1.1.9 သင်္ခါရုပေက္ခာဉာဏနိဒ္ဒေသ
- ဉာဏကထာ
ကထံ မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ? ဥပ္ပါဒံ မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ, ပဝတ္တံ မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ, နိမိတ္တံ မုဉ္စိတုကမျတာ …ပေ… အာယူဟနံ မုဉ္စိတုကမျတာ… ပဋိသန္ဓိံ မုဉ္စိတုကမျတာ… ဂတိံ မုဉ္စိတုကမျတာ… နိဗ္ဗတ္တိံ မုဉ္စိတုကမျတာ… ဥပပတ္တိံ မုဉ္စိတုကမျတာ… ဇာတိံ မုဉ္စိတုကမျတာ… ဇရံ မုဉ္စိတုကမျတာ… ဗျာဓိံ မုဉ္စိတုကမျတာ… မရဏံ မုဉ္စိတုကမျတာ… သောကံ မုဉ္စိတုကမျတာ… ပရိဒေဝံ မုဉ္စိတုကမျတာ …ပေ… ဥပါယာသံ မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ.
ဥပ္ပါဒေါ ဒုက္ခန္တိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. ပဝတ္တံ ဒုက္ခန္တိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ …ပေ… ဥပါယာသော ဒုက္ခန္တိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ.
ဥပ္ပါဒေါ ဘယန္တိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. ပဝတ္တံ ဘယန္တိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ …ပေ… ဥပါယာသော ဘယန္တိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ.
ဥပ္ပါဒေါ သာမိသန္တိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. ပဝတ္တံ သာမိသန္တိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ …ပေ… ဥပါယာသော သာမိသန္တိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ.
ဥပ္ပါဒေါ သင်္ခါရာတိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. ပဝတ္တံ သင်္ခါရာတိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ …ပေ… ဥပါယာသော သင်္ခါရာတိ— မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ.
ဥပ္ပါဒေါ သင်္ခါရာ, တေ သင်္ခါရေ အဇ္ဈုပေက္ခတီတိ— သင်္ခါရုပေက္ခာ. ယေ စ သင်္ခါရာ ယာ စ ဥပေက္ခာ ဥဘောပေတေ သင်္ခါရာ, တေ သင်္ခါရေ အဇ္ဈုပေက္ခတီတိ— သင်္ခါရုပေက္ခာ. ပဝတ္တံ သင်္ခါရာ …ပေ… နိမိတ္တံ သင်္ခါရာ… အာယူဟနာ သင်္ခါရာ… ပဋိသန္ဓိ သင်္ခါရာ… ဂတိ သင်္ခါရာ… နိဗ္ဗတ္တိ သင်္ခါရာ… ဥပပတ္တိ သင်္ခါရာ… ဇာတိ သင်္ခါရာ… ဇရာ သင်္ခါရာ… ဗျာဓိ သင်္ခါရာ… မရဏံ သင်္ခါရာ… သောကော သင်္ခါရာ… ပရိဒေဝေါ သင်္ခါရာ …ပေ… ဥပါယာသော သင်္ခါရာ, တေ သင်္ခါရေ အဇ္ဈုပေက္ခတီတိ— သင်္ခါရုပေက္ခာ. ယေ စ သင်္ခါရာ ယာ စ ဥပေက္ခာ ဥဘောပေတေ သင်္ခါရာ, တေ သင်္ခါရေ အဇ္ဈုပေက္ခတီတိ— သင်္ခါရုပေက္ခာ.
ကတိဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ? အဋ္ဌဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ. ပုထုဇ္ဇနဿ ကတိဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ? သေက္ခဿ ကတိဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ? ဝီတရာဂဿ ကတိဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ? ပုထုဇ္ဇနဿ ဒွီဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ. သေက္ခဿ တီဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ. ဝီတရာဂဿ တီဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ.
ပုထုဇ္ဇနဿ ကတမေဟိ ဒွီဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ? ပုထုဇ္ဇနော သင်္ခါရုပေက္ခံ အဘိနန္ဒတိ ဝါ ဝိပဿတိ ဝါ. ပုထုဇ္ဇနဿ ဣမေဟိ ဒွီဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ. သေက္ခဿ ကတမေဟိ တီဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ? သေက္ခော သင်္ခါရုပေက္ခံ အဘိနန္ဒတိ ဝါ ဝိပဿတိ ဝါ ပဋိသင်္ခါယ ဝါ ဖလသမာပတ္တိံ သမာပဇ္ဇတိ. သေက္ခဿ ဣမေဟိ တီဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ. ဝီတရာဂဿ ကတမေဟိ တီဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ? ဝီတရာဂေါ သင်္ခါရုပေက္ခံ ဝိပဿတိ ဝါ ပဋိသင်္ခါယ ဝါ ဖလသမာပတ္တိံ သမာပဇ္ဇတိ, တဒဇ္ဈုပေက္ခိတွာ သုညတဝိဟာရေန ဝါ အနိမိတ္တဝိဟာရေန ဝါ အပ္ပဏိဟိတဝိဟာရေန ဝါ ဝိဟရတိ. ဝီတရာဂဿ ဣမေဟိ တီဟာကာရေဟိ သင်္ခါရုပေက္ခာယ စိတ္တဿ အဘိနီဟာရော ဟောတိ.
ကထံ ပုထုဇ္ဇနဿ စ သေက္ခဿ စ သင်္ခါရုပေက္ခာယ စိတ္တဿ အဘိနီဟာရော ဧကတ္တံ ဟောတိ? ပုထုဇ္ဇနဿ သင်္ခါရုပေက္ခံ အဘိနန္ဒတော စိတ္တံ ကိလိဿတိ, ဘာဝနာယ ပရိပန္ထော ဟောတိ, ပဋိဝေဓဿ အန္တရာယော ဟောတိ, အာယတိံ ပဋိသန္ဓိယာ ပစ္စယော ဟောတိ. သေက္ခဿပိ သင်္ခါရုပေက္ခံ အဘိနန္ဒတော စိတ္တံ ကိလိဿတိ, ဘာဝနာယ ပရိပန္ထော ဟောတိ, ဥတ္တရိပဋိဝေဓဿ အန္တရာယော ဟောတိ, အာယတိံ ပဋိသန္ဓိယာ ပစ္စယော ဟောတိ. ဧဝံ ပုထုဇ္ဇနဿ စ သေက္ခဿ စ သင်္ခါရုပေက္ခာယ စိတ္တဿ အဘိနီဟာရော ဧကတ္တံ ဟောတိ အဘိနန္ဒဋ္ဌေန.
ကထံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော ဧကတ္တံ ဟောတိ? ပုထုဇ္ဇနော သင်္ခါရုပေက္ခံ အနိစ္စတောပိ ဒုက္ခတောပိ အနတ္တတောပိ ဝိပဿတိ. သေက္ခောပိ သင်္ခါရုပေက္ခံ အနိစ္စတောပိ ဒုက္ခတောပိ အနတ္တတောပိ ဝိပဿတိ. ဝီတရာဂေါပိ သင်္ခါရုပေက္ခံ အနိစ္စတောပိ ဒုက္ခတောပိ အနတ္တတောပိ ဝိပဿတိ. ဧဝံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော ဧကတ္တံ ဟောတိ အနုပဿနဋ္ဌေန.
ကထံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ? ပုထုဇ္ဇနဿ သင်္ခါရုပေက္ခာ ကုသလာ ဟောတိ. သေက္ခဿပိ သင်္ခါရုပေက္ခာ ကုသလာ ဟောတိ. ဝီတရာဂဿ သင်္ခါရုပေက္ခာ အဗျာကတာ ဟောတိ. ဧဝံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ ကုသလာဗျာကတဋ္ဌေန.
ကထံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ? ပုထုဇ္ဇနဿ သင်္ခါရုပေက္ခာ ကိဉ္စိကာလေ သုဝိဒိတာ ဟောတိ, ကိဉ္စိကာလေ န သုဝိဒိတာ ဟောတိ. သေက္ခဿပိ သင်္ခါရုပေက္ခာ ကိဉ္စိကာလေ သုဝိဒိတာ ဟောတိ, ကိဉ္စိကာလေ န သုဝိဒိတာ ဟောတိ. ဝီတရာဂဿ သင်္ခါရုပေက္ခာ အစ္စန္တံ သုဝိဒိတာ ဟောတိ. ဧဝံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ ဝိဒိတဋ္ဌေန စ အဝိဒိတဋ္ဌေန စ.
ကထံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ? ပုထုဇ္ဇနော သင်္ခါရုပေက္ခံ အတိတ္တတ္တာ ဝိပဿတိ. သေက္ခောပိ သင်္ခါရုပေက္ခံ အတိတ္တတ္တာ ဝိပဿတိ. ဝီတရာဂေါ သင်္ခါရုပေက္ခံ တိတ္တတ္တာ ဝိပဿတိ. ဧဝံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ တိတ္တဋ္ဌေန စ အတိတ္တဋ္ဌေန စ.
ကထံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ? ပုထုဇ္ဇနော သင်္ခါရုပေက္ခံ တိဏ္ဏံ သညောဇနာနံ ပဟာနာယ သောတာပတ္တိမဂ္ဂံ ပဋိလာဘတ္ထာယ ဝိပဿတိ. သေက္ခော သင်္ခါရုပေက္ခံ တိဏ္ဏံ သညောဇနာနံ ပဟီနတ္တာ ဥတ္တရိပဋိလာဘတ္ထာယ ဝိပဿတိ. ဝီတရာဂေါ သင်္ခါရုပေက္ခံ သဗ္ဗကိလေသာနံ ပဟီနတ္တာ ဒိဋ္ဌဓမ္မသုခဝိဟာရတ္ထာယ ဝိပဿတိ. ဧဝံ ပုထုဇ္ဇနဿ စ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ ပဟီနဋ္ဌေန စ အပ္ပဟီနဋ္ဌေန စ.
ကထံ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ? သေက္ခော သင်္ခါရုပေက္ခံ အဘိနန္ဒတိ ဝါ ဝိပဿတိ ဝါ ပဋိသင်္ခါယ ဝါ ဖလသမာပတ္တိံ သမာပဇ္ဇတိ. ဝီတရာဂေါ သင်္ခါရုပေက္ခံ ဝိပဿတိ ဝါ ပဋိသင်္ခါယ ဝါ ဖလသမာပတ္တိံ သမာပဇ္ဇတိ, တဒဇ္ဈုပေက္ခိတွာ သုညတဝိဟာရေန ဝါ အနိမိတ္တဝိဟာရေန ဝါ အပ္ပဏိဟိတဝိဟာရေန ဝါ ဝိဟရတိ. ဧဝံ သေက္ခဿ စ ဝီတရာဂဿ စ သင်္ခါရုပေက္ခာယ စိတ္တဿ အဘိနီဟာရော နာနတ္တံ ဟောတိ ဝိဟာရသမာပတ္တဋ္ဌေန.
ကတိ သင်္ခါရုပေက္ခာ သမထဝသေန ဥပ္ပဇ္ဇန္တိ? ကတိ သင်္ခါရုပေက္ခာ ဝိပဿနာဝသေန ဥပ္ပဇ္ဇန္တိ? အဋ္ဌ သင်္ခါရုပေက္ခာ သမထဝသေန ဥပ္ပဇ္ဇန္တိ. ဒသ သင်္ခါရုပေက္ခာ ဝိပဿနာဝသေန ဥပ္ပဇ္ဇန္တိ.
ကတမာ အဋ္ဌ သင်္ခါရုပေက္ခာ သမထဝသေန ဥပ္ပဇ္ဇန္တိ? ပဌမံ ဈာနံ ပဋိလာဘတ္ထာယ နီဝရဏေ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. ဒုတိယံ ဈာနံ ပဋိလာဘတ္ထာယ ဝိတက္ကဝိစာရေ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. တတိယံ ဈာနံ ပဋိလာဘတ္ထာယ ပီတိံ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. စတုတ္ထံ ဈာနံ ပဋိလာဘတ္ထာယ သုခဒုက္ခေ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. အာကာသာနဉ္စာယတနသမာပတ္တိံ ပဋိလာဘတ္ထာယ ရူပသညံ ပဋိဃသညံ နာနတ္တသညံ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. ဝိညာဏဉ္စာယတနသမာပတ္တိံ ပဋိလာဘတ္ထာယ အာကာသာနဉ္စာယတနသညံ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. အာကိဉ္စညာယတနသမာပတ္တိံ ပဋိလာဘတ္ထာယ ဝိညာဏဉ္စာယတနသညံ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. နေဝသညာနာသညာယတနသမာပတ္တိံ ပဋိလာဘတ္ထာယ အာကိဉ္စညာယတနသညံ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. ဣမာ အဋ္ဌ သင်္ခါရုပေက္ခာ သမထဝသေန ဥပ္ပဇ္ဇန္တိ.
ကတမာ ဒသ သင်္ခါရုပေက္ခာ ဝိပဿနာဝသေန ဥပ္ပဇ္ဇန္တိ? သောတာပတ္တိမဂ္ဂံ ပဋိလာဘတ္ထာယ ဥပ္ပါဒံ ပဝတ္တံ နိမိတ္တံ အာယူဟနံ ပဋိသန္ဓိံ ဂတိံ နိဗ္ဗတ္တိံ ဥပပတ္တိံ ဇာတိံ ဇရံ ဗျာဓိံ မရဏံ သောကံ ပရိဒေဝံ ဥပါယာသံ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. သောတာပတ္တိဖလသမာပတ္တတ္ထာယ ဥပ္ပါဒံ ပဝတ္တံ နိမိတ္တံ အာယူဟနံ ပဋိသန္ဓိံ ပဋိသင်္ခါ သန္တိဋ္ဌနာ ပညာ သင်္ခါရုပေက္ခာသု ဉာဏံ. သကဒါဂါမိမဂ္ဂံ ပဋိလာဘတ္ထာယ …ပေ… သကဒါဂါမိဖလသမာပတ္တတ္ထာယ… အနာဂါမိမဂ္ဂံ ပဋိလာဘတ္ထာယ …ပေ… အနာဂါမိဖလသမာပတ္တတ္ထာယ… အရဟတ္တမဂ္ဂံ ပဋိလာဘတ္ထာယ ဥပ္ပါဒံ ပဝတ္တံ နိမိတ္တံ အာယူဟနံ ပဋိသန္ဓိံ ဂတိံ နိဗ္ဗတ္တိံ ဥပပတ္တိံ ဇာတိံ ဇရံ ဗျာဓိံ မရဏံ သောကံ ပရိဒေဝံ ဥပါယာသံ ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. အရဟတ္တဖလသမာပတ္တတ္ထာယ …ပေ… သုညတဝိဟာရသမာပတ္တတ္ထာယ …ပေ… အနိမိတ္တဝိဟာရသမာပတ္တတ္ထာယ ဥပ္ပါဒံ ပဝတ္တံ နိမိတ္တံ အာယူဟနံ ပဋိသန္ဓိံ… ပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ. ဣမာ ဒသ သင်္ခါရုပေက္ခာ ဝိပဿနာဝသေန ဥပ္ပဇ္ဇန္တိ.
ကတိ သင်္ခါရုပေက္ခာ ကုသလာ, ကတိ အကုသလာ, ကတိ အဗျာကတာ? ပန္နရသ သင်္ခါရုပေက္ခာ ကုသလာ, တိဿော သင်္ခါရုပေက္ခာ အဗျာကတာ. နတ္ထိ သင်္ခါရုပေက္ခာ အကုသလာ.
ပဋိသင်္ခါသန္တိဋ္ဌနာ ပညာ,
အဋ္ဌ စိတ္တဿ ဂေါစရာ;
ပုထုဇ္ဇနဿ ဒွေ ဟောန္တိ,
တယော သေက္ခဿ ဂေါစရာ;
တယော စ ဝီတရာဂဿ,
ယေဟိ စိတ္တံ ဝိဝဋ္ဋတိ.
အဋ္ဌ သမာဓိဿ ပစ္စယာ,
ဒသ ဉာဏဿ ဂေါစရာ;
အဋ္ဌာရသ သင်္ခါရုပေက္ခာ,
တိဏ္ဏံ ဝိမောက္ခာန ပစ္စယာ.
ဣမေ အဋ္ဌာရသာကာရာ,_
ပညာ ယဿ ပရိစ္စိတာ;
ကုသလော သင်္ခါရုပေက္ခာသု,
နာနာဒိဋ္ဌီသု န ကမ္ပတီတိ.
တံ ဉာတဋ္ဌေန ဉာဏံ, ပဇာနနဋ္ဌေန ပညာ. တေန ဝုစ္စတိ— “မုဉ္စိတုကမျတာပဋိသင်္ခါသန္တိဋ္ဌနာ ပညာ သင်္ခါရုပေက္ခာသု ဉာဏံ”.
သင်္ခါရုပေက္ခာဉာဏနိဒ္ဒေသော နဝမော.