1.3.1 ဂဏနဝါရ
သောဠသဝတ္ထုကံ အာနာပါနဿတိသမာဓိံ ဘာဝယတော သမဓိကာနိ ဒွေ ဉာဏသတာနိ ဥပ္ပဇ္ဇန္တိ— အဋ္ဌ ပရိပန္ထေ ဉာဏာနိ, အဋ္ဌ စ ဥပကာရေ ဉာဏာနိ, အဋ္ဌာရသ ဥပက္ကိလေသေ ဉာဏာနိ, တေရသ ဝေါဒါနေ ဉာဏာနိ, ဗာတ္တိံသ သတောကာရိဿ ဉာဏာနိ, စတုဝီသတိ သမာဓိဝသေန ဉာဏာနိ, ဒွေသတ္တတိ ဝိပဿနာဝသေန ဉာဏာနိ, အဋ္ဌ နိဗ္ဗိဒါဉာဏာနိ, အဋ္ဌ နိဗ္ဗိဒါနုလောမဉာဏာနိ, အဋ္ဌ နိဗ္ဗိဒါပဋိပ္ပဿဒ္ဓိဉာဏာနိ, ဧကဝီသတိ ဝိမုတ္တိသုခေ ဉာဏာနိ.
ကတမာနိ အဋ္ဌ ပရိပန္ထေ ဉာဏာနိ, အဋ္ဌ စ ဥပကာရေ ဉာဏာနိ? ကာမစ္ဆန္ဒော သမာဓိဿ ပရိပန္ထော, နေက္ခမ္မံ သမာဓိဿ ဥပကာရံ. ဗျာပါဒေါ သမာဓိဿ ပရိပန္ထော, အဗျာပါဒေါ သမာဓိဿ ဥပကာရံ. ထိနမိဒ္ဓံ သမာဓိဿ ပရိပန္ထော, အာလောကသညာ သမာဓိဿ ဥပကာရံ. ဥဒ္ဓစ္စံ သမာဓိဿ ပရိပန္ထော, အဝိက္ခေပေါ သမာဓိဿ ဥပကာရံ. ဝိစိကိစ္ဆာ သမာဓိဿ ပရိပန္ထော, ဓမ္မဝဝတ္ထာနံ သမာဓိဿ ဥပကာရံ. အဝိဇ္ဇာ သမာဓိဿ ပရိပန္ထော, ဉာဏံ သမာဓိဿ ဥပကာရံ. အရတိ သမာဓိဿ ပရိပန္ထော, ပါမောဇ္ဇံ သမာဓိဿ ဥပကာရံ. သဗ္ဗေပိ အကုသလာ ဓမ္မာ သမာဓိဿ ပရိပန္ထာ, သဗ္ဗေပိ ကုသလာ ဓမ္မာ သမာဓိဿ ဥပကာရာ. ဣမာနိ အဋ္ဌ ပရိပန္ထေ ဉာဏာနိ, အဋ္ဌ စ ဥပကာရေ ဉာဏာနိ.
ဂဏနဝါရော ပဌမော.