1.1.35 ပရိနိဗ္ဗာနဉာဏနိဒ္ဒေသ
- ဉာဏကထာ
ကထံ သမ္ပဇာနဿ ပဝတ္တပရိယာဒါနေ ပညာ ပရိနိဗ္ဗာနေ ဉာဏံ? ဣဓ သမ္ပဇာနော နေက္ခမ္မေန ကာမစ္ဆန္ဒဿ ပဝတ္တံ ပရိယာဒိယတိ, အဗျာပါဒေန ဗျာပါဒဿ ပဝတ္တံ ပရိယာဒိယတိ, အာလောကသညာယ ထိနမိဒ္ဓဿ ပဝတ္တံ ပရိယာဒိယတိ, အဝိက္ခေပေန ဥဒ္ဓစ္စဿ ပဝတ္တံ ပရိယာဒိယတိ, ဓမ္မဝဝတ္ထာနေန ဝိစိကိစ္ဆာယ …ပေ… ဉာဏေန အဝိဇ္ဇာယ… ပါမောဇ္ဇေန အရတိယာ… ပဌမေန ဈာနေန နီဝရဏာနံ ပဝတ္တံ ပရိယာဒိယတိ …ပေ… အရဟတ္တမဂ္ဂေန သဗ္ဗကိလေသာနံ ပဝတ္တံ ပရိယာဒိယတိ.
အထ ဝါ ပန သမ္ပဇာနဿ အနုပါဒိသေသာယ နိဗ္ဗာနဓာတုယာ ပရိနိဗ္ဗာယန္တဿ ဣဒဉ္စေဝ စက္ခုပဝတ္တံ ပရိယာဒိယတိ, အညဉ္စ စက္ခုပဝတ္တံ န ဥပ္ပဇ္ဇတိ. ဣဒဉ္စေဝ သောတပဝတ္တံ …ပေ… ဃာနပဝတ္တံ… ဇိဝှါပဝတ္တံ… ကာယပဝတ္တံ… မနောပဝတ္တံ ပရိယာဒိယတိ, အညဉ္စ မနောပဝတ္တံ န ဥပ္ပဇ္ဇတိ. ဣဒံ သမ္ပဇာနဿ ပဝတ္တပရိယာဒါနေ ပညာ ပရိနိဗ္ဗာနေ ဉာဏံ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “သမ္ပဇာနဿ ပဝတ္တပရိယာဒါနေ ပညာ ပရိနိဗ္ဗာနေ ဉာဏံ”.
ပရိနိဗ္ဗာနဉာဏနိဒ္ဒေသော ပဉ္စတိံသတိမော.