1.10 မဏ္ဍပေယျကထာ
“မဏ္ဍပေယျမိဒံ, ဘိက္ခဝေ, ဗြဟ္မစရိယံ. သတ္ထာ သမ္မုခီဘူတော တိဓတ္တမဏ္ဍော. သတ္ထရိ သမ္မုခီဘူတေ ဒေသနာမဏ္ဍော, ပဋိဂ္ဂဟမဏ္ဍော, ဗြဟ္မစရိယမဏ္ဍော”.
ကတမော ဒေသနာမဏ္ဍော? စတုန္နံ အရိယသစ္စာနံ အာစိက္ခနာ ဒေသနာ ပညာပနာ ပဋ္ဌပနာ ဝိဝရဏာ ဝိဘဇနာ ဥတ္တာနီကမ္မံ, စတုန္နံ သတိပဋ္ဌာနာနံ …ပေ… စတုန္နံ သမ္မပ္ပဓာနာနံ… စတုန္နံ ဣဒ္ဓိပါဒါနံ… ပဉ္စန္နံ ဣန္ဒြိယာနံ… ပဉ္စန္နံ ဗလာနံ… သတ္တန္နံ ဗောဇ္ဈင်္ဂါနံ… အရိယဿ အဋ္ဌင်္ဂိကဿ မဂ္ဂဿ အာစိက္ခနာ ဒေသနာ ပညာပနာ ပဋ္ဌပနာ ဝိဝရဏာ ဝိဘဇနာ ဥတ္တာနီကမ္မံ— အယံ ဒေသနာမဏ္ဍော. (1)
ကတမော ပဋိဂ္ဂဟမဏ္ဍော? ဘိက္ခူ ဘိက္ခုနိယော ဥပါသကာ ဥပါသိကာယော ဒေဝါ မနုဿာ ယေ ဝါ ပနညေပိ ကေစိ ဝိညာတာရော— အယံ ပဋိဂ္ဂဟမဏ္ဍော. (2)
ကတမော ဗြဟ္မစရိယမဏ္ဍော? အယမေဝ အရိယော အဋ္ဌင်္ဂိကော မဂ္ဂေါ, သေယျထိဒံ— သမ္မာဒိဋ္ဌိ, သမ္မာသင်္ကပ္ပေါ, သမ္မာဝါစာ, သမ္မာကမ္မန္တော, သမ္မာအာဇီဝေါ, သမ္မာဝါယာမော, သမ္မာသတိ, သမ္မာသမာဓိ— အယံ ဗြဟ္မစရိယမဏ္ဍော. (3)
အဓိမောက္ခမဏ္ဍော သဒ္ဓိန္ဒြိယံ, အဿဒ္ဓိယံ ကသဋော; အဿဒ္ဓိယံ ကသဋံ ဆဍ္ဍေတွာ သဒ္ဓိန္ဒြိယဿ အဓိမောက္ခမဏ္ဍံ ပိဝတီတိ— မဏ္ဍပေယျံ. ပဂ္ဂဟမဏ္ဍော ဝီရိယိန္ဒြိယံ, ကောသဇ္ဇံ ကသဋော; ကောသဇ္ဇံ ကသဋံ ဆဍ္ဍေတွာ ဝီရိယိန္ဒြိယဿ ပဂ္ဂဟမဏ္ဍံ ပိဝတီတိ— မဏ္ဍပေယျံ. ဥပဋ္ဌာနမဏ္ဍော သတိန္ဒြိယံ, ပမာဒေါ ကသဋော; ပမာဒံ ကသဋံ ဆဍ္ဍေတွာ သတိန္ဒြိယဿ ဥပဋ္ဌာနမဏ္ဍံ ပိဝတီတိ— မဏ္ဍပေယျံ. အဝိက္ခေပမဏ္ဍော သမာဓိန္ဒြိယံ, ဥဒ္ဓစ္စံ ကသဋော; ဥဒ္ဓစ္စံ ကသဋံ ဆဍ္ဍေတွာ သမာဓိန္ဒြိယဿ အဝိက္ခေပမဏ္ဍံ ပိဝတီတိ— မဏ္ဍပေယျံ. ဒဿနမဏ္ဍော ပညိန္ဒြိယံ, အဝိဇ္ဇာ ကသဋော; အဝိဇ္ဇံ ကသဋံ ဆဍ္ဍေတွာ ပညိန္ဒြိယဿ ဒဿနမဏ္ဍံ ပိဝတီတိ— မဏ္ဍပေယျံ.
အဿဒ္ဓိယေ အကမ္ပိယမဏ္ဍော သဒ္ဓါဗလံ, အဿဒ္ဓိယံ ကသဋော; အဿဒ္ဓိယံ ကသဋံ ဆဍ္ဍေတွာ သဒ္ဓါဗလဿ အဿဒ္ဓိယေ အကမ္ပိယမဏ္ဍံ ပိဝတီတိ— မဏ္ဍပေယျံ. ကောသဇ္ဇေ အကမ္ပိယမဏ္ဍော ဝီရိယဗလံ, ကောသဇ္ဇံ ကသဋော; ကောသဇ္ဇံ ကသဋံ ဆဍ္ဍေတွာ ဝီရိယဗလဿ ကောသဇ္ဇေ အကမ္ပိယမဏ္ဍံ ပိဝတီတိ— မဏ္ဍပေယျံ. ပမာဒေ အကမ္ပိယမဏ္ဍော သတိဗလံ, ပမာဒေါ ကသဋော; ပမာဒံ ကသဋံ ဆဍ္ဍေတွာ သတိဗလဿ ပမာဒေ အကမ္ပိယမဏ္ဍံ ပိဝတီတိ— မဏ္ဍပေယျံ. ဥဒ္ဓစ္စေ အကမ္ပိယမဏ္ဍော သမာဓိဗလံ, ဥဒ္ဓစ္စံ ကသဋော; ဥဒ္ဓစ္စံ ကသဋံ ဆဍ္ဍေတွာ သမာဓိဗလဿ ဥဒ္ဓစ္စေ အကမ္ပိယမဏ္ဍံ ပိဝတီတိ— မဏ္ဍပေယျံ. အဝိဇ္ဇာယ အကမ္ပိယမဏ္ဍော ပညာဗလံ, အဝိဇ္ဇာ ကသဋော; အဝိဇ္ဇံ ကသဋံ ဆဍ္ဍေတွာ ပညာဗလဿ အဝိဇ္ဇာယ အကမ္ပိယမဏ္ဍံ ပိဝတီတိ— မဏ္ဍပေယျံ.
ဥပဋ္ဌာနမဏ္ဍော သတိသမ္ဗောဇ္ဈင်္ဂါ, ပမာဒေါ ကသဋော; ပမာဒံ ကသဋံ ဆဍ္ဍေတွာ သတိသမ္ဗောဇ္ဈင်္ဂဿ ဥပဋ္ဌာနမဏ္ဍံ ပိဝတီတိ— မဏ္ဍပေယျံ. ပဝိစယမဏ္ဍော ဓမ္မဝိစယသမ္ဗောဇ္ဈင်္ဂေါ, အဝိဇ္ဇာ ကသဋော; အဝိဇ္ဇံ ကသဋံ ဆဍ္ဍေတွာ ဓမ္မဝိစယသမ္ဗောဇ္ဈင်္ဂဿ ပဝိစယမဏ္ဍံ ပိဝတီတိ— မဏ္ဍပေယျံ. ပဂ္ဂဟမဏ္ဍော ဝီရိယသမ္ဗောဇ္ဈင်္ဂေါ, ကောသဇ္ဇံ ကသဋော; ကောသဇ္ဇံ ကသဋံ ဆဍ္ဍေတွာ ဝီရိယသမ္ဗောဇ္ဈင်္ဂဿ ပဂ္ဂဟမဏ္ဍံ ပိဝတီတိ— မဏ္ဍပေယျံ. ဖရဏမဏ္ဍော ပီတိသမ္ဗောဇ္ဈင်္ဂေါ, ပရိဠာဟော ကသဋော; ပရိဠာဟံ ကသဋံ ဆဍ္ဍေတွာ ပီတိသမ္ဗောဇ္ဈင်္ဂဿ ဖရဏမဏ္ဍံ ပိဝတီတိ— မဏ္ဍပေယျံ. ဥပသမမဏ္ဍော ပဿဒ္ဓိသမ္ဗောဇ္ဈင်္ဂေါ, ဒုဋ္ဌုလ္လံ ကသဋော; ဒုဋ္ဌုလ္လံ ကသဋံ ဆဍ္ဍေတွာ ပဿဒ္ဓိသမ္ဗောဇ္ဈင်္ဂဿ ဥပသမမဏ္ဍံ ပိဝတီတိ— မဏ္ဍပေယျံ. အဝိက္ခေပမဏ္ဍော သမာဓိသမ္ဗောဇ္ဈင်္ဂေါ, ဥဒ္ဓစ္စံ ကသဋော; ဥဒ္ဓစ္စံ ကသဋံ ဆဍ္ဍေတွာ သမာဓိသမ္ဗောဇ္ဈင်္ဂဿ အဝိက္ခေပမဏ္ဍံ ပိဝတီတိ— မဏ္ဍပေယျံ. ပဋိသင်္ခါနမဏ္ဍော ဥပေက္ခာသမ္ဗောဇ္ဈင်္ဂေါ, အပ္ပဋိသင်္ခါ ကသဋော; အပ္ပဋိသင်္ခံ ကသဋံ ဆဍ္ဍေတွာ ဥပေက္ခာသမ္ဗောဇ္ဈင်္ဂဿ ပဋိသင်္ခါနမဏ္ဍံ ပိဝတီတိ— မဏ္ဍပေယျံ.
ဒဿနမဏ္ဍော သမ္မာဒိဋ္ဌိ, မိစ္ဆာဒိဋ္ဌိ ကသဋော; မိစ္ဆာဒိဋ္ဌိံ ကသဋံ ဆဍ္ဍေတွာ သမ္မာဒိဋ္ဌိယာ ဒဿနမဏ္ဍံ ပိဝတီတိ— မဏ္ဍပေယျံ. အဘိနိရောပနမဏ္ဍော သမ္မာသင်္ကပ္ပေါ, မိစ္ဆာသင်္ကပ္ပေါ ကသဋော; မိစ္ဆာသင်္ကပ္ပံ ကသဋံ ဆဍ္ဍေတွာ သမ္မာသင်္ကပ္ပဿ အဘိနိရောပနမဏ္ဍံ ပိဝတီတိ— မဏ္ဍပေယျံ. ပရိဂ္ဂဟမဏ္ဍော သမ္မာဝါစာ, မိစ္ဆာဝါစာ ကသဋော; မိစ္ဆာဝါစံ ကသဋံ ဆဍ္ဍေတွာ သမ္မာဝါစာယ ပရိဂ္ဂဟမဏ္ဍံ ပိဝတီတိ— မဏ္ဍပေယျံ. သမုဋ္ဌာနမဏ္ဍော သမ္မာကမ္မန္တော, မိစ္ဆာကမ္မန္တော ကသဋော; မိစ္ဆာကမ္မန္တံ ကသဋံ ဆဍ္ဍေတွာ သမ္မာကမ္မန္တဿ သမုဋ္ဌာနမဏ္ဍံ ပိဝတီတိ— မဏ္ဍပေယျံ. ဝေါဒါနမဏ္ဍော သမ္မာအာဇီဝေါ, မိစ္ဆာအာဇီဝေါ ကသဋော; မိစ္ဆာအာဇီဝံ ကသဋံ ဆဍ္ဍေတွာ သမ္မာအာဇီဝဿ ဝေါဒါနမဏ္ဍံ ပိဝတီတိ— မဏ္ဍပေယျံ. ပဂ္ဂဟမဏ္ဍော သမ္မာဝါယာမော, မိစ္ဆာဝါယာမော ကသဋော; မိစ္ဆာဝါယာမံ ကသဋံ ဆဍ္ဍေတွာ သမ္မာဝါယာမဿ ပဂ္ဂဟမဏ္ဍံ ပိဝတီတိ— မဏ္ဍပေယျံ. ဥပဋ္ဌာနမဏ္ဍော သမ္မာသတိ, မိစ္ဆာသတိ ကသဋော; မိစ္ဆာသတိံ ကသဋံ ဆဍ္ဍေတွာ သမ္မာသတိယာ ဥပဋ္ဌာနမဏ္ဍံ ပိဝတီတိ— မဏ္ဍပေယျံ. အဝိက္ခေပမဏ္ဍော သမ္မာသမာဓိ, မိစ္ဆာသမာဓိ ကသဋော; မိစ္ဆာသမာဓိံ ကသဋံ ဆဍ္ဍေတွာ သမ္မာသမာဓိဿ အဝိက္ခေပမဏ္ဍံ ပိဝတီတိ— မဏ္ဍပေယျံ.
အတ္ထိ မဏ္ဍော, အတ္ထိ ပေယျံ, အတ္ထိ ကသဋော. အဓိမောက္ခမဏ္ဍော သဒ္ဓိန္ဒြိယံ, အဿဒ္ဓိယံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ပဂ္ဂဟမဏ္ဍော ဝီရိယိန္ဒြိယံ, ကောသဇ္ဇံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ဥပဋ္ဌာနမဏ္ဍော သတိန္ဒြိယံ, ပမာဒေါ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. အဝိက္ခေပမဏ္ဍော သမာဓိန္ဒြိယံ, ဥဒ္ဓစ္စံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ဒဿနမဏ္ဍော ပညိန္ဒြိယံ, အဝိဇ္ဇာ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ.
အဿဒ္ဓိယေ အကမ္ပိယမဏ္ဍော သဒ္ဓါဗလံ, အဿဒ္ဓိယံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ကောသဇ္ဇေ အကမ္ပိယမဏ္ဍော ဝီရိယဗလံ, ကောသဇ္ဇံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ပမာဒေ အကမ္ပိယမဏ္ဍော သတိဗလံ, ပမာဒေါ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ဥဒ္ဓစ္စေ အကမ္ပိယမဏ္ဍော သမာဓိဗလံ, ဥဒ္ဓစ္စံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. အဝိဇ္ဇာယ အကမ္ပိယမဏ္ဍော ပညာဗလံ, အဝိဇ္ဇာ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ.
ဥပဋ္ဌာနမဏ္ဍော သတိသမ္ဗောဇ္ဈင်္ဂေါ, ပမာဒေါ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ပဝိစယမဏ္ဍော ဓမ္မဝိစယသမ္ဗောဇ္ဈင်္ဂေါ, အဝိဇ္ဇာ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ပဂ္ဂဟမဏ္ဍော ဝီရိယသမ္ဗောဇ္ဈင်္ဂေါ, ကောသဇ္ဇံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ဖရဏမဏ္ဍော ပီတိသမ္ဗောဇ္ဈင်္ဂေါ, ပရိဠာဟော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ဥပသမမဏ္ဍော ပဿဒ္ဓိသမ္ဗောဇ္ဈင်္ဂေါ, ဒုဋ္ဌုလ္လံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. အဝိက္ခေပမဏ္ဍော သမာဓိသမ္ဗောဇ္ဈင်္ဂေါ, ဥဒ္ဓစ္စံ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ပဋိသင်္ခါနမဏ္ဍော ဥပေက္ခာသမ္ဗောဇ္ဈင်္ဂေါ, အပဋိသင်္ခါ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ.
ဒဿနမဏ္ဍော သမ္မာဒိဋ္ဌိ, မိစ္ဆာဒိဋ္ဌိ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. အဘိနိရောပနမဏ္ဍော သမ္မာသင်္ကပ္ပေါ, မိစ္ဆာသင်္ကပ္ပေါ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ပရိဂ္ဂဟမဏ္ဍော သမ္မာဝါစာ, မိစ္ဆာဝါစာ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. သမုဋ္ဌာနမဏ္ဍော သမ္မာကမ္မန္တော, မိစ္ဆာကမ္မန္တော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ဝေါဒါနမဏ္ဍော သမ္မာအာဇီဝေါ, မိစ္ဆာအာဇီဝေါ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ပဂ္ဂဟမဏ္ဍော သမ္မာဝါယာမော, မိစ္ဆာဝါယာမော ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. ဥပဋ္ဌာနမဏ္ဍော သမ္မာသတိ, မိစ္ဆာသတိ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ. အဝိက္ခေပမဏ္ဍော သမ္မာသမာဓိ, မိစ္ဆာသမာဓိ ကသဋော; ယော တတ္ထ အတ္ထရသော ဓမ္မရသော ဝိမုတ္တိရသော— ဣဒံ ပေယျံ.
ဒဿနမဏ္ဍော သမ္မာဒိဋ္ဌိ… အဘိနိရောပနမဏ္ဍော သမ္မာသင်္ကပ္ပေါ… ပရိဂ္ဂဟမဏ္ဍော သမ္မာဝါစာ… သမုဋ္ဌာနမဏ္ဍော သမ္မာကမ္မန္တော… ဝေါဒါနမဏ္ဍော သမ္မာအာဇီဝေါ… ပဂ္ဂဟမဏ္ဍော သမ္မာဝါယာမော… ဥပဋ္ဌာနမဏ္ဍော သမ္မာသတိ… အဝိက္ခေပမဏ္ဍော သမ္မာသမာဓိ.
ဥပဋ္ဌာနမဏ္ဍော သတိသမ္ဗောဇ္ဈင်္ဂေါ… ပဝိစယမဏ္ဍော ဓမ္မဝိစယသမ္ဗောဇ္ဈင်္ဂေါ… ပဂ္ဂဟမဏ္ဍော ဝီရိယသမ္ဗောဇ္ဈင်္ဂေါ… ဖရဏမဏ္ဍော ပီတိသမ္ဗောဇ္ဈင်္ဂေါ… ဥပသမမဏ္ဍော ပဿဒ္ဓိသမ္ဗောဇ္ဈင်္ဂေါ… အဝိက္ခေပမဏ္ဍော သမာဓိသမ္ဗောဇ္ဈင်္ဂေါ… ပဋိသင်္ခါနမဏ္ဍော ဥပေက္ခာသမ္ဗောဇ္ဈင်္ဂေါ.
အဿဒ္ဓိယေ အကမ္ပိယမဏ္ဍော သဒ္ဓါဗလံ… ကောသဇ္ဇေ အကမ္ပိယမဏ္ဍော ဝီရိယဗလံ… ပမာဒေ အကမ္ပိယမဏ္ဍော သတိဗလံ… ဥဒ္ဓစ္စေ အကမ္ပိယမဏ္ဍော သမာဓိဗလံ… အဝိဇ္ဇာယ အကမ္ပိယမဏ္ဍော ပညာဗလံ.
အဓိမောက္ခမဏ္ဍော သဒ္ဓိန္ဒြိယံ… ပဂ္ဂဟမဏ္ဍော ဝီရိယိန္ဒြိယံ… ဥပဋ္ဌာနမဏ္ဍော သတိန္ဒြိယံ… အဝိက္ခေပမဏ္ဍော သမာဓိန္ဒြိယံ… ဒဿနမဏ္ဍော ပညိန္ဒြိယံ.
အာဓိပတေယျဋ္ဌေန ဣန္ဒြိယာ မဏ္ဍော, အကမ္ပိယဋ္ဌေန ဗလာ မဏ္ဍော, နိယျာနဋ္ဌေန ဗောဇ္ဈင်္ဂါ မဏ္ဍော, ဟေတုဋ္ဌေန မဂ္ဂေါ မဏ္ဍော, ဥပဋ္ဌာနဋ္ဌေန သတိပဋ္ဌာနာ မဏ္ဍော, ပဒဟနဋ္ဌေန သမ္မပ္ပဓာနာ မဏ္ဍော, ဣဇ္ဈနဋ္ဌေန ဣဒ္ဓိပါဒါ မဏ္ဍော, တထဋ္ဌေန သစ္စာ မဏ္ဍော, အဝိက္ခေပဋ္ဌေန သမထော မဏ္ဍော, အနုပဿနဋ္ဌေန ဝိပဿနာ မဏ္ဍော, ဧကရသဋ္ဌေန သမထဝိပဿနာ မဏ္ဍော, အနတိဝတ္တနဋ္ဌေန ယုဂနဒ္ဓါ မဏ္ဍော, သံဝရဋ္ဌေန သီလဝိသုဒ္ဓိ မဏ္ဍော, အဝိက္ခေပဋ္ဌေန စိတ္တဝိသုဒ္ဓိ မဏ္ဍော, ဒဿနဋ္ဌေန ဒိဋ္ဌိဝိသုဒ္ဓိ မဏ္ဍော, မုတ္တဋ္ဌေန ဝိမောက္ခော မဏ္ဍော, ပဋိဝေဓဋ္ဌေန ဝိဇ္ဇာ မဏ္ဍော, ပရိစ္စာဂဋ္ဌေန ဝိမုတ္တိ မဏ္ဍော, သမုစ္ဆေဒဋ္ဌေန ခယေ ဉာဏံ မဏ္ဍော, ပဋိပ္ပဿဒ္ဓဋ္ဌေန အနုပ္ပါဒေ ဉာဏံ မဏ္ဍော, ဆန္ဒော မူလဋ္ဌေန မဏ္ဍော, မနသိကာရော သမုဋ္ဌာနဋ္ဌေန မဏ္ဍော, ဖဿော သမောဓာနဋ္ဌေန မဏ္ဍော, ဝေဒနာ သမောသရဏဋ္ဌေန မဏ္ဍော, သမာဓိ ပမုခဋ္ဌေန မဏ္ဍော, သတိ အာဓိပတေယျဋ္ဌေန မဏ္ဍော, ပညာ တဒုတ္တရဋ္ဌေန မဏ္ဍော, ဝိမုတ္တိ သာရဋ္ဌေန မဏ္ဍော, အမတောဂဓံ နိဗ္ဗာနံ ပရိယောသာနဋ္ဌေန မဏ္ဍောတိ.
မဏ္ဍပေယျကထာ နိဋ္ဌိတာ.
စတုတ္ထဘာဏဝါရော.
မဟာဝဂ္ဂေါ ပဌမော.
တဿုဒ္ဒါနံ
ဉာဏဒိဋ္ဌီ စ အဿာသာ,
ဣန္ဒြိယံ ဝိမောက္ခပဉ္စမာ;_
ဂတိကမ္မဝိပလ္လာသာ,
မဂ္ဂေါ မဏ္ဍေန တေ ဒသာတိ.
ဧသ နိကာယဓရေဟိ ဌပိတော, အသမော ပဌမော ပဝရော ဝရဝဂ္ဂေါတိ.