1.2 ဒိဋ္ဌိကထာ
ကာ ဒိဋ္ဌိ, ကတိ ဒိဋ္ဌိဋ္ဌာနာနိ, ကတိ ဒိဋ္ဌိပရိယုဋ္ဌာနာနိ, ကတိ ဒိဋ္ဌိယော, ကတိ ဒိဋ္ဌာဘိနိဝေသာ, ကတမော ဒိဋ္ဌိဋ္ဌာနသမုဂ္ဃါတောတိ?
ကာ ဒိဋ္ဌီ တိ အဘိနိဝေသပရာမာသော ဒိဋ္ဌိ. (1)
ကတိ ဒိဋ္ဌိဋ္ဌာနာနီ တိ အဋ္ဌ ဒိဋ္ဌိဋ္ဌာနာနိ. (2)
ကတိ ဒိဋ္ဌိပရိယုဋ္ဌာနာနီ တိ အဋ္ဌာရသ ဒိဋ္ဌိပရိယုဋ္ဌာနာနိ. (3)
ကတိ ဒိဋ္ဌိယော တိ သောဠသ ဒိဋ္ဌိယော. (4)
ကတိ ဒိဋ္ဌာဘိနိဝေသာ တိ တီဏိ သတံ ဒိဋ္ဌာဘိနိဝေသာ. (5)
ကတမော ဒိဋ္ဌိဋ္ဌာနသမုဂ္ဃါတော တိ သောတာပတ္တိမဂ္ဂေါ ဒိဋ္ဌိဋ္ဌာနသမုဂ္ဃါတော. (6)
ကထံ အဘိနိဝေသပရာမာသော ဒိဋ္ဌိ ? ရူပံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. ဝေဒနံ ဧတံ မမ …ပေ… သညံ ဧတံ မမ …ပေ… သင်္ခါရေ ဧတံ မမ …ပေ… ဝိညာဏံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. စက္ခုံ ဧတံ မမ… သောတံ ဧတံ မမ… ဃာနံ ဧတံ မမ… ဇိဝှံ ဧတံ မမ… ကာယံ ဧတံ မမ… မနံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. ရူပေ ဧတံ မမ… သဒ္ဒေ ဧတံ မမ… ဂန္ဓေ ဧတံ မမ… ရသေ ဧတံ မမ… ဖောဋ္ဌဗ္ဗေ ဧတံ မမ… ဓမ္မေ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. စက္ခုဝိညာဏံ ဧတံ မမ… သောတဝိညာဏံ ဧတံ မမ… ဃာနဝိညာဏံ ဧတံ မမ… ဇိဝှါဝိညာဏံ ဧတံ မမ… ကာယဝိညာဏံ ဧတံ မမ… မနောဝိညာဏံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. စက္ခုသမ္ဖဿံ ဧတံ မမ… သောတသမ္ဖဿံ ဧတံ မမ… ဃာနသမ္ဖဿံ ဧတံ မမ… ဇိဝှါသမ္ဖဿံ ဧတံ မမ… ကာယသမ္ဖဿံ ဧတံ မမ… မနောသမ္ဖဿံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. စက္ခုသမ္ဖဿဇံ ဝေဒနံ… သောတသမ္ဖဿဇံ ဝေဒနံ… ဃာနသမ္ဖဿဇံ ဝေဒနံ… ဇိဝှါသမ္ဖဿဇံ ဝေဒနံ… ကာယသမ္ဖဿဇံ ဝေဒနံ… မနောသမ္ဖဿဇံ ဝေဒနံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ.
ရူပသညံ ဧတံ မမ… သဒ္ဒသညံ ဧတံ မမ… ဂန္ဓသညံ ဧတံ မမ… ရသသညံ ဧတံ မမ… ဖောဋ္ဌဗ္ဗသညံ ဧတံ မမ… ဓမ္မသညံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. ရူပသဉ္စေတနံ ဧတံ မမ… သဒ္ဒသဉ္စေတနံ ဧတံ မမ… ဂန္ဓသဉ္စေတနံ ဧတံ မမ… ရသသဉ္စေတနံ ဧတံ မမ… ဖောဋ္ဌဗ္ဗသဉ္စေတနံ ဧတံ မမ… ဓမ္မသဉ္စေတနံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. ရူပတဏှံ ဧတံ မမ… သဒ္ဒတဏှံ ဧတံ မမ… ဂန္ဓတဏှံ ဧတံ မမ… ရသတဏှံ ဧတံ မမ… ဖောဋ္ဌဗ္ဗတဏှံ ဧတံ မမ… ဓမ္မတဏှံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. ရူပဝိတက္ကံ ဧတံ မမ… သဒ္ဒဝိတက္ကံ ဧတံ မမ… ဂန္ဓဝိတက္ကံ ဧတံ မမ… ရသဝိတက္ကံ ဧတံ မမ… ဖောဋ္ဌဗ္ဗဝိတက္ကံ ဧတံ မမ… ဓမ္မဝိတက္ကံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. ရူပဝိစာရံ ဧတံ မမ… သဒ္ဒဝိစာရံ ဧတံ မမ… ဂန္ဓဝိစာရံ ဧတံ မမ… ရသဝိစာရံ ဧတံ မမ… ဖောဋ္ဌဗ္ဗဝိစာရံ ဧတံ မမ… ဓမ္မဝိစာရံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ.
ပထဝီဓာတုံ ဧတံ မမ… အာပေါဓာတုံ ဧတံ မမ… တေဇောဓာတုံ ဧတံ မမ… ဝါယောဓာတုံ ဧတံ မမ… အာကာသဓာတုံ ဧတံ မမ… ဝိညာဏဓာတုံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. ပထဝီကသိဏံ ဧတံ မမ… အာပေါကသိဏံ… တေဇောကသိဏံ… ဝါယောကသိဏံ… နီလကသိဏံ… ပီတကသိဏံ… လောဟိတကသိဏံ… ဩဒါတကသိဏံ… အာကာသကသိဏံ… ဝိညာဏကသိဏံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ.
ကေသံ ဧတံ မမ… လောမံ ဧတံ မမ… နခံ ဧတံ မမ… ဒန္တံ ဧတံ မမ… တစံ ဧတံ မမ… မံသံ ဧတံ မမ… နှာရုံ ဧတံ မမ… အဋ္ဌိံ ဧတံ မမ… အဋ္ဌိမိဉ္ဇံ ဧတံ မမ… ဝက္ကံ ဧတံ မမ… ဟဒယံ ဧတံ မမ… ယကနံ ဧတံ မမ… ကိလောမကံ ဧတံ မမ… ပိဟကံ ဧတံ မမ… ပပ္ဖါသံ ဧတံ မမ… အန္တံ ဧတံ မမ… အန္တဂုဏံ ဧတံ မမ… ဥဒရိယံ ဧတံ မမ… ကရီသံ ဧတံ မမ… ပိတ္တံ ဧတံ မမ… သေမှံ ဧတံ မမ… ပုဗ္ဗံ ဧတံ မမ … လောဟိတံ ဧတံ မမ… သေဒံ ဧတံ မမ… မေဒံ ဧတံ မမ… အဿုံ ဧတံ မမ… ဝသံ ဧတံ မမ… ခေဠံ ဧတံ မမ… သိင်္ဃာဏိကံ ဧတံ မမ… လသိကံ ဧတံ မမ… မုတ္တံ ဧတံ မမ… မတ္ထလုင်္ဂံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ.
စက္ခာယတနံ ဧတံ မမ… ရူပါယတနံ ဧတံ မမ… သောတာယတနံ ဧတံ မမ… သဒ္ဒါယတနံ ဧတံ မမ… ဃာနာယတနံ ဧတံ မမ… ဂန္ဓာယတနံ ဧတံ မမ… ဇိဝှါယတနံ ဧတံ မမ… ရသာယတနံ ဧတံ မမ… ကာယာယတနံ ဧတံ မမ… ဖောဋ္ဌဗ္ဗာယတနံ ဧတံ မမ… မနာယတနံ ဧတံ မမ… ဓမ္မာယတနံ ဧတံ မမ.
စက္ခုဓာတုံ ဧတံ မမ… ရူပဓာတုံ ဧတံ မမ… စက္ခုဝိညာဏဓာတုံ ဧတံ မမ… သောတဓာတုံ ဧတံ မမ… သဒ္ဒဓာတုံ ဧတံ မမ… သောတဝိညာဏဓာတုံ ဧတံ မမ… ဃာနဓာတုံ ဧတံ မမ… ဂန္ဓဓာတုံ ဧတံ မမ… ဃာနဝိညာဏဓာတုံ ဧတံ မမ… ဇိဝှါဓာတုံ ဧတံ မမ… ရသဓာတုံ ဧတံ မမ… ဇိဝှါဝိညာဏဓာတုံ ဧတံ မမ… ကာယဓာတုံ ဧတံ မမ… ဖောဋ္ဌဗ္ဗဓာတုံ ဧတံ မမ… ကာယဝိညာဏဓာတုံ ဧတံ မမ… မနောဓာတုံ ဧတံ မမ… ဓမ္မဓာတုံ ဧတံ မမ… မနောဝိညာဏဓာတုံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ.
စက္ခုန္ဒြိယံ ဧတံ မမ… သောတိန္ဒြိယံ ဧတံ မမ… ဃာနိန္ဒြိယံ ဧတံ မမ… ဇိဝှိန္ဒြိယံ ဧတံ မမ… ကာယိန္ဒြိယံ ဧတံ မမ… မနိန္ဒြိယံ ဧတံ မမ… ဇီဝိတိန္ဒြိယံ ဧတံ မမ… ဣတ္ထိန္ဒြိယံ ဧတံ မမ… ပုရိသိန္ဒြိယံ ဧတံ မမ… သုခိန္ဒြိယံ ဧတံ မမ… ဒုက္ခိန္ဒြိယံ ဧတံ မမ… သောမနဿိန္ဒြိယံ ဧတံ မမ… ဒေါမနဿိန္ဒြိယံ ဧတံ မမ… ဥပေက္ခိန္ဒြိယံ ဧတံ မမ… သဒ္ဓိန္ဒြိယံ ဧတံ မမ… ဝီရိယိန္ဒြိယံ ဧတံ မမ… သတိန္ဒြိယံ ဧတံ မမ… သမာဓိန္ဒြိယံ ဧတံ မမ… ပညိန္ဒြိယံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ.
ကာမဓာတုံ ဧတံ မမ… ရူပဓာတုံ ဧတံ မမ… အရူပဓာတုံ ဧတံ မမ… ကာမဘဝံ ဧတံ မမ… ရူပဘဝံ ဧတံ မမ… အရူပဘဝံ ဧတံ မမ… သညာဘဝံ ဧတံ မမ… အသညာဘဝံ ဧတံ မမ… နေဝသညာနာသညာဘဝံ ဧတံ မမ… ဧကဝေါကာရဘဝံ ဧတံ မမ… စတုဝေါကာရဘဝံ ဧတံ မမ… ပဉ္စဝေါကာရဘဝံ ဧတံ မမ… ပဌမဇ္ဈာနံ ဧတံ မမ… ဒုတိယဇ္ဈာနံ ဧတံ မမ… တတိယဇ္ဈာနံ ဧတံ မမ… စတုတ္ထဇ္ဈာနံ ဧတံ မမ… မေတ္တံ စေတောဝိမုတ္တိံ ဧတံ မမ… ကရုဏံ စေတောဝိမုတ္တိံ ဧတံ မမ… မုဒိတံ စေတောဝိမုတ္တိံ ဧတံ မမ… ဥပေက္ခံ စေတောဝိမုတ္တိံ ဧတံ မမ… အာကာသာနဉ္စာယတနသမာပတ္တိံ ဧတံ မမ… ဝိညာဏဉ္စာယတနသမာပတ္တိံ ဧတံ မမ… အာကိဉ္စညာယတနသမာပတ္တိံ ဧတံ မမ… နေဝသညာနာသညာယတနသမာပတ္တိံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ.
အဝိဇ္ဇံ ဧတံ မမ… သင်္ခါရေ ဧတံ မမ… ဝိညာဏံ ဧတံ မမ… နာမရူပံ ဧတံ မမ… သဠာယတနံ ဧတံ မမ… ဖဿံ ဧတံ မမ… ဝေဒနံ ဧတံ မမ… တဏှံ ဧတံ မမ… ဥပါဒါနံ ဧတံ မမ… ဘဝံ ဧတံ မမ… ဇာတိံ ဧတံ မမ… ဇရာမရဏံ ဧတံ မမ, ဧသောဟမသ္မိ, ဧသော မေ အတ္တာတိ— အဘိနိဝေသပရာမာသော ဒိဋ္ဌိ. ဧဝံ အဘိနိဝေသပရာမာသော ဒိဋ္ဌိ. (1)
ကတမာနိ အဋ္ဌ ဒိဋ္ဌိဋ္ဌာနာနိ? ခန္ဓာပိ ဒိဋ္ဌိဋ္ဌာနံ, အဝိဇ္ဇာပိ ဒိဋ္ဌိဋ္ဌာနံ, ဖဿောပိ ဒိဋ္ဌိဋ္ဌာနံ, သညာပိ ဒိဋ္ဌိဋ္ဌာနံ, ဝိတက္ကောပိ ဒိဋ္ဌိဋ္ဌာနံ, အယောနိသော မနသိကာရောပိ ဒိဋ္ဌိဋ္ဌာနံ, ပါပမိတ္တောပိ ဒိဋ္ဌိဋ္ဌာနံ, ပရတောဃောသောပိ ဒိဋ္ဌိဋ္ဌာနံ.
ခန္ဓာ ဟေတု ခန္ဓာ ပစ္စယော ဒိဋ္ဌိဋ္ဌာနံ ဥပါဒါယ သမုဋ္ဌာနဋ္ဌေန— ဧဝံ ခန္ဓာပိ ဒိဋ္ဌိဋ္ဌာနံ.
အဝိဇ္ဇာ ဟေတု အဝိဇ္ဇာ ပစ္စယော ဒိဋ္ဌိဋ္ဌာနံ ဥပါဒါယ သမုဋ္ဌာနဋ္ဌေန— ဧဝံ အဝိဇ္ဇာပိ ဒိဋ္ဌိဋ္ဌာနံ.
ဖဿော ဟေတု ဖဿော ပစ္စယော ဒိဋ္ဌိဋ္ဌာနံ ဥပါဒါယ သမုဋ္ဌာနဋ္ဌေန— ဧဝံ ဖဿောပိ ဒိဋ္ဌိဋ္ဌာနံ.
သညာ ဟေတု သညာ ပစ္စယော ဒိဋ္ဌိဋ္ဌာနံ ဥပါဒါယ သမုဋ္ဌာနဋ္ဌေန— ဧဝံ သညာပိ ဒိဋ္ဌိဋ္ဌာနံ.
ဝိတက္ကော ဟေတု ဝိတက္ကော ပစ္စယော ဒိဋ္ဌိဋ္ဌာနံ ဥပါဒါယ, သမုဋ္ဌာနဋ္ဌေန— ဧဝံ ဝိတက္ကောပိ ဒိဋ္ဌိဋ္ဌာနံ.
အယောနိသော မနသိကာရော ဟေတု အယောနိသော မနသိကာရော ပစ္စယော ဒိဋ္ဌိဋ္ဌာနံ ဥပါဒါယ သမုဋ္ဌာနဋ္ဌေန— ဧဝံ အယောနိသော မနသိကာရောပိ ဒိဋ္ဌိဋ္ဌာနံ.
ပါပမိတ္တော ဟေတု ပါပမိတ္တော ပစ္စယော ဒိဋ္ဌိဋ္ဌာနံ ဥပါဒါယ, သမုဋ္ဌာနဋ္ဌေန— ဧဝံ ပါပမိတ္တောပိ ဒိဋ္ဌိဋ္ဌာနံ.
ပရတောဃောသော ဟေတု ပရတောဃောသော ပစ္စယော ဒိဋ္ဌိဋ္ဌာနံ ဥပါဒါယ သမုဋ္ဌာနဋ္ဌေန— ဧဝံ ပရတောဃောသောပိ ဒိဋ္ဌိဋ္ဌာနံ. ဣမာနိ အဋ္ဌ ဒိဋ္ဌိဋ္ဌာနာနိ. (2)
ကတမာနိ အဋ္ဌာရသ ဒိဋ္ဌိပရိယုဋ္ဌာနာနိ? ယာ ဒိဋ္ဌိ ဒိဋ္ဌိဂတံ, ဒိဋ္ဌိဂဟနံ, ဒိဋ္ဌိကန္တာရံ, ဒိဋ္ဌိဝိသူကံ, ဒိဋ္ဌိဝိပ္ဖန္ဒိတံ, ဒိဋ္ဌိသညောဇနံ, ဒိဋ္ဌိသလ္လံ, ဒိဋ္ဌိသမ္ဗာဓော, ဒိဋ္ဌိပလိဗောဓော, ဒိဋ္ဌိဗန္ဓနံ, ဒိဋ္ဌိပပါတော, ဒိဋ္ဌာနုသယော, ဒိဋ္ဌိသန္တာပေါ, ဒိဋ္ဌိပရိဠာဟော, ဒိဋ္ဌိဂန္ထော, ဒိဋ္ဌုပါဒါနံ, ဒိဋ္ဌာဘိနိဝေသော, ဒိဋ္ဌိပရာမာသော— ဣမာနိ အဋ္ဌာရသ ဒိဋ္ဌိပရိယုဋ္ဌာနာနိ. (3)
ကတမာ သောဠသ ဒိဋ္ဌိယော? အဿာဒဒိဋ္ဌိ, အတ္တာနုဒိဋ္ဌိ, မိစ္ဆာဒိဋ္ဌိ, သက္ကာယဒိဋ္ဌိ, သက္ကာယဝတ္ထုကာ သဿတဒိဋ္ဌိ, သက္ကာယဝတ္ထုကာ ဥစ္ဆေဒဒိဋ္ဌိ, အန္တဂ္ဂါဟိကာ ဒိဋ္ဌိ, ပုဗ္ဗန္တာနုဒိဋ္ဌိ, အပရန္တာနုဒိဋ္ဌိ, သညောဇနိကာ ဒိဋ္ဌိ, အဟန္တိ မာနဝိနိဗန္ဓာ ဒိဋ္ဌိ, မမန္တိ မာနဝိနိဗန္ဓာ ဒိဋ္ဌိ, အတ္တဝါဒပဋိသံယုတ္တာ ဒိဋ္ဌိ, လောကဝါဒပဋိသံယုတ္တာ ဒိဋ္ဌိ, ဘဝဒိဋ္ဌိ, ဝိဘဝဒိဋ္ဌိ— ဣမာ သောဠသ ဒိဋ္ဌိယော. (4)
ကတမေ တီဏိ သတံ ဒိဋ္ဌာဘိနိဝေသာ? အဿာဒဒိဋ္ဌိယာ ကတိဟာကာရေဟိ အဘိနိဝေသော ဟောတိ? အတ္တာနုဒိဋ္ဌိယာ ကတိဟာကာရေဟိ အဘိနိဝေသော ဟောတိ? မိစ္ဆာဒိဋ္ဌိယာ ကတိဟာကာရေဟိ အဘိနိဝေသော ဟောတိ? သက္ကာယဒိဋ္ဌိယာ ကတိဟာကာရေဟိ အဘိနိဝေသော ဟောတိ? သက္ကာယဝတ္ထုကာယ သဿတဒိဋ္ဌိယာ ကတိဟာကာရေဟိ အဘိနိဝေသော ဟောတိ? သက္ကာယဝတ္ထုကာယ ဥစ္ဆေဒဒိဋ္ဌိယာ ကတိဟာကာရေဟိ အဘိနိဝေသော ဟောတိ? အန္တဂ္ဂါဟိကာယ ဒိဋ္ဌိယာ ကတိဟာကာရေဟိ အဘိနိဝေသော ဟောတိ? ပုဗ္ဗန္တာနုဒိဋ္ဌိယာ ကတိဟာကာရေဟိ အဘိနိဝေသော ဟောတိ? အပရန္တာနုဒိဋ္ဌိယာ ကတိဟာကာရေဟိ အဘိနိဝေသော ဟောတိ? သညောဇနိကာယ ဒိဋ္ဌိယာ ကတိဟာကာရေဟိ အဘိနိဝေသော ဟောတိ? အဟန္တိ မာနဝိနိဗန္ဓာယ ဒိဋ္ဌိယာ ကတိဟာကာရေဟိ အဘိနိဝေသော ဟောတိ? မမန္တိ မာနဝိနိဗန္ဓာယ ဒိဋ္ဌိယာ ကတိဟာကာရေဟိ အဘိနိဝေသော ဟောတိ? အတ္တဝါဒပဋိသံယုတ္တာယ ဒိဋ္ဌိယာ ကတိဟာကာရေဟိ အဘိနိဝေသော ဟောတိ? လောကဝါဒပဋိသံယုတ္တာယ ဒိဋ္ဌိယာ ကတိဟာကာရေဟိ အဘိနိဝေသော ဟောတိ? ဘဝဒိဋ္ဌိယာ ကတိဟာကာရေဟိ အဘိနိဝေသော ဟောတိ? ဝိဘဝဒိဋ္ဌိယာ ကတိဟာကာရေဟိ အဘိနိဝေသော ဟောတိ?
အဿာဒဒိဋ္ဌိယာ ပဉ္စတိံသာယ အာကာရေဟိ အဘိနိဝေသော ဟောတိ. အတ္တာနုဒိဋ္ဌိယာ ဝီသတိယာ အာကာရေဟိ အဘိနိဝေသော ဟောတိ. မိစ္ဆာဒိဋ္ဌိယာ ဒသဟာကာရေဟိ အဘိနိဝေသော ဟောတိ. သက္ကာယဒိဋ္ဌိယာ ဝီသတိယာ အာကာရေဟိ အဘိနိဝေသော ဟောတိ. သက္ကာယဝတ္ထုကာယ သဿတဒိဋ္ဌိယာ ပန္နရသဟိ အာကာရေဟိ အဘိနိဝေသော ဟောတိ. သက္ကာယဝတ္ထုကာယ ဥစ္ဆေဒဒိဋ္ဌိယာ ပဉ္စဟာကာရေဟိ အဘိနိဝေသော ဟောတိ. အန္တဂ္ဂါဟိကာယ ဒိဋ္ဌိယာ ပညာသာယ အာကာရေဟိ အဘိနိဝေသော ဟောတိ. ပုဗ္ဗန္တာနုဒိဋ္ဌိယာ အဋ္ဌာရသဟိ အာကာရေဟိ အဘိနိဝေသော ဟောတိ. အပရန္တာနုဒိဋ္ဌိယာ စတုစတ္တာလီသာယ အာကာရေဟိ အဘိနိဝေသော ဟောတိ. သညောဇနိကာယ ဒိဋ္ဌိယာ အဋ္ဌာရသဟိ အာကာရေဟိ အဘိနိဝေသော ဟောတိ. အဟန္တိ မာနဝိနိဗန္ဓာယ ဒိဋ္ဌိယာ အဋ္ဌာရသဟိ အာကာရေဟိ အဘိနိဝေသော ဟောတိ. မမန္တိ မာနဝိနိဗန္ဓာယ ဒိဋ္ဌိယာ အဋ္ဌာရသဟိ အာကာရေဟိ အဘိနိဝေသော ဟောတိ. အတ္တဝါဒပဋိသံယုတ္တာယ ဒိဋ္ဌိယာ ဝီသတိယာ အာကာရေဟိ အဘိနိဝေသော ဟောတိ. လောကဝါဒပဋိသံယုတ္တာယ ဒိဋ္ဌိယာ အဋ္ဌဟိ အာကာရေဟိ အဘိနိဝေသော ဟောတိ. ဘဝဒိဋ္ဌိယာ ဧကေန အာကာရေန အဘိနိဝေသော ဟောတိ. ဝိဘဝဒိဋ္ဌိယာ ဧကေန အာကာရေန အဘိနိဝေသော ဟောတိ.