1.1.43 ပဒေသဝိဟာရဉာဏနိဒ္ဒေသ
- ဉာဏကထာ
ကထံ သမောဒဟနေ ပညာ ပဒေသဝိဟာရေ ဉာဏံ? မိစ္ဆာဒိဋ္ဌိပစ္စယာပိ ဝေဒယိတံ, မိစ္ဆာဒိဋ္ဌိဝူပသမပစ္စယာပိ ဝေဒယိတံ. သမ္မာဒိဋ္ဌိပစ္စယာပိ ဝေဒယိတံ, သမ္မာဒိဋ္ဌိဝူပသမပစ္စယာပိ ဝေဒယိတံ. မိစ္ဆာသင်္ကပ္ပပစ္စယာပိ ဝေဒယိတံ, မိစ္ဆာသင်္ကပ္ပဝူပသမပစ္စယာပိ ဝေဒယိတံ. သမ္မာသင်္ကပ္ပပစ္စယာပိ ဝေဒယိတံ, သမ္မာသင်္ကပ္ပဝူပသမပစ္စယာပိ ဝေဒယိတံ …ပေ… မိစ္ဆာဝိမုတ္တိပစ္စယာပိ ဝေဒယိတံ, မိစ္ဆာဝိမုတ္တိဝူပသမပစ္စယာပိ ဝေဒယိတံ. သမ္မာဝိမုတ္တိပစ္စယာပိ ဝေဒယိတံ, သမ္မာဝိမုတ္တိဝူပသမပစ္စယာပိ ဝေဒယိတံ. ဆန္ဒပစ္စယာပိ ဝေဒယိတံ, ဆန္ဒဝူပသမပစ္စယာပိ ဝေဒယိတံ. ဝိတက္ကပစ္စယာပိ ဝေဒယိတံ, ဝိတက္ကဝူပသမပစ္စယာပိ ဝေဒယိတံ. သညာပစ္စယာပိ ဝေဒယိတံ, သညာဝူပသမပစ္စယာပိ ဝေဒယိတံ.
ဆန္ဒော စ အဝူပသန္တော ဟောတိ, ဝိတက္ကော စ အဝူပသန္တော ဟောတိ, သညာ စ အဝူပသန္တာ ဟောတိ, တပ္ပစ္စယာပိ ဝေဒယိတံ. ဆန္ဒော စ ဝူပသန္တော ဟောတိ, ဝိတက္ကော စ အဝူပသန္တော ဟောတိ, သညာ စ အဝူပသန္တာ ဟောတိ, တပ္ပစ္စယာပိ ဝေဒယိတံ. ဆန္ဒော စ ဝူပသန္တော ဟောတိ, ဝိတက္ကော စ ဝူပသန္တော ဟောတိ, သညာ စ အဝူပသန္တာ ဟောတိ, တပ္ပစ္စယာပိ ဝေဒယိတံ. ဆန္ဒော စ ဝူပသန္တော ဟောတိ, ဝိတက္ကော စ ဝူပသန္တော ဟောတိ, သညာ စ ဝူပသန္တာ ဟောတိ, တပ္ပစ္စယာပိ ဝေဒယိတံ. အပ္ပတ္တဿ ပတ္တိယာ အတ္ထိ အာယဝံ, တသ္မိမ္ပိ ဌာနေ အနုပ္ပတ္တေ တပ္ပစ္စယာပိ ဝေဒယိတံ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “သမောဒဟနေ ပညာ ပဒေသဝိဟာရေ ဉာဏံ”.
ပဒေသဝိဟာရဉာဏနိဒ္ဒေသော တေစတ္တာလီသမော.