1.1.55 အာသဝက္ခယဉာဏနိဒ္ဒေသ
- ဉာဏကထာ
ကထံ စတုသဋ္ဌိယာ အာကာရေဟိ တိဏ္ဏန္နံ ဣန္ဒြိယာနံ ဝသိဘာဝတာ ပညာ အာသဝါနံ ခယေ ဉာဏံ? ကတမေသံ တိဏ္ဏန္နံ ဣန္ဒြိယာနံ? အနညာတညဿာမီတိန္ဒြိယဿ အညိန္ဒြိယဿ အညာတာဝိန္ဒြိယဿ.
အနညာတညဿာမီတိန္ဒြိယံ ကတိ ဌာနာနိ ဂစ္ဆတိ, အညိန္ဒြိယံ ကတိ ဌာနာနိ ဂစ္ဆတိ, အညာတာဝိန္ဒြိယံ ကတိ ဌာနာနိ ဂစ္ဆတိ? အနညာတညဿာမီတိန္ဒြိယံ ဧကံ ဌာနံ ဂစ္ဆတိ— သောတာပတ္တိမဂ္ဂံ. အညိန္ဒြိယံ ဆ ဌာနာနိ ဂစ္ဆတိ— သောတာပတ္တိဖလံ, သကဒါဂါမိမဂ္ဂံ, သကဒါဂါမိဖလံ, အနာဂါမိမဂ္ဂံ, အနာဂါမိဖလံ, အရဟတ္တမဂ္ဂံ. အညာတာဝိန္ဒြိယံ ဧကံ ဌာနံ ဂစ္ဆတိ— အရဟတ္တဖလံ.
သောတာပတ္တိမဂ္ဂက္ခဏေ အနညာတညဿာမီတိန္ဒြိယဿ သဒ္ဓိန္ဒြိယံ အဓိမောက္ခပရိဝါရံ ဟောတိ, ဝီရိယိန္ဒြိယံ ပဂ္ဂဟပရိဝါရံ ဟောတိ, သတိန္ဒြိယံ ဥပဋ္ဌာနပရိဝါရံ ဟောတိ, သမာဓိန္ဒြိယံ အဝိက္ခေပပရိဝါရံ ဟောတိ, ပညိန္ဒြိယံ ဒဿနပရိဝါရံ ဟောတိ, မနိန္ဒြိယံ ဝိဇာနနပရိဝါရံ ဟောတိ, သောမနဿိန္ဒြိယံ အဘိသန္ဒနပရိဝါရံ ဟောတိ, ဇီဝိတိန္ဒြိယံ ပဝတ္တသန္တတာဓိပတေယျပရိဝါရံ ဟောတိ. သောတာပတ္တိမဂ္ဂက္ခဏေ ဇာတာ ဓမ္မာ ဌပေတွာ စိတ္တသမုဋ္ဌာနံ ရူပံ သဗ္ဗေဝ ကုသလာ ဟောန္တိ, သဗ္ဗေဝ အနာသဝါ ဟောန္တိ, သဗ္ဗေဝ နိယျာနိကာ ဟောန္တိ, သဗ္ဗေဝ အပစယဂါမိနော ဟောန္တိ, သဗ္ဗေဝ လောကုတ္တရာ ဟောန္တိ, သဗ္ဗေဝ နိဗ္ဗာနာရမ္မဏာ ဟောန္တိ. သောတာပတ္တိမဂ္ဂက္ခဏေ အနညာတညဿာမီတိန္ဒြိယဿ ဣမာနိ အဋ္ဌိန္ဒြိယာနိ သဟဇာတပရိဝါရာ ဟောန္တိ, အညမညပရိဝါရာ ဟောန္တိ, နိဿယပရိဝါရာ ဟောန္တိ, သမ္ပယုတ္တပရိဝါရာ ဟောန္တိ, သဟဂတာ ဟောန္တိ, သဟဇာတာ ဟောန္တိ, သံသဋ္ဌာ ဟောန္တိ, သမ္ပယုတ္တာ ဟောန္တိ. တေဝ တဿ အာကာရာ စေဝ ဟောန္တိ ပရိဝါရာ စ.
သောတာပတ္တိဖလက္ခဏေ အညိန္ဒြိယဿ သဒ္ဓိန္ဒြိယံ အဓိမောက္ခပရိဝါရံ ဟောတိ, ဝီရိယိန္ဒြိယံ ပဂ္ဂဟပရိဝါရံ ဟောတိ, သတိန္ဒြိယံ ဥပဋ္ဌာနပရိဝါရံ ဟောတိ, သမာဓိန္ဒြိယံ အဝိက္ခေပပရိဝါရံ ဟောတိ, ပညိန္ဒြိယံ ဒဿနပရိဝါရံ ဟောတိ, မနိန္ဒြိယံ ဝိဇာနနပရိဝါရံ ဟောတိ, သောမနဿိန္ဒြိယံ အဘိသန္ဒနပရိဝါရံ ဟောတိ, ဇီဝိတိန္ဒြိယံ ပဝတ္တသန္တတာဓိပတေယျပရိဝါရံ ဟောတိ. သောတာပတ္တိဖလက္ခဏေ ဇာတာ ဓမ္မာ သဗ္ဗေဝ အဗျာကတာ ဟောန္တိ, ဌပေတွာ စိတ္တသမုဋ္ဌာနံ ရူပံ သဗ္ဗေဝ အနာသဝါ ဟောန္တိ, သဗ္ဗေဝ လောကုတ္တရာ ဟောန္တိ, သဗ္ဗေဝ နိဗ္ဗာနာရမ္မဏာ ဟောန္တိ. သောတာပတ္တိဖလက္ခဏေ အညိန္ဒြိယဿ ဣမာနိ အဋ္ဌိန္ဒြိယာနိ သဟဇာတပရိဝါရာ ဟောန္တိ, အညမညပရိဝါရာ ဟောန္တိ, နိဿယပရိဝါရာ ဟောန္တိ, သမ္ပယုတ္တပရိဝါရာ ဟောန္တိ, သဟဂတာ ဟောန္တိ, သဟဇာတာ ဟောန္တိ, သံသဋ္ဌာ ဟောန္တိ, သမ္ပယုတ္တာ ဟောန္တိ. တေဝ တဿ အာကာရာ စေဝ ဟောန္တိ ပရိဝါရာ စ.
သကဒါဂါမိမဂ္ဂက္ခဏေ …ပေ… သကဒါဂါမိဖလက္ခဏေ …ပေ… အနာဂါမိမဂ္ဂက္ခဏေ …ပေ… အနာဂါမိဖလက္ခဏေ …ပေ… အရဟတ္တမဂ္ဂက္ခဏေ အညိန္ဒြိယဿ သဒ္ဓိန္ဒြိယံ အဓိမောက္ခပရိဝါရံ ဟောတိ …ပေ… ဇီဝိတိန္ဒြိယံ ပဝတ္တသန္တတာဓိပတေယျပရိဝါရံ ဟောတိ. အရဟတ္တမဂ္ဂက္ခဏေ ဇာတာ ဓမ္မာ ဌပေတွာ စိတ္တသမုဋ္ဌာနံ ရူပံ သဗ္ဗေဝ ကုသလာ ဟောန္တိ, သဗ္ဗေဝ အနာသဝါ ဟောန္တိ, သဗ္ဗေဝ နိယျာနိကာ ဟောန္တိ, သဗ္ဗေဝ အပစယဂါမိနော ဟောန္တိ, သဗ္ဗေဝ လောကုတ္တရာ ဟောန္တိ, သဗ္ဗေဝ နိဗ္ဗာနာရမ္မဏာ ဟောန္တိ. အရဟတ္တမဂ္ဂက္ခဏေ အညိန္ဒြိယဿ ဣမာနိ အဋ္ဌိန္ဒြိယာနိ သဟဇာတပရိဝါရာ ဟောန္တိ, အညမညပရိဝါရာ ဟောန္တိ, နိဿယပရိဝါရာ ဟောန္တိ, သမ္ပယုတ္တပရိဝါရာ ဟောန္တိ, သဟဂတာ ဟောန္တိ, သဟဇာတာ ဟောန္တိ, သံသဋ္ဌာ ဟောန္တိ, သမ္ပယုတ္တာ ဟောန္တိ. တေဝ တဿ အာကာရာ စေဝ ဟောန္တိ ပရိဝါရာ စ.
အရဟတ္တဖလက္ခဏေ အညာတာဝိန္ဒြိယဿ သဒ္ဓိန္ဒြိယံ အဓိမောက္ခပရိဝါရံ ဟောတိ, ဝီရိယိန္ဒြိယံ ပဂ္ဂဟပရိဝါရံ ဟောတိ, သတိန္ဒြိယံ ဥပဋ္ဌာနပရိဝါရံ ဟောတိ, သမာဓိန္ဒြိယံ အဝိက္ခေပပရိဝါရံ ဟောတိ, ပညိန္ဒြိယံ ဒဿနပရိဝါရံ ဟောတိ, မနိန္ဒြိယံ ဝိဇာနနပရိဝါရံ ဟောတိ, သောမနဿိန္ဒြိယံ အဘိသန္ဒနပရိဝါရံ ဟောတိ, ဇီဝိတိန္ဒြိယံ ပဝတ္တသန္တတာဓိပတေယျပရိဝါရံ ဟောတိ. အရဟတ္တဖလက္ခဏေ ဇာတာ ဓမ္မာ သဗ္ဗေဝ အဗျာကတာ ဟောန္တိ, ဌပေတွာ စိတ္တသမုဋ္ဌာနံ ရူပံ သဗ္ဗေဝ အနာသဝါ ဟောန္တိ, သဗ္ဗေဝ လောကုတ္တရာ ဟောန္တိ, သဗ္ဗေဝ နိဗ္ဗာနာရမ္မဏာ ဟောန္တိ. အရဟတ္တဖလက္ခဏေ အညာတာဝိန္ဒြိယဿ ဣမာနိ အဋ္ဌိန္ဒြိယာနိ သဟဇာတပရိဝါရာ ဟောန္တိ, အညမညပရိဝါရာ ဟောန္တိ, နိဿယပရိဝါရာ ဟောန္တိ, သမ္ပယုတ္တပရိဝါရာ ဟောန္တိ, သဟဂတာ ဟောန္တိ, သဟဇာတာ ဟောန္တိ, သံသဋ္ဌာ ဟောန္တိ, သမ္ပယုတ္တာ ဟောန္တိ. တေဝ တဿ အာကာရာ စေဝ ဟောန္တိ ပရိဝါရာ စ. ဣတိ ဣမာနိ အဋ္ဌဋ္ဌကာနိ စတုသဋ္ဌိ ဟောန္တိ.
အာသဝါ တိ ကတမေ တေ အာသဝါ? ကာမာသဝေါ, ဘဝါသဝေါ, ဒိဋ္ဌာသဝေါ, အဝိဇ္ဇာသဝေါ. ကတ္ထေတေ အာသဝါ ခီယန္တိ? သောတာပတ္တိမဂ္ဂေန အနဝသေသော ဒိဋ္ဌာသဝေါ ခီယတိ, အပါယဂမနီယော ကာမာသဝေါ ခီယတိ, အပါယဂမနီယော ဘဝါသဝေါ ခီယတိ, အပါယဂမနီယော အဝိဇ္ဇာသဝေါ ခီယတိ. ဧတ္ထေတေ အာသဝါ ခီယန္တိ. သကဒါဂါမိမဂ္ဂေန ဩဠာရိကော ကာမာသဝေါ ခီယတိ, တဒေကဋ္ဌော ဘဝါသဝေါ ခီယတိ, တဒေကဋ္ဌော အဝိဇ္ဇာသဝေါ ခီယတိ. ဧတ္ထေတေ အာသဝါ ခီယန္တိ. အနာဂါမိမဂ္ဂေန အနဝသေသော ကာမာသဝေါ ခီယတိ, တဒေကဋ္ဌော ဘဝါသဝေါ ခီယတိ, တဒေကဋ္ဌော အဝိဇ္ဇာသဝေါ ခီယတိ. ဧတ္ထေတေ အာသဝါ ခီယန္တိ. အရဟတ္တမဂ္ဂေန အနဝသေသော ဘဝါသဝေါ ခီယတိ, အနဝသေသော အဝိဇ္ဇာသဝေါ ခီယတိ. ဧတ္ထေတေ အာသဝါ ခီယန္တိ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “စတုသဋ္ဌိယာ အာကာရေဟိ တိဏ္ဏန္နံ ဣန္ဒြိယာနံ ဝသိဘာဝတာ ပညာ အာသဝါနံ ခယေ ဉာဏံ”.
အာသဝက္ခယဉာဏနိဒ္ဒေသော ပဉ္စပညာသမော.