1.4.2 ဒုတိယသုတ္တန္တနိဒ္ဒေသ
သာဝတ္ထိနိဒါနံ. “ပဉ္စိမာနိ, ဘိက္ခဝေ, ဣန္ဒြိယာနိ. ကတမာနိ ပဉ္စ? သဒ္ဓိန္ဒြိယံ, ဝီရိယိန္ဒြိယံ, သတိန္ဒြိယံ, သမာဓိန္ဒြိယံ, ပညိန္ဒြိယံ.
ယေ ဟိ ကေစိ, ဘိက္ခဝေ, သမဏာ ဝါ ဗြာဟ္မဏာ ဝါ ဣမေသံ ပဉ္စန္နံ ဣန္ဒြိယာနံ သမုဒယဉ္စ အတ္ထင်္ဂမဉ္စ အဿာဒဉ္စ အာဒီနဝဉ္စ နိဿရဏဉ္စ ယထာဘူတံ နပ္ပဇာနန္တိ, န မေ တေ, ဘိက္ခဝေ, သမဏာ ဝါ ဗြာဟ္မဏာ ဝါ သမဏေသု ဝါ သမဏသမ္မတာ, ဗြာဟ္မဏေသု ဝါ ဗြာဟ္မဏသမ္မတာ; န စ ပနေတေ အာယသ္မန္တာ သာမညတ္ထံ ဝါ ဗြဟ္မညတ္ထံ ဝါ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရန္တိ.
ယေ စ ခေါ ကေစိ ဘိက္ခဝေ သမဏာ ဝါ ဗြာဟ္မဏာ ဝါ ဣမေသံ ပဉ္စန္နံ ဣန္ဒြိယာနံ သမုဒယဉ္စ အတ္ထင်္ဂမဉ္စ အဿာဒဉ္စ အာဒီနဝဉ္စ နိဿရဏဉ္စ ယထာဘူတံ ပဇာနန္တိ, တေ ခေါ မေ, ဘိက္ခဝေ, သမဏာ ဝါ ဗြာဟ္မဏာ ဝါ သမဏေသု ဝါ သမဏသမ္မတာ, ဗြာဟ္မဏေသု ဝါ ဗြာဟ္မဏသမ္မတာ; တေ စ ပနာယသ္မန္တာ သာမညတ္ထဉ္စ ဗြဟ္မညတ္ထဉ္စ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရန္တီ”တိ.
ကတိဟာကာရေဟိ ပဉ္စန္နံ ဣန္ဒြိယာနံ သမုဒယော ဟောတိ; ကတိဟာကာရေဟိ ပဉ္စန္နံ ဣန္ဒြိယာနံ သမုဒယံ ပဇာနာတိ? ကတိဟာကာရေဟိ ပဉ္စန္နံ ဣန္ဒြိယာနံ အတ္ထင်္ဂမော ဟောတိ; ကတိဟာကာရေဟိ ပဉ္စန္နံ ဣန္ဒြိယာနံ အတ္ထင်္ဂမံ ပဇာနာတိ? ကတိဟာကာရေဟိ ပဉ္စန္နံ ဣန္ဒြိယာနံ အဿာဒေါ ဟောတိ, ကတိဟာကာရေဟိ ပဉ္စန္နံ ဣန္ဒြိယာနံ အဿာဒံ ပဇာနာတိ? ကတိဟာကာရေဟိ ပဉ္စန္နံ ဣန္ဒြိယာနံ အာဒီနဝေါ ဟောတိ; ကတိဟာကာရေဟိ ပဉ္စန္နံ ဣန္ဒြိယာနံ အာဒီနဝံ ပဇာနာတိ? ကတိဟာကာရေဟိ ပဉ္စန္နံ ဣန္ဒြိယာနံ နိဿရဏံ ဟောတိ; ကတိဟာကာရေဟိ ပဉ္စန္နံ ဣန္ဒြိယာနံ နိဿရဏံ ပဇာနာတိ?
စတ္တာရီသာယ အာကာရေဟိ ပဉ္စန္နံ ဣန္ဒြိယာနံ သမုဒယော ဟောတိ; စတ္တာရီသာယ အာကာရေဟိ ပဉ္စန္နံ ဣန္ဒြိယာနံ သမုဒယံ ပဇာနာတိ. စတ္တာရီသာယ အာကာရေဟိ ပဉ္စန္နံ ဣန္ဒြိယာနံ အတ္ထင်္ဂမော ဟောတိ; စတ္တာရီသာယ အာကာရေဟိ ပဉ္စန္နံ ဣန္ဒြိယာနံ အတ္ထင်္ဂမံ ပဇာနာတိ. ပဉ္စဝီသတိယာ အာကာရေဟိ ပဉ္စန္နံ ဣန္ဒြိယာနံ အဿာဒေါ ဟောတိ; ပဉ္စဝီသတိယာ အာကာရေဟိ ပဉ္စန္နံ ဣန္ဒြိယာနံ အဿာဒံ ပဇာနာတိ. ပဉ္စဝီသတိယာ အာကာရေဟိ ပဉ္စန္နံ ဣန္ဒြိယာနံ အာဒီနဝေါ ဟောတိ; ပဉ္စဝီသတိယာ အာကာရေဟိ ပဉ္စန္နံ ဣန္ဒြိယာနံ အာဒီနဝံ ပဇာနာတိ. အသီတိသတံ အာကာရေဟိ ပဉ္စန္နံ ဣန္ဒြိယာနံ နိဿရဏံ ဟောတိ; အသီတိသတံ အာကာရေဟိ ပဉ္စန္နံ ဣန္ဒြိယာနံ နိဿရဏံ ပဇာနာတိ.
ကတမေဟိ စတ္တာရီသာယ အာကာရေဟိ ပဉ္စန္နံ ဣန္ဒြိယာနံ သမုဒယော ဟောတိ; ကတမေဟိ စတ္တာရီသာယ အာကာရေဟိ ပဉ္စန္နံ ဣန္ဒြိယာနံ သမုဒယံ ပဇာနာတိ? အဓိမောက္ခတ္ထာယ အာဝဇ္ဇနာယ သမုဒယော သဒ္ဓိန္ဒြိယဿ သမုဒယော ဟောတိ, အဓိမောက္ခဝသေန ဆန္ဒဿ သမုဒယော သဒ္ဓိန္ဒြိယဿ သမုဒယော ဟောတိ, အဓိမောက္ခဝသေန မနသိကာရဿ သမုဒယော သဒ္ဓိန္ဒြိယဿ သမုဒယော ဟောတိ, သဒ္ဓိန္ဒြိယဿ ဝသေန ဧကတ္တုပဋ္ဌာနံ သဒ္ဓိန္ဒြိယဿ သမုဒယော ဟောတိ; ပဂ္ဂဟတ္ထာယ အာဝဇ္ဇနာယ သမုဒယော ဝီရိယိန္ဒြိယဿ သမုဒယော ဟောတိ, ပဂ္ဂဟဝသေန ဆန္ဒဿ သမုဒယော ဝီရိယိန္ဒြိယဿ သမုဒယော ဟောတိ, ပဂ္ဂဟဝသေန မနသိကာရဿ သမုဒယော ဝီရိယိန္ဒြိယဿ သမုဒယော ဟောတိ, ဝီရိယိန္ဒြိယဿ ဝသေန ဧကတ္တုပဋ္ဌာနံ ဝီရိယိန္ဒြိယဿ သမုဒယော ဟောတိ; ဥပဋ္ဌာနတ္ထာယ အာဝဇ္ဇနာယ သမုဒယော သတိန္ဒြိယဿ သမုဒယော ဟောတိ, ဥပဋ္ဌာနဝသေန ဆန္ဒဿ သမုဒယော သတိန္ဒြိယဿ သမုဒယော ဟောတိ, ဥပဋ္ဌာနဝသေန မနသိကာရဿ သမုဒယော သတိန္ဒြိယဿ သမုဒယော ဟောတိ, သတိန္ဒြိယဿ ဝသေန ဧကတ္တုပဋ္ဌာနံ သတိန္ဒြိယဿ သမုဒယော ဟောတိ; အဝိက္ခေပတ္ထာယ အာဝဇ္ဇနာယ သမုဒယော သမာဓိန္ဒြိယဿ သမုဒယော ဟောတိ, အဝိက္ခေပဝသေန ဆန္ဒဿ သမုဒယော သမာဓိန္ဒြိယဿ သမုဒယော ဟောတိ, အဝိက္ခေပဝသေန မနသိကာရဿ သမုဒယော သမာဓိန္ဒြိယဿ သမုဒယော ဟောတိ, သမာဓိန္ဒြိယဿ ဝသေန ဧကတ္တုပဋ္ဌာနံ သမာဓိန္ဒြိယဿ သမုဒယော ဟောတိ; ဒဿနတ္ထာယ အာဝဇ္ဇနာယ သမုဒယော ပညိန္ဒြိယဿ သမုဒယော ဟောတိ, ဒဿနဝသေန ဆန္ဒဿ သမုဒယော ပညိန္ဒြိယဿ သမုဒယော ဟောတိ, ဒဿနဝသေန မနသိကာရဿ သမုဒယော ပညိန္ဒြိယဿ သမုဒယော ဟောတိ, ပညိန္ဒြိယဿ ဝသေန ဧကတ္တုပဋ္ဌာနံ ပညိန္ဒြိယဿ သမုဒယော ဟောတိ. အဓိမောက္ခတ္ထာယ အာဝဇ္ဇနာယ သမုဒယော သဒ္ဓိန္ဒြိယဿ သမုဒယော ဟောတိ, ပဂ္ဂဟတ္ထာယ အာဝဇ္ဇနာယ သမုဒယော ဝီရိယိန္ဒြိယဿ သမုဒယော ဟောတိ, ဥပဋ္ဌာနတ္ထာယ အာဝဇ္ဇနာယ သမုဒယော သတိန္ဒြိယဿ သမုဒယော ဟောတိ, အဝိက္ခေပတ္ထာယ အာဝဇ္ဇနာယ သမုဒယော သမာဓိန္ဒြိယဿ သမုဒယော ဟောတိ, ဒဿနတ္ထာယ အာဝဇ္ဇနာယ သမုဒယော ပညိန္ဒြိယဿ သမုဒယော ဟောတိ. အဓိမောက္ခဝသေန ဆန္ဒဿ သမုဒယော သဒ္ဓိန္ဒြိယဿ သမုဒယော ဟောတိ, ပဂ္ဂဟဝသေန ဆန္ဒဿ သမုဒယော ဝီရိယိန္ဒြိယဿ သမုဒယော ဟောတိ, ဥပဋ္ဌာနဝသေန ဆန္ဒဿ သမုဒယော သတိန္ဒြိယဿ သမုဒယော ဟောတိ, အဝိက္ခေပဝသေန ဆန္ဒဿ သမုဒယော သမာဓိန္ဒြိယဿ သမုဒယော ဟောတိ, ဒဿနဝသေန ဆန္ဒဿ သမုဒယော ပညိန္ဒြိယဿ သမုဒယော ဟောတိ. အဓိမောက္ခဝသေန မနသိကာရဿ သမုဒယော သဒ္ဓိန္ဒြိယဿ သမုဒယော ဟောတိ, ပဂ္ဂဟဝသေန မနသိကာရဿ သမုဒယော ဝီရိယိန္ဒြိယဿ သမုဒယော ဟောတိ, ဥပဋ္ဌာနဝသေန မနသိကာရဿ သမုဒယော သတိန္ဒြိယဿ သမုဒယော ဟောတိ, အဝိက္ခေပဝသေန မနသိကာရဿ သမုဒယော သမာဓိန္ဒြိယဿ သမုဒယော ဟောတိ, ဒဿနဝသေန မနသိကာရဿ သမုဒယော ပညိန္ဒြိယဿ သမုဒယော ဟောတိ. သဒ္ဓိန္ဒြိယဿ ဝသေန ဧကတ္တုပဋ္ဌာနံ သဒ္ဓိန္ဒြိယဿ သမုဒယော ဟောတိ ဝီရိယိန္ဒြိယဿ ဝသေန ဧကတ္တုပဋ္ဌာနံ ဝီရိယိန္ဒြိယဿ သမုဒယော ဟောတိ, သတိန္ဒြိယဿ ဝသေန ဧကတ္တုပဋ္ဌာနံ သတိန္ဒြိယဿ သမုဒယော ဟောတိ, သမာဓိန္ဒြိယဿ ဝသေန ဧကတ္တုပဋ္ဌာနံ သမာဓိန္ဒြိယဿ သမုဒယော ဟောတိ, ပညိန္ဒြိယဿ ဝသေန ဧကတ္တုပဋ္ဌာနံ ပညိန္ဒြိယဿ သမုဒယော ဟောတိ.
ဣမေဟိ စတ္တာရီသာယ အာကာရေဟိ ပဉ္စန္နံ ဣန္ဒြိယာနံ သမုဒယော ဟောတိ, ဣမေဟိ စတ္တာရီသာယ အာကာရေဟိ ပဉ္စန္နံ ဣန္ဒြိယာနံ သမုဒယံ ပဇာနာတိ.
ကတမေဟိ စတ္တာရီသာယ အာကာရေဟိ ပဉ္စန္နံ ဣန္ဒြိယာနံ အတ္ထင်္ဂမော ဟောတိ; ကတမေဟိ စတ္တာရီသာယ အာကာရေဟိ ပဉ္စန္နံ ဣန္ဒြိယာနံ အတ္ထင်္ဂမံ ပဇာနာတိ? အဓိမောက္ခတ္ထာယ အာဝဇ္ဇနာယ အတ္ထင်္ဂမော သဒ္ဓိန္ဒြိယဿ အတ္ထင်္ဂမော ဟောတိ, အဓိမောက္ခဝသေန ဆန္ဒဿ အတ္ထင်္ဂမော သဒ္ဓိန္ဒြိယဿ အတ္ထင်္ဂမော ဟောတိ, အဓိမောက္ခဝသေန မနသိကာရဿ အတ္ထင်္ဂမော သဒ္ဓိန္ဒြိယဿ အတ္ထင်္ဂမော ဟောတိ, သဒ္ဓိန္ဒြိယဿ ဝသေန ဧကတ္တအနုပဋ္ဌာနံ သဒ္ဓိန္ဒြိယဿ ဝသေန အတ္ထင်္ဂမော ဟောတိ; ပဂ္ဂဟတ္ထာယ အာဝဇ္ဇနာယ အတ္ထင်္ဂမော ဝီရိယိန္ဒြိယဿ အတ္ထင်္ဂမော ဟောတိ, ပဂ္ဂဟဝသေန ဆန္ဒဿ အတ္ထင်္ဂမော ဝီရိယိန္ဒြိယဿ အတ္ထင်္ဂမော ဟောတိ, ပဂ္ဂဟဝသေန မနသိကာရဿ အတ္ထင်္ဂမော ဝီရိယိန္ဒြိယဿ အတ္ထင်္ဂမော ဟောတိ, ဝီရိယိန္ဒြိယဿ ဝသေန ဧကတ္တအနုပဋ္ဌာနံ ဝီရိယိန္ဒြိယဿ အတ္ထင်္ဂမော ဟောတိ; ဥပဋ္ဌာနတ္ထာယ အာဝဇ္ဇနာယ အတ္ထင်္ဂမော သတိန္ဒြိယဿ အတ္ထင်္ဂမော ဟောတိ, ဥပဋ္ဌာနဝသေန ဆန္ဒဿ အတ္ထင်္ဂမော သတိန္ဒြိယဿ အတ္ထင်္ဂမော ဟောတိ, ဥပဋ္ဌာနဝသေန မနသိကာရဿ အတ္ထင်္ဂမော သတိန္ဒြိယဿ အတ္ထင်္ဂမော ဟောတိ, သတိန္ဒြိယဿ ဝသေန ဧကတ္တအနုပဋ္ဌာနံ သတိန္ဒြိယဿ အတ္ထင်္ဂမော ဟောတိ; အဝိက္ခေပတ္ထာယ အာဝဇ္ဇနာယ အတ္ထင်္ဂမော သမာဓိန္ဒြိယဿ အတ္ထင်္ဂမော ဟောတိ, အဝိက္ခေပဝသေန ဆန္ဒဿ အတ္ထင်္ဂမော သမာဓိန္ဒြိယဿ အတ္ထင်္ဂမော ဟောတိ, အဝိက္ခေပဝသေန မနသိကာရဿ အတ္ထင်္ဂမော သမာဓိန္ဒြိယဿ အတ္ထင်္ဂမော ဟောတိ, သမာဓိန္ဒြိယဿ ဝသေန ဧကတ္တအနုပဋ္ဌာနံ သမာဓိန္ဒြိယဿ အတ္ထင်္ဂမော ဟောတိ; ဒဿနတ္ထာယ အာဝဇ္ဇနာယ အတ္ထင်္ဂမော ပညိန္ဒြိယဿ အတ္ထင်္ဂမော ဟောတိ, ဒဿနဝသေန ဆန္ဒဿ အတ္ထင်္ဂမော ပညိန္ဒြိယဿ အတ္ထင်္ဂမော ဟောတိ, ဒဿနဝသေန မနသိကာရဿ အတ္ထင်္ဂမော ပညိန္ဒြိယဿ အတ္ထင်္ဂမော ဟောတိ, ပညိန္ဒြိယဿ ဝသေန ဧကတ္တအနုပဋ္ဌာနံ ပညိန္ဒြိယဿ အတ္ထင်္ဂမော ဟောတိ.
အဓိမောက္ခတ္ထာယ အာဝဇ္ဇနာယ အတ္ထင်္ဂမော သဒ္ဓိန္ဒြိယဿ အတ္ထင်္ဂမော ဟောတိ, ပဂ္ဂဟတ္ထာယ အာဝဇ္ဇနာယ အတ္ထင်္ဂမော ဝီရိယိန္ဒြိယဿ အတ္ထင်္ဂမော ဟောတိ, ဥပဋ္ဌာနတ္ထာယ အာဝဇ္ဇနာယ အတ္ထင်္ဂမော သတိန္ဒြိယဿ အတ္ထင်္ဂမော ဟောတိ, အဝိက္ခေပတ္ထာယ အာဝဇ္ဇနာယ အတ္ထင်္ဂမော သမာဓိန္ဒြိယဿ အတ္ထင်္ဂမော ဟောတိ, ဒဿနတ္ထာယ အာဝဇ္ဇနာယ အတ္ထင်္ဂမော ပညိန္ဒြိယဿ အတ္ထင်္ဂမော ဟောတိ. အဓိမောက္ခဝသေန ဆန္ဒဿ အတ္ထင်္ဂမော သဒ္ဓိန္ဒြိယဿ အတ္ထင်္ဂမော ဟောတိ, ပဂ္ဂဟဝသေန ဆန္ဒဿ အတ္ထင်္ဂမော ဝီရိယိန္ဒြိယဿ အတ္ထင်္ဂမော ဟောတိ, ဥပဋ္ဌာနဝသေန ဆန္ဒဿ အတ္ထင်္ဂမော သတိန္ဒြိယဿ အတ္ထင်္ဂမော ဟောတိ, အဝိက္ခေပဝသေန ဆန္ဒဿ အတ္ထင်္ဂမော သမာဓိန္ဒြိယဿ အတ္ထင်္ဂမော ဟောတိ, ဒဿနဝသေန ဆန္ဒဿ အတ္ထင်္ဂမော ပညိန္ဒြိယဿ အတ္ထင်္ဂမော ဟောတိ. အဓိမောက္ခဝသေန မနသိကာရဿ အတ္ထင်္ဂမော သဒ္ဓိန္ဒြိယဿ အတ္ထင်္ဂမော ဟောတိ, ပဂ္ဂဟဝသေန မနသိကာရဿ အတ္ထင်္ဂမော ဝီရိယိန္ဒြိယဿ အတ္ထင်္ဂမော ဟောတိ, ဥပဋ္ဌာနဝသေန မနသိကာရဿ အတ္ထင်္ဂမော သတိန္ဒြိယဿ အတ္ထင်္ဂမော ဟောတိ, အဝိက္ခေပဝသေန မနသိကာရဿ အတ္ထင်္ဂမော သမာဓိန္ဒြိယဿ အတ္ထင်္ဂမော ဟောတိ, ဒဿနဝသေန မနသိကာရဿ အတ္ထင်္ဂမော ပညိန္ဒြိယဿ အတ္ထင်္ဂမော ဟောတိ. သဒ္ဓိန္ဒြိယဿ ဝသေန ဧကတ္တအနုပဋ္ဌာနံ သဒ္ဓိန္ဒြိယဿ အတ္ထင်္ဂမော ဟောတိ, ဝီရိယိန္ဒြိယဿ ဝသေန ဧကတ္တအနုပဋ္ဌာနံ ဝီရိယိန္ဒြိယဿ အတ္ထင်္ဂမော ဟောတိ, သတိန္ဒြိယဿ ဝသေန ဧကတ္တအနုပဋ္ဌာနံ သတိန္ဒြိယဿ အတ္ထင်္ဂမော ဟောတိ, သမာဓိန္ဒြိယဿ ဝသေန ဧကတ္တအနုပဋ္ဌာနံ သမာဓိန္ဒြိယဿ အတ္ထင်္ဂမော ဟောတိ, ပညိန္ဒြိယဿ ဝသေန ဧကတ္တအနုပဋ္ဌာနံ ပညိန္ဒြိယဿ အတ္ထင်္ဂမော ဟောတိ.
ဣမေဟိ စတ္တာရီသာယ အာကာရေဟိ ပဉ္စန္နံ ဣန္ဒြိယာနံ အတ္ထင်္ဂမော ဟောတိ; ဣမေဟိ စတ္တာရီသာယ အာကာရေဟိ ပဉ္စန္နံ ဣန္ဒြိယာနံ အတ္ထင်္ဂမံ ပဇာနာတိ.