1.1.41 ခန္တိဉာဏနိဒ္ဒေသ
Review
- ဉာဏကထာ
92.
604
ကထံ ဝိဒိတတ္တာ ပညာ ခန္တိဉာဏံ? ရူပံ အနိစ္စတော ဝိဒိတံ, ရူပံ ဒုက္ခတော ဝိဒိတံ, ရူပံ အနတ္တတော ဝိဒိတံ. ယံ ယံ ဝိဒိတံ တံ တံ ခမတီတိ— ဝိဒိတတ္တာ ပညာ ခန္တိဉာဏံ. ဝေဒနာ …ပေ… သညာ… သင်္ခါရာ… ဝိညာဏံ… စက္ခု …ပေ… ဇရာမရဏံ အနိစ္စတော ဝိဒိတံ, ဇရာမရဏံ ဒုက္ခတော ဝိဒိတံ, ဇရာမရဏံ အနတ္တတော ဝိဒိတံ. ယံ ယံ ဝိဒိတံ တံ တံ ခမတီတိ— ဝိဒိတတ္တာ ပညာ ခန္တိဉာဏံ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “ဝိဒိတတ္တာ ပညာ ခန္တိဉာဏံ”.
605
ခန္တိဉာဏနိဒ္ဒေသော ဧကစတ္တာလီသမော.