဝတ္ထုကာနိ ဧကန္တနိဗ္ဗိဒါယ ဝိရာဂါယ နိရောဓာယ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တန္တိ— ဣဒံ တံ သီလံ အပရိယန္တံ.
ကိံ သီလံ? ကတိ သီလာနိ? ကိံ သမုဋ္ဌာနံ သီလံ? ကတိ ဓမ္မသမောဓာနံ သီလံ?
ကိံ သီလန် တိ စေတနာ သီလံ, စေတသိကံ သီလံ, သံဝရော သီလံ, အဝီတိက္ကမော သီလံ.
ကတိ သီလာနီ တိ တီဏိ သီလာနိ— ကုသလသီလံ, အကုသလသီလံ, အဗျာကတသီလံ.
ကိံ သမုဋ္ဌာနံ သီလန် တိ ကုသလစိတ္တသမုဋ္ဌာနံ ကုသလသီလံ, အကုသလစိတ္တသမုဋ္ဌာနံ အကုသလသီလံ, အဗျာကတစိတ္တသမုဋ္ဌာနံ အဗျာကတသီလံ.
ကတိ ဓမ္မသမောဓာနံ သီလန် တိ သံဝရသမောဓာနံ သီလံ, အဝီတိက္ကမသမောဓာနံ သီလံ, တထာဘာဝေ ဇာတစေတနာသမောဓာနံ သီလံ.
ပါဏာတိပါတံ သံဝရဋ္ဌေန သီလံ, အဝီတိက္ကမဋ္ဌေန သီလံ. အဒိန္နာဒါနံ သံဝရဋ္ဌေန သီလံ, အဝီတိက္ကမဋ္ဌေန သီလံ. ကာမေသုမိစ္ဆာစာရံ သံဝရဋ္ဌေန သီလံ, အဝီတိက္ကမဋ္ဌေန သီလံ. မုသာဝါဒံ သံဝရဋ္ဌေန သီလံ, အဝီတိက္ကမဋ္ဌေန သီလံ. ပိသုဏံ ဝါစံ သံဝရဋ္ဌေန သီလံ, အဝီတိက္ကမဋ္ဌေန သီလံ. ဖရုသံ ဝါစံ သံဝရဋ္ဌေန သီလံ, အဝီတိက္ကမဋ္ဌေန သီလံ. သမ္ဖပ္ပလာပံ သံဝရဋ္ဌေန သီလံ, အဝီတိက္ကမဋ္ဌေန သီလံ. အဘိဇ္ဈံ သံဝရဋ္ဌေန သီလံ, အဝီတိက္ကမဋ္ဌေန သီလံ. ဗျာပါဒံ သံဝရဋ္ဌေန သီလံ, အဝီတိက္ကမဋ္ဌေန သီလံ. မိစ္ဆာဒိဋ္ဌိံ သံဝရဋ္ဌေန သီလံ, အဝီတိက္ကမဋ္ဌေန သီလံ.
နေက္ခမ္မေန ကာမစ္ဆန္ဒံ သံဝရဋ္ဌေန သီလံ, အဝီတိက္ကမဋ္ဌေန သီလံ. အဗျာပါဒေန ဗျာပါဒံ သံဝရဋ္ဌေန သီလံ, အဝီတိက္ကမဋ္ဌေန သီလံ. အာလောကသညာယ ထိနမိဒ္ဓံ… အဝိက္ခေပဋ္ဌေန ဥဒ္ဓစ္စံ… ဓမ္မဝဝတ္ထာနေန ဝိစိကိစ္ဆံ… ဉာဏေန အဝိဇ္ဇံ… ပါမောဇ္ဇေန အရတိံ… .
ပဌမေန ဈာနေန နီဝရဏေ… ဒုတိယေန ဈာနေန ဝိတက္ကဝိစာရေ… တတိယေန ဈာနေန ပီတိံ… စတုတ္ထေန ဈာနေန သုခဒုက္ခံ… အာကာသာနဉ္စာယတနသမာပတ္တိယာ ရူပသညံ ပဋိဃသညံ နာနတ္တသညံ… ဝိညာဏဉ္စာယတနသမာပတ္တိယာ အာကာသာနဉ္စာယတနသညံ… အာကိဉ္စညာယတနသမာပတ္တိယာ ဝိညာဏဉ္စာယတနသညံ… နေဝသညာနာသညာယတနသမာပတ္တိယာ အာကိဉ္စညာယတနသညံ.
အနိစ္စာနုပဿနာယ နိစ္စသညံ… ဒုက္ခာနုပဿနာယ သုခသညံ… အနတ္တာ အနုပဿနာယ အတ္တသညံ… နိဗ္ဗိဒါနုပဿနာယ နန္ဒိံ… ဝိရာဂါနုပဿနာယ ရာဂံ… နိရောဓာနုပဿနာယ သမုဒယံ… ပဋိနိဿဂ္ဂါနုပဿနာယ အာဒါနံ… ခယာနုပဿနာယ ဃနသညံ… ဝယာနုပဿနာယ အာယူဟနံ… ဝိပရိဏာမာနုပဿနာယ ဓုဝသညံ… အနိမိတ္တာနုပဿနာယ နိမိတ္တံ… အပ္ပဏိဟိတာနုပဿနာယ ပဏိဓိံ… သုညတာနုပဿနာယ အဘိနိဝေသံ… အဓိပညာဓမ္မဝိပဿနာယ သာရာဒါနာဘိနိဝေသံ… ယထာဘူတဉာဏဒဿနေန သမ္မောဟာဘိနိဝေသံ… အာဒီနဝါနုပဿနာယ အာလယာဘိနိဝေသံ… ပဋိသင်္ခါနုပဿနာယ အပ္ပဋိသင်္ခံ… ဝိဝဋ္ဋနာနုပဿနာယ သညောဂါဘိနိဝေသံ… .
သောတာပတ္တိမဂ္ဂေန ဒိဋ္ဌေကဋ္ဌေ ကိလေသေ… သကဒါဂါမိမဂ္ဂေန ဩဠာရိကေ ကိလေသေ… အနာဂါမိမဂ္ဂေန အဏုသဟဂတေ ကိလေသေ… အရဟတ္တမဂ္ဂေန သဗ္ဗကိလေသေ သံဝရဋ္ဌေန သီလံ, အဝီတိက္ကမဋ္ဌေန သီလံ.
ပဉ္စ သီလာနိ— ပါဏာတိပါတဿ ပဟာနံ သီလံ, ဝေရမဏီ သီလံ, စေတနာ သီလံ, သံဝရော သီလံ, အဝီတိက္ကမော သီလံ. ဧဝရူပါနိ သီလာနိ စိတ္တဿ အဝိပ္ပဋိသာရာယ သံဝတ္တန္တိ, ပါမောဇ္ဇာယ သံဝတ္တန္တိ, ပီတိယာ သံဝတ္တန္တိ, ပဿဒ္ဓိယာ သံဝတ္တန္တိ, သောမနဿာယ သံဝတ္တန္တိ, အာသေဝနာယ သံဝတ္တန္တိ, ဘာဝနာယ သံဝတ္တန္တိ, ဗဟုလီကမ္မာယ သံဝတ္တန္တိ, အလင်္ကာရာယ သံဝတ္တန္တိ, ပရိက္ခာရာယ သံဝတ္တန္တိ, ပရိဝါရာယ သံဝတ္တန္တိ, ပါရိပူရိယာ သံဝတ္တန္တိ, ဧကန္တနိဗ္ဗိဒါယ ဝိရာဂါယ နိရောဓာယ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တန္တိ.
ဧဝရူပါနံ သီလာနံ သံဝရပါရိသုဒ္ဓိ အဓိသီလံ, သံဝရပါရိသုဒ္ဓိယာ ဌိတံ စိတ္တံ န ဝိက္ခေပံ ဂစ္ဆတိ, အဝိက္ခေပပါရိသုဒ္ဓိ အဓိစိတ္တံ သံဝရပါရိသုဒ္ဓိံ သမ္မာ ပဿတိ, အဝိက္ခေပပါရိသုဒ္ဓိံ သမ္မာ ပဿတိ. ဒဿနပါရိသုဒ္ဓိ အဓိပညာ. ယော တတ္ထ သံဝရဋ္ဌော, အယံ အဓိသီလသိက္ခာ. ယော တတ္ထ အဝိက္ခေပဋ္ဌော, အယံ အဓိစိတ္တသိက္ခာ. ယော တတ္ထ ဒဿနဋ္ဌော, အယံ အဓိပညာသိက္ခာ.
ဣမာ တိဿော သိက္ခာယော အာဝဇ္ဇန္တော သိက္ခတိ, ဇာနန္တော သိက္ခတိ, ပဿန္တော သိက္ခတိ, ပစ္စဝေက္ခန္တော သိက္ခတိ, စိတ္တံ အဓိဋ္ဌဟန္တော သိက္ခတိ, သဒ္ဓါယ အဓိမုစ္စန္တော သိက္ခတိ, ဝီရိယံ ပဂ္ဂဏှန္တော သိက္ခတိ, သတိံ ဥပဋ္ဌပေန္တော သိက္ခတိ, စိတ္တံ သမာဒဟန္တော သိက္ခတိ, ပညာယ ပဇာနန္တော သိက္ခတိ, အဘိညေယျံ အဘိဇာနန္တော သိက္ခတိ, ပရိညေယျံ ပရိဇာနန္တော သိက္ခတိ, ပဟာတဗ္ဗံ ပဇဟန္တော သိက္ခတိ, သစ္ဆိကာတဗ္ဗံ သစ္ဆိကရောန္တော သိက္ခတိ, ဘာဝေတဗ္ဗံ ဘာဝေန္တော သိက္ခတိ.
ပဉ္စ သီလာနိ— အဒိန္နာဒါနဿ… ကာမေသုမိစ္ဆာစာရဿ… မုသာဝါဒဿ… ပိသုဏာယ ဝါစာယ… ဖရုသာယ ဝါစာယ… သမ္ဖပ္ပလာပဿ… အဘိဇ္ဈာယ… ဗျာပါဒဿ… မိစ္ဆာဒိဋ္ဌိယာ…
နေက္ခမ္မေန ကာမစ္ဆန္ဒဿ… အဗျာပါဒေန ဗျာပါဒဿ… အာလောကသညာယ ထိနမိဒ္ဓဿ… အဝိက္ခေပေန ဥဒ္ဓစ္စဿ… ဓမ္မဝဝတ္ထာနေန ဝိစိကိစ္ဆာယ… ဉာဏေန အဝိဇ္ဇာယ… ပါမောဇ္ဇေန အရတိယာ…
ပဌမေန ဈာနေန နီဝရဏာနံ… ဒုတိယေန ဈာနေန ဝိတက္ကဝိစာရာနံ… တတိယေန ဈာနေန ပီတိယာ… စတုတ္ထေန ဈာနေန သုခဒုက္ခာနံ… အာကာသာနဉ္စာယတနသမာပတ္တိယာ ရူပသညာယ ပဋိဃသညာယ နာနတ္တသညာယ… ဝိညာဏဉ္စာယတနသမာပတ္တိယာ အာကာသာနဉ္စာယတနသညာယ… အာကိဉ္စညာယတနသမာပတ္တိယာ ဝိညာဏဉ္စာယတနသညာယ… နေဝသညာနာသညာယတနသမာပတ္တိယာ အာကိဉ္စညာယတနသညာယ…
အနိစ္စာနုပဿနာယ နိစ္စသညာယ… ဒုက္ခာနုပဿနာယ သုခသညာယ… အနတ္တာနုပဿနာယ အတ္တသညာယ… နိဗ္ဗိဒါနုပဿနာယ နန္ဒိယာ… ဝိရာဂါနုပဿနာယ ရာဂဿ… နိရောဓာနုပဿနာယ သမုဒယဿ… ပဋိနိဿဂ္ဂါနုပဿနာယ အာဒါနဿ… ခယာနုပဿနာယ ဃနသညာယ… ဝယာနုပဿနာယ အာယူဟနဿ… ဝိပရိဏာမာနုပဿနာယ ဓုဝသညာယ… အနိမိတ္တာနုပဿနာယ နိမိတ္တဿ… အပ္ပဏိဟိတာနုပဿနာယ ပဏိဓိယာ… သုညတာနုပဿနာယ အဘိနိဝေသဿ… အဓိပညာဓမ္မဝိပဿနာယ သာရာဂါဘိနိဝေသဿ… ယထာဘူတဉာဏဒဿနေန သမ္မောဟာဘိနိဝေသဿ… အာဒီနဝါနုပဿနာယ အာလယာဘိနိဝေသဿ… ပဋိသင်္ခါနုပဿနာယ အပ္ပဋိသင်္ခါယ… ဝိဝဋ္ဋနာနုပဿနာယ သညောဂါဘိနိဝေသဿ.
သောတာပတ္တိမဂ္ဂေန ဒိဋ္ဌေကဋ္ဌာနံ ကိလေသာနံ… သကဒါဂါမိမဂ္ဂေန ဩဠာရိကာနံ ကိလေသာနံ… အနာဂါမိမဂ္ဂေန အနုသဟဂတာနံ ကိလေသာနံ… အရဟတ္တမဂ္ဂေန သဗ္ဗကိလေသာနံ ပဟာနံ သီလံ, ဝေရမဏီ သီလံ, စေတနာ သီလံ, သံဝရော သီလံ, အဝီတိက္ကမော သီလံ. ဧဝရူပါနိ သီလာနိ စိတ္တဿ အဝိပ္ပဋိသာရာယ သံဝတ္တန္တိ, ပါမောဇ္ဇာယ သံဝတ္တန္တိ, ပီတိယာ သံဝတ္တန္တိ, ပဿဒ္ဓိယာ သံဝတ္တန္တိ, သောမနဿာယ သံဝတ္တန္တိ, အာသေဝနာယ သံဝတ္တန္တိ, ဘာဝနာယ သံဝတ္တန္တိ, ဗဟုလီကမ္မာယ သံဝတ္တန္တိ, အလင်္ကာရာယ သံဝတ္တန္တိ, ပရိက္ခာရာယ သံဝတ္တန္တိ, ပရိဝါရာယ သံဝတ္တန္တိ, ပါရိပူရိယာ သံဝတ္တန္တိ, ဧကန္တနိဗ္ဗိဒါယ ဝိရာဂါယ နိရောဓာယ ဥပသမာယ အဘိညာယ သမ္ဗောဓာယ နိဗ္ဗာနာယ သံဝတ္တန္တိ.
ဧဝရူပါနံ သီလာနံ သံဝရပါရိသုဒ္ဓိ အဓိသီလံ. သံဝရပါရိသုဒ္ဓိယာ ဌိတံ စိတ္တံ အဝိက္ခေပံ ဂစ္ဆတိ, အဝိက္ခေပပါရိသုဒ္ဓိ အဓိစိတ္တံ. သံဝရပါရိသုဒ္ဓိံ သမ္မာ ပဿတိ, အဝိက္ခေပပါရိသုဒ္ဓိံ သမ္မာ ပဿတိ. ဒဿနပါရိသုဒ္ဓိ အဓိပညာ. ယော တတ္ထ သံဝရဋ္ဌော, အယံ အဓိသီလသိက္ခာ. ယော တတ္ထ အဝိက္ခေပဋ္ဌော, အယံ အဓိစိတ္တသိက္ခာ. ယော တတ္ထ ဒဿနဋ္ဌော, အယံ အဓိပညာသိက္ခာ. ဣမာ တိဿော သိက္ခာယော အာဝဇ္ဇန္တော သိက္ခတိ, ဇာနန္တော သိက္ခတိ, ပဿန္တော သိက္ခတိ, ပစ္စဝေက္ခန္တော သိက္ခတိ, စိတ္တံ အဓိဋ္ဌဟန္တော သိက္ခတိ, သဒ္ဓါယ အဓိမုစ္စန္တော သိက္ခတိ, ဝီရိယံ ပဂ္ဂဏှန္တော သိက္ခတိ, သတိံ ဥပဋ္ဌပေန္တော သိက္ခတိ, စိတ္တံ သမာဒဟန္တော သိက္ခတိ, ပညာယ ပဇာနန္တော သိက္ခတိ, အဘိညေယျံ အဘိဇာနန္တော သိက္ခတိ, ပရိညေယျံ ပရိဇာနန္တော သိက္ခတိ ပဟာတဗ္ဗံ ပဇဟန္တော သိက္ခတိ, သစ္ဆိကာတဗ္ဗံ သစ္ဆိကရောန္တော သိက္ခတိ, ဘာဝေတဗ္ဗံ ဘာဝေန္တော သိက္ခတိ. တံ ဉာတဋ္ဌေန ဉာဏံ ပဇာနနဋ္ဌေန ပညာ. တေန ဝုစ္စတိ— “သုတွာန သံဝရေ ပညာ သီလမယေ ဉာဏံ”.
သီလမယဉာဏနိဒ္ဒေသော ဒုတိယော.