1.3.6 ဉာဏရာသိဆက္ကနိဒ္ဒေသ
- ဉာဏရာသိဆက္ကနိဒ္ဒေသ
ကတမာနိ စတုဝီသတိ သမာဓိဝသေန ဉာဏာနိ? ဒီဃံ အဿာသဝသေန စိတ္တဿ ဧကဂ္ဂတာ အဝိက္ခေပေါ သမာဓိ, ဒီဃံ ပဿာသဝသေန စိတ္တဿ ဧကဂ္ဂတာ အဝိက္ခေပေါ သမာဓိ …ပေ… ဝိမောစယံ စိတ္တံ အဿာသဝသေန စိတ္တဿ ဧကဂ္ဂတာ အဝိက္ခေပေါ သမာဓိ, ဝိမောစယံ စိတ္တံ ပဿာသဝသေန စိတ္တဿ ဧကဂ္ဂတာ အဝိက္ခေပေါ သမာဓိ. ဣမာနိ စတုဝီသတိ သမာဓိဝသေန ဉာဏာနိ. (1)
ကတမာနိ ဒွေသတ္တတိ ဝိပဿနာဝသေန ဉာဏာနိ? ဒီဃံ အဿာသံ အနိစ္စတော အနုပဿနဋ္ဌေန ဝိပဿနာ, ဒုက္ခတော အနုပဿနဋ္ဌေန ဝိပဿနာ, အနတ္တတော အနုပဿနဋ္ဌေန ဝိပဿနာ, ဒီဃံ ပဿာသံ အနိစ္စတော အနုပဿနဋ္ဌေန ဝိပဿနာ, ဒုက္ခတော အနုပဿနဋ္ဌေန ဝိပဿနာ, အနတ္တတော အနုပဿနဋ္ဌေန ဝိပဿနာ …ပေ… ဝိမောစယံ စိတ္တံ အဿာသံ, ဝိမောစယံ စိတ္တံ ပဿာသံ အနိစ္စတော အနုပဿနဋ္ဌေန ဝိပဿနာ, ဒုက္ခတော အနုပဿနဋ္ဌေန ဝိပဿနာ, အနတ္တတော အနုပဿနဋ္ဌေန ဝိပဿနာ. ဣမာနိ ဒွေသတ္တတိ ဝိပဿနာဝသေန ဉာဏာနိ. (2)
ကတမာနိ အဋ္ဌ နိဗ္ဗိဒါဉာဏာနိ? အနိစ္စာနုပဿီ အဿသံ ယထာဘူတံ ဇာနာတိ ပဿတီတိ— နိဗ္ဗိဒါဉာဏံ, အနိစ္စာနုပဿီ ပဿသံ ယထာဘူတံ ဇာနာတိ ပဿတီတိ— နိဗ္ဗိဒါဉာဏံ …ပေ… ပဋိနိဿဂ္ဂါနုပဿီ အဿသံ ယထာဘူတံ ဇာနာတိ ပဿတီတိ— နိဗ္ဗိဒါဉာဏံ, ပဋိနိဿဂ္ဂါနုပဿီ ပဿသံ ယထာဘူတံ ဇာနာတိ ပဿတီတိ— နိဗ္ဗိဒါဉာဏံ. ဣမာနိ အဋ္ဌ နိဗ္ဗိဒါဉာဏာနိ. (3)
ကတမာနိ အဋ္ဌ နိဗ္ဗိဒါနုလောမေ ဉာဏာနိ? အနိစ္စာနုပဿီ အဿသံ ဘယတုပဋ္ဌာနေ ပညာ နိဗ္ဗိဒါနုလောမေ ဉာဏံ, အနိစ္စာနုပဿီ ပဿသံ ဘယတုပဋ္ဌာနေ ပညာ နိဗ္ဗိဒါနုလောမေ ဉာဏံ …ပေ… ပဋိနိဿဂ္ဂါနုပဿီ အဿသံ ဘယတုပဋ္ဌာနေ ပညာ နိဗ္ဗိဒါနုလောမေ ဉာဏံ, ပဋိနိဿဂ္ဂါနုပဿီ ပဿသံ ဘယတုပဋ္ဌာနေ ပညာ နိဗ္ဗိဒါနုလောမေ ဉာဏံ— ဣမာနိ အဋ္ဌ နိဗ္ဗိဒါနုလောမေ ဉာဏာနိ. (4)
ကတမာနိ အဋ္ဌ နိဗ္ဗိဒါပဋိပ္ပဿဒ္ဓိဉာဏာနိ? အနိစ္စာနုပဿီ အဿသံ ပဋိသင်္ခါ သန္တိဋ္ဌနာ ပညာ နိဗ္ဗိဒါပဋိပ္ပဿဒ္ဓိဉာဏံ, အနိစ္စာနုပဿီ ပဿသံ ပဋိသင်္ခါ သန္တိဋ္ဌနာ ပညာ နိဗ္ဗိဒါပဋိပ္ပဿဒ္ဓိဉာဏံ …ပေ… ပဋိနိဿဂ္ဂါနုပဿီ အဿသံ ပဋိသင်္ခါ သန္တိဋ္ဌနာ ပညာ နိဗ္ဗိဒါပဋိပ္ပဿဒ္ဓိဉာဏံ, ပဋိနိဿဂ္ဂါနုပဿီ ပဿသံ ပဋိသင်္ခါ သန္တိဋ္ဌနာ ပညာ နိဗ္ဗိဒါပဋိပ္ပဿဒ္ဓိဉာဏံ— ဣမာနိ အဋ္ဌ နိဗ္ဗိဒါပဋိပ္ပဿဒ္ဓိဉာဏာနိ. (5)
ကတမာနိ ဧကဝီသတိ ဝိမုတ္တိသုခေ ဉာဏာနိ? သောတာပတ္တိမဂ္ဂေန သက္ကာယဒိဋ္ဌိယာ ပဟီနတ္တာ သမုစ္ဆိန္နတ္တာ ဥပ္ပဇ္ဇတိ ဝိမုတ္တိသုခေ ဉာဏံ, ဝိစိကိစ္ဆာယ ပဟီနတ္တာ သမုစ္ဆိန္နတ္တာ ဥပ္ပဇ္ဇတိ ဝိမုတ္တိသုခေ ဉာဏံ, သီလဗ္ဗတပရာမာသဿ …ပေ… ဒိဋ္ဌာနုသယဿ, ဝိစိကိစ္ဆာနုသယဿ ပဟီနတ္တာ သမုစ္ဆိန္နတ္တာ ဥပ္ပဇ္ဇတိ ဝိမုတ္တိသုခေ ဉာဏံ, သကဒါဂါမိမဂ္ဂေန ဩဠာရိကဿ, ကာမရာဂသညောဇနဿ …ပေ… ပဋိဃသညောဇနဿ, ဩဠာရိကဿ ကာမရာဂါနုသယဿ, ပဋိဃာနုသယဿ ပဟီနတ္တာ သမုစ္ဆိန္နတ္တာ ဥပ္ပဇ္ဇတိ ဝိမုတ္တိသုခေ ဉာဏံ, အနာဂါမိမဂ္ဂေန အနုသဟဂတဿ ကာမရာဂသညောဇနဿ …ပေ… ပဋိဃသညောဇနဿ, အနုသဟဂတဿ ကာမရာဂါနုသယဿ, ပဋိဃာနုသယဿ ပဟီနတ္တာ သမုစ္ဆိန္နတ္တာ ဥပ္ပဇ္ဇတိ ဝိမုတ္တိသုခေ ဉာဏံ, အရဟတ္တမဂ္ဂေန, ရူပရာဂဿ …ပေ… အရူပရာဂဿ, မာနဿ, ဥဒ္ဓစ္စဿ, အဝိဇ္ဇာယ, မာနာနုသယဿ, ဘဝရာဂါနုသယဿ, အဝိဇ္ဇာနုသယဿ ပဟီနတ္တာ သမုစ္ဆိန္နတ္တာ ဥပ္ပဇ္ဇတိ ဝိမုတ္တိသုခေ ဉာဏံ. ဣမာနိ ဧကဝီသတိ ဝိမုတ္တိသုခေ ဉာဏာနိ. သောဠသဝတ္ထုကံ အာနာပါနဿတိသမာဓိံ ဘာဝယတော သမဓိကာနိ ဣမာနိ ဒွေ ဉာဏသတာနိ ဥပ္ပဇ္ဇန္တိ. (6)
အာနာပါနဿတိကထာ နိဋ္ဌိတာ.