1.1.6 ဥဒယဗ္ဗယဉာဏနိဒ္ဒေသ
- ဉာဏကထာ
ကထံ ပစ္စုပ္ပန္နာနံ ဓမ္မာနံ ဝိပရိဏာမာနုပဿနေ ပညာ ဥဒယဗ္ဗယာနုပဿနေ ဉာဏံ? ဇာတံ ရူပံ ပစ္စုပ္ပန္နံ, တဿ နိဗ္ဗတ္တိလက္ခဏံ ဥဒယော, ဝိပရိဏာမလက္ခဏံ ဝယော, အနုပဿနာ ဉာဏံ. ဇာတာ ဝေဒနာ… ဇာတာ သညာ… ဇာတာ သင်္ခါရာ… ဇာတံ ဝိညာဏံ… ဇာတံ စက္ခု …ပေ… ဇာတော ဘဝေါ ပစ္စုပ္ပန္နော, တဿ နိဗ္ဗတ္တိလက္ခဏံ ဥဒယော, ဝိပရိဏာမလက္ခဏံ ဝယော, အနုပဿနာ ဉာဏံ.
ပဉ္စန္နံ ခန္ဓာနံ ဥဒယံ ပဿန္တော ကတိ လက္ခဏာနိ ပဿတိ, ဝယံ ပဿန္တော ကတိ လက္ခဏာနိ ပဿတိ, ဥဒယဗ္ဗယံ ပဿန္တော ကတိ လက္ခဏာနိ ပဿတိ? ပဉ္စန္နံ ခန္ဓာနံ ဥဒယံ ပဿန္တော ပဉ္စဝီသတိ လက္ခဏာနိ ပဿတိ, ဝယံ ပဿန္တော ပဉ္စဝီသတိ လက္ခဏာနိ ပဿတိ; ဥဒယဗ္ဗယံ ပဿန္တော ပညာသ လက္ခဏာနိ ပဿတိ.
ရူပက္ခန္ဓဿ ဥဒယံ ပဿန္တော ကတိ လက္ခဏာနိ ပဿတိ, ဝယံ ပဿန္တော ကတိ လက္ခဏာနိ ပဿတိ, ဥဒယဗ္ဗယံ ပဿန္တော ကတိ လက္ခဏာနိ ပဿတိ? ဝေဒနာက္ခန္ဓဿ …ပေ… သညာက္ခန္ဓဿ …ပေ… သင်္ခါရက္ခန္ဓဿ …ပေ… ဝိညာဏက္ခန္ဓဿ ဥဒယံ ပဿန္တော ကတိ လက္ခဏာနိ ပဿတိ, ဝယံ ပဿန္တော ကတိ လက္ခဏာနိ ပဿတိ, ဥဒယဗ္ဗယံ ပဿန္တော ကတိ လက္ခဏာနိ ပဿတိ? ရူပက္ခန္ဓဿ ဥဒယံ ပဿန္တော ပဉ္စ လက္ခဏာနိ ပဿတိ, ဝယံ ပဿန္တော ပဉ္စ လက္ခဏာနိ ပဿတိ; ဥဒယဗ္ဗယံ ပဿန္တော ဒသ လက္ခဏာနိ ပဿတိ. ဝေဒနာက္ခန္ဓဿ …ပေ… သညာက္ခန္ဓဿ… သင်္ခါရက္ခန္ဓဿ… ဝိညာဏက္ခန္ဓဿ ဥဒယံ ပဿန္တော ပဉ္စ လက္ခဏာနိ ပဿတိ, ဝယံ ပဿန္တော ပဉ္စ လက္ခဏာနိ ပဿတိ; ဥဒယဗ္ဗယံ ပဿန္တော ဒသ လက္ခဏာနိ ပဿတိ.
ရူပက္ခန္ဓဿ ဥဒယံ ပဿန္တော ကတမာနိ ပဉ္စ လက္ခဏာနိ ပဿတိ? အဝိဇ္ဇာသမုဒယာ ရူပသမုဒယောတိ— ပစ္စယသမုဒယဋ္ဌေန ရူပက္ခန္ဓဿ ဥဒယံ ပဿတိ. တဏှာသမုဒယာ ရူပသမုဒယောတိ— ပစ္စယသမုဒယဋ္ဌေန ရူပက္ခန္ဓဿ ဥဒယံ ပဿတိ. ကမ္မသမုဒယာ ရူပသမုဒယောတိ— ပစ္စယသမုဒယဋ္ဌေန ရူပက္ခန္ဓဿ ဥဒယံ ပဿတိ. အာဟာရသမုဒယာ ရူပသမုဒယောတိ— ပစ္စယသမုဒယဋ္ဌေန ရူပက္ခန္ဓဿ ဥဒယံ ပဿတိ. နိဗ္ဗတ္တိလက္ခဏံ ပဿန္တောပိ ရူပက္ခန္ဓဿ ဥဒယံ ပဿတိ. ရူပက္ခန္ဓဿ ဥဒယံ ပဿန္တော ဣမာနိ ပဉ္စ လက္ခဏာနိ ပဿတိ.
ဝယံ ပဿန္တော ကတမာနိ ပဉ္စ လက္ခဏာနိ ပဿတိ? အဝိဇ္ဇာနိရောဓာ ရူပနိရောဓောတိ— ပစ္စယနိရောဓဋ္ဌေန ရူပက္ခန္ဓဿ ဝယံ ပဿတိ. တဏှာနိရောဓာ ရူပနိရောဓောတိ— ပစ္စယနိရောဓဋ္ဌေန ရူပက္ခန္ဓဿ ဝယံ ပဿတိ. ကမ္မနိရောဓာ ရူပနိရောဓောတိ— ပစ္စယနိရောဓဋ္ဌေန ရူပက္ခန္ဓဿ ဝယံ ပဿတိ. အာဟာရနိရောဓာ ရူပနိရောဓောတိ— ပစ္စယနိရောဓဋ္ဌေန ရူပက္ခန္ဓဿ ဝယံ ပဿတိ. ဝိပရိဏာမလက္ခဏံ ပဿန္တောပိ ရူပက္ခန္ဓဿ ဝယံ ပဿတိ. ရူပက္ခန္ဓဿ ဝယံ ပဿန္တော ဣမာနိ ပဉ္စ လက္ခဏာနိ ပဿတိ. ဥဒယဗ္ဗယံ ပဿန္တော ဣမာနိ ဒသ လက္ခဏာနိ ပဿတိ.
ဝေဒနာက္ခန္ဓဿ ဥဒယံ ပဿန္တော ကတမာနိ ပဉ္စ လက္ခဏာနိ ပဿတိ? အဝိဇ္ဇာသမုဒယာ ဝေဒနာသမုဒယောတိ— ပစ္စယသမုဒယဋ္ဌေန ဝေဒနာက္ခန္ဓဿ ဥဒယံ ပဿတိ. တဏှာသမုဒယာ ဝေဒနာသမုဒယောတိ— ပစ္စယသမုဒယဋ္ဌေန ဝေဒနာက္ခန္ဓဿ ဥဒယံ ပဿတိ. ကမ္မသမုဒယာ ဝေဒနာသမုဒယောတိ— ပစ္စယသမုဒယဋ္ဌေန ဝေဒနာက္ခန္ဓဿ ဥဒယံ ပဿတိ. ဖဿသမုဒယာ ဝေဒနာသမုဒယောတိ— ပစ္စယသမုဒယဋ္ဌေန ဝေဒနာက္ခန္ဓဿ ဥဒယံ ပဿတိ. နိဗ္ဗတ္တိလက္ခဏံ ပဿန္တောပိ ဝေဒနာက္ခန္ဓဿ ဥဒယံ ပဿတိ. ဝေဒနာက္ခန္ဓဿ ဥဒယံ ပဿန္တော ဣမာနိ ပဉ္စ လက္ခဏာနိ ပဿတိ.
ဝယံ ပဿန္တော ကတမာနိ ပဉ္စ လက္ခဏာနိ ပဿတိ? အဝိဇ္ဇာနိရောဓာ ဝေဒနာနိရောဓောတိ— ပစ္စယနိရောဓဋ္ဌေန ဝေဒနာက္ခန္ဓဿ ဝယံ ပဿတိ. တဏှာနိရောဓာ ဝေဒနာနိရောဓောတိ— ပစ္စယနိရောဓဋ္ဌေန ဝေဒနာက္ခန္ဓဿ ဝယံ ပဿတိ. ကမ္မနိရောဓာ ဝေဒနာနိရောဓောတိ— ပစ္စယနိရောဓဋ္ဌေန ဝေဒနာက္ခန္ဓဿ ဝယံ ပဿတိ. ဖဿနိရောဓာ ဝေဒနာနိရောဓောတိ— ပစ္စယနိရောဓဋ္ဌေန ဝေဒနာက္ခန္ဓဿ ဝယံ ပဿတိ. ဝိပရိဏာမလက္ခဏံ ပဿန္တောပိ ဝေဒနာက္ခန္ဓဿ ဝယံ ပဿတိ. ဝေဒနာက္ခန္ဓဿ ဝယံ ပဿန္တော ဣမာနိ ပဉ္စ လက္ခဏာနိ ပဿတိ. ဥဒယဗ္ဗယံ ပဿန္တော ဣမာနိ ဒသ လက္ခဏာနိ ပဿတိ.
သညာက္ခန္ဓဿ …ပေ… သင်္ခါရက္ခန္ဓဿ …ပေ… ဝိညာဏက္ခန္ဓဿ ဥဒယံ ပဿန္တော ကတမာနိ ပဉ္စ လက္ခဏာနိ ပဿတိ? အဝိဇ္ဇာသမုဒယာ ဝိညာဏသမုဒယောတိ— ပစ္စယသမုဒယဋ္ဌေန ဝိညာဏက္ခန္ဓဿ ဥဒယံ ပဿတိ. တဏှာသမုဒယာ ဝိညာဏသမုဒယောတိ ပစ္စယသမုဒယဋ္ဌေန ဝိညာဏက္ခန္ဓဿ ဥဒယံ ပဿတိ. ကမ္မသမုဒယာ ဝိညာဏသမုဒယောတိ— ပစ္စယသမုဒယဋ္ဌေန ဝိညာဏက္ခန္ဓဿ ဥဒယံ ပဿတိ. နာမရူပသမုဒယာ ဝိညာဏသမုဒယောတိ— ပစ္စယသမုဒယဋ္ဌေန ဝိညာဏက္ခန္ဓဿ ဥဒယံ ပဿတိ. နိဗ္ဗတ္တိလက္ခဏံ ပဿန္တောပိ ဝိညာဏက္ခန္ဓဿ ဥဒယံ ပဿတိ. ဝိညာဏက္ခန္ဓဿ ဥဒယံ ပဿန္တော ဣမာနိ ပဉ္စ လက္ခဏာနိ ပဿတိ.
ဝယံ ပဿန္တော ကတမာနိ ပဉ္စ လက္ခဏာနိ ပဿတိ? အဝိဇ္ဇာနိရောဓာ ဝိညာဏနိရောဓောတိ— ပစ္စယနိရောဓဋ္ဌေန ဝိညာဏက္ခန္ဓဿ ဝယံ ပဿတိ. တဏှာနိရောဓာ ဝိညာဏနိရောဓောတိ— ပစ္စယနိရောဓဋ္ဌေန ဝိညာဏက္ခန္ဓဿ ဝယံ ပဿတိ. ကမ္မနိရောဓာ ဝိညာဏနိရောဓောတိ— ပစ္စယနိရောဓဋ္ဌေန ဝိညာဏက္ခန္ဓဿ ဝယံ ပဿတိ. နာမရူပနိရောဓာ ဝိညာဏနိရောဓောတိ— ပစ္စယနိရောဓဋ္ဌေန ဝိညာဏက္ခန္ဓဿ ဝယံ ပဿတိ. ဝိပရိဏာမလက္ခဏံ ပဿန္တောပိ ဝိညာဏက္ခန္ဓဿ ဝယံ ပဿတိ. ဝိညာဏက္ခန္ဓဿ ဝယံ ပဿန္တော ဣမာနိ ပဉ္စ လက္ခဏာနိ ပဿတိ. ဥဒယဗ္ဗယံ ပဿန္တော ဣမာနိ ဒသ လက္ခဏာနိ ပဿတိ.
ပဉ္စန္နံ ခန္ဓာနံ ဥဒယံ ပဿန္တော ဣမာနိ ပဉ္စဝီသတိ လက္ခဏာနိ ပဿတိ, ဝယံ ပဿန္တော ဣမာနိ ပဉ္စဝီသတိ လက္ခဏာနိ ပဿတိ, ဥဒယဗ္ဗယံ ပဿန္တော ဣမာနိ ပညာသ လက္ခဏာနိ ပဿတိ. တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “ပစ္စုပ္ပန္နာနံ ဓမ္မာနံ ဝိပရိဏာမာနုပဿနေ ပညာ ဥဒယဗ္ဗယာနုပဿနေ ဉာဏံ”. ရူပက္ခန္ဓော အာဟာရသမုဒယော. ဝေဒနာ, သညာ, သင်္ခါရာ— တယော ခန္ဓာ ဖဿသမုဒယာ. ဝိညာဏက္ခန္ဓော နာမရူပသမုဒယော.
ဥဒယဗ္ဗယဉာဏနိဒ္ဒေသော ဆဋ္ဌော.