1.1.34 နိရောဓသမာပတ္တိဉာဏနိဒ္ဒေသ
- ဉာဏကထာ
ကထံ ဒွီဟိ ဗလေဟိ သမန္နာဂတတ္တာ တယော စ သင်္ခါရာနံ ပဋိပ္ပဿဒ္ဓိယာ သောဠသဟိ ဉာဏစရိယာဟိ နဝဟိ သမာဓိစရိယာဟိ ဝသိဘာဝတာ ပညာ နိရောဓသမာပတ္တိယာ ဉာဏံ?
ဒွီဟိ ဗလေဟီ တိ ဒွေ ဗလာနိ— သမထဗလံ, ဝိပဿနာဗလံ. ကတမံ သမထဗလံ? နေက္ခမ္မဝသေန စိတ္တဿေကဂ္ဂတာ အဝိက္ခေပေါ သမထဗလံ. အဗျာပါဒဝသေန စိတ္တဿေကဂ္ဂတာ အဝိက္ခေပေါ သမထဗလံ. အာလောကသညာဝသေန စိတ္တဿေကဂ္ဂတာ အဝိက္ခေပေါ သမထဗလံ. အဝိက္ခေပဝသေန စိတ္တဿေကဂ္ဂတာ အဝိက္ခေပေါ သမထဗလံ …ပေ… ပဋိနိဿဂ္ဂါနုပဿီ အဿာသဝသေန စိတ္တဿေကဂ္ဂတာ အဝိက္ခေပေါ သမထဗလံ. ပဋိနိဿဂ္ဂါနုပဿီ ပဿာသဝသေန စိတ္တဿေကဂ္ဂတာ အဝိက္ခေပေါ သမထဗလံ.
သမထဗလန် တိ ကေနဋ္ဌေန သမထဗလံ? ပဌမေန ဈာနေန နီဝရဏေ န ကမ္ပတီတိ— သမထဗလံ. ဒုတိယေန ဈာနေန ဝိတက္ကဝိစာရေ န ကမ္ပတီတိ— သမထဗလံ. တတိယေန ဈာနေန ပီတိယာ န ကမ္ပတီတိ— သမထဗလံ. စတုတ္ထေန ဈာနေန သုခဒုက္ခေ န ကမ္ပတီတိ— သမထဗလံ. အာကာသာနဉ္စာယတနသမာပတ္တိယာ ရူပသညာယ ပဋိဃသညာယ နာနတ္တသညာယ န ကမ္ပတီတိ— သမထဗလံ. ဝိညာဏဉ္စာယတနသမာပတ္တိယာ အာကာသာနဉ္စာယတနသညာယ န ကမ္ပတီတိ— သမထဗလံ. အာကိဉ္စညာယတနသမာပတ္တိယာ ဝိညာဏဉ္စာယတနသညာယ န ကမ္ပတီတိ— သမထဗလံ. နေဝသညာနာသညာယတနသမာပတ္တိယာ အာကိဉ္စညာယတနသညာယ န ကမ္ပတီတိ— သမထဗလံ. ဥဒ္ဓစ္စေ စ ဥဒ္ဓစ္စသဟဂတကိလေသေ စ ခန္ဓေ စ န ကမ္ပတိ န စလတိ န ဝေဓတီတိ— သမထဗလံ. ဣဒံ သမထဗလံ.
ကတမံ ဝိပဿနာဗလံ? အနိစ္စာနုပဿနာ ဝိပဿနာဗလံ. ဒုက္ခာနုပဿနာ ဝိပဿနာဗလံ. အနတ္တာနုပဿနာ ဝိပဿနာဗလံ. နိဗ္ဗိဒါနုပဿနာ ဝိပဿနာဗလံ. ဝိရာဂါနုပဿနာ ဝိပဿနာဗလံ. နိရောဓာနုပဿနာ ဝိပဿနာဗလံ. ပဋိနိဿဂ္ဂါနုပဿနာ ဝိပဿနာဗလံ. ရူပေ အနိစ္စာနုပဿနာ ဝိပဿနာဗလံ …ပေ… ရူပေ ပဋိနိဿဂ္ဂါနုပဿနာ ဝိပဿနာဗလံ. ဝေဒနာယ …ပေ… သညာယ… သင်္ခါရေသု… ဝိညာဏေ… စက္ခုသ္မိံ …ပေ… ဇရာမရဏေ အနိစ္စာနုပဿနာ ဝိပဿနာဗလံ …ပေ… ဇရာမရဏေ ပဋိနိဿဂ္ဂါနုပဿနာ ဝိပဿနာဗလံ.
ဝိပဿနာဗလန် တိ ကေနဋ္ဌေန ဝိပဿနာဗလံ? အနိစ္စာနုပဿနာယ နိစ္စသညာယ န ကမ္ပတီတိ— ဝိပဿနာဗလံ. ဒုက္ခာနုပဿနာယ သုခသညာယ န ကမ္ပတီတိ— ဝိပဿနာဗလံ. အနတ္တာနုပဿနာယ အတ္တသညာယ န ကမ္ပတီတိ— ဝိပဿနာဗလံ. နိဗ္ဗိဒါနုပဿနာယ နန္ဒိယာ န ကမ္ပတီတိ— ဝိပဿနာဗလံ. ဝိရာဂါနုပဿနာယ ရာဂေ န ကမ္ပတီတိ— ဝိပဿနာဗလံ. နိရောဓာနုပဿနာယ သမုဒယေ န ကမ္ပတီတိ— ဝိပဿနာဗလံ. ပဋိနိဿဂ္ဂါနုပဿနာယ အာဒါနေ န ကမ္ပတီတိ— ဝိပဿနာဗလံ. အဝိဇ္ဇာယ စ အဝိဇ္ဇာ သဟဂတကိလေသေ စ ခန္ဓေ စ န ကမ္ပတိ န စလတိ န ဝေဓတီတိ— ဝိပဿနာဗလံ. ဣဒံ ဝိပဿနာဗလံ.
တယော စ သင်္ခါရာနံ ပဋိပ္ပဿဒ္ဓိယာ တိ ကတမေသံ တိဏ္ဏန္နံ သင်္ခါရာနံ ပဋိပ္ပဿဒ္ဓိယာ? ဒုတိယံ ဈာနံ သမာပန္နဿ ဝိတက္ကဝိစာရာ ဝစီသင်္ခါရာ ပဋိပ္ပဿဒ္ဓါ ဟောန္တိ. စတုတ္ထံ ဈာနံ သမာပန္နဿ အဿာသပဿာသာ ကာယသင်္ခါရာ ပဋိပ္ပဿဒ္ဓါ ဟောန္တိ. သညာဝေဒယိတနိရောဓံ သမာပန္နဿ သညာ စ ဝေဒနာ စ စိတ္တသင်္ခါရာ ပဋိပ္ပဿဒ္ဓါ ဟောန္တိ. ဣမေသံ တိဏ္ဏန္နံ သင်္ခါရာနံ ပဋိပ္ပဿဒ္ဓိယာ.
သောဠသဟိ ဉာဏစရိယာဟီ တိ ကတမာဟိ သောဠသဟိ ဉာဏစရိယာဟိ? အနိစ္စာနုပဿနာ ဉာဏစရိယာ, ဒုက္ခာနုပဿနာ ဉာဏစရိယာ, အနတ္တာနုပဿနာ ဉာဏစရိယာ, နိဗ္ဗိဒါနုပဿနာ ဉာဏစရိယာ, ဝိရာဂါနုပဿနာ ဉာဏစရိယာ, နိရောဓာနုပဿနာ ဉာဏစရိယာ, ပဋိနိဿဂ္ဂါနုပဿနာ ဉာဏစရိယာ, ဝိဝဋ္ဋနာနုပဿနာ ဉာဏစရိယာ, သောတာပတ္တိမဂ္ဂေါ ဉာဏစရိယာ, သောတာပတ္တိဖလသမာပတ္တိ ဉာဏစရိယာ, သကဒါဂါမိမဂ္ဂေါ ဉာဏစရိယာ, သကဒါဂါမိဖလသမာပတ္တိ ဉာဏစရိယာ, အနာဂါမိမဂ္ဂေါ ဉာဏစရိယာ, အနာဂါမိဖလသမာပတ္တိ ဉာဏစရိယာ, အရဟတ္တမဂ္ဂေါ ဉာဏစရိယာ, အရဟတ္တဖလသမာပတ္တိ ဉာဏစရိယာ— ဣမာဟိ သောဠသဟိ ဉာဏစရိယာဟိ.
နဝဟိ သမာဓိစရိယာဟီ တိ ကတမာဟိ နဝဟိ သမာဓိစရိယာဟိ? ပဌမံ ဈာနံ သမာဓိစရိယာ, ဒုတိယံ ဈာနံ သမာဓိစရိယာ, တတိယံ ဈာနံ သမာဓိစရိယာ, စတုတ္ထံ ဈာနံ သမာဓိစရိယာ, အာကာသာနဉ္စာယတနသမာပတ္တိ …ပေ… ဝိညာဏဉ္စာယတနသမာပတ္တိ… အာကိဉ္စညာယတနသမာပတ္တိ… နေဝသညာနာသညာယတနသမာပတ္တိ သမာဓိစရိယာ. ပဌမံ ဈာနံ ပဋိလာဘတ္ထာယ ဝိတက္ကော စ ဝိစာရော စ ပီတိ စ သုခဉ္စ စိတ္တေကဂ္ဂတာ စ …ပေ… နေဝသညာနာသညာယတနသမာပတ္တိံ ပဋိလာဘတ္ထာယ ဝိတက္ကော စ ဝိစာရော စ ပီတိ စ သုခဉ္စ စိတ္တေကဂ္ဂတာ စ— ဣမာဟိ နဝဟိ သမာဓိစရိယာဟိ.
ဝသီ တိ ပဉ္စ ဝသိယော. အာဝဇ္ဇနဝသီ, သမာပဇ္ဇနဝသီ, အဓိဋ္ဌာနဝသီ, ဝုဋ္ဌာနဝသီ, ပစ္စဝေက္ခဏာဝသီ. ပဌမံ ဈာနံ ယတ္ထိစ္ဆကံ ယဒိစ္ဆကံ ယာဝတိစ္ဆကံ အာဝဇ္ဇတိ; အာဝဇ္ဇနာယ ဒန္ဓာယိတတ္တံ နတ္ထီတိ— အာဝဇ္ဇနဝသီ. ပဌမံ ဈာနံ ယတ္ထိစ္ဆကံ ယဒိစ္ဆကံ ယာဝတိစ္ဆကံ သမာပဇ္ဇတိ; သမာပဇ္ဇနာယ ဒန္ဓာယိတတ္တံ နတ္ထီတိ— သမာပဇ္ဇနဝသီ. ပဌမံ ဈာနံ ယတ္ထိစ္ဆကံ ယဒိစ္ဆကံ ယာဝတိစ္ဆကံ အဓိဋ္ဌာတိ; အဓိဋ္ဌာနေ ဒန္ဓာယိတတ္တံ နတ္ထီတိ— အဓိဋ္ဌာနဝသီ. ပဌမံ ဈာနံ ယတ္ထိစ္ဆကံ ယဒိစ္ဆကံ ယာဝတိစ္ဆကံ ဝုဋ္ဌာတိ; ဝုဋ္ဌာနေ ဒန္ဓာယိတတ္တံ နတ္ထီတိ— ဝုဋ္ဌာနဝသီ. ပဌမံ ဈာနံ ယတ္ထိစ္ဆကံ ယဒိစ္ဆကံ ယာဝတိစ္ဆကံ ပစ္စဝေက္ခတိ; ပစ္စဝေက္ခဏာယ ဒန္ဓာယိတတ္တံ နတ္ထီတိ— ပစ္စဝေက္ခဏာဝသီ.
ဒုတိယံ ဈာနံ …ပေ… နေဝသညာနာသညာယတနသမာပတ္တိံ ယတ္ထိစ္ဆကံ ယဒိစ္ဆကံ ယာဝတိစ္ဆကံ အာဝဇ္ဇတိ; အာဝဇ္ဇနာယ ဒန္ဓာယိတတ္တံ နတ္ထီတိ— အာဝဇ္ဇနဝသီ. နေဝသညာနာသညာယတနသမာပတ္တိံ ယတ္ထိစ္ဆကံ ယဒိစ္ဆကံ ယာဝတိစ္ဆကံ သမာပဇ္ဇတိ …ပေ… အဓိဋ္ဌာတိ… ဝုဋ္ဌာတိ… ပစ္စဝေက္ခတိ; ပစ္စဝေက္ခဏာယ ဒန္ဓာယိတတ္တံ နတ္ထီတိ— ပစ္စဝေက္ခဏာဝသီ. ဣမာ ပဉ္စ ဝသိယော. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “ဒွီဟိ ဗလေဟိ သမန္နာဂတတ္တာ တယော စ သင်္ခါရာနံ ပဋိပ္ပဿဒ္ဓိယာ သောဠသဟိ ဉာဏစရိယာဟိ နဝဟိ သမာဓိစရိယာဟိ ဝသီဘာဝတာ ပညာ နိရောဓသမာပတ္တိယာ ဉာဏံ”.
နိရောဓသမာပတ္တိဉာဏနိဒ္ဒေသော စတုတ္တိံသတိမော.