1.1.37 သလ္လေခဋ္ဌဉာဏနိဒ္ဒေသ
- ဉာဏကထာ
ကထံ ပုထုနာနတ္တတေဇပရိယာဒါနေ ပညာ သလ္လေခဋ္ဌေ ဉာဏံ? ပုထူ တိ— ရာဂေါ ပုထု, ဒေါသော ပုထု, မောဟော ပုထု, ကောဓော …ပေ… ဥပနာဟော… မက္ခော… ပဠာသော… ဣဿာ… မစ္ဆရိယံ… မာယာ… သာဌေယျံ… ထမ္ဘော… သာရမ္ဘော… မာနော… အတိမာနော… မဒေါ… ပမာဒေါ… သဗ္ဗေ ကိလေသာ… သဗ္ဗေ ဒုစ္စရိတာ… သဗ္ဗေ အဘိသင်္ခါရာ… သဗ္ဗေ ဘဝဂါမိကမ္မာ.
နာနတ္တေကတ္တန် တိ ကာမစ္ဆန္ဒော နာနတ္တံ, နေက္ခမ္မံ ဧကတ္တံ. ဗျာပါဒေါ နာနတ္တံ, အဗျာပါဒေါ ဧကတ္တံ. ထိနမိဒ္ဓံ နာနတ္တံ, အာလောကသညာ ဧကတ္တံ. ဥဒ္ဓစ္စံ နာနတ္တံ, အဝိက္ခေပေါ ဧကတ္တံ. ဝိစိကိစ္ဆာ နာနတ္တံ, ဓမ္မဝဝတ္ထာနံ ဧကတ္တံ. အဝိဇ္ဇာ နာနတ္တံ, ဉာဏံ ဧကတ္တံ. အရတိ နာနတ္တံ, ပါမောဇ္ဇံ ဧကတ္တံ. နီဝရဏာ နာနတ္တံ, ပဌမံ ဈာနံ ဧကတ္တံ …ပေ… သဗ္ဗေ ကိလေသာ နာနတ္တံ, အရဟတ္တမဂ္ဂေါ ဧကတ္တံ.
တေဇော တိ ပဉ္စ တေဇာ— စရဏတေဇော, ဂုဏတေဇော, ပညာတေဇော, ပုညတေဇော, ဓမ္မတေဇော. စရဏတေဇေန တေဇိတတ္တာ ဒုဿီလျတေဇံ ပရိယာဒိယတိ. ဂုဏတေဇေန တေဇိတတ္တာ အဂုဏတေဇံ ပရိယာဒိယတိ. ပညာတေဇေန တေဇိတတ္တာ ဒုပ္ပညတေဇံ ပရိယာဒိယတိ. ပုညတေဇေန တေဇိတတ္တာ အပုညတေဇံ ပရိယာဒိယတိ. ဓမ္မတေဇေန တေဇိတတ္တာ အဓမ္မတေဇံ ပရိယာဒိယတိ.
သလ္လေခေါ တိ ကာမစ္ဆန္ဒော အသလ္လေခေါ, နေက္ခမ္မံ သလ္လေခေါ. ဗျာပါဒေါ အသလ္လေခေါ, အဗျာပါဒေါ သလ္လေခေါ. ထိနမိဒ္ဓံ အသလ္လေခေါ, အာလောကသညာ သလ္လေခေါ. ဥဒ္ဓစ္စံ အသလ္လေခေါ, အဝိက္ခေပေါ သလ္လေခေါ. ဝိစိကိစ္ဆာ အသလ္လေခေါ, ဓမ္မဝဝတ္ထာနံ သလ္လေခေါ. အဝိဇ္ဇာ အသလ္လေခေါ, ဉာဏံ သလ္လေခေါ. အရတိ အသလ္လေခေါ, ပါမောဇ္ဇံ သလ္လေခေါ. နီဝရဏာ အသလ္လေခေါ, ပဌမံ ဈာနံ သလ္လေခေါ …ပေ… သဗ္ဗကိလေသာ အသလ္လေခေါ, အရဟတ္တမဂ္ဂေါ သလ္လေခေါ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “ပုထုနာနတ္တတေဇပရိယာဒါနေ ပညာ သလ္လေခဋ္ဌေ ဉာဏံ”.
သလ္လေခဋ္ဌဉာဏနိဒ္ဒေသော သတ္တတိံသတိမော.