1.1.3 သမာဓိဘာဝနာမယဉာဏနိဒ္ဒေသ
- ဉာဏကထာ
ကထံ သံဝရိတွာ သမာဒဟနေ ပညာ သမာဓိဘာဝနာမယေ ဉာဏံ?
ဧကော သမာဓိ— စိတ္တဿ ဧကဂ္ဂတာ.
ဒွေ သမာဓီ— လောကိယော သမာဓိ, လောကုတ္တရော သမာဓိ.
တယော သမာဓီ— သဝိတက္ကသဝိစာရော သမာဓိ, အဝိတက္ကဝိစာရမတ္တော သမာဓိ, အဝိတက္ကအဝိစာရော သမာဓိ.
စတ္တာရော သမာဓီ— ဟာနဘာဂိယော သမာဓိ, ဌိတိဘာဂိယော သမာဓိ, ဝိသေသဘာဂိယော သမာဓိ, နိဗ္ဗေဓဘာဂိယော သမာဓိ.
ပဉ္စ သမာဓီ— ပီတိဖရဏတာ, သုခဖရဏတာ, စေတောဖရဏတာ, အာလောကဖရဏတာ, ပစ္စဝေက္ခဏာနိမိတ္တံ.
ဆ သမာဓီ— ဗုဒ္ဓါနုဿတိဝသေန စိတ္တဿ ဧကဂ္ဂတာ အဝိက္ခေပေါ သမာဓိ, ဓမ္မာနုဿတိဝသေန စိတ္တဿ ဧကဂ္ဂတာ အဝိက္ခေပေါ သမာဓိ, သံဃာနုဿတိဝသေန စိတ္တဿ ဧကဂ္ဂတာ အဝိက္ခေပေါ သမာဓိ, သီလာနုဿတိဝသေန စိတ္တဿ ဧကဂ္ဂတာ အဝိက္ခေပေါ သမာဓိ, စာဂါနုဿတိဝသေန စိတ္တဿ ဧကဂ္ဂတာ အဝိက္ခေပေါ သမာဓိ, ဒေဝတာနုဿတိဝသေန စိတ္တဿ ဧကဂ္ဂတာ အဝိက္ခေပေါ သမာဓိ.
သတ္တ သမာဓီ— သမာဓိကုသလတာ, သမာဓိဿ သမာပတ္တိကုသလတာ, သမာဓိဿ ဌိတိကုသလတာ, သမာဓိဿ ဝုဋ္ဌာနကုသလတာ, သမာဓိဿ ကလ္လတာကုသလတာ, သမာဓိဿ ဂေါစရကုသလတာ, သမာဓိဿ အဘိနီဟာရကုသလတာ.
အဋ္ဌ သမာဓီ— ပထဝီကသိဏဝသေန စိတ္တဿ ဧကဂ္ဂတာ အဝိက္ခေပေါ သမာဓိ, အာပေါကသိဏဝသေန …ပေ… တေဇောကသိဏဝသေန… ဝါယောကသိဏဝသေန… နီလကသိဏဝသေန… ပီတကသိဏဝသေန… လောဟိတကသိဏဝသေန… ဩဒါတကသိဏဝသေန စိတ္တဿ ဧကဂ္ဂတာ အဝိက္ခေပေါ သမာဓိ.
နဝ သမာဓီ— ရူပါဝစရော သမာဓိ အတ္ထိ ဟီနော, အတ္ထိ မဇ္ဈော, အတ္ထိ ပဏီတော; အရူပါဝစရော သမာဓိ အတ္ထိ ဟီနော, အတ္ထိ မဇ္ဈော, အတ္ထိ ပဏီတော; သုညတော သမာဓိ, အနိမိတ္တော သမာဓိ, အပ္ပဏိဟိတော သမာဓိ.
ဒသ သမာဓီ— ဥဒ္ဓုမာတကသညာဝသေန စိတ္တဿ ဧကဂ္ဂတာ အဝိက္ခေပေါ သမာဓိ, ဝိနီလကသညာဝသေန… ဝိပုဗ္ဗကသညာဝသေန… ဝိစ္ဆိဒ္ဒကသညာဝသေန… ဝိက္ခာယိတကသညာဝသေန… ဝိက္ခိတ္တကသညာဝသေန… ဟတဝိက္ခိတ္တကသညာဝသေန… လောဟိတကသညာဝသေန… ပုဠဝကသညာဝသေန… အဋ္ဌိကသညာဝသေန စိတ္တဿ ဧကဂ္ဂတာ အဝိက္ခေပေါ သမာဓိ. ဣမေ ပဉ္စပညာသ သမာဓီ.
အပိ စ ပဉ္စဝီသတိ သမာဓိဿ သမာဓိဋ္ဌာ— ပရိဂ္ဂဟဋ္ဌေန သမာဓိ, ပရိဝါရဋ္ဌေန သမာဓိ, ပရိပူရဋ္ဌေန သမာဓိ, ဧကဂ္ဂဋ္ဌေန သမာဓိ, အဝိက္ခေပဋ္ဌေန သမာဓိ, အဝိသာရဋ္ဌေန သမာဓိ, အနာဝိလဋ္ဌေန သမာဓိ, အနိဉ္ဇနဋ္ဌေန သမာဓိ, ဝိမုတ္တဋ္ဌေန သမာဓိ, ဧကတ္တုပဋ္ဌာနဝသေန စိတ္တဿ ဌိတတ္တာ သမာဓိ, သမံ ဧသတီတိ သမာဓိ, ဝိသမံ နေသတီတိ သမာဓိ, သမံ ဧသိတတ္တာ သမာဓိ, ဝိသမံ နေသိတတ္တာ သမာဓိ, သမံ အာဒိယတီတိ သမာဓိ, ဝိသမံ နာဒိယတီတိ သမာဓိ, သမံ အာဒိန္နတ္တာ သမာဓိ, ဝိသမံ အနာဒိန္နတ္တာ သမာဓိ, သမံ ပဋိပဇ္ဇတီတိ သမာဓိ, ဝိသမံ နပ္ပဋိပဇ္ဇတီတိ သမာဓိ, သမံ ပဋိပန္နတ္တာ သမာဓိ, ဝိသမံ နပ္ပဋိပန္နတ္တာ သမာဓိ, သမံ ဈာယတီတိ သမာဓိ, ဝိသမံ ဈာပေတီတိ သမာဓိ, သမံ ဈာတတ္တာ သမာဓိ, ဝိသမံ ဈာပိတတ္တာ သမာဓိ, သမော စ ဟိတော စ သုခေါ စာတိ သမာဓိ. ဣမေ ပဉ္စဝီသတိ သမာဓိဿ သမာဓိဋ္ဌာ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “သံဝရိတွာ သမာဒဟနေ ပညာ သမာဓိဘာဝနာမယေ ဉာဏံ”.
သမာဓိဘာဝနာမယဉာဏနိဒ္ဒေသော တတိယော.