1.1.40 ဒဿနဝိသုဒ္ဓိဉာဏနိဒ္ဒေသ
- ဉာဏကထာ
ကထံ သဗ္ဗဓမ္မာနံ ဧကသင်္ဂဟတာနာနတ္တေကတ္တပဋိဝေဓေ ပညာ ဒဿနဝိသုဒ္ဓိဉာဏံ? သဗ္ဗဓမ္မာနန် တိ ပဉ္စက္ခန္ဓာ …ပေ… အပရိယာပန္နာ ဓမ္မာ.
ဧကသင်္ဂဟတာ တိ ဒွါဒသဟိ အာကာရေဟိ သဗ္ဗေ ဓမ္မာ ဧကသင်္ဂဟိတာ. တထဋ္ဌေန, အနတ္တဋ္ဌေန, သစ္စဋ္ဌေန, ပဋိဝေဓဋ္ဌေန, အဘိဇာနနဋ္ဌေန, ပရိဇာနနဋ္ဌေန, ဓမ္မဋ္ဌေန, ဓာတုဋ္ဌေန, ဉာတဋ္ဌေန, သစ္ဆိကိရိယဋ္ဌေန, ဖုသနဋ္ဌေန, အဘိသမယဋ္ဌေန— ဣမေဟိ ဒွါဒသဟိ အာကာရေဟိ သဗ္ဗေ ဓမ္မာ ဧကသင်္ဂဟိတာ.
နာနတ္တေကတ္တန် တိ ကာမစ္ဆန္ဒော နာနတ္တံ, နေက္ခမ္မံ ဧကတ္တံ …ပေ… သဗ္ဗကိလေသာ နာနတ္တံ, အရဟတ္တမဂ္ဂေါ ဧကတ္တံ.
ပဋိဝေဓေ တိ ဒုက္ခသစ္စံ ပရိညာပဋိဝေဓံ ပဋိဝိဇ္ဈတိ. သမုဒယသစ္စံ ပဟာနပဋိဝေဓံ ပဋိဝိဇ္ဈတိ. နိရောဓသစ္စံ သစ္ဆိကိရိယာပဋိဝေဓံ ပဋိဝိဇ္ဈတိ. မဂ္ဂသစ္စံ ဘာဝနာပဋိဝေဓံ ပဋိဝိဇ္ဈတိ.
ဒဿနဝိသုဒ္ဓီ တိ သောတာပတ္တိမဂ္ဂက္ခဏေ ဒဿနံ ဝိသုဇ္ဈတိ; သောတာပတ္တိဖလက္ခဏေ ဒဿနံ ဝိသုဒ္ဓံ. သကဒါဂါမိမဂ္ဂက္ခဏေ ဒဿနံ ဝိသုဇ္ဈတိ; သကဒါဂါမိဖလက္ခဏေ ဒဿနံ ဝိသုဒ္ဓံ. အနာဂါမိမဂ္ဂက္ခဏေ ဒဿနံ ဝိသုဇ္ဈတိ; အနာဂါမိဖလက္ခဏေ ဒဿနံ ဝိသုဒ္ဓံ. အရဟတ္တမဂ္ဂက္ခဏေ ဒဿနံ ဝိသုဇ္ဈတိ; အရဟတ္တဖလက္ခဏေ ဒဿနံ ဝိသုဒ္ဓံ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “သဗ္ဗဓမ္မာနံ ဧကသင်္ဂဟတာနာနတ္တေကတ္တပဋိဝေဓေ ပညာ ဒဿနဝိသုဒ္ဓိဉာဏံ”.
ဒဿနဝိသုဒ္ဓိဉာဏနိဒ္ဒေသော စတ္တာလီသမော.