1.1.68 ဣန္ဒြိယပရောပရိယတ္တဉာဏနိဒ္ဒေသ
- ဉာဏကထာ
ကတမံ တထာဂတဿ ဣန္ဒြိယပရောပရိယတ္တဉာဏံ? ဣဓ တထာဂတော သတ္တေ ပဿတိ အပ္ပရဇက္ခေ မဟာရဇက္ခေ တိက္ခိန္ဒြိယေ မုဒိန္ဒြိယေ သွာကာရေ ဒွါကာရေ သုဝိညာပယေ ဒုဝိညာပယေ အပ္ပေကစ္စေ ပရလောကဝဇ္ဇဘယဒဿာဝိနော အပ္ပေကစ္စေ န ပရလောကဝဇ္ဇဘယဒဿာဝိနော.
အပ္ပရဇက္ခေ မဟာရဇက္ခေ တိ သဒ္ဓေါ ပုဂ္ဂလော အပ္ပရဇက္ခော, အဿဒ္ဓေါ ပုဂ္ဂလော မဟာရဇက္ခော. အာရဒ္ဓဝီရိယော ပုဂ္ဂလော အပ္ပရဇက္ခော, ကုသီတော ပုဂ္ဂလော မဟာရဇက္ခော. ဥပဋ္ဌိတဿတိ ပုဂ္ဂလော အပ္ပရဇက္ခော, မုဋ္ဌဿတိ ပုဂ္ဂလော မဟာရဇက္ခော. သမာဟိတော ပုဂ္ဂလော အပ္ပရဇက္ခော, အသမာဟိတော ပုဂ္ဂလော မဟာရဇက္ခော. ပညဝါ ပုဂ္ဂလော အပ္ပရဇက္ခော, ဒုပ္ပညော ပုဂ္ဂလော မဟာရဇက္ခော.
တိက္ခိန္ဒြိယေ မုဒိန္ဒြိယေ တိ သဒ္ဓေါ ပုဂ္ဂလော တိက္ခိန္ဒြိယော, အဿဒ္ဓေါ ပုဂ္ဂလော မုဒိန္ဒြိယော. အာရဒ္ဓဝီရိယော ပုဂ္ဂလော တိက္ခိန္ဒြိယော, ကုသီတော ပုဂ္ဂလော မုဒိန္ဒြိယော. ဥပဋ္ဌိတဿတိ ပုဂ္ဂလော တိက္ခိန္ဒြိယော, မုဋ္ဌဿတိ ပုဂ္ဂလော မုဒိန္ဒြိယော. သမာဟိတော ပုဂ္ဂလော တိက္ခိန္ဒြိယော, အသမာဟိတော ပုဂ္ဂလော မုဒိန္ဒြိယော. ပညဝါ ပုဂ္ဂလော တိက္ခိန္ဒြိယော, ဒုပ္ပညော ပုဂ္ဂလော မုဒိန္ဒြိယော.
သွာကာရေ ဒွါကာရေ တိ သဒ္ဓေါ ပုဂ္ဂလော သွာကာရော, အဿဒ္ဓေါ ပုဂ္ဂလော ဒွါကာရော. အာရဒ္ဓဝီရိယော ပုဂ္ဂလော သွာကာရော, ကုသီတော ပုဂ္ဂလော ဒွါကာရော. ဥပဋ္ဌိတဿတိ ပုဂ္ဂလော သွာကာရော, မုဋ္ဌဿတိ ပုဂ္ဂလော ဒွါကာရော. သမာဟိတော ပုဂ္ဂလော သွာကာရော, အသမာဟိတော ပုဂ္ဂလော ဒွါကာရော. ပညဝါ ပုဂ္ဂလော သွာကာရော, ဒုပ္ပညော ပုဂ္ဂလော ဒွါကာရော.
သုဝိညာပယေ ဒုဝိညာပယေ တိ သဒ္ဓေါ ပုဂ္ဂလော သုဝိညာပယော, အဿဒ္ဓေါ ပုဂ္ဂလော ဒုဝိညာပယော. အာရဒ္ဓဝီရိယော ပုဂ္ဂလော သုဝိညာပယော, ကုသီတော ပုဂ္ဂလော ဒုဝိညာပယော. ဥပဋ္ဌိတဿတိ ပုဂ္ဂလော သုဝိညာပယော, မုဋ္ဌဿတိ ပုဂ္ဂလော ဒုဝိညာပယော. သမာဟိတော ပုဂ္ဂလော သုဝိညာပယော, အသမာဟိတော ပုဂ္ဂလော ဒုဝိညာပယော. ပညဝါ ပုဂ္ဂလော သုဝိညာပယော, ဒုပ္ပညော ပုဂ္ဂလော ဒုဝိညာပယော.
အပ္ပေကစ္စေ ပရလောကဝဇ္ဇဘယဒဿာဝိနော, အပ္ပေကစ္စေ န ပရလောကဝဇ္ဇဘယဒဿာဝိနော တိ သဒ္ဓေါ ပုဂ္ဂလော ပရလောကဝဇ္ဇဘယဒဿာဝီ, အဿဒ္ဓေါ ပုဂ္ဂလော န ပရလောကဝဇ္ဇဘယဒဿာဝီ. အာရဒ္ဓဝီရိယော ပုဂ္ဂလော ပရလောကဝဇ္ဇဘယဒဿာဝီ, ကုသီတော ပုဂ္ဂလော န ပရလောကဝဇ္ဇဘယဒဿာဝီ. ဥပဋ္ဌိတဿတိ ပုဂ္ဂလော ပရလောကဝဇ္ဇဘယဒဿာဝီ, မုဋ္ဌဿတိ ပုဂ္ဂလော န ပရလောကဝဇ္ဇဘယဒဿာဝီ. သမာဟိတော ပုဂ္ဂလော ပရလောကဝဇ္ဇဘယဒဿာဝီ, အသမာဟိတော ပုဂ္ဂလော န ပရလောကဝဇ္ဇဘယဒဿာဝီ. ပညဝါ ပုဂ္ဂလော ပရလောကဝဇ္ဇဘယဒဿာဝီ, ဒုပ္ပညော ပုဂ္ဂလော န ပရလောကဝဇ္ဇဘယဒဿာဝီ.
လောကော တိ— ခန္ဓလောကော, ဓာတုလောကော, အာယတနလောကော, ဝိပတ္တိဘဝလောကော, ဝိပတ္တိသမ္ဘဝလောကော, သမ္ပတ္တိဘဝလောကော, သမ္ပတ္တိသမ္ဘဝလောကော.
ဧကော လောကော— သဗ္ဗေ သတ္တာ အာဟာရဋ္ဌိတိကာ.
ဒွေ လောကာ— နာမဉ္စ, ရူပဉ္စ.
တယော လောကာ— တိဿော ဝေဒနာ.
စတ္တာရော လောကာ— စတ္တာရော အာဟာရာ.
ပဉ္စ လောကာ— ပဉ္စုပါဒါနက္ခန္ဓာ.
ဆ လောကာ— ဆ အဇ္ဈတ္တိကာနိ အာယတနာနိ.
သတ္တ လောကာ— သတ္တ ဝိညာဏဋ္ဌိတိယော.
အဋ္ဌ လောကာ— အဋ္ဌ လောကဓမ္မာ.
နဝ လောကာ— နဝ သတ္တာဝါသာ.
ဒသ လောကာ— ဒသာယတနာနိ.
ဒွါဒသ လောကာ— ဒွါဒသာယတနာနိ.
အဋ္ဌာရသ လောကာ— အဋ္ဌာရသ ဓာတုယော.
ဝဇ္ဇန် တိ သဗ္ဗေ ကိလေသာ ဝဇ္ဇာ, သဗ္ဗေ ဒုစ္စရိတာ ဝဇ္ဇာ, သဗ္ဗေ အဘိသင်္ခါရာ ဝဇ္ဇာ, သဗ္ဗေ ဘဝဂါမိကမ္မာ ဝဇ္ဇာ. ဣတိ ဣမသ္မိဉ္စ လောကေ ဣမသ္မိဉ္စ ဝဇ္ဇေ တိဗ္ဗာ ဘယသညာ ပစ္စုပဋ္ဌိတာ ဟောတိ, သေယျထာပိ ဥက္ခိတ္တာသိကေ ဝဓကေ. ဣမေဟိ ပညာသာယ အာကာရေဟိ ဣမာနိ ပဉ္စိန္ဒြိယာနိ ဇာနာတိ ပဿတိ အညာတိ ပဋိဝိဇ္ဈတိ— ဣဒံ တထာဂတဿ ဣန္ဒြိယပရောပရိယတ္တဉာဏံ.
ဣန္ဒြိယပရောပရိယတ္တဉာဏနိဒ္ဒေသော အဋ္ဌသဋ္ဌိမော.