1.2.13 အတ္တဝါဒပဋိသံယုတ္တဒိဋ္ဌိနိဒ္ဒေသ
အတ္တဝါဒပဋိသံယုတ္တာယ ဒိဋ္ဌိယာ ကတမေဟိ ဝီသတိယာ အာကာရေဟိ အဘိနိဝေသော ဟောတိ? ဣဓ အဿုတဝါ ပုထုဇ္ဇနော အရိယာနံ အဒဿာဝီ အရိယဓမ္မဿ အကောဝိဒေါ အရိယဓမ္မေ အဝိနီတော သပ္ပုရိသာနံ အဒဿာဝီ သပ္ပုရိသဓမ္မဿ အကောဝိဒေါ သပ္ပုရိသဓမ္မေ အဝိနီတော ရူပံ အတ္တတော သမနုပဿတိ ရူပဝန္တံ ဝါ အတ္တာနံ အတ္တနိ ဝါ ရူပံ ရူပသ္မိံ ဝါ အတ္တာနံ …ပေ… ဝေဒနံ… သညံ… သင်္ခါရေ… ဝိညာဏံ အတ္တတော သမနုပဿတိ ဝိညာဏဝန္တံ ဝါ အတ္တာနံ အတ္တနိ ဝါ ဝိညာဏံ ဝိညာဏသ္မိံ ဝါ အတ္တာနံ …ပေ… .
ကထံ ရူပံ အတ္တတော သမနုပဿတိ? ဣဓေကစ္စော ပထဝီကသိဏံ …ပေ… ဩဒါတကသိဏံ အတ္တတော သမနုပဿတိ. “ယံ ဩဒါတကသိဏံ, သော အဟံ; ယော အဟံ, တံ ဩဒါတကသိဏန်”တိ— ဩဒါတကသိဏဉ္စ အတ္တဉ္စ အဒွယံ သမနုပဿတိ. သေယျထာပိ တေလပ္ပဒီပဿ ဈာယတော “ယာ အစ္စိ, သော ဝဏ္ဏော; ယော ဝဏ္ဏော, သာ အစ္စီ”တိ— အစ္စိဉ္စ ဝဏ္ဏဉ္စ အဒွယံ သမနုပဿတိ. ဧဝမေဝံ ဣဓေကစ္စော ဩဒါတကသိဏံ အတ္တတော သမနုပဿတိ …ပေ… အယံ ပဌမာ ရူပဝတ္ထုကာ အတ္တဝါဒပဋိသံယုတ္တာ ဒိဋ္ဌိ. အတ္တဝါဒပဋိသံယုတ္တာ ဒိဋ္ဌိ မိစ္ဆာဒိဋ္ဌိ …ပေ… ဣမာနိ သညောဇနာနိ, န စ ဒိဋ္ဌိယော. ဧဝံ ရူပံ အတ္တတော သမနုပဿတိ …ပေ… အတ္တဝါဒပဋိသံယုတ္တာယ ဒိဋ္ဌိယာ ဣမေဟိ ဝီသတိယာ အာကာရေဟိ အဘိနိဝေသော ဟောတိ.
အတ္တဝါဒပဋိသံယုတ္တဒိဋ္ဌိနိဒ္ဒေသော တေရသမော.