1.5.2 နိဒ္ဒေသ
ကတမော သုညတော ဝိမောက္ခော? ဣဓ ဘိက္ခု အရညဂတော ဝါ ရုက္ခမူလဂတော ဝါ သုညာဂါရဂတော ဝါ ဣတိ ပဋိသဉ္စိက္ခတိ— “သုညမိဒံ အတ္တေန ဝါ အတ္တနိယေန ဝါ”တိ. သော တတ္ထ အဘိနိဝေသံ န ကရောတီတိ— သုညတော ဝိမောက္ခော. အယံ သုညတော ဝိမောက္ခော. (1:1)
ကတမော အနိမိတ္တော ဝိမောက္ခော? ဣဓ ဘိက္ခု အရညဂတော ဝါ ရုက္ခမူလဂတော ဝါ သုညာဂါရဂတော ဝါ ဣတိ ပဋိသဉ္စိက္ခတိ— “သုညမိဒံ အတ္တေန ဝါ အတ္တနိယေန ဝါ”တိ. သော တတ္ထ နိမိတ္တံ န ကရောတီတိ— အနိမိတ္တော ဝိမောက္ခော. အယံ အနိမိတ္တော ဝိမောက္ခော. (2:2)
ကတမော အပ္ပဏိဟိတော ဝိမောက္ခော? ဣဓ ဘိက္ခု အရညဂတော ဝါ ရုက္ခမူလဂတော ဝါ သုညာဂါရဂတော ဝါ ဣတိ ပဋိသဉ္စိက္ခတိ— “သုညမိဒံ အတ္တေန ဝါ အတ္တနိယေန ဝါ”တိ. သော တတ္ထ ပဏိဓိံ န ကရောတီတိ— အပ္ပဏိဟိတော ဝိမောက္ခော. အယံ အပ္ပဏိဟိတော ဝိမောက္ခော. (3:3)
ကတမော အဇ္ဈတ္တဝုဋ္ဌာနော ဝိမောက္ခော? စတ္တာရိ ဈာနာနိ— အယံ အဇ္ဈတ္တဝုဋ္ဌာနော ဝိမောက္ခော. ကတမော ဗဟိဒ္ဓါဝုဋ္ဌာနော ဝိမောက္ခော? စတဿော အရူပသမာပတ္တိယော— အယံ ဗဟိဒ္ဓါဝုဋ္ဌာနော ဝိမောက္ခော. ကတမော ဒုဘတော ဝုဋ္ဌာနော ဝိမောက္ခော? စတ္တာရော အရိယမဂ္ဂါ— အယံ ဒုဘတော ဝုဋ္ဌာနော ဝိမောက္ခော.
ကတမေ အဇ္ဈတ္တဝုဋ္ဌာနာ စတ္တာရော ဝိမောက္ခာ? ပဌမံ ဈာနံ နီဝရဏေဟိ ဝုဋ္ဌာတိ. ဒုတိယံ ဈာနံ ဝိတက္ကဝိစာရေဟိ ဝုဋ္ဌာတိ. တတိယံ ဈာနံ ပီတိယာ ဝုဋ္ဌာတိ. စတုတ္ထံ ဈာနံ သုခဒုက္ခေဟိ ဝုဋ္ဌာတိ. ဣမေ အဇ္ဈတ္တဝုဋ္ဌာနာ စတ္တာရော ဝိမောက္ခာ. (4:4)
ကတမေ ဗဟိဒ္ဓါဝုဋ္ဌာနာ စတ္တာရော ဝိမောက္ခာ? အာကာသာနဉ္စာယတနသမာပတ္တိ ရူပသညာယ ပဋိဃသညာယ နာနတ္တသညာယ ဝုဋ္ဌာတိ. ဝိညာဏဉ္စာယတနသမာပတ္တိ အာကာသာနဉ္စာယတနသညာယ ဝုဋ္ဌာတိ. အာကိဉ္စညာယတနသမာပတ္တိ ဝိညာဏဉ္စာယတနသညာယ ဝုဋ္ဌာတိ. နေဝသညာနာသညာယတနသမာပတ္တိ အာကိဉ္စညာယတနသညာယ ဝုဋ္ဌာတိ. ဣမေ ဗဟိဒ္ဓါဝုဋ္ဌာနာ စတ္တာရော ဝိမောက္ခာ. (4:8)
ကတမေ ဒုဘတော ဝုဋ္ဌာနာ စတ္တာရော ဝိမောက္ခာ? သောတာပတ္တိမဂ္ဂေါ သက္ကာယဒိဋ္ဌိဝိစိကိစ္ဆာသီလဗ္ဗတပရာမာသာ ဒိဋ္ဌာနုသယာ ဝိစိကိစ္ဆာနုသယာ ဝုဋ္ဌာတိ, တဒနုဝတ္တကကိလေသေဟိ စ ခန္ဓေဟိ စ ဝုဋ္ဌာတိ, ဗဟိဒ္ဓါ စ သဗ္ဗနိမိတ္တေဟိ ဝုဋ္ဌာတိ. သကဒါဂါမိမဂ္ဂေါ ဩဠာရိကာ ကာမရာဂသညောဇနာ ပဋိဃသညောဇနာ ဩဠာရိကာ ကာမရာဂါနုသယာ ပဋိဃာနုသယာ ဝုဋ္ဌာတိ, တဒနုဝတ္တကကိလေသေဟိ စ ခန္ဓေဟိ စ ဝုဋ္ဌာတိ, ဗဟိဒ္ဓါ စ သဗ္ဗနိမိတ္တေဟိ ဝုဋ္ဌာတိ. အနာဂါမိမဂ္ဂေါ အနုသဟဂတာ ကာမရာဂသညောဇနာ ပဋိဃသညောဇနာ အနုသဟဂတာ ကာမရာဂါနုသယာ ပဋိဃာနုသယာ ဝုဋ္ဌာတိ, တဒနုဝတ္တကကိလေသေဟိ စ ခန္ဓေဟိ စ ဝုဋ္ဌာတိ, ဗဟိဒ္ဓါ စ သဗ္ဗနိမိတ္တေဟိ ဝုဋ္ဌာတိ. အရဟတ္တမဂ္ဂေါ ရူပရာဂါ အရူပရာဂါ မာနာ ဥဒ္ဓစ္စာ အဝိဇ္ဇာယ မာနာနုသယာ ဘဝရာဂါနုသယာ အဝိဇ္ဇာနုသယာ ဝုဋ္ဌာတိ, တဒနုဝတ္တကကိလေသေဟိ စ ခန္ဓေဟိ စ ဝုဋ္ဌာတိ, ဗဟိဒ္ဓါ စ သဗ္ဗနိမိတ္တေဟိ ဝုဋ္ဌာတိ. ဣမေ ဒုဘတော ဝုဋ္ဌာနာ စတ္တာရော ဝိမောက္ခာ. (4:12)
ကတမေ အဇ္ဈတ္တဝုဋ္ဌာနာနံ အနုလောမာ စတ္တာရော ဝိမောက္ခာ? ပဌမံ ဈာနံ ပဋိလာဘတ္ထာယ ဝိတက္ကော စ ဝိစာရော စ ပီတိ စ သုခဉ္စ စိတ္တေကဂ္ဂတာ စ, ဒုတိယံ ဈာနံ ပဋိလာဘတ္ထာယ …ပေ… တတိယံ ဈာနံ ပဋိလာဘတ္ထာယ …ပေ… စတုတ္ထံ ဈာနံ ပဋိလာဘတ္ထာယ ဝိတက္ကော စ ဝိစာရော စ ပီတိ စ သုခဉ္စ စိတ္တေကဂ္ဂတာ စ— ဣမေ အဇ္ဈတ္တဝုဋ္ဌာနာနံ အနုလောမာ စတ္တာရော ဝိမောက္ခာ. (4:16)
ကတမေ ဗဟိဒ္ဓါဝုဋ္ဌာနာနံ အနုလောမာ စတ္တာရော ဝိမောက္ခာ? အာကာသာနဉ္စာယတနသမာပတ္တိံ ပဋိလာဘတ္ထာယ ဝိတက္ကော စ ဝိစာရော စ ပီတိ စ သုခဉ္စ စိတ္တေကဂ္ဂတာ စ, ဝိညာဏဉ္စာယတနသမာပတ္တိံ …ပေ… အာကိဉ္စညာယတနသမာပတ္တိံ …ပေ… နေဝသညာနာသညာယတနသမာပတ္တိံ ပဋိလာဘတ္ထာယ ဝိတက္ကော စ ဝိစာရော စ ပီတိ စ သုခဉ္စ စိတ္တေကဂ္ဂတာ စ— ဣမေ ဗဟိဒ္ဓါဝုဋ္ဌာနာနံ အနုလောမာ စတ္တာရော ဝိမောက္ခာ. (4:20)
ကတမေ ဒုဘတော ဝုဋ္ဌာနာနံ အနုလောမာ စတ္တာရော ဝိမောက္ခာ? သောတာပတ္တိမဂ္ဂံ ပဋိလာဘတ္ထာယ အနိစ္စာနုပဿနာ, ဒုက္ခာနုပဿနာ, အနတ္တာနုပဿနာ . သကဒါဂါမိမဂ္ဂံ ပဋိလာဘတ္ထာယ …ပေ… အနာဂါမိမဂ္ဂံ ပဋိလာဘတ္ထာယ …ပေ… အရဟတ္တမဂ္ဂံ ပဋိလာဘတ္ထာယ အနိစ္စာနုပဿနာ, ဒုက္ခာနုပဿနာ, အနတ္တာနုပဿနာ — ဣမေ ဒုဘတော ဝုဋ္ဌာနာနံ အနုလောမာ စတ္တာရော ဝိမောက္ခာ. (4:24)
ကတမေ အဇ္ဈတ္တဝုဋ္ဌာနပဋိပ္ပဿဒ္ဓီ စတ္တာရော ဝိမောက္ခာ? ပဌမဿ ဈာနဿ ပဋိလာဘော ဝါ ဝိပါကော ဝါ, ဒုတိယဿ ဈာနဿ …ပေ… တတိယဿ ဈာနဿ …ပေ… စတုတ္ထဿ ဈာနဿ ပဋိလာဘော ဝါ ဝိပါကော ဝါ— ဣမေ အဇ္ဈတ္တဝုဋ္ဌာနပဋိပ္ပဿဒ္ဓီ စတ္တာရော ဝိမောက္ခာ. (4:28)
ကတမေ ဗဟိဒ္ဓါဝုဋ္ဌာနပဋိပ္ပဿဒ္ဓီ စတ္တာရော ဝိမောက္ခာ? အာကာသာနဉ္စာယတနသမာပတ္တိယာ ပဋိလာဘော ဝါ ဝိပါကော ဝါ, ဝိညာဏဉ္စာယတနသမာပတ္တိယာ …ပေ… အာကိဉ္စညာယတနသမာပတ္တိယာ …ပေ… နေဝသညာနာသညာယတနသမာပတ္တိယာ ပဋိလာဘော ဝါ ဝိပါကော ဝါ— ဣမေ ဗဟိဒ္ဓါဝုဋ္ဌာနပဋိပ္ပဿဒ္ဓီ စတ္တာရော ဝိမောက္ခာ. (4:32)
ကတမေ ဒုဘတော ဝုဋ္ဌာနပဋိပ္ပဿဒ္ဓီ စတ္တာရော ဝိမောက္ခာ? သောတာပတ္တိမဂ္ဂဿ သောတာပတ္တိဖလံ, သကဒါဂါမိမဂ္ဂဿ သကဒါဂါမိဖလံ, အနာဂါမိမဂ္ဂဿ အနာဂါမိဖလံ, အရဟတ္တမဂ္ဂဿ အရဟတ္တဖလံ— ဣမေ ဒုဘတော ဝုဋ္ဌာနပဋိပ္ပဿဒ္ဓီ စတ္တာရော ဝိမောက္ခာ. (4:36)
ကထံ ရူပီ ရူပါနိ ပဿတီတိ— ဝိမောက္ခော? ဣဓေကစ္စော အဇ္ဈတ္တံ ပစ္စတ္တံ နီလနိမိတ္တံ မနသိကရောတိ, နီလသညံ ပဋိလဘတိ. သော တံ နိမိတ္တံ သုဂ္ဂဟိတံ ကရောတိ, သူပဓာရိတံ ဥပဓာရေတိ, သွာဝတ္ထိတံ အဝတ္ထာပေတိ. သော တံ နိမိတ္တံ သုဂ္ဂဟိတံ ကတွာ သူပဓာရိတံ ဥပဓာရေတွာ သွာဝတ္ထိတံ အဝတ္ထာပေတွာ ဗဟိဒ္ဓါ နီလနိမိတ္တေ စိတ္တံ ဥပသံဟရတိ, နီလသညံ ပဋိလဘတိ. သော တံ နိမိတ္တံ သုဂ္ဂဟိတံ ကရောတိ, သူပဓာရိတံ ဥပဓာရေတိ, သွာဝတ္ထိတံ အဝတ္ထာပေတိ. သော တံ နိမိတ္တံ သုဂ္ဂဟိတံ ကတွာ ဥပဓာရေတွာ သွာဝတ္ထိတံ အဝတ္ထာပေတွာ အာသေဝတိ ဘာဝေတိ ဗဟုလီကရောတိ. တဿ ဧဝံ ဟောတိ— “အဇ္ဈတ္တဉ္စ ဗဟိဒ္ဓါ စ ဥဘယမိဒံ ရူပန်”တိ, ရူပသညီ ဟောတိ. ဣဓေကစ္စော အဇ္ဈတ္တံ ပစ္စတ္တံ ပီတနိမိတ္တံ …ပေ… လောဟိတနိမိတ္တံ …ပေ… ဩဒါတနိမိတ္တံ မနသိကရောတိ, ဩဒါတသညံ ပဋိလဘတိ. သော တံ နိမိတ္တံ သုဂ္ဂဟိတံ ကရောတိ, သူပဓာရိတံ ဥပဓာရေတိ, သွာဝတ္ထိတံ အဝတ္ထာပေတိ. သော တံ နိမိတ္တံ သုဂ္ဂဟိတံ ကတွာ သူပဓာရိတံ ဥပဓာရေတွာ သွာဝတ္ထိတံ အဝတ္ထာပေတွာ ဗဟိဒ္ဓါ ဩဒါတနိမိတ္တေ စိတ္တံ ဥပသံဟရတိ, ဩဒါတသညံ ပဋိလဘတိ. သော တံ နိမိတ္တံ သုဂ္ဂဟိတံ ကရောတိ, သူပဓာရိတံ ဥပဓာရေတိ, သွာဝတ္ထိတံ အဝတ္ထာပေတိ. သော တံ နိမိတ္တံ သုဂ္ဂဟိတံ ကတွာ သူပဓာရိတံ ဥပဓာရေတွာ သွာဝတ္ထိတံ အဝတ္ထာပေတွာ အာသေဝတိ ဘာဝေတိ ဗဟုလီကရောတိ. တဿ ဧဝံ ဟောတိ— “အဇ္ဈတ္တဉ္စ ဗဟိဒ္ဓါ စ ဥဘယမိဒံ ရူပန်”တိ, ရူပသညီ ဟောတိ. ဧဝံ ရူပီ ရူပါနိ ပဿတီတိ— ဝိမောက္ခော. (1:37)
ကထံ အဇ္ဈတ္တံ အရူပသညီ ဗဟိဒ္ဓါ ရူပါနိ ပဿတီတိ— ဝိမောက္ခော? ဣဓေကစ္စော အဇ္ဈတ္တံ ပစ္စတ္တံ နီလနိမိတ္တံ န မနသိကရောတိ, နီလသညံ န ပဋိလဘတိ; ဗဟိဒ္ဓါ နီလနိမိတ္တေ စိတ္တံ ဥပသံဟရတိ, နီလသညံ ပဋိလဘတိ. သော တံ နိမိတ္တံ သုဂ္ဂဟိတံ ကရောတိ, သူပဓာရိတံ ဥပဓာရေတိ, သွာဝတ္ထိတံ အဝတ္ထာပေတိ. သော တံ နိမိတ္တံ သုဂ္ဂဟိတံ ကတွာ သူပဓာရိတံ ဥပဓာရေတွာ သွာဝတ္ထိတံ အဝတ္ထာပေတွာ အာသေဝတိ ဘာဝေတိ ဗဟုလီကရောတိ. တဿ ဧဝံ ဟောတိ— “အဇ္ဈတ္တံ အရူပံ, ဗဟိဒ္ဓါ ရူပမိဒန်”တိ, ရူပသညီ ဟောတိ. ဣဓေကစ္စော အဇ္ဈတ္တံ ပစ္စတ္တံ ပီတနိမိတ္တံ …ပေ… လောဟိတနိမိတ္တံ …ပေ… ဩဒါတနိမိတ္တံ န မနသိကရောတိ, ဩဒါတသညံ န ပဋိလဘတိ; ဗဟိဒ္ဓါ ဩဒါတနိမိတ္တေ စိတ္တံ ဥပသံဟရတိ, ဩဒါတသညံ ပဋိလဘတိ. သော တံ နိမိတ္တံ သုဂ္ဂဟိတံ ကရောတိ, သူပဓာရိတံ ဥပဓာရေတိ, သွာဝတ္ထိတံ အဝတ္ထာပေတိ. သော တံ နိမိတ္တံ သုဂ္ဂဟိတံ ကတွာ သူပဓာရိတံ ဥပဓာရေတွာ သွာဝတ္ထိတံ အဝတ္ထာပေတွာ အာသေဝတိ ဘာဝေတိ ဗဟုလီကရောတိ. တဿ ဧဝံ ဟောတိ— “အဇ္ဈတ္တံ အရူပံ ဗဟိဒ္ဓါ ရူပမိဒန်”တိ, ရူပသညီ ဟောတိ. ဧဝံ အဇ္ဈတ္တံ အရူပသညီ ဗဟိဒ္ဓါ ရူပါနိ ပဿတီတိ— ဝိမောက္ခော. (1:38)
ကထံ သုဘန္တေဝ အဓိမုတ္တော ဟောတီတိ— ဝိမောက္ခော? ဣဓ ဘိက္ခု မေတ္တာသဟဂတေန စေတသာ ဧကံ ဒိသံ ဖရိတွာ ဝိဟရတိ, တထာ ဒုတိယံ, တထာ တတိယံ, တထာ စတုတ္ထံ. ဣတိ ဥဒ္ဓမဓော တိရိယံ သဗ္ဗဓိ သဗ္ဗတ္တတာယ သဗ္ဗာဝန္တံ လောကံ မေတ္တာသဟဂတေန စေတသာ ဝိပုလေန မဟဂ္ဂတေန အပ္ပမာဏေန အဝေရေန အဗျာပဇ္ဇေန ဖရိတွာ ဝိဟရတိ. မေတ္တာယ ဘာဝိတတ္တာ သတ္တာ အပ္ပဋိကူလာ ဟောန္တိ. ကရုဏာသဟဂတေန စေတသာ …ပေ… ကရုဏာယ ဘာဝိတတ္တာ သတ္တာ အပ္ပဋိကူလာ ဟောန္တိ. မုဒိတာသဟဂတေန စေတသာ …ပေ… မုဒိတာယ ဘာဝိတတ္တာ သတ္တာ အပ္ပဋိကူလာ ဟောန္တိ. ဥပေက္ခာသဟဂတေန စေတသာ ဧကံ ဒိသံ ဖရိတွာ ဝိဟရတိ …ပေ… ဥပေက္ခာယ ဘာဝိတတ္တာ သတ္တာ အပ္ပဋိကူလာ ဟောန္တိ. ဧဝံ “သုဘံ” တေဝ အဓိမုတ္တော ဟောတီတိ— ဝိမောက္ခော. (1:39)
ကတမော အာကာသာနဉ္စာယတနသမာပတ္တိ ဝိမောက္ခော? ဣဓ ဘိက္ခု သဗ္ဗသော ရူပသညာနံ သမတိက္ကမာ ပဋိဃသညာနံ အတ္ထင်္ဂမာ နာနတ္တသညာနံ အမနသိကာရာ “အနန္တော အာကာသော”တိ အာကာသာနဉ္စာယတနံ ဥပသမ္ပဇ္ဇ ဝိဟရတိ— အယံ အာကာသာနဉ္စာယတနသမာပတ္တိ ဝိမောက္ခော. (1:40)
ကတမော ဝိညာဏဉ္စာယတနသမာပတ္တိ ဝိမောက္ခော? ဣဓ ဘိက္ခု သဗ္ဗသော အာကာသာနဉ္စာယတနံ သမတိက္ကမ္မ “အနန္တံ ဝိညာဏန်”တိ ဝိညာဏဉ္စာယတနံ ဥပသမ္ပဇ္ဇ ဝိဟရတိ— အယံ ဝိညာဏဉ္စာယတနသမာပတ္တိ ဝိမောက္ခော. (1:41)
ကတမော အာကိဉ္စညာယတနသမာပတ္တိ ဝိမောက္ခော? ဣဓ ဘိက္ခု သဗ္ဗသော ဝိညာဏဉ္စာယတနံ သမတိက္ကမ္မ “နတ္ထိ ကိဉ္စီ”တိ အာကိဉ္စညာယတနံ ဥပသမ္ပဇ္ဇ ဝိဟရတိ— အယံ အာကိဉ္စညာယတနသမာပတ္တိ ဝိမောက္ခော. (1:42)
ကတမော နေဝသညာနာသညာယတနသမာပတ္တိ ဝိမောက္ခော? ဣဓ ဘိက္ခု သဗ္ဗသော အာကိဉ္စညာယတနံ သမတိက္ကမ္မ နေဝသညာနာသညာယတနံ ဥပသမ္ပဇ္ဇ ဝိဟရတိ— အယံ နေဝသညာနာသညာယတနသမာပတ္တိ ဝိမောက္ခော. (1:43)
ကတမော သညာဝေဒယိတနိရောဓသမာပတ္တိ ဝိမောက္ခော? ဣဓ ဘိက္ခု သဗ္ဗသော နေဝသညာနာသညာယတနံ သမတိက္ကမ္မ သညာဝေဒယိတနိရောဓံ ဥပသမ္ပဇ္ဇ ဝိဟရတိ— အယံ သညာဝေဒယိတနိရောဓသမာပတ္တိ ဝိမောက္ခော. (1:44)
ကတမော သမယဝိမောက္ခော? စတ္တာရိ စ ဈာနာနိ စတဿော စ အရူပသမာပတ္တိယော— အယံ သမယဝိမောက္ခော. (1:45)
ကတမော အသမယဝိမောက္ခော? စတ္တာရော စ အရိယမဂ္ဂါ, စတ္တာရိ စ သာမညဖလာနိ, နိဗ္ဗာနဉ္စ— အယံ အသမယဝိမောက္ခော. (1:46)
ကတမော သာမယိကော ဝိမောက္ခော? စတ္တာရိ စ ဈာနာနိ, စတဿော စ အရူပသမာပတ္တိယော— အယံ သာမယိကော ဝိမောက္ခော. (1:47)
ကတမော အသာမယိကော ဝိမောက္ခော? စတ္တာရော စ အရိယမဂ္ဂါ, စတ္တာရိ စ သာမညဖလာနိ, နိဗ္ဗာနဉ္စ— အယံ အသာမယိကော ဝိမောက္ခော. (1:48)
ကတမော ကုပ္ပေါ ဝိမောက္ခော? စတ္တာရိ စ ဈာနာနိ, စတဿော စ အရူပသမာပတ္တိယော— အယံ ကုပ္ပေါ ဝိမောက္ခော. (1:49)
ကတမော အကုပ္ပေါ ဝိမောက္ခော? စတ္တာရော စ အရိယမဂ္ဂါ, စတ္တာရိ စ သာမညဖလာနိ, နိဗ္ဗာနဉ္စ— အယံ အကုပ္ပေါ ဝိမောက္ခော. (1:50)
ကတမော လောကိကော ဝိမောက္ခော? စတ္တာရိ စ ဈာနာနိ, စတဿော စ အရူပသမာပတ္တိယော— အယံ လောကိကော ဝိမောက္ခော. (1:51)
ကတမော လောကုတ္တရော ဝိမောက္ခော? စတ္တာရော စ အရိယမဂ္ဂါ, စတ္တာရိ စ သာမညဖလာနိ, နိဗ္ဗာနဉ္စ— အယံ လောကုတ္တရော ဝိမောက္ခော. (1:52)
ကတမော သာသဝေါ ဝိမောက္ခော? စတ္တာရိ စ ဈာနာနိ, စတဿော စ အရူပသမာပတ္တိယော— အယံ သာသဝေါ ဝိမောက္ခော. (1:53)
ကတမော အနာသဝေါ ဝိမောက္ခော? စတ္တာရော စ အရိယမဂ္ဂါ, စတ္တာရိ စ သာမညဖလာနိ, နိဗ္ဗာနဉ္စ— အယံ အနာသဝေါ ဝိမောက္ခော. (1:54)
ကတမော သာမိသော ဝိမောက္ခော? ရူပပ္ပဋိသညုတ္တော ဝိမောက္ခော— အယံ သာမိသော ဝိမောက္ခော. (1:55)
ကတမော နိရာမိသော ဝိမောက္ခော? အရူပပ္ပဋိသညုတ္တော ဝိမောက္ခော— အယံ နိရာမိသော ဝိမောက္ခော. (1:56)
ကတမော နိရာမိသာ နိရာမိသတရော ဝိမောက္ခော? စတ္တာရော စ အရိယမဂ္ဂါ, စတ္တာရိ စ သာမညဖလာနိ, နိဗ္ဗာနဉ္စ— အယံ နိရာမိသာနိရာမိသတရော ဝိမောက္ခော. (1:57)
ကတမော ပဏိဟိတော ဝိမောက္ခော? စတ္တာရိ စ ဈာနာနိ, စတဿော စ အရူပသမာပတ္တိယော— အယံ ပဏိဟိတော ဝိမောက္ခော. ကတမော အပ္ပဏိဟိတော ဝိမောက္ခော? စတ္တာရော စ အရိယမဂ္ဂါ, စတ္တာရိ စ သာမညဖလာနိ, နိဗ္ဗာနဉ္စ— အယံ အပ္ပဏိဟိတော ဝိမောက္ခော. (1:58)
ကတမော ပဏိဟိတပ္ပဋိပ္ပဿဒ္ဓိ ဝိမောက္ခော? ပဌမဿ ဈာနဿ ပဋိလာဘော ဝါ ဝိပါကော ဝါ …ပေ… နေဝသညာနာသညာယတနသမာပတ္တိယာ ပဋိလာဘော ဝါ ဝိပါကော ဝါ— အယံ ပဏိဟိတပ္ပဋိပ္ပဿဒ္ဓိ ဝိမောက္ခော. (1:59)
ကတမော သညုတ္တော ဝိမောက္ခော? စတ္တာရိ စ ဈာနာနိ, စတဿော စ အရူပသမာပတ္တိယော— အယံ သညုတ္တော ဝိမောက္ခော. (1:60)
ကတမော ဝိသညုတ္တော ဝိမောက္ခော? စတ္တာရော စ အရိယမဂ္ဂါ, စတ္တာရိ စ သာမညဖလာနိ, နိဗ္ဗာနဉ္စ— အယံ ဝိသညုတ္တော ဝိမောက္ခော. (1:61)
ကတမော ဧကတ္တဝိမောက္ခော? စတ္တာရော စ အရိယမဂ္ဂါ, စတ္တာရိ စ သာမညဖလာနိ, နိဗ္ဗာနဉ္စ— အယံ ဧကတ္တဝိမောက္ခော. (1:62)
ကတမော နာနတ္တဝိမောက္ခော? စတ္တာရိ စ ဈာနာနိ, စတဿော စ အရူပသမာပတ္တိယော— အယံ နာနတ္တဝိမောက္ခော. (1:63)
ကတမော သညာဝိမောက္ခော? သိယာ ဧကော သညာဝိမောက္ခော ဒသ သညာဝိမောက္ခာ ဟောန္တိ, ဒသ သညာဝိမောက္ခာ ဧကော သညာဝိမောက္ခော ဟောတိ, ဝတ္ထုဝသေန ပရိယာယေန.
သိယာ တိ ကထဉ္စ သိယာ? အနိစ္စာနုပဿနဉာဏံ နိစ္စတော သညာယ မုစ္စတီတိ— သညာဝိမောက္ခော. ဒုက္ခာနုပဿနဉာဏံ သုခတော သညာယ မုစ္စတီတိ— သညာဝိမောက္ခော. အနတ္တာနုပဿနဉာဏံ အတ္တတော သညာယ မုစ္စတီတိ— သညာဝိမောက္ခော. နိဗ္ဗိဒါနုပဿနဉာဏံ နန္ဒိယာ သညာယ မုစ္စတီတိ— သညာဝိမောက္ခော. ဝိရာဂါနုပဿနဉာဏံ ရာဂတော သညာယ မုစ္စတီတိ— သညာဝိမောက္ခော. နိရောဓာနုပဿနဉာဏံ သမုဒယတော သညာယ မုစ္စတီတိ— သညာဝိမောက္ခော. ပဋိနိဿဂ္ဂါနုပဿနဉာဏံ အာဒါနတော သညာယ မုစ္စတီတိ— သညာဝိမောက္ခော. အနိမိတ္တာနုပဿနဉာဏံ နိမိတ္တတော သညာယ မုစ္စတီတိ— သညာဝိမောက္ခော. အပ္ပဏိဟိတာနုပဿနဉာဏံ ပဏိဓိယာ သညာယ မုစ္စတီတိ— သညာဝိမောက္ခော. သုညတာနုပဿနဉာဏံ အဘိနိဝေသတော သညာယ မုစ္စတီတိ— သညာဝိမောက္ခော. ဧဝံ သိယာ ဧကော သညာဝိမောက္ခော ဒသ သညာဝိမောက္ခာ ဟောန္တိ, ဒသ သညာဝိမောက္ခာ ဧကော သညာဝိမောက္ခော ဟောတိ ဝတ္ထုဝသေန ပရိယာယေန.
ရူပေ အနိစ္စာနုပဿနဉာဏံ နိစ္စတော သညာယ မုစ္စတီတိ— သညာဝိမောက္ခော …ပေ… ရူပေ သုညတာနုပဿနဉာဏံ အဘိနိဝေသတော သညာယ မုစ္စတီတိ— သညာဝိမောက္ခော. ဧဝံ သိယာ ဧကော သညာဝိမောက္ခော ဒသ သညာဝိမောက္ခာ ဟောန္တိ, ဒသ သညာဝိမောက္ခာ ဧကော သညာဝိမောက္ခော ဟောတိ ဝတ္ထုဝသေန ပရိယာယေန.
ဝေဒနာယ …ပေ… သညာယ… သင်္ခါရေသု… ဝိညာဏေ… စက္ခုသ္မိံ …ပေ… ဇရာမရဏေ အနိစ္စာနုပဿနဉာဏံ နိစ္စတော သညာယ မုစ္စတီတိ— သညာဝိမောက္ခော …ပေ… ဇရာမရဏေ သုညတာနုပဿနဉာဏံ အဘိနိဝေသတော သညာယ မုစ္စတီတိ— သညာဝိမောက္ခော. ဧဝံ သိယာ, ဧကော သညာဝိမောက္ခော ဒသ သညာဝိမောက္ခာ ဟောန္တိ, ဒသ သညာဝိမောက္ခာ ဧကော သညာဝိမောက္ခော ဟောတိ ဝတ္ထုဝသေန ပရိယာယေန— အယံ သညာဝိမောက္ခော. (1:64)
ကတမော ဉာဏဝိမောက္ခော? သိယာ ဧကော ဉာဏဝိမောက္ခော ဒသ ဉာဏဝိမောက္ခာ ဟောန္တိ, ဒသ ဉာဏဝိမောက္ခာ ဧကော ဉာဏဝိမောက္ခော ဟောတိ ဝတ္ထုဝသေန ပရိယာယေန သိယာ တိ. ကထဉ္စ သိယာ? အနိစ္စာနုပဿနာ ယထာဘူတံ ဉာဏံ နိစ္စတော သမ္မောဟာ အညာဏာ မုစ္စတီတိ— ဉာဏဝိမောက္ခော. ဒုက္ခာနုပဿနာ ယထာဘူတံ ဉာဏံ သုခတော သမ္မောဟာ အညာဏာ မုစ္စတီတိ— ဉာဏဝိမောက္ခော. အနတ္တာနုပဿနာ ယထာဘူတံ ဉာဏံ အတ္တတော သမ္မောဟာ အညာဏာ မုစ္စတီတိ— ဉာဏဝိမောက္ခော. နိဗ္ဗိဒါနုပဿနာ ယထာဘူတံ ဉာဏံ နန္ဒိယာ သမ္မောဟာ အညာဏာ မုစ္စတီတိ— ဉာဏဝိမောက္ခော. ဝိရာဂါနုပဿနာ ယထာဘူတံ ဉာဏံ ရာဂတော သမ္မောဟာ အညာဏာ မုစ္စတီတိ— ဉာဏဝိမောက္ခော. နိရောဓာနုပဿနာ ယထာဘူတံ ဉာဏံ သမုဒယတော သမ္မောဟာ အညာဏာ မုစ္စတီတိ— ဉာဏဝိမောက္ခော. ပဋိနိဿဂ္ဂါနုပဿနာ ယထာဘူတံ ဉာဏံ အာဒါနတော သမ္မောဟာ အညာဏာ မုစ္စတီတိ— ဉာဏဝိမောက္ခော. အနိမိတ္တာနုပဿနာ ယထာဘူတံ ဉာဏံ နိမိတ္တတော သမ္မောဟာ အညာဏာ မုစ္စတီတိ— ဉာဏဝိမောက္ခော. အပ္ပဏိဟိတာနုပဿနာ ယထာဘူတံ ဉာဏံ ပဏိဓိယာ သမ္မောဟာ အညာဏာ မုစ္စတီတိ— ဉာဏဝိမောက္ခော. သုညတာနုပဿနာ ယထာဘူတံ ဉာဏံ အဘိနိဝေသတော သမ္မောဟာ အညာဏာ မုစ္စတီတိ— ဉာဏဝိမောက္ခော. ဧဝံ သိယာ ဧကော ဉာဏဝိမောက္ခော ဒသ ဉာဏဝိမောက္ခာ ဟောန္တိ, ဒသ ဉာဏဝိမောက္ခာ ဧကော ဉာဏဝိမောက္ခော ဟောတိ ဝတ္ထုဝသေန ပရိယာယေန.
ရူပေ အနိစ္စာနုပဿနာ ယထာဘူတံ ဉာဏံ နိစ္စတော သမ္မောဟာ အညာဏာ မုစ္စတီတိ— ဉာဏဝိမောက္ခော …ပေ… ရူပေ သုညတာနုပဿနာ ယထာဘူတံ ဉာဏံ အဘိနိဝေသတော သမ္မောဟာ အညာဏာ မုစ္စတီတိ— ဉာဏဝိမောက္ခော. ဧဝံ သိယာ ဧကော ဉာဏဝိမောက္ခော ဒသ ဉာဏဝိမောက္ခာ ဟောန္တိ, ဒသ ဉာဏဝိမောက္ခာ ဧကော ဉာဏဝိမောက္ခော ဟောတိ ဝတ္ထုဝသေန ပရိယာယေန.
ဝေဒနာယ …ပေ… သညာယ… သင်္ခါရေသု… ဝိညာဏေ… စက္ခုသ္မိံ …ပေ… ဇရာမရဏေ အနိစ္စာနုပဿနာ ယထာဘူတံ ဉာဏံ နိစ္စတော သမ္မောဟာ အညာဏာ မုစ္စတီတိ— ဉာဏဝိမောက္ခော …ပေ… ဇရာမရဏေ သုညတာနုပဿနာ ယထာဘူတံ ဉာဏံ အဘိနိဝေသတော သမ္မောဟာ အညာဏာ မုစ္စတီတိ— ဉာဏဝိမောက္ခော. ဧဝံ သိယာ ဧကော ဉာဏဝိမောက္ခော ဒသ ဉာဏဝိမောက္ခာ ဟောန္တိ, ဒသ ဉာဏဝိမောက္ခာ ဧကော ဉာဏဝိမောက္ခော ဟောတိ ဝတ္ထုဝသေန ပရိယာယေန— အယံ ဉာဏဝိမောက္ခော. (1:65)
ကတမော သီတိသိယာဝိမောက္ခော? သိယာ ဧကော သီတိသိယာဝိမောက္ခော ဒသ သီတိသိယာဝိမောက္ခာ ဟောန္တိ, ဒသ သီတိသိယာဝိမောက္ခာ ဧကော သီတိသိယာဝိမောက္ခော ဟောတိ ဝတ္ထုဝသေန ပရိယာယေန သိယာ တိ. ကထဉ္စ သိယာ? အနိစ္စာနုပဿနာ အနုတ္တရံ သီတိဘာဝဉာဏံ နိစ္စတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. ဒုက္ခာနုပဿနာ အနုတ္တရံ သီတိဘာဝဉာဏံ သုခတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. အနတ္တာနုပဿနာ အနုတ္တရံ သီတိဘာဝဉာဏံ အတ္တတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. နိဗ္ဗိဒါနုပဿနာ အနုတ္တရံ သီတိဘာဝဉာဏံ နန္ဒိယာ သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. ဝိရာဂါနုပဿနာ အနုတ္တရံ သီတိဘာဝဉာဏံ ရာဂတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. နိရောဓာနုပဿနာ အနုတ္တရံ သီတိဘာဝဉာဏံ သမုဒယတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. ပဋိနိဿဂ္ဂါနုပဿနာ အနုတ္တရံ သီတိဘာဝဉာဏံ အာဒါနတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. အနိမိတ္တာနုပဿနာ အနုတ္တရံ သီတိဘာဝဉာဏံ နိမိတ္တတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. အပ္ပဏိဟိတာနုပဿနာ အနုတ္တရံ သီတိဘာဝဉာဏံ ပဏိဓိယာ သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. သုညတာနုပဿနာ အနုတ္တရံ သီတိဘာဝဉာဏံ အဘိနိဝေသတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. ဧဝံ သိယာ ဧကော သီတိသိယာဝိမောက္ခော ဒသ သီတိသိယာဝိမောက္ခာ ဟောန္တိ, ဒသ သီတိသိယာဝိမောက္ခာ ဧကော သီတိသိယာဝိမောက္ခော ဟောတိ ဝတ္ထုဝသေန ပရိယာယေန.
ရူပေ အနိစ္စာနုပဿနာ အနုတ္တရံ သီတိဘာဝဉာဏံ နိစ္စတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော …ပေ… ရူပေ သုညတာနုပဿနာ အနုတ္တရံ သီတိဘာဝဉာဏံ အဘိနိဝေသတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. ဧဝံ သိယာ ဧကော သီတိသိယာဝိမောက္ခော ဒသ သီတိသိယာဝိမောက္ခာ ဟောန္တိ, ဒသ သီတိသိယာဝိမောက္ခာ ဧကော သီတိသိယာဝိမောက္ခော ဟောတိ ဝတ္ထုဝသေန ပရိယာယေန.
ဝေဒနာယ …ပေ… သညာယ… သင်္ခါရေသု… ဝိညာဏေ… စက္ခုသ္မိံ …ပေ… ဇရာမရဏေ အနိစ္စာနုပဿနာ အနုတ္တရံ သီတိဘာဝဉာဏံ နိစ္စတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော …ပေ… ဇရာမရဏေ သုညတာနုပဿနာ အနုတ္တရံ သီတိဘာဝဉာဏံ အဘိနိဝေသတော သန္တာပပရိဠာဟဒရထာ မုစ္စတီတိ— သီတိသိယာဝိမောက္ခော. ဧဝံ သိယာ ဧကော သီတိသိယာဝိမောက္ခော ဒသ သီတိသိယာဝိမောက္ခာ ဟောန္တိ, ဒသ သီတိသိယာဝိမောက္ခာ ဧကော သီတိသိယာဝိမောက္ခော ဟောတိ ဝတ္ထုဝသေန ပရိယာယေန— အယံ သီတိသိယာဝိမောက္ခော. (1:66)
ကတမော ဈာနဝိမောက္ခော? နေက္ခမ္မံ ဈာယတီတိ ဈာနံ. ကာမစ္ဆန္ဒံ ဈာပေတီတိ— ဈာနံ. ဈာယန္တော မုစ္စတီတိ— ဈာနဝိမောက္ခော. ဈာပေန္တော မုစ္စတီတိ— ဈာနဝိမောက္ခော. ဈာယန္တီတိ— ဓမ္မာ. ဈာပေတီတိ— ကိလေသေ. ဈာတေ စ ဈာပေ စ ဇာနာတီတိ— ဈာနဝိမောက္ခော. အဗျာပါဒေါ ဈာယတီတိ— ဈာနံ. ဗျာပါဒံ ဈာပေတီတိ— ဈာနံ. ဈာယန္တော မုစ္စတီတိ— ဈာနဝိမောက္ခော. ဈာပေန္တော မုစ္စတီတိ— ဈာနဝိမောက္ခော. ဈာယန္တီတိ— ဓမ္မာ. ဈာပေတီတိ— ကိလေသေ. ဈာတေ စ ဈာပေ စ ဇာနာတီတိ— ဈာနဝိမောက္ခော. အာလောကသညာ ဈာယတီတိ— ဈာနံ. ထိနမိဒ္ဓံ ဈာပေတီတိ— ဈာနံ …ပေ… အဝိက္ခေပေါ ဈာယတီတိ— ဈာနံ. ဥဒ္ဓစ္စံ ဈာပေတီတိ— ဈာနံ. ဓမ္မဝဝတ္ထာနံ ဈာယတီတိ— ဈာနံ. ဝိစိကိစ္ဆံ ဈာပေတီတိ— ဈာနံ. ဉာဏံ ဈာယတီတိ— ဈာနံ. အဝိဇ္ဇံ ဈာပေတီတိ— ဈာနံ. ပါမောဇ္ဇံ ဈာယတီတိ— ဈာနံ. အရတိံ ဈာပေတီတိ— ဈာနံ. ပဌမံ ဈာနံ ဈာယတီတိ— ဈာနံ. နီဝရဏေ ဈာပေတီတိ— ဈာနံ …ပေ… အရဟတ္တမဂ္ဂေါ ဈာယတီတိ— ဈာနံ. သဗ္ဗကိလေသေ ဈာပေတီတိ— ဈာနံ. ဈာယန္တော မုစ္စတီတိ— ဈာနဝိမောက္ခော. ဈာပေန္တော မုစ္စတီတိ— ဈာနဝိမောက္ခော. ဈာယန္တီတိ— ဓမ္မာ. ဈာပေတီတိ— ကိလေသေ. ဈာတေ စ ဈာပေ စ ဇာနာတီတိ— ဈာနဝိမောက္ခော— အယံ ဈာနဝိမောက္ခော. (1:67)
ကတမော အနုပါဒါ စိတ္တဿ ဝိမောက္ခော? သိယာ ဧကော အနုပါဒါစိတ္တဿ ဝိမောက္ခော ဒသ အနုပါဒါစိတ္တဿ ဝိမောက္ခာ ဟောန္တိ, ဒသ အနုပါဒါစိတ္တဿ ဝိမောက္ခာ ဧကော အနုပါဒါစိတ္တဿ ဝိမောက္ခော ဟောတိ ဝတ္ထုဝသေန ပရိယာယေန သိယာ တိ. ကထဉ္စ သိယာ? အနိစ္စာနုပဿနဉာဏံ နိစ္စတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. ဒုက္ခာနုပဿနဉာဏံ သုခတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. အနတ္တာနုပဿနဉာဏံ အတ္တတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. နိဗ္ဗိဒါနုပဿနဉာဏံ နန္ဒိယာ ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. ဝိရာဂါနုပဿနဉာဏံ ရာဂတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. နိရောဓာနုပဿနဉာဏံ သမုဒယတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. ပဋိနိဿဂ္ဂါနုပဿနဉာဏံ အာဒါနတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. အနိမိတ္တာနုပဿနဉာဏံ နိမိတ္တတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. အပ္ပဏိဟိတာနုပဿနဉာဏံ ပဏိဓိယာ ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. သုညတာနုပဿနဉာဏံ အဘိနိဝေသတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. ဧဝံ သိယာ ဧကော အနုပါဒါစိတ္တဿ ဝိမောက္ခော ဒသ အနုပါဒါစိတ္တဿ ဝိမောက္ခာ ဟောန္တိ, ဒသ အနုပါဒါစိတ္တဿ ဝိမောက္ခာ ဧကော အနုပါဒါစိတ္တဿ ဝိမောက္ခော ဟောတိ ဝတ္ထုဝသေန ပရိယာယေန.
ရူပေ အနိစ္စာနုပဿနဉာဏံ နိစ္စတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော …ပေ… ရူပေ သုညတာနုပဿနဉာဏံ အဘိနိဝေသတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. ဧဝံ သိယာ ဧကော အနုပါဒါစိတ္တဿ ဝိမောက္ခော ဒသ အနုပါဒါစိတ္တဿ ဝိမောက္ခာ ဟောန္တိ, ဒသ အနုပါဒါစိတ္တဿ ဝိမောက္ခာ ဧကော အနုပါဒါစိတ္တဿ ဝိမောက္ခော ဟောတိ ဝတ္ထုဝသေန ပရိယာယေန.
ဝေဒနာယ …ပေ… သညာယ… သင်္ခါရေသု… ဝိညာဏေ… စက္ခုသ္မိံ …ပေ… ဇရာမရဏေ အနိစ္စာနုပဿနဉာဏံ နိစ္စတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော …ပေ… ဇရာမရဏေ သုညတာနုပဿနဉာဏံ အဘိနိဝေသတော ဥပါဒါနာ မုစ္စတီတိ— အနုပါဒါစိတ္တဿ ဝိမောက္ခော. ဧဝံ သိယာ ဧကော အနုပါဒါစိတ္တဿ ဝိမောက္ခော ဒသ အနုပါဒါစိတ္တဿ ဝိမောက္ခာ ဟောန္တိ, ဒသ အနုပါဒါစိတ္တဿ ဝိမောက္ခာ ဧကော အနုပါဒါစိတ္တဿ ဝိမောက္ခော ဟောတိ ဝတ္ထုဝသေန ပရိယာယေန.
အနိစ္စာနုပဿနဉာဏံ ကတိဟုပါဒါနေဟိ မုစ္စတိ? ဒုက္ခာနုပဿနဉာဏံ ကတိဟုပါဒါနေဟိ မုစ္စတိ? အနတ္တာနုပဿနဉာဏံ ကတိဟုပါဒါနေဟိ မုစ္စတိ? နိဗ္ဗိဒါနုပဿနဉာဏံ …ပေ… ဝိရာဂါနုပဿနဉာဏံ… နိရောဓာနုပဿနဉာဏံ… ပဋိနိဿဂ္ဂါနုပဿနဉာဏံ… အနိမိတ္တာနုပဿနဉာဏံ… အပ္ပဏိဟိတာနုပဿနဉာဏံ… သုညတာနုပဿနဉာဏံ ကတိဟုပါဒါနေဟိ မုစ္စတီတိ?
အနိစ္စာနုပဿနဉာဏံ တီဟုပါဒါနေဟိ မုစ္စတိ. ဒုက္ခာနုပဿနဉာဏံ ဧကုပါဒါနာ မုစ္စတိ. အနတ္တာနုပဿနဉာဏံ တီဟုပါဒါနေဟိ မုစ္စတိ. နိဗ္ဗိဒါနုပဿနဉာဏံ ဧကုပါဒါနာ မုစ္စတိ. ဝိရာဂါနုပဿနဉာဏံ ဧကုပါဒါနာ မုစ္စတိ. နိရောဓာနုပဿနဉာဏံ စတူဟုပါဒါနေဟိ မုစ္စတိ. ပဋိနိဿဂ္ဂါနုပဿနဉာဏံ စတူဟုပါဒါနေဟိ မုစ္စတိ. အနိမိတ္တာနုပဿနဉာဏံ တီဟုပါဒါနေဟိ မုစ္စတိ. အပ္ပဏိဟိတာနုပဿနဉာဏံ ဧကုပါဒါနာ မုစ္စတိ. သုညတာနုပဿနဉာဏံ တီဟုပါဒါနေဟိ မုစ္စတိ.
အနိစ္စာနုပဿနဉာဏံ ကတမေဟိ တီဟုပါဒါနေဟိ မုစ္စတိ? ဒိဋ္ဌုပါဒါနာ, သီလဗ္ဗတုပါဒါနာ, အတ္တဝါဒုပါဒါနာ— အနိစ္စာနုပဿနဉာဏံ ဣမေဟိ တီဟုပါဒါနေဟိ မုစ္စတိ. ဒုက္ခာနုပဿနဉာဏံ ကတမာ ဧကုပါဒါနာ မုစ္စတိ? ကာမုပါဒါနာ— ဒုက္ခာနုပဿနဉာဏံ ဣဒံ ဧကုပါဒါနာ မုစ္စတိ. အနတ္တာနုပဿနဉာဏံ ကတမေဟိ တီဟုပါဒါနေဟိ မုစ္စတိ? ဒိဋ္ဌုပါဒါနာ, သီလဗ္ဗတုပါဒါနာ, အတ္တဝါဒုပါဒါနာ— အနတ္တာနုပဿနဉာဏံ ဣမေဟိ တီဟုပါဒါနေဟိ မုစ္စတိ. နိဗ္ဗိဒါနုပဿနဉာဏံ ကတမာ ဧကုပါဒါနာ မုစ္စတိ? ကာမုပါဒါနာ— နိဗ္ဗိဒါနုပဿနဉာဏံ ဣဒံ ဧကုပါဒါနာ မုစ္စတိ. ဝိရာဂါနုပဿနဉာဏံ ကတမာ ဧကုပါဒါနာ မုစ္စတိ? ကာမုပါဒါနာ— ဝိရာဂါနုပဿနဉာဏံ ဣဒံ ဧကုပါဒါနာ မုစ္စတိ. နိရောဓာနုပဿနဉာဏံ ကတမေဟိ စတူဟုပါဒါနေဟိ မုစ္စတိ? ကာမုပါဒါနာ, ဒိဋ္ဌုပါဒါနာ, သီလဗ္ဗတုပါဒါနာ, အတ္တဝါဒုပါဒါနာ— နိရောဓာနုပဿနဉာဏံ ဣမေဟိ စတူဟုပါဒါနေဟိ မုစ္စတိ. ပဋိနိဿဂ္ဂါနုပဿနဉာဏံ ကတမေဟိ စတူဟုပါဒါနေဟိ မုစ္စတိ? ကာမုပါဒါနာ, ဒိဋ္ဌုပါဒါနာ, သီလဗ္ဗတုပါဒါနာ, အတ္တဝါဒုပါဒါနာ— ပဋိနိဿဂ္ဂါနုပဿနဉာဏံ ဣမေဟိ စတူဟုပါဒါနေဟိ မုစ္စတိ. အနိမိတ္တာနုပဿနဉာဏံ ကတမေဟိ တီဟုပါဒါနေဟိ မုစ္စတိ? ဒိဋ္ဌုပါဒါနာ, သီလဗ္ဗတုပါဒါနာ, အတ္တဝါဒုပါဒါနာ— အနိမိတ္တာနုပဿနဉာဏံ ဣမေဟိ တီဟုပါဒါနေဟိ မုစ္စတိ. အပ္ပဏိဟိတာနုပဿနဉာဏံ ကတမာ ဧကုပါဒါနာ မုစ္စတိ? ကာမုပါဒါနာ— အပ္ပဏိဟိတာနုပဿနဉာဏံ ဣဒံ ဧကုပါဒါနာ မုစ္စတိ. သုညတာနုပဿနဉာဏံ ကတမေဟိ တီဟုပါဒါနေဟိ မုစ္စတိ? ဒိဋ္ဌုပါဒါနာ, သီလဗ္ဗတုပါဒါနာ, အတ္တဝါဒုပါဒါနာ— သုညတာနုပဿနဉာဏံ ဣမေဟိ တီဟုပါဒါနေဟိ မုစ္စတိ.
ယဉ္စ အနိစ္စာနုပဿနဉာဏံ, ယဉ္စ အနတ္တာနုပဿနဉာဏံ, ယဉ္စ အနိမိတ္တာနုပဿနဉာဏံ, ယဉ္စ သုညတာနုပဿနဉာဏံ— ဣမာနိ စတ္တာရိ ဉာဏာနိ တီဟုပါဒါနေဟိ မုစ္စန္တိ— ဒိဋ္ဌုပါဒါနာ, သီလဗ္ဗတုပါဒါနာ, အတ္တဝါဒုပါဒါနာ. ယဉ္စ ဒုက္ခာနုပဿနဉာဏံ, ယံ စ နိဗ္ဗိဒါနုပဿနဉာဏံ, ယဉ္စ ဝိရာဂါနုပဿနဉာဏံ, ယဉ္စ အပ္ပဏိဟိတာနုပဿနဉာဏံ— ဣမာနိ စတ္တာရိ ဉာဏာနိ ဧကုပါဒါနာ မုစ္စန္တိ— ကာမုပါဒါနာ. ယဉ္စ နိရောဓာနုပဿနဉာဏံ, ယဉ္စ ပဋိနိဿဂ္ဂါနုပဿနဉာဏံ— ဣမာနိ ဒွေ ဉာဏာနိ စတူဟုပါဒါနေဟိ မုစ္စန္တိ— ကာမုပါဒါနာ, ဒိဋ္ဌုပါဒါနာ, သီလဗ္ဗတုပါဒါနာ, အတ္တဝါဒုပါဒါနာ— အယံ အနုပါဒါစိတ္တဿ ဝိမောက္ခော. (1:68)
ဝိမောက္ခကထာယ ပဌမဘာဏဝါရော.
တီဏိ ခေါ ပနိမာနိ ဝိမောက္ခမုခါနိ လောကနိယျာနာယ သံဝတ္တန္တိ. သဗ္ဗသင်္ခါရေ ပရိစ္ဆေဒပရိဝဋုမတော သမနုပဿနတာယ အနိမိတ္တာယ စ ဓာတုယာ စိတ္တသမ္ပက္ခန္ဒနတာယ, သဗ္ဗသင်္ခါရေသု မနောသမုတ္တေဇနတာယ အပ္ပဏိဟိတာယ စ ဓာတုယာ စိတ္တသမ္ပက္ခန္ဒနတာယ, သဗ္ဗဓမ္မေ ပရတော သမနုပဿနတာယ သုညတာယ စ ဓာတုယာ စိတ္တသမ္ပက္ခန္ဒနတာယ— ဣမာနိ တီဏိ ဝိမောက္ခမုခါနိ လောကနိယျာနာယ သံဝတ္တန္တိ.
အနိစ္စတော မနသိကရောတော ကထံ သင်္ခါရာ ဥပဋ္ဌန္တိ? ဒုက္ခတော မနသိကရောတော ကထံ သင်္ခါရာ ဥပဋ္ဌန္တိ? အနတ္တတော မနသိကရောတော ကထံ သင်္ခါရာ ဥပဋ္ဌန္တိ? အနိစ္စတော မနသိကရောတော ခယတော သင်္ခါရာ ဥပဋ္ဌန္တိ, ဒုက္ခတော မနသိကရောတော ဘယတော သင်္ခါရာ ဥပဋ္ဌန္တိ, အနတ္တတော မနသိကရောတော သုညတော သင်္ခါရာ ဥပဋ္ဌန္တိ.
အနိစ္စတော မနသိကရောတော ကိံ ဗဟုလံ စိတ္တံ ဟောတိ? ဒုက္ခတော မနသိကရောတော ကိံ ဗဟုလံ စိတ္တံ ဟောတိ? အနတ္တတော မနသိကရောတော ကိံ ဗဟုလံ စိတ္တံ ဟောတိ? အနိစ္စတော မနသိကရောတော အဓိမောက္ခဗဟုလံ စိတ္တံ ဟောတိ. ဒုက္ခတော မနသိကရောတော ပဿဒ္ဓိဗဟုလံ စိတ္တံ ဟောတိ. အနတ္တတော မနသိကရောတော ဝေဒဗဟုလံ စိတ္တံ ဟောတိ.
အနိစ္စတော မနသိကရောန္တော အဓိမောက္ခဗဟုလော ကတမိန္ဒြိယံ ပဋိလဘတိ? ဒုက္ခတော မနသိကရောန္တော ပဿဒ္ဓိဗဟုလော ကတမိန္ဒြိယံ ပဋိလဘတိ? အနတ္တတော မနသိကရောန္တော ဝေဒဗဟုလော ကတမိန္ဒြိယံ ပဋိလဘတိ? အနိစ္စတော မနသိကရောန္တော အဓိမောက္ခဗဟုလော သဒ္ဓိန္ဒြိယံ ပဋိလဘတိ. ဒုက္ခတော မနသိကရောန္တော ပဿဒ္ဓိဗဟုလော သမာဓိန္ဒြိယံ ပဋိလဘတိ. အနတ္တတော မနသိကရောန္တော ဝေဒဗဟုလော ပညိန္ဒြိယံ ပဋိလဘတိ.
အနိစ္စတော မနသိကရောတော အဓိမောက္ခဗဟုလဿ ကတမိန္ဒြိယံ အာဓိပတေယျံ ဟောတိ, ဘာဝနာယ ကတိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ကေနဋ္ဌေန ဘာဝနာ, ကော ဘာဝေတိ? ဒုက္ခတော မနသိကရောတော ပဿဒ္ဓိဗဟုလဿ ကတမိန္ဒြိယံ အာဓိပတေယျံ ဟောတိ, ဘာဝနာယ ကတိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ကေနဋ္ဌေန ဘာဝနာ, ကော ဘာဝေတိ? အနတ္တတော မနသိကရောတော ဝေဒဗဟုလဿ ကတမိန္ဒြိယံ အာဓိပတေယျံ ဟောတိ, ဘာဝနာယ ကတိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ကေနဋ္ဌေန ဘာဝနာ, ကော ဘာဝေတိ? အနိစ္စတော မနသိကရောတော အဓိမောက္ခဗဟုလဿ သဒ္ဓိန္ဒြိယံ အာဓိပတေယျံ ဟောတိ. ဘာဝနာယ စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ. ဧကရသဋ္ဌေန ဘာဝနာ. ယော သမ္မာပဋိပန္နော သော ဘာဝေတိ; နတ္ထိ မိစ္ဆာပဋိပန္နဿ ဣန္ဒြိယဘာဝနာ. ဒုက္ခတော မနသိကရောတော ပဿဒ္ဓိဗဟုလဿ သမာဓိန္ဒြိယံ အာဓိပတေယျံ ဟောတိ. ဘာဝနာယ စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ. ဧကရသဋ္ဌေန ဘာဝနာ. ယော သမ္မာပဋိပန္နော သော ဘာဝေတိ; နတ္ထိ မိစ္ဆာပဋိပန္နဿ ဣန္ဒြိယဘာဝနာ. အနတ္တတော မနသိကရောတော ဝေဒဗဟုလဿ ပညိန္ဒြိယံ အာဓိပတေယျံ ဟောတိ. ဘာဝနာယ စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ. ဧကရသဋ္ဌေန ဘာဝနာ. ယော သမ္မာပဋိပန္နော သော ဘာဝေတိ; နတ္ထိ မိစ္ဆာပဋိပန္နဿ ဣန္ဒြိယဘာဝနာ.
အနိစ္စတော မနသိကရောတော အဓိမောက္ခဗဟုလဿ ကတမိန္ဒြိယံ အာဓိပတေယျံ ဟောတိ? ဘာဝနာယ ကတိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ? ပဋိဝေဓကာလေ ကတမိန္ဒြိယံ အာဓိပတေယျံ ဟောတိ? ပဋိဝေဓာယ ကတိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ? ကေနဋ္ဌေန ဘာဝနာ? ကေနဋ္ဌေန ပဋိဝေဓော? ဒုက္ခတော မနသိကရောတော ပဿဒ္ဓိဗဟုလဿ ကတမိန္ဒြိယံ အာဓိပတေယျံ ဟောတိ? ဘာဝနာယ ကတိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ? ပဋိဝေဓကာလေ ကတမိန္ဒြိယံ အာဓိပတေယျံ ဟောတိ? ပဋိဝေဓာယ ကတိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ? ကေနဋ္ဌေန ဘာဝနာ? ကေနဋ္ဌေန ပဋိဝေဓော? အနတ္တတော မနသိကရောတော ဝေဒဗဟုလဿ ကတမိန္ဒြိယံ အာဓိပတေယျံ ဟောတိ? ဘာဝနာယ ကတိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ? ပဋိဝေဓကာလေ ကတမိန္ဒြိယံ အာဓိပတေယျံ ဟောတိ? ပဋိဝေဓာယ ကတိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ? ကေနဋ္ဌေန ဘာဝနာ? ကေနဋ္ဌေန ပဋိဝေဓော?
အနိစ္စတော မနသိကရောတော အဓိမောက္ခဗဟုလဿ သဒ္ဓိန္ဒြိယံ အာဓိပတေယျံ ဟောတိ. ဘာဝနာယ စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ. ပဋိဝေဓကာလေ ပညိန္ဒြိယံ အာဓိပတေယျံ ဟောတိ. ပဋိဝေဓာယ စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ. ဧကရသဋ္ဌေန ဘာဝနာ. ဒဿနဋ္ဌေန ပဋိဝေဓော. ဧဝံ ပဋိဝိဇ္ဈန္တောပိ ဘာဝေတိ, ဘာဝေန္တောပိ ပဋိဝိဇ္ဈတိ. ဒုက္ခတော မနသိကရောတော ပဿဒ္ဓိဗဟုလဿ သမာဓိန္ဒြိယံ အာဓိပတေယျံ ဟောတိ. ဘာဝနာယ စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ. ပဋိဝေဓကာလေ ပညိန္ဒြိယံ အာဓိပတေယျံ ဟောတိ. ပဋိဝေဓာယ စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ. ဧကရသဋ္ဌေန ဘာဝနာ. ဒဿနဋ္ဌေန ပဋိဝေဓော. ဧဝံ ပဋိဝိဇ္ဈန္တောပိ ဘာဝေတိ, ဘာဝေန္တောပိ ပဋိဝိဇ္ဈတိ. အနတ္တတော မနသိကရောတော ဝေဒဗဟုလဿ ပညိန္ဒြိယံ အာဓိပတေယျံ ဟောတိ. ဘာဝနာယ စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ. ပဋိဝေဓကာလေပိ ပညိန္ဒြိယံ အာဓိပတေယျံ ဟောတိ. ပဋိဝေဓာယ စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ. ဧကရသဋ္ဌေန ဘာဝနာ. ဒဿနဋ္ဌေန ပဋိဝေဓော. ဧဝံ ပဋိဝိဇ္ဈန္တောပိ ဘာဝေတိ, ဘာဝေန္တောပိ ပဋိဝိဇ္ဈတိ.
အနိစ္စတော မနသိကရောတော ကတမိန္ဒြိယံ အဓိမတ္တံ ဟောတိ? ကတမိန္ဒြိယဿ အဓိမတ္တတ္တာ သဒ္ဓါဝိမုတ္တော ဟောတိ? ဒုက္ခတော မနသိကရောတော ကတမိန္ဒြိယံ အဓိမတ္တံ ဟောတိ? ကတမိန္ဒြိယဿ အဓိမတ္တတ္တာ ကာယသက္ခီ ဟောတိ? အနတ္တတော မနသိကရောတော ကတမိန္ဒြိယံ အဓိမတ္တံ ဟောတိ? ကတမိန္ဒြိယဿ အဓိမတ္တတ္တာ ဒိဋ္ဌိပ္ပတ္တော ဟောတိ?
အနိစ္စတော မနသိကရောတော သဒ္ဓိန္ဒြိယံ အဓိမတ္တံ ဟောတိ. သဒ္ဓိန္ဒြိယဿ အဓိမတ္တတ္တာ သဒ္ဓါဝိမုတ္တော ဟောတိ. ဒုက္ခတော မနသိကရောတော သမာဓိန္ဒြိယံ အဓိမတ္တံ ဟောတိ. သမာဓိန္ဒြိယဿ အဓိမတ္တတ္တာ ကာယသက္ခီ ဟောတိ. အနတ္တတော မနသိကရောတော ပညိန္ဒြိယံ အဓိမတ္တံ ဟောတိ. ပညိန္ဒြိယဿ အဓိမတ္တတ္တာ ဒိဋ္ဌိပ္ပတ္တော ဟောတိ.
သဒ္ဒဟန္တော ဝိမုတ္တောတိ— သဒ္ဓါဝိမုတ္တော. ဖုဋ္ဌတ္တာ သစ္ဆိကတောတိ— ကာယသက္ခီ. ဒိဋ္ဌတ္တာ ပတ္တောတိ— ဒိဋ္ဌိပ္ပတ္တော. သဒ္ဒဟန္တော ဝိမုစ္စတီတိ— သဒ္ဓါဝိမုတ္တော. ဈာနဖဿံ ပဌမံ ဖုသတိ, ပစ္ဆာ နိရောဓံ နိဗ္ဗာနံ သစ္ဆိကရောတီတိ— ကာယသက္ခီ. “ဒုက္ခာ သင်္ခါရာ, သုခေါ နိရောဓော”တိ ဉာတံ ဟောတိ ဒိဋ္ဌံ ဝိဒိတံ သစ္ဆိကတံ ဖဿိတံ ပညာယာတိ— ဒိဋ္ဌိပ္ပတ္တော. ယော စာယံ ပုဂ္ဂလော သဒ္ဓါဝိမုတ္တော, ယော စ ကာယသက္ခီ, ယော စ ဒိဋ္ဌိပ္ပတ္တော, သိယာ ဣမေ တယော ပုဂ္ဂလာ သဒ္ဓါဝိမုတ္တာပိ ကာယသက္ခီပိ ဒိဋ္ဌိပ္ပတ္တာပိ ဝတ္ထုဝသေန ပရိယာယေန သိယာ တိ. ကထဉ္စ သိယာ? အနိစ္စတော မနသိကရောတော သဒ္ဓိန္ဒြိယံ အဓိမတ္တံ ဟောတိ. သဒ္ဓိန္ဒြိယဿ အဓိမတ္တတ္တာ သဒ္ဓါဝိမုတ္တော ဟောတိ. ဒုက္ခတော မနသိကရောတော သဒ္ဓိန္ဒြိယံ အဓိမတ္တံ ဟောတိ. သဒ္ဓိန္ဒြိယဿ အဓိမတ္တတ္တာ သဒ္ဓါဝိမုတ္တော ဟောတိ. အနတ္တတော မနသိကရောတော သဒ္ဓိန္ဒြိယံ အဓိမတ္တံ ဟောတိ. သဒ္ဓိန္ဒြိယဿ အဓိမတ္တတ္တာ သဒ္ဓါဝိမုတ္တော ဟောတိ. ဧဝံ ဣမေ တယော ပုဂ္ဂလာ သဒ္ဓိန္ဒြိယဿ ဝသေန သဒ္ဓါဝိမုတ္တာ.
ဒုက္ခတော မနသိကရောတော သမာဓိန္ဒြိယံ အဓိမတ္တံ ဟောတိ. သမာဓိန္ဒြိယဿ အဓိမတ္တတ္တာ ကာယသက္ခီ ဟောတိ. အနတ္တတော မနသိကရောတော သမာဓိန္ဒြိယံ အဓိမတ္တံ ဟောတိ. သမာဓိန္ဒြိယဿ အဓိမတ္တတ္တာ ကာယသက္ခီ ဟောတိ. အနိစ္စတော မနသိကရောတော သမာဓိန္ဒြိယံ အဓိမတ္တံ ဟောတိ. သမာဓိန္ဒြိယဿ အဓိမတ္တတ္တာ ကာယသက္ခီ ဟောတိ. ဧဝံ ဣမေ တယော ပုဂ္ဂလာ သမာဓိန္ဒြိယဿ ဝသေန ကာယသက္ခီ.
အနတ္တတော မနသိကရောတော ပညိန္ဒြိယံ အဓိမတ္တံ ဟောတိ. ပညိန္ဒြိယဿ အဓိမတ္တတ္တာ ဒိဋ္ဌိပ္ပတ္တော ဟောတိ. အနိစ္စတော မနသိကရောတော ပညိန္ဒြိယံ အဓိမတ္တံ ဟောတိ. ပညိန္ဒြိယဿ အဓိမတ္တတ္တာ ဒိဋ္ဌိပ္ပတ္တော ဟောတိ. ဒုက္ခတော မနသိကရောတော ပညိန္ဒြိယံ အဓိမတ္တံ ဟောတိ. ပညိန္ဒြိယဿ အဓိမတ္တတ္တာ ဒိဋ္ဌိပ္ပတ္တော ဟောတိ. ဧဝံ ဣမေ တယော ပုဂ္ဂလာ ပညိန္ဒြိယဿ ဝသေန ဒိဋ္ဌိပ္ပတ္တာ.
ယော စာယံ ပုဂ္ဂလော သဒ္ဓါဝိမုတ္တော, ယော စ ကာယသက္ခီ, ယော စ ဒိဋ္ဌိပ္ပတ္တော, ဧဝံ သိယာ ဣမေ တယော ပုဂ္ဂလာ သဒ္ဓါဝိမုတ္တာပိ ကာယသက္ခီပိ ဒိဋ္ဌိပ္ပတ္တာပိ ဝတ္ထုဝသေန ပရိယာယေန. ယော စာယံ ပုဂ္ဂလော သဒ္ဓါဝိမုတ္တော, ယော စ ကာယသက္ခီ, ယော စ ဒိဋ္ဌိပ္ပတ္တော, သိယာ ဣမေ တယော ပုဂ္ဂလာ …ပေ… အညောယေဝ သဒ္ဓါဝိမုတ္တော, အညော ကာယသက္ခီ, အညော ဒိဋ္ဌိပ္ပတ္တော.
သိယာ တိ. ကထဉ္စ သိယာ? အနိစ္စတော မနသိကရောတော သဒ္ဓိန္ဒြိယံ အဓိမတ္တံ ဟောတိ. သဒ္ဓိန္ဒြိယဿ အဓိမတ္တတ္တာ သဒ္ဓါဝိမုတ္တော ဟောတိ. ဒုက္ခတော မနသိကရောတော သမာဓိန္ဒြိယံ အဓိမတ္တံ ဟောတိ. သမာဓိန္ဒြိယဿ အဓိမတ္တတ္တာ ကာယသက္ခီ ဟောတိ. အနတ္တတော မနသိကရောတော ပညိန္ဒြိယံ အဓိမတ္တံ ဟောတိ. ပညိန္ဒြိယဿ အဓိမတ္တတ္တာ ဒိဋ္ဌိပ္ပတ္တော ဟောတိ. ယော စာယံ ပုဂ္ဂလော သဒ္ဓါဝိမုတ္တော, ယော စ ကာယသက္ခီ, ယော စ ဒိဋ္ဌိပ္ပတ္တော, ဧဝံ သိယာ ဣမေ တယော ပုဂ္ဂလာ သဒ္ဓါဝိမုတ္တာပိ ကာယသက္ခီပိ ဒိဋ္ဌိပ္ပတ္တာပိ ဝတ္ထုဝသေန ပရိယာယေန. အညောယေဝ သဒ္ဓါဝိမုတ္တော, အညော ကာယသက္ခီ, အညော ဒိဋ္ဌိပ္ပတ္တော.
အနိစ္စတော မနသိကရောတော သဒ္ဓိန္ဒြိယံ အဓိမတ္တံ ဟောတိ, သဒ္ဓိန္ဒြိယဿ အဓိမတ္တတ္တာ သောတာပတ္တိမဂ္ဂံ ပဋိလဘတိ; တေန ဝုစ္စတိ— “သဒ္ဓါနုသာရီ”. စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ. သဒ္ဓိန္ဒြိယဿ ဝသေန စတုန္နံ ဣန္ဒြိယာနံ ဘာဝနာ ဟောတိ. ယေ ဟိ ကေစိ သဒ္ဓိန္ဒြိယဿ ဝသေန သောတာပတ္တိမဂ္ဂံ ပဋိလဘန္တိ, သဗ္ဗေ တေ သဒ္ဓါနုသာရိနော.
အနိစ္စတော မနသိကရောတော သဒ္ဓိန္ဒြိယံ အဓိမတ္တံ ဟောတိ, သဒ္ဓိန္ဒြိယဿ အဓိမတ္တတ္တာ သောတာပတ္တိဖလံ သစ္ဆိကတံ ဟောတိ; တေန ဝုစ္စတိ— “သဒ္ဓါဝိမုတ္တော”. စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ. သဒ္ဓိန္ဒြိယဿ ဝသေန စတ္တာရိန္ဒြိယာနိ ဘာဝိတာနိ ဟောန္တိ သုဘာဝိတာနိ. ယေဟိ ကေစိ သဒ္ဓိန္ဒြိယဿ ဝသေန သောတာပတ္တိဖလံ သစ္ဆိကတာ, သဗ္ဗေ တေ သဒ္ဓါဝိမုတ္တာ.
အနိစ္စတော မနသိကရောတော သဒ္ဓိန္ဒြိယံ အဓိမတ္တံ ဟောတိ, သဒ္ဓိန္ဒြိယဿ အဓိမတ္တတ္တာ သကဒါဂါမိမဂ္ဂံ ပဋိလဘတိ …ပေ… သကဒါဂါမိဖလံ သစ္ဆိကတံ ဟောတိ …ပေ… အနာဂါမိမဂ္ဂံ ပဋိလဘတိ… အနာဂါမိဖလံ သစ္ဆိကတံ ဟောတိ …ပေ… အရဟတ္တမဂ္ဂံ ပဋိလဘတိ… အရဟတ္တံ သစ္ဆိကတံ ဟောတိ; တေန ဝုစ္စတိ— “သဒ္ဓါဝိမုတ္တော”. စတ္တာရိန္ဒြိယာနိ တဒနွယာ ဟောန္တိ …ပေ… သမ္ပယုတ္တပစ္စယာ ဟောန္တိ. သဒ္ဓိန္ဒြိယဿ ဝသေန စတ္တာရိန္ဒြိယာနိ ဘာဝိတာနိ ဟောန္တိ သုဘာဝိတာနိ. ယေဟိ ကေစိ သဒ္ဓိန္ဒြိယဿ ဝသေန အရဟတ္တံ သစ္ဆိကတာ, သဗ္ဗေ တေ သဒ္ဓါဝိမုတ္တာ.
ဒုက္ခတော မနသိကရောတော သမာဓိန္ဒြိယံ အဓိမတ္တံ ဟောတိ, သမာဓိန္ဒြိယဿ အဓိမတ္တတ္တာ သောတာပတ္တိမဂ္ဂံ ပဋိလဘတိ; တေန ဝုစ္စတိ— “ကာယသက္ခီ”. စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ. သမာဓိန္ဒြိယဿ ဝသေန စတုန္နံ ဣန္ဒြိယာနံ ဘာဝနာ ဟောတိ. ယေ ဟိ ကေစိ သမာဓိန္ဒြိယဿ ဝသေန သောတာပတ္တိမဂ္ဂံ ပဋိလဘန္တိ, သဗ္ဗေ တေ ကာယသက္ခီ.
ဒုက္ခတော မနသိကရောတော သမာဓိန္ဒြိယံ အဓိမတ္တံ ဟောတိ, သမာဓိန္ဒြိယဿ အဓိမတ္တတ္တာ သောတာပတ္တိဖလံ သစ္ဆိကတံ ဟောတိ …ပေ… သကဒါဂါမိမဂ္ဂံ ပဋိလဘတိ …ပေ… သကဒါဂါမိဖလံ သစ္ဆိကတံ ဟောတိ …ပေ… အနာဂါမိမဂ္ဂံ ပဋိလဘတိ …ပေ… အနာဂါမိဖလံ သစ္ဆိကတံ ဟောတိ …ပေ… အရဟတ္တမဂ္ဂံ ပဋိလဘတိ …ပေ… အရဟတ္တံ သစ္ဆိကတံ ဟောတိ; တေန ဝုစ္စတိ— “ကာယသက္ခီ”. စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ. သမာဓိန္ဒြိယဿ ဝသေန စတ္တာရိန္ဒြိယာနိ ဘာဝိတာနိ ဟောန္တိ သုဘာဝိတာနိ. ယေ ဟိ ကေစိ သမာဓိန္ဒြိယဿ ဝသေန အရဟတ္တံ သစ္ဆိကတာ, သဗ္ဗေ တေ ကာယသက္ခီ.
အနတ္တတော မနသိကရောတော ပညိန္ဒြိယံ အဓိမတ္တံ ဟောတိ, ပညိန္ဒြိယဿ အဓိမတ္တတ္တာ သောတာပတ္တိမဂ္ဂံ ပဋိလဘတိ; တေန ဝုစ္စတိ— “ဓမ္မာနုသာရီ”. စတ္တာရိန္ဒြိယာနိ တဒနွယာ ဟောန္တိ …ပေ… သမ္ပယုတ္တပစ္စယာ ဟောန္တိ. ပညိန္ဒြိယဿ ဝသေန စတုန္နံ ဣန္ဒြိယာနံ ဘာဝနာ ဟောတိ. ယေ ဟိ ကေစိ ပညိန္ဒြိယဿ ဝသေန သောတာပတ္တိမဂ္ဂံ ပဋိလဘန္တိ, သဗ္ဗေ တေ ဓမ္မာနုသာရိနော.
အနတ္တတော မနသိကရောတော ပညိန္ဒြိယံ အဓိမတ္တံ ဟောတိ, ပညိန္ဒြိယဿ အဓိမတ္တတ္တာ သောတာပတ္တိဖလံ သစ္ဆိကတံ ဟောတိ; တေန ဝုစ္စတိ— “ဒိဋ္ဌိပ္ပတ္တော”. စတ္တာရိန္ဒြိယာနိ တဒနွယာ ဟောန္တိ …ပေ… သမ္ပယုတ္တပစ္စယာ ဟောန္တိ. ပညိန္ဒြိယဿ ဝသေန စတ္တာရိန္ဒြိယာနိ ဘာဝိတာနိ ဟောန္တိ သုဘာဝိတာနိ. ယေ ဟိ ကေစိ ပညိန္ဒြိယဿ ဝသေန သောတာပတ္တိဖလံ သစ္ဆိကတာ, သဗ္ဗေ တေ ဒိဋ္ဌိပ္ပတ္တာ.
အနတ္တတော မနသိကရောတော ပညိန္ဒြိယံ အဓိမတ္တံ ဟောတိ, ပညိန္ဒြိယဿ အဓိမတ္တတ္တာ သကဒါဂါမိမဂ္ဂံ ပဋိလဘတိ …ပေ… သကဒါဂါမိဖလံ သစ္ဆိကတံ ဟောတိ …ပေ… အနာဂါမိမဂ္ဂံ ပဋိလဘတိ… အနာဂါမိဖလံ သစ္ဆိကတံ ဟောတိ… အရဟတ္တမဂ္ဂံ ပဋိလဘတိ …ပေ… အရဟတ္တံ သစ္ဆိကတံ ဟောတိ; တေန ဝုစ္စတိ— “ဒိဋ္ဌိပ္ပတ္တော”. စတ္တာရိန္ဒြိယာနိ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ. ပညိန္ဒြိယဿ ဝသေန စတ္တာရိန္ဒြိယာနိ ဘာဝိတာနိ ဟောန္တိ သုဘာဝိတာနိ. ယေ ဟိ ကေစိ ပညိန္ဒြိယဿ ဝသေန အရဟတ္တံ သစ္ဆိကတာ, သဗ္ဗေ တေ ဒိဋ္ဌိပ္ပတ္တာ.
ယေ ဟိ ကေစိ နေက္ခမ္မံ ဘာဝိတာ ဝါ ဘာဝေန္တိ ဝါ ဘာဝိဿန္တိ ဝါ, အဓိဂတာ ဝါ အဓိဂစ္ဆန္တိ ဝါ အဓိဂမိဿန္တိ ဝါ, ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, ပဋိလဒ္ဓါ ဝါ ပဋိလဘန္တိ ဝါ ပဋိလဘိဿန္တိ ဝါ, ပဋိဝိဒ္ဓါ ဝါ ပဋိဝိဇ္ဈန္တိ ဝါ ပဋိဝိဇ္ဈိဿန္တိ ဝါ, သစ္ဆိကတာ ဝါ သစ္ဆိကရောန္တိ ဝါ သစ္ဆိကရိဿန္တိ ဝါ, ဖဿိတာ ဝါ ဖဿန္တိ ဝါ ဖဿိဿန္တိ ဝါ, ဝသိပ္ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, ပါရမိပ္ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, ဝေသာရဇ္ဇပ္ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, သဗ္ဗေ တေ သဒ္ဓိန္ဒြိယဿ ဝသေန သဒ္ဓါဝိမုတ္တာ, သမာဓိန္ဒြိယဿ ဝသေန ကာယသက္ခီ, ပညိန္ဒြိယဿ ဝသေန ဒိဋ္ဌိပ္ပတ္တာ.
ယေ ဟိ ကေစိ အဗျာပါဒံ …ပေ… အာလောကသညံ… အဝိက္ခေပံ… ဓမ္မဝဝတ္ထာနံ… ဉာဏံ… ပါမောဇ္ဇံ… ပဌမံ ဈာနံ… ဒုတိယံ ဈာနံ… တတိယံ ဈာနံ… စတုတ္ထံ ဈာနံ… အာကာသာနဉ္စာယတနသမာပတ္တိံ… ဝိညာဏဉ္စာယတနသမာပတ္တိံ… အာကိဉ္စညာယတနသမာပတ္တိံ… နေဝသညာနာသညာယတနသမာပတ္တိံ… အနိစ္စာနုပဿနံ… ဒုက္ခာနုပဿနံ… အနတ္တာနုပဿနံ… နိဗ္ဗိဒါနုပဿနံ… ဝိရာဂါနုပဿနံ… နိရောဓာနုပဿနံ… ပဋိနိဿဂ္ဂါနုပဿနံ… ခယာနုပဿနံ… ဝယာနုပဿနံ… ဝိပရိဏာမာနုပဿနံ… အနိမိတ္တာနုပဿနံ… အပ္ပဏိဟိတာနုပဿနံ… သုညတာနုပဿနံ… အဓိပညာဓမ္မဝိပဿနံ… ယထာဘူတဉာဏဒဿနံ… အာဒီနဝါနုပဿနံ… ပဋိသင်္ခါနုပဿနံ… ဝိဝဋ္ဋနာနုပဿနံ… သောတာပတ္တိမဂ္ဂံ… သကဒါဂါမိမဂ္ဂံ… အနာဂါမိမဂ္ဂံ… အရဟတ္တမဂ္ဂံ… .
ယေ ဟိ ကေစိ စတ္တာရော သတိပဋ္ဌာနေ… စတ္တာရော သမ္မပ္ပဓာနေ… စတ္တာရော ဣဒ္ဓိပါဒေ… ပဉ္စိန္ဒြိယာနိ… ပဉ္စ ဗလာနိ… သတ္တ ဗောဇ္ဈင်္ဂေ… အရိယံ အဋ္ဌင်္ဂိကံ မဂ္ဂံ… ယေ ဟိ ကေစိ အဋ္ဌ ဝိမောက္ခေ ဘာဝိတာ ဝါ ဘာဝေန္တိ ဝါ ဘာဝိဿန္တိ ဝါ, အဓိဂတာ ဝါ အဓိဂစ္ဆန္တိ ဝါ အဓိဂမိဿန္တိ ဝါ, ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, ပဋိလဒ္ဓါ ဝါ ပဋိလဘန္တိ ဝါ ပဋိလဘိဿန္တိ ဝါ, ပဋိဝိဒ္ဓါ ဝါ ပဋိဝိဇ္ဈန္တိ ဝါ ပဋိဝိဇ္ဈိဿန္တိ ဝါ, သစ္ဆိကတာ ဝါ သစ္ဆိကရောန္တိ ဝါ သစ္ဆိကရိဿန္တိ ဝါ, ဖဿိတာ ဝါ ဖဿန္တိ ဝါ ဖဿိဿန္တိ ဝါ, ဝသိပ္ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ ပါရမိပ္ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, ဝေသာရဇ္ဇပ္ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, သဗ္ဗေ တေ သဒ္ဓိန္ဒြိယဿ ဝသေန သဒ္ဓါဝိမုတ္တာ, သမာဓိန္ဒြိယဿ ဝသေန ကာယသက္ခီ, ပညိန္ဒြိယဿ ဝသေန ဒိဋ္ဌိပ္ပတ္တာ.
ယေ ဟိ ကေစိ စတဿော ပဋိသမ္ဘိဒါ ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ …ပေ… သဗ္ဗေ တေ သဒ္ဓိန္ဒြိယဿ ဝသေန သဒ္ဓါဝိမုတ္တာ, သမာဓိန္ဒြိယဿ ဝသေန ကာယသက္ခီ, ပညိန္ဒြိယဿ ဝသေန ဒိဋ္ဌိပ္ပတ္တာ.
ယေ ဟိ ကေစိ တိဿော ဝိဇ္ဇာ ပဋိဝိဒ္ဓါ ဝါ ပဋိဝိဇ္ဈန္တိ ဝါ ပဋိဝိဇ္ဈိဿန္တိ ဝါ …ပေ… သဗ္ဗေ တေ သဒ္ဓိန္ဒြိယဿ ဝသေန သဒ္ဓါဝိမုတ္တာ, သမာဓိန္ဒြိယဿ ဝသေန ကာယသက္ခီ, ပညိန္ဒြိယဿ ဝသေန ဒိဋ္ဌိပ္ပတ္တာ.
ယေ ဟိ ကေစိ တိဿော သိက္ခာ သိက္ခိတာ ဝါ သိက္ခန္တိ ဝါ သိက္ခိဿန္တိ ဝါ, သစ္ဆိကတာ ဝါ သစ္ဆိကရောန္တိ ဝါ သစ္ဆိကရိဿန္တိ ဝါ, ဖဿိတာ ဝါ ဖဿန္တိ ဝါ ဖဿိဿန္တိ ဝါ, ဝသိပ္ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, ပါရမိပ္ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, ဝေသာရဇ္ဇပ္ပတ္တာ ဝါ ပါပုဏန္တိ ဝါ ပါပုဏိဿန္တိ ဝါ, သဗ္ဗေ တေ သဒ္ဓိန္ဒြိယဿ ဝသေန သဒ္ဓါဝိမုတ္တာ, သမာဓိန္ဒြိယဿ ဝသေန ကာယသက္ခီ, ပညိန္ဒြိယဿ ဝသေန ဒိဋ္ဌိပ္ပတ္တာ.
ယေ ဟိ ကေစိ ဒုက္ခံ ပရိဇာနန္တိ သမုဒယံ ပဇဟန္တိ နိရောဓံ သစ္ဆိကရောန္တိ မဂ္ဂံ ဘာဝေန္တိ, သဗ္ဗေ တေ သဒ္ဓိန္ဒြိယဿ ဝသေန သဒ္ဓါဝိမုတ္တာ, သမာဓိန္ဒြိယဿ ဝသေန ကာယသက္ခီ, ပညိန္ဒြိယဿ ဝသေန ဒိဋ္ဌိပ္ပတ္တာ.
ကတိဟာကာရေဟိ သစ္စပ္ပဋိဝေဓော ဟောတိ? ကတိဟာကာရေဟိ သစ္စာနိ ပဋိဝိဇ္ဈတိ? စတူဟာကာရေဟိ သစ္စပ္ပဋိဝေဓော ဟောတိ. စတူဟာကာရေဟိ သစ္စာနိ ပဋိဝိဇ္ဈတိ. ဒုက္ခသစ္စံ ပရိညာပဋိဝေဓံ ပဋိဝိဇ္ဈတိ, သမုဒယသစ္စံ ပဟာနပ္ပဋိဝေဓံ ပဋိဝိဇ္ဈတိ, နိရောဓသစ္စံ သစ္ဆိကိရိယာပဋိဝေဓံ ပဋိဝိဇ္ဈတိ, မဂ္ဂသစ္စံ ဘာဝနာပဋိဝေဓံ ပဋိဝိဇ္ဈတိ. ဣမေဟိ စတူဟာကာရေဟိ သစ္စပ္ပဋိဝေဓော ဟောတိ. ဣမေဟိ စတူဟာကာရေဟိ သစ္စာနိ ပဋိဝိဇ္ဈန္တော သဒ္ဓိန္ဒြိယဿ ဝသေန သဒ္ဓါဝိမုတ္တော, သမာဓိန္ဒြိယဿ ဝသေန ကာယသက္ခီ, ပညိန္ဒြိယဿ ဝသေန ဒိဋ္ဌိပ္ပတ္တော.
ကတိဟာကာရေဟိ သစ္စပ္ပဋိဝေဓော ဟောတိ? ကတိဟာကာရေဟိ သစ္စာနိ ပဋိဝိဇ္ဈတိ? နဝဟာကာရေဟိ သစ္စပ္ပဋိဝေဓော ဟောတိ, နဝဟာကာရေဟိ သစ္စာနိ ပဋိဝိဇ္ဈတိ. ဒုက္ခသစ္စံ ပရိညာပဋိဝေဓံ ပဋိဝိဇ္ဈတိ, သမုဒယသစ္စံ ပဟာနပ္ပဋိဝေဓံ ပဋိဝိဇ္ဈတိ, နိရောဓသစ္စံ သစ္ဆိကိရိယာပဋိဝေဓံ ပဋိဝိဇ္ဈတိ, မဂ္ဂသစ္စံ ဘာဝနာပဋိဝေဓံ ပဋိဝိဇ္ဈတိ. အဘိညာပဋိဝေဓော စ သဗ္ဗဓမ္မာနံ, ပရိညာပဋိဝေဓော စ သဗ္ဗသင်္ခါရာနံ, ပဟာနပ္ပဋိဝေဓော စ သဗ္ဗာကုသလာနံ, ဘာဝနာပဋိဝေဓော စ စတုန္နံ မဂ္ဂါနံ, သစ္ဆိကိရိယာပဋိဝေဓော စ နိရောဓဿ. ဣမေဟိ နဝဟာကာရေဟိ သစ္စပ္ပဋိဝေဓော ဟောတိ. ဣမေဟိ နဝဟာကာရေဟိ သစ္စာနိ ပဋိဝိဇ္ဈန္တော သဒ္ဓိန္ဒြိယဿ ဝသေန သဒ္ဓါဝိမုတ္တော, သမာဓိန္ဒြိယဿ ဝသေန ကာယသက္ခီ, ပညိန္ဒြိယဿ ဝသေန ဒိဋ္ဌိပ္ပတ္တော.
ဒုတိယဘာဏဝါရော.
အနိစ္စတော မနသိကရောတော ကထံ သင်္ခါရာ ဥပဋ္ဌန္တိ? ဒုက္ခတော မနသိကရောတော ကထံ သင်္ခါရာ ဥပဋ္ဌန္တိ? အနတ္တတော မနသိကရောတော ကထံ သင်္ခါရာ ဥပဋ္ဌန္တိ? အနိစ္စတော မနသိကရောတော ခယတော သင်္ခါရာ ဥပဋ္ဌန္တိ. ဒုက္ခတော မနသိကရောတော ဘယတော သင်္ခါရာ ဥပဋ္ဌန္တိ. အနတ္တတော မနသိကရောတော သုညတော သင်္ခါရာ ဥပဋ္ဌန္တိ.
အနိစ္စတော မနသိကရောတော ကိံ ဗဟုလံ စိတ္တံ ဟောတိ? ဒုက္ခတော မနသိကရောတော ကိံ ဗဟုလံ စိတ္တံ ဟောတိ? အနတ္တတော မနသိကရောတော ကိံ ဗဟုလံ စိတ္တံ ဟောတိ? အနိစ္စတော မနသိကရောတော အဓိမောက္ခဗဟုလံ စိတ္တံ ဟောတိ. ဒုက္ခတော မနသိကရောတော ပဿဒ္ဓိဗဟုလံ စိတ္တံ ဟောတိ. အနတ္တတော မနသိကရောတော ဝေဒဗဟုလံ စိတ္တံ ဟောတိ.
အနိစ္စတော မနသိကရောန္တော အဓိမောက္ခဗဟုလော ကတမံ ဝိမောက္ခံ ပဋိလဘတိ? ဒုက္ခတော မနသိကရောန္တော ပဿဒ္ဓိဗဟုလော ကတမံ ဝိမောက္ခံ ပဋိလဘတိ? အနတ္တတော မနသိကရောန္တော ဝေဒဗဟုလော ကတမံ ဝိမောက္ခံ ပဋိလဘတိ? အနိစ္စတော မနသိကရောန္တော အဓိမောက္ခဗဟုလော အနိမိတ္တံ ဝိမောက္ခံ ပဋိလဘတိ. ဒုက္ခတော မနသိကရောန္တော ပဿဒ္ဓိဗဟုလော အပ္ပဏိဟိတံ ဝိမောက္ခံ ပဋိလဘတိ. အနတ္တတော မနသိကရောန္တော ဝေဒဗဟုလော သုညတံ ဝိမောက္ခံ ပဋိလဘတိ.
အနိစ္စတော မနသိကရောတော အဓိမောက္ခဗဟုလဿ ကတမော ဝိမောက္ခော အာဓိပတေယျော ဟောတိ, ဘာဝနာယ ကတိ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ကေနဋ္ဌေန ဘာဝနာ, ကော ဘာဝေတိ? ဒုက္ခတော မနသိကရောတော ပဿဒ္ဓိဗဟုလဿ ကတမော ဝိမောက္ခော အာဓိပတေယျော ဟောတိ, ဘာဝနာယ ကတိ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ကေနဋ္ဌေန ဘာဝနာ, ကော ဘာဝေတိ? အနတ္တတော မနသိကရောတော ဝေဒဗဟုလဿ ကတမော ဝိမောက္ခော အာဓိပတေယျော ဟောတိ, ဘာဝနာယ ကတိ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ကေနဋ္ဌေန ဘာဝနာ, ကော ဘာဝေတိ?
အနိစ္စတော မနသိကရောတော အဓိမောက္ခဗဟုလဿ အနိမိတ္တော ဝိမောက္ခော အာဓိပတေယျော ဟောတိ. ဘာဝနာယ ဒွေ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ. ဧကရသဋ္ဌေန ဘာဝနာ. ယော သမ္မာပဋိပန္နော သော ဘာဝေတိ; နတ္ထိ မိစ္ဆာပဋိပန္နဿ ဝိမောက္ခဘာဝနာ. ဒုက္ခတော မနသိကရောတော ပဿဒ္ဓိဗဟုလဿ အပ္ပဏိဟိတော ဝိမောက္ခော အာဓိပတေယျော ဟောတိ. ဘာဝနာယ ဒွေ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ. ဧကရသဋ္ဌေန ဘာဝနာ. ယော သမ္မာပဋိပန္နော သော ဘာဝေတိ; နတ္ထိ မိစ္ဆာပဋိပန္နဿ ဝိမောက္ခဘာဝနာ. အနတ္တတော မနသိကရောတော ဝေဒဗဟုလဿ သုညတော ဝိမောက္ခော အာဓိပတေယျော ဟောတိ. ဘာဝနာယ ဒွေ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ. ဧကရသဋ္ဌေန ဘာဝနာ. ယော သမ္မာပဋိပန္နော သော ဘာဝေတိ; နတ္ထိ မိစ္ဆာပဋိပန္နဿ ဝိမောက္ခဘာဝနာ.
အနိစ္စတော မနသိကရောတော အဓိမောက္ခဗဟုလဿ ကတမော ဝိမောက္ခော အာဓိပတေယျော ဟောတိ, ဘာဝနာယ ကတိ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ပဋိဝေဓကာလေ ကတမော ဝိမောက္ခော အာဓိပတေယျော ဟောတိ, ပဋိဝေဓာယ ကတိ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ကေနဋ္ဌေန ဘာဝနာ, ကေနဋ္ဌေန ပဋိဝေဓော? ဒုက္ခတော မနသိကရောတော ပဿဒ္ဓိဗဟုလဿ ကတမော ဝိမောက္ခော အာဓိပတေယျော ဟောတိ, ဘာဝနာယ ကတိ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ပဋိဝေဓကာလေ ကတမော ဝိမောက္ခော အာဓိပတေယျော ဟောတိ, ပဋိဝေဓာယ ကတိ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ကေနဋ္ဌေန ဘာဝနာ, ကေနဋ္ဌေန ပဋိဝေဓော? အနတ္တတော မနသိကရောတော ဝေဒဗဟုလဿ ကတမော ဝိမောက္ခော အာဓိပတေယျော ဟောတိ, ဘာဝနာယ ကတိ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ပဋိဝေဓကာလေ ကတမော ဝိမောက္ခော အာဓိပတေယျော ဟောတိ, ပဋိဝေဓာယ ကတိဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ကေနဋ္ဌေန ဘာဝနာ, ကေနဋ္ဌေန ပဋိဝေဓော?
အနိစ္စတော မနသိကရောတော အဓိမောက္ခဗဟုလဿ အနိမိတ္တော ဝိမောက္ခော အာဓိပတေယျော ဟောတိ, ဘာဝနာယ ဒွေ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ပဋိဝေဓကာလေပိ အနိမိတ္တော ဝိမောက္ခော အာဓိပတေယျော ဟောတိ, ပဋိဝေဓာယ ဒွေ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ဧကရသဋ္ဌေန ဘာဝနာ, ဒဿနဋ္ဌေန ပဋိဝေဓော, ဧဝံ ပဋိဝိဇ္ဈန္တောပိ ဘာဝေတိ, ဘာဝေန္တောပိ ပဋိဝိဇ္ဈတိ. ဒုက္ခတော မနသိကရောတော ပဿဒ္ဓိဗဟုလဿ အပ္ပဏိဟိတော ဝိမောက္ခော အာဓိပတေယျော ဟောတိ, ဘာဝနာယ ဒွေ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ပဋိဝေဓကာလေပိ အပ္ပဏိဟိတော ဝိမောက္ခော အာဓိပတေယျော ဟောတိ, ပဋိဝေဓာယ ဒွေ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ဧကရသဋ္ဌေန ဘာဝနာ, ဒဿနဋ္ဌေန ပဋိဝေဓော, ဧဝံ ပဋိဝိဇ္ဈန္တောပိ ဘာဝေတိ, ဘာဝေန္တောပိ ပဋိဝိဇ္ဈတိ. အနတ္တတော မနသိကရောတော ဝေဒဗဟုလဿ သုညတော ဝိမောက္ခော အာဓိပတေယျော ဟောတိ, ဘာဝနာယ ဒွေ ဝိမောက္ခာ တဒနွယာ ဟောန္တိ သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ပဋိဝေဓကာလေပိ သုညတော ဝိမောက္ခော အာဓိပတေယျော ဟောတိ, ပဋိဝေဓာယ ဒွေ ဝိမောက္ခာ တဒနွယာ ဟောန္တိ, သဟဇာတပစ္စယာ ဟောန္တိ, အညမညပစ္စယာ ဟောန္တိ, နိဿယပစ္စယာ ဟောန္တိ, သမ္ပယုတ္တပစ္စယာ ဟောန္တိ, ဧကရသာ ဟောန္တိ, ဧကရသဋ္ဌေန ဘာဝနာ, ဒဿနဋ္ဌေန ပဋိဝေဓော, ဧဝံ ပဋိဝိဇ္ဈန္တောပိ ဘာဝေတိ, ဘာဝေန္တောပိ ပဋိဝိဇ္ဈတိ.
အနိစ္စတော မနသိကရောတော ကတမော ဝိမောက္ခော အဓိမတ္တော ဟောတိ? ကတမဝိမောက္ခဿ အဓိမတ္တတ္တာ သဒ္ဓါဝိမုတ္တော ဟောတိ? ဒုက္ခတော မနသိကရောတော ကတမော ဝိမောက္ခော အဓိမတ္တော ဟောတိ? ကတမဝိမောက္ခဿ အဓိမတ္တတ္တာ ကာယသက္ခီ ဟောတိ? အနတ္တတော မနသိကရောတော ကတမော ဝိမောက္ခော အဓိမတ္တော ဟောတိ? ကတမဝိမောက္ခဿ အဓိမတ္တတ္တာ ဒိဋ္ဌိပ္ပတ္တော ဟောတိ?
အနိစ္စတော မနသိကရောတော အနိမိတ္တော ဝိမောက္ခော အဓိမတ္တော ဟောတိ. အနိမိတ္တဝိမောက္ခဿ အဓိမတ္တတ္တာ သဒ္ဓါဝိမုတ္တော ဟောတိ. ဒုက္ခတော မနသိကရောတော အပ္ပဏိဟိတော ဝိမောက္ခော အဓိမတ္တော ဟောတိ. အပ္ပဏိဟိတဝိမောက္ခဿ အဓိမတ္တတ္တာ ကာယသက္ခီ ဟောတိ. အနတ္တတော မနသိကရောတော သုညတော ဝိမောက္ခော အဓိမတ္တော ဟောတိ. သုညတဝိမောက္ခဿ အဓိမတ္တတ္တာ ဒိဋ္ဌိပ္ပတ္တော ဟောတိ.
သဒ္ဒဟန္တော ဝိမုတ္တောတိ— သဒ္ဓါဝိမုတ္တော. ဖုဋ္ဌတ္တာ သစ္ဆိကတောတိ— ကာယသက္ခီ. ဒိဋ္ဌတ္တာ ပတ္တောတိ— ဒိဋ္ဌိပ္ပတ္တော. သဒ္ဒဟန္တော ဝိမုစ္စတီတိ— သဒ္ဓါဝိမုတ္တော. ဈာနဖဿံ ပဌမံ ဖုသတိ, ပစ္ဆာ နိရောဓံ နိဗ္ဗာနံ သစ္ဆိကရောတီတိ— ကာယသက္ခီ. “ဒုက္ခာ သင်္ခါရာ, သုခေါ နိရောဓော”တိ ဝိညာတံ ဟောတိ ဒိဋ္ဌံ ဝိဒိတံ သစ္ဆိကတံ ဖဿိတံ ပညာယာတိ— ဒိဋ္ဌိပ္ပတ္တော …ပေ… ယေ ဟိ ကေစိ နေက္ခမ္မံ ဘာဝိတာ ဝါ ဘာဝေန္တိ ဝါ ဘာဝိဿန္တိ ဝါ …ပေ… သဗ္ဗေ တေ အနိမိတ္တဝိမောက္ခဿ ဝသေန သဒ္ဓါဝိမုတ္တာ, အပ္ပဏိဟိတဝိမောက္ခဿ ဝသေန ကာယသက္ခီ, သုညတဝိမောက္ခဿ ဝသေန ဒိဋ္ဌိပ္ပတ္တာ.
ယေ ဟိ ကေစိ အဗျာပါဒံ… အာလောကသညံ… အဝိက္ခေပံ… ယေ ဟိ ကေစိ ဒုက္ခံ ပရိဇာနန္တိ, သမုဒယံ ပဇဟန္တိ, နိရောဓံ သစ္ဆိကရောန္တိ, မဂ္ဂံ ဘာဝေန္တိ, သဗ္ဗေ တေ အနိမိတ္တဝိမောက္ခဿ ဝသေန သဒ္ဓါဝိမုတ္တာ, အပ္ပဏိဟိတဝိမောက္ခဿ ဝသေန ကာယသက္ခီ, သုညတဝိမောက္ခဿ ဝသေန ဒိဋ္ဌိပ္ပတ္တာ.
ကတိဟာကာရေဟိ သစ္စပ္ပဋိဝေဓော ဟောတိ? ကတိဟာကာရေဟိ သစ္စာနိ ပဋိဝိဇ္ဈတိ? စတူဟာကာရေဟိ သစ္စပ္ပဋိဝေဓော ဟောတိ. စတူဟာကာရေဟိ သစ္စာနိ ပဋိဝိဇ္ဈတိ. ဒုက္ခသစ္စံ ပရိညာပဋိဝေဓံ ပဋိဝိဇ္ဈတိ, သမုဒယသစ္စံ ပဟာနပဋိဝေဓံ ပဋိဝိဇ္ဈတိ. နိရောဓသစ္စံ သစ္ဆိကိရိယာပဋိဝေဓံ ပဋိဝိဇ္ဈတိ. မဂ္ဂသစ္စံ ဘာဝနာပဋိဝေဓံ ပဋိဝိဇ္ဈတိ. ဣမေဟိ စတူဟာကာရေဟိ သစ္စပ္ပဋိဝေဓော ဟောတိ. ဣမေဟိ စတူဟာကာရေဟိ သစ္စာနိ ပဋိဝိဇ္ဈန္တော အနိမိတ္တဝိမောက္ခဿ ဝသေန သဒ္ဓါဝိမုတ္တော, အပ္ပဏိဟိတဝိမောက္ခဿ ဝသေန ကာယသက္ခီ, သုညတဝိမောက္ခဿ ဝသေန ဒိဋ္ဌိပ္ပတ္တော.
ကတိဟာကာရေဟိ သစ္စပ္ပဋိဝေဓော ဟောတိ? ကတိဟာကာရေဟိ သစ္စာနိ ပဋိဝိဇ္ဈတိ? နဝဟာကာရေဟိ သစ္စပ္ပဋိဝေဓော ဟောတိ. နဝဟာကာရေဟိ သစ္စာနိ ပဋိဝိဇ္ဈတိ. ဒုက္ခသစ္စံ ပရိညာပဋိဝေဓံ ပဋိဝိဇ္ဈတိ …ပေ… သစ္ဆိကိရိယာပဋိဝေဓော စ နိရောဓဿ. ဣမေဟိ နဝဟာကာရေဟိ သစ္စပ္ပဋိဝေဓော ဟောတိ. ဣမေဟိ နဝဟာကာရေဟိ သစ္စာနိ ပဋိဝိဇ္ဈန္တော အနိမိတ္တဝိမောက္ခဿ ဝသေန သဒ္ဓါဝိမုတ္တော, အပ္ပဏိဟိတဝိမောက္ခဿ ဝသေန ကာယသက္ခီ, သုညတဝိမောက္ခဿ ဝသေန ဒိဋ္ဌိပ္ပတ္တော.
အနိစ္စတော မနသိကရောန္တော ကတမေ ဓမ္မေ ယထာဘူတံ ဇာနာတိ ပဿတိ? ကထံ သမ္မာဒဿနံ ဟောတိ? ကထံ တဒနွယေန သဗ္ဗေ သင်္ခါရာ အနိစ္စတော သုဒိဋ္ဌာ ဟောန္တိ? ကတ္ထ ကင်္ခါ ပဟီယတိ? ဒုက္ခတော မနသိကရောန္တော ကတမေ ဓမ္မေ ယထာဘူတံ ဇာနာတိ ပဿတိ? ကထံ သမ္မာဒဿနံ ဟောတိ? ကထံ တဒနွယေန သဗ္ဗေ သင်္ခါရာ ဒုက္ခတော သုဒိဋ္ဌာ ဟောန္တိ? ကတ္ထ ကင်္ခါ ပဟီယတိ? အနတ္တတော မနသိကရောန္တော ကတမေ ဓမ္မေ ယထာဘူတံ ဇာနာတိ ပဿတိ? ကထံ သမ္မာဒဿနံ ဟောတိ? ကထံ တဒနွယေန သဗ္ဗေ ဓမ္မာ အနတ္တတော သုဒိဋ္ဌာ ဟောန္တိ? ကတ္ထ ကင်္ခါ ပဟီယတိ?
အနိစ္စတော မနသိကရောန္တော နိမိတ္တံ ယထာဘူတံ ဇာနာတိ ပဿတိ; တေန ဝုစ္စတိ— “သမ္မာဒဿနံ”. ဧဝံ တဒနွယေန သဗ္ဗေ သင်္ခါရာ အနိစ္စတော သုဒိဋ္ဌာ ဟောန္တိ. ဧတ္ထ ကင်္ခါ ပဟီယတိ. ဒုက္ခတော မနသိကရောန္တော ပဝတ္တံ ယထာဘူတံ ဇာနာတိ ပဿတိ; တေန ဝုစ္စတိ— “သမ္မာဒဿနံ”. ဧဝံ တဒနွယေန သဗ္ဗေ သင်္ခါရာ ဒုက္ခတော သုဒိဋ္ဌာ ဟောန္တိ. ဧတ္ထ ကင်္ခါ ပဟီယတိ. အနတ္တတော မနသိကရောန္တော နိမိတ္တဉ္စ ပဝတ္တဉ္စ ယထာဘူတံ ဇာနာတိ ပဿတိ; တေန ဝုစ္စတိ— “သမ္မာဒဿနံ”. ဧဝံ တဒနွယေန သဗ္ဗေ ဓမ္မာ အနတ္တတော သုဒိဋ္ဌာ ဟောန္တိ. ဧတ္ထ ကင်္ခါ ပဟီယတိ.
ယဉ္စ ယထာဘူတံ ဉာဏံ ယဉ္စ သမ္မာဒဿနံ ယာ စ ကင်္ခါဝိတရဏာ, ဣမေ ဓမ္မာ နာနတ္ထာ စေဝ နာနာဗျဉ္ဇနာ စ, ဥဒါဟု ဧကတ္ထာ, ဗျဉ္ဇနမေဝ နာနန္တိ? ယဉ္စ ယထာဘူတံ ဉာဏံ ယဉ္စ သမ္မာဒဿနံ ယာ စ ကင်္ခါဝိတရဏာ, ဣမေ ဓမ္မာ ဧကတ္ထာ, ဗျဉ္ဇနမေဝ နာနံ.
အနိစ္စတော မနသိကရောတော ကိံ ဘယတော ဥပဋ္ဌာတိ? ဒုက္ခတော မနသိကရောတော ကိံ ဘယတော ဥပဋ္ဌာတိ? အနတ္တတော မနသိကရောတော ကိံ ဘယတော ဥပဋ္ဌာတိ? အနိစ္စတော မနသိကရောတော နိမိတ္တံ ဘယတော ဥပဋ္ဌာတိ. ဒုက္ခတော မနသိကရောတော ပဝတ္တံ ဘယတော ဥပဋ္ဌာတိ. အနတ္တတော မနသိကရောတော နိမိတ္တဉ္စ ပဝတ္တဉ္စ ဘယတော ဥပဋ္ဌာတိ.
ယာ စ ဘယတုပဋ္ဌာနေ ပညာ ယဉ္စ အာဒီနဝေ ဉာဏံ ယာ စ နိဗ္ဗိဒါ, ဣမေ ဓမ္မာ နာနတ္ထာ စေဝ နာနာဗျဉ္ဇနာ စ, ဥဒါဟု ဧကတ္ထာ, ဗျဉ္ဇနမေဝ နာနန္တိ? ယာ စ ဘယတုပဋ္ဌာနေ ပညာ ယဉ္စ အာဒီနဝေ ဉာဏံ ယာ စ နိဗ္ဗိဒါ, ဣမေ ဓမ္မာ ဧကတ္ထာ, ဗျဉ္ဇနမေဝ နာနံ.
ယာ စ အနတ္တာနုပဿနာ ယာ စ သုညတာနုပဿနာ, ဣမေ ဓမ္မာ နာနတ္ထာ စေဝ နာနာဗျဉ္ဇနာ စ, ဥဒါဟု ဧကတ္ထာ, ဗျဉ္ဇနမေဝ နာနန္တိ? ယာ စ အနတ္တာနုပဿနာ ယာ စ သုညတာနုပဿနာ, ဣမေ ဓမ္မာ ဧကတ္ထာ, ဗျဉ္ဇနမေဝ နာနံ.
အနိစ္စတော မနသိကရောတော ကိံ ပဋိသင်္ခါ ဉာဏံ ဥပ္ပဇ္ဇတိ? ဒုက္ခတော မနသိကရောတော ကိံ ပဋိသင်္ခါ ဉာဏံ ဥပ္ပဇ္ဇတိ? အနတ္တတော မနသိကရောတော ကိံ ပဋိသင်္ခါ ဉာဏံ ဥပ္ပဇ္ဇတိ? အနိစ္စတော မနသိကရောတော နိမိတ္တံ ပဋိသင်္ခါ ဉာဏံ ဥပ္ပဇ္ဇတိ. ဒုက္ခတော မနသိကရောတော ပဝတ္တံ ပဋိသင်္ခါ ဉာဏံ ဥပ္ပဇ္ဇတိ. အနတ္တတော မနသိကရောတော နိမိတ္တဉ္စ ပဝတ္တဉ္စ ပဋိသင်္ခါ ဉာဏံ ဥပ္ပဇ္ဇတိ.
ယာ စ မုစ္စိတုကမျတာ ယာ စ ပဋိသင်္ခါနုပဿနာ ယာ စ သင်္ခါရုပေက္ခာ, ဣမေ ဓမ္မာ နာနတ္ထာ စေဝ နာနာဗျဉ္ဇနာ စ, ဥဒါဟု ဧကတ္ထာ, ဗျဉ္ဇနမေဝ နာနန္တိ? ယာ စ မုစ္စိတုကမျတာ ယာ စ ပဋိသင်္ခါနုပဿနာ ယာ စ သင်္ခါရုပေက္ခာ, ဣမေ ဓမ္မာ ဧကတ္ထာ, ဗျဉ္ဇနမေဝ နာနံ.
အနိစ္စတော မနသိကရောတော ကုတော စိတ္တံ ဝုဋ္ဌာတိ, ကတ္ထ စိတ္တံ ပက္ခန္ဒတိ? ဒုက္ခတော မနသိကရောတော ကုတော စိတ္တံ ဝုဋ္ဌာတိ, ကတ္ထ စိတ္တံ ပက္ခန္ဒတိ? အနတ္တတော မနသိကရောတော ကုတော စိတ္တံ ဝုဋ္ဌာတိ, ကတ္ထ စိတ္တံ ပက္ခန္ဒတိ? အနိစ္စတော မနသိကရောတော နိမိတ္တာ စိတ္တံ ဝုဋ္ဌာတိ, အနိမိတ္တေ စိတ္တံ ပက္ခန္ဒတိ. ဒုက္ခတော မနသိကရောတော ပဝတ္တာ စိတ္တံ ဝုဋ္ဌာတိ, အပ္ပဝတ္တေ စိတ္တံ ပက္ခန္ဒတိ. အနတ္တတော မနသိကရောတော နိမိတ္တာ စ ပဝတ္တာ စ စိတ္တံ ဝုဋ္ဌာတိ, အနိမိတ္တေ အပ္ပဝတ္တေ နိရောဓေ နိဗ္ဗာနဓာတုယာ စိတ္တံ ပက္ခန္ဒတိ.
ယာ စ ဗဟိဒ္ဓါဝုဋ္ဌာနဝိဝဋ္ဋနေ ပညာ ယေ စ ဂေါတြဘူ ဓမ္မာ, ဣမေ ဓမ္မာ နာနတ္ထာ စေဝ နာနာဗျဉ္ဇနာ စ, ဥဒါဟု ဧကတ္ထာ, ဗျဉ္ဇနမေဝ နာနန္တိ? ယာ စ ဗဟိဒ္ဓါဝုဋ္ဌာနဝိဝဋ္ဋနေ ပညာ ယေ စ ဂေါတြဘူ ဓမ္မာ, ဣမေ ဓမ္မာ ဧကတ္ထာ, ဗျဉ္ဇနမေဝ နာနံ.
အနိစ္စတော မနသိကရောန္တော ကတမေန ဝိမောက္ခေန ဝိမုစ္စတိ? ဒုက္ခတော မနသိကရောန္တော ကတမေန ဝိမောက္ခေန ဝိမုစ္စတိ? အနတ္တတော မနသိကရောန္တော ကတမေန ဝိမောက္ခေန ဝိမုစ္စတိ? အနိစ္စတော မနသိကရောန္တော အနိမိတ္တဝိမောက္ခေန ဝိမုစ္စတိ. ဒုက္ခတော မနသိကရောန္တော အပ္ပဏိဟိတဝိမောက္ခေန ဝိမုစ္စတိ. အနတ္တတော မနသိကရောန္တော သုညတဝိမောက္ခေန ဝိမုစ္စတိ.
ယာ စ ဒုဘတော ဝုဋ္ဌာနဝိဝဋ္ဋနေ ပညာ ယဉ္စ မဂ္ဂေ ဉာဏံ, ဣမေ ဓမ္မာ နာနတ္ထာ စေဝ နာနာဗျဉ္ဇနာ စ, ဥဒါဟု ဧကတ္ထာ, ဗျဉ္ဇနမေဝ နာနန္တိ? ယာ စ ဒုဘတော ဝုဋ္ဌာနဝိဝဋ္ဋနေ ပညာ ယဉ္စ မဂ္ဂေ ဉာဏံ, ဣမေ ဓမ္မာ ဧကတ္ထာ, ဗျဉ္ဇနမေဝ နာနံ.
ကတိဟာကာရေဟိ တယော ဝိမောက္ခာ နာနာက္ခဏေ ဟောန္တိ? ကတိဟာကာရေဟိ တယော ဝိမောက္ခာ ဧကက္ခဏေ ဟောန္တိ? စတူဟာကာရေဟိ တယော ဝိမောက္ခာ နာနာက္ခဏေ ဟောန္တိ. သတ္တဟာကာရေဟိ တယော ဝိမောက္ခာ ဧကက္ခဏေ ဟောန္တိ.
ကတမေဟိ စတူဟာကာရေဟိ တယော ဝိမောက္ခာ နာနာက္ခဏေ ဟောန္တိ? အာဓိပတေယျဋ္ဌေန, အဓိဋ္ဌာနဋ္ဌေန, အဘိနီဟာရဋ္ဌေန, နိယျာနဋ္ဌေန. ကထံ အာဓိပတေယျဋ္ဌေန တယော ဝိမောက္ခာ နာနာက္ခဏေ ဟောန္တိ? အနိစ္စတော မနသိကရောတော အနိမိတ္တော ဝိမောက္ခော အာဓိပတေယျော ဟောတိ, ဒုက္ခတော မနသိကရောတော အပ္ပဏိဟိတော ဝိမောက္ခော အာဓိပတေယျော ဟောတိ, အနတ္တတော မနသိကရောတော သုညတော ဝိမောက္ခော အာဓိပတေယျော ဟောတိ. ဧဝံ အာဓိပတေယျဋ္ဌေန တယော ဝိမောက္ခာ နာနာက္ခဏေ ဟောန္တိ.
ကထံ အဓိဋ္ဌာနဋ္ဌေန တယော ဝိမောက္ခာ နာနာက္ခဏေ ဟောန္တိ? အနိစ္စတော မနသိကရောန္တော အနိမိတ္တဝိမောက္ခဿ ဝသေန စိတ္တံ အဓိဋ္ဌာတိ, ဒုက္ခတော မနသိကရောန္တော အပ္ပဏိဟိတဝိမောက္ခဿ ဝသေန စိတ္တံ အဓိဋ္ဌာတိ, အနတ္တတော မနသိကရောန္တော သုညတဝိမောက္ခဿ ဝသေန စိတ္တံ အဓိဋ္ဌာတိ. ဧဝံ အဓိဋ္ဌာနဋ္ဌေန တယော ဝိမောက္ခာ နာနာက္ခဏေ ဟောန္တိ.
ကထံ အဘိနီဟာရဋ္ဌေန တယော ဝိမောက္ခာ နာနာက္ခဏေ ဟောန္တိ? အနိစ္စတော မနသိကရောန္တော အနိမိတ္တဝိမောက္ခဿ ဝသေန စိတ္တံ အဘိနီဟရတိ, ဒုက္ခတော မနသိကရောန္တော အပ္ပဏိဟိတဝိမောက္ခဿ ဝသေန စိတ္တံ အဘိနီဟရတိ, အနတ္တတော မနသိကရောန္တော သုညတဝိမောက္ခဿ ဝသေန စိတ္တံ အဘိနီဟရတိ. ဧဝံ အဘိနီဟာရဋ္ဌေန တယော ဝိမောက္ခာ နာနာက္ခဏေ ဟောန္တိ.
ကထံ နိယျာနဋ္ဌေန တယော ဝိမောက္ခာ နာနာက္ခဏေ ဟောန္တိ? အနိစ္စတော မနသိကရောန္တော အနိမိတ္တဝိမောက္ခဿ ဝသေန နိရောဓံ နိဗ္ဗာနံ နိယျာတိ, ဒုက္ခတော မနသိကရောန္တော အပ္ပဏိဟိတဝိမောက္ခဿ ဝသေန နိရောဓံ နိဗ္ဗာနံ နိယျာတိ, အနတ္တတော မနသိကရောန္တော သုညတဝိမောက္ခဿ ဝသေန နိရောဓံ နိဗ္ဗာနံ နိယျာတိ. ဧဝံ နိယျာနဋ္ဌေန တယော ဝိမောက္ခာ နာနာက္ခဏေ ဟောန္တိ. ဣမေဟိ စတူဟာကာရေဟိ တယော ဝိမောက္ခာ နာနာက္ခဏေ ဟောန္တိ.
ကတမေဟိ သတ္တဟာကာရေဟိ တယော ဝိမောက္ခာ ဧကက္ခဏေ ဟောန္တိ? သမောဓာနဋ္ဌေန, အဓိဂမနဋ္ဌေန, ပဋိလာဘဋ္ဌေန ပဋိဝေဓဋ္ဌေန, သစ္ဆိကိရိယဋ္ဌေန, ဖဿနဋ္ဌေန, အဘိသမယဋ္ဌေန. ကထံ သမောဓာနဋ္ဌေန အဓိဂမနဋ္ဌေန ပဋိလာဘဋ္ဌေန ပဋိဝေဓဋ္ဌေန သစ္ဆိကိရိယဋ္ဌေန ဖဿနဋ္ဌေန အဘိသမယဋ္ဌေန တယော ဝိမောက္ခာ ဧကက္ခဏေ ဟောန္တိ? အနိစ္စတော မနသိကရောန္တော နိမိတ္တာ မုစ္စတီတိ— အနိမိတ္တော ဝိမောက္ခော. ယတော မုစ္စတိ, တတ္ထ န ပဏိဒဟတီတိ— အပ္ပဏိဟိတော ဝိမောက္ခော. ယတ္ထ န ပဏိဒဟတိ, တေန သုညောတိ— သုညတော ဝိမောက္ခော. ယေန သုညော, တေန နိမိတ္တေန အနိမိတ္တောတိ— အနိမိတ္တော ဝိမောက္ခော. ဧဝံ သမောဓာနဋ္ဌေန အဓိဂမနဋ္ဌေန ပဋိလာဘဋ္ဌေန ပဋိဝေဓဋ္ဌေန သစ္ဆိကိရိယဋ္ဌေန ဖဿနဋ္ဌေန အဘိသမယဋ္ဌေန တယော ဝိမောက္ခာ ဧကက္ခဏေ ဟောန္တိ.
ဒုက္ခတော မနသိကရောန္တော ပဏိဓိယာ မုစ္စတီတိ— အပ္ပဏိဟိတော ဝိမောက္ခော. ယတ္ထ န ပဏိဒဟတိ, တေန သုညောတိ— သုညတော ဝိမောက္ခော. ယေန သုညော, တေန နိမိတ္တေန အနိမိတ္တောတိ— အနိမိတ္တော ဝိမောက္ခော. ယေန နိမိတ္တေန အနိမိတ္တော, တတ္ထ န ပဏိဒဟတီတိ— အပ္ပဏိဟိတော ဝိမောက္ခော. ဧဝံ သမောဓာနဋ္ဌေန အဓိဂမနဋ္ဌေန ပဋိလာဘဋ္ဌေန ပဋိဝေဓဋ္ဌေန သစ္ဆိကိရိယဋ္ဌေန ဖဿနဋ္ဌေန အဘိသမယဋ္ဌေန တယော ဝိမောက္ခာ ဧကက္ခဏေ ဟောန္တိ.
အနတ္တတော မနသိကရောန္တော အဘိနိဝေသာ မုစ္စတီတိ— သုညတော ဝိမောက္ခော. ယေန သုညော, တေန နိမိတ္တေန အနိမိတ္တောတိ— အနိမိတ္တော ဝိမောက္ခော. ယေန နိမိတ္တေန အနိမိတ္တော, တတ္ထ န ပဏိဒဟတီတိ— အပ္ပဏိဟိတော ဝိမောက္ခော. ယတ္ထ န ပဏိဒဟတိ, တေန သုညောတိ— သုညတော ဝိမောက္ခော. ဧဝံ သမောဓာနဋ္ဌေန အဓိဂမနဋ္ဌေန ပဋိလာဘဋ္ဌေန ပဋိဝေဓဋ္ဌေန သစ္ဆိကိရိယဋ္ဌေန ဖဿနဋ္ဌေန အဘိသမယဋ္ဌေန တယော ဝိမောက္ခာ ဧကက္ခဏေ ဟောန္တိ. ဣမေဟိ သတ္တဟာကာရေဟိ တယော ဝိမောက္ခာ ဧကက္ခဏေ ဟောန္တိ.
အတ္ထိ ဝိမောက္ခော, အတ္ထိ မုခံ, အတ္ထိ ဝိမောက္ခမုခံ, အတ္ထိ ဝိမောက္ခပစ္စနီကံ, အတ္ထိ ဝိမောက္ခာနုလောမံ, အတ္ထိ ဝိမောက္ခဝိဝဋ္ဋော, အတ္ထိ ဝိမောက္ခဘာဝနာ, အတ္ထိ ဝိမောက္ခပ္ပဋိပ္ပဿဒ္ဓိ.
ကတမော ဝိမောက္ခော? သုညတော ဝိမောက္ခော, အနိမိတ္တော ဝိမောက္ခော, အပ္ပဏိဟိတော ဝိမောက္ခော. ကတမော သုညတော ဝိမောက္ခော? အနိစ္စာနုပဿနဉာဏံ နိစ္စတော အဘိနိဝေသာ မုစ္စတီတိ— သုညတော ဝိမောက္ခော. ဒုက္ခာနုပဿနဉာဏံ သုခတော အဘိနိဝေသာ မုစ္စတီတိ— သုညတော ဝိမောက္ခော. အနတ္တာနုပဿနဉာဏံ အတ္တတော အဘိနိဝေသာ မုစ္စတီတိ— သုညတော ဝိမောက္ခော. နိဗ္ဗိဒါနုပဿနဉာဏံ နန္ဒိယာ အဘိနိဝေသာ မုစ္စတီတိ— သုညတော ဝိမောက္ခော. ဝိရာဂါနုပဿနဉာဏံ ရာဂတော အဘိနိဝေသာ မုစ္စတီတိ— သုညတော ဝိမောက္ခော. နိရောဓာနုပဿနဉာဏံ သမုဒယတော အဘိနိဝေသာ မုစ္စတီတိ— သုညတော ဝိမောက္ခော. ပဋိနိဿဂ္ဂါနုပဿနဉာဏံ အာဒါနတော အဘိနိဝေသာ မုစ္စတီတိ— သုညတော ဝိမောက္ခော. အနိမိတ္တာနုပဿနဉာဏံ နိမိတ္တတော အဘိနိဝေသာ မုစ္စတီတိ— သုညတော ဝိမောက္ခော. အပ္ပဏိဟိတာနုပဿနဉာဏံ ပဏိဓိယာ အဘိနိဝေသာ မုစ္စတီတိ— သုညတော ဝိမောက္ခော. သုညတာနုပဿနဉာဏံ သဗ္ဗာဘိနိဝေသေဟိ မုစ္စတီတိ— သုညတော ဝိမောက္ခော.
ရူပေ အနိစ္စာနုပဿနဉာဏံ နိစ္စတော အဘိနိဝေသာ မုစ္စတီတိ— သုညတော ဝိမောက္ခော …ပေ… ရူပေ သုညတာနုပဿနဉာဏံ သဗ္ဗာဘိနိဝေသေဟိ မုစ္စတီတိ— သုညတော ဝိမောက္ခော. ဝေဒနာယ …ပေ… သညာယ… သင်္ခါရေသု… ဝိညာဏေ… စက္ခုသ္မိံ …ပေ… ဇရာမရဏေ အနိစ္စာနုပဿနဉာဏံ နိစ္စတော အဘိနိဝေသာ မုစ္စတီတိ— သုညတော ဝိမောက္ခော …ပေ… ဇရာမရဏေ သုညတာနုပဿနဉာဏံ သဗ္ဗာဘိနိဝေသေဟိ မုစ္စတီတိ— သုညတော ဝိမောက္ခော. အယံ သုညတော ဝိမောက္ခော.
ကတမော အနိမိတ္တော ဝိမောက္ခော? အနိစ္စာနုပဿနဉာဏံ နိစ္စတော နိမိတ္တာ မုစ္စတီတိ— အနိမိတ္တော ဝိမောက္ခော. ဒုက္ခာနုပဿနဉာဏံ သုခတော နိမိတ္တာ မုစ္စတီတိ— အနိမိတ္တော ဝိမောက္ခော. အနတ္တာနုပဿနဉာဏံ အတ္တတော နိမိတ္တာ မုစ္စတီတိ— အနိမိတ္တော ဝိမောက္ခော. နိဗ္ဗိဒါနုပဿနဉာဏံ နန္ဒိယာ နိမိတ္တာ မုစ္စတီတိ— အနိမိတ္တော ဝိမောက္ခော. ဝိရာဂါနုပဿနဉာဏံ ရာဂတော နိမိတ္တာ မုစ္စတီတိ— အနိမိတ္တော ဝိမောက္ခော. နိရောဓာနုပဿနဉာဏံ သမုဒယတော နိမိတ္တာ မုစ္စတီတိ— အနိမိတ္တော ဝိမောက္ခော. ပဋိနိဿဂ္ဂါနုပဿနဉာဏံ အာဒါနတော နိမိတ္တာ မုစ္စတီတိ— အနိမိတ္တော ဝိမောက္ခော. အနိမိတ္တာနုပဿနဉာဏံ သဗ္ဗနိမိတ္တေဟိ မုစ္စတီတိ— အနိမိတ္တော ဝိမောက္ခော. အပ္ပဏိဟိတာနုပဿနဉာဏံ ပဏိဓိယာ နိမိတ္တာ မုစ္စတီတိ— အနိမိတ္တော ဝိမောက္ခော. သုညတာနုပဿနဉာဏံ အဘိနိဝေသတော နိမိတ္တာ မုစ္စတီတိ— အနိမိတ္တော ဝိမောက္ခော.
ရူပေ အနိစ္စာနုပဿနဉာဏံ နိစ္စတော နိမိတ္တာ မုစ္စတီတိ— အနိမိတ္တော ဝိမောက္ခော …ပေ… ရူပေ အနိမိတ္တာနုပဿနဉာဏံ သဗ္ဗနိမိတ္တေဟိ မုစ္စတီတိ— အနိမိတ္တော ဝိမောက္ခော. ရူပေ အပ္ပဏိဟိတာနုပဿနဉာဏံ ပဏိဓိယာ နိမိတ္တာ မုစ္စတီတိ— အနိမိတ္တော ဝိမောက္ခော. ရူပေ သုညတာနုပဿနဉာဏံ အဘိနိဝေသတော နိမိတ္တာ မုစ္စတီတိ— အနိမိတ္တော ဝိမောက္ခော. ဝေဒနာယ …ပေ… သညာယ… သင်္ခါရေသု… ဝိညာဏေ… စက္ခုသ္မိံ …ပေ… ဇရာမရဏေ အနိစ္စာနုပဿနဉာဏံ နိစ္စတော နိမိတ္တာ မုစ္စတီတိ— အနိမိတ္တော ဝိမောက္ခော …ပေ… ဇရာမရဏေ အနိစ္စာနုပဿနဉာဏံ သဗ္ဗနိမိတ္တေဟိ မုစ္စတီတိ— အနိမိတ္တော ဝိမောက္ခော. ဇရာမရဏေ အပ္ပဏိဟိတာနုပဿနဉာဏံ ပဏိဓိယာ နိမိတ္တာ မုစ္စတီတိ— အနိမိတ္တော ဝိမောက္ခော. ဇရာမရဏေ သုညတာနုပဿနဉာဏံ အဘိနိဝေသတော နိမိတ္တာ မုစ္စတီတိ— အနိမိတ္တော ဝိမောက္ခော. အယံ အနိမိတ္တော ဝိမောက္ခော.
ကတမော အပ္ပဏိဟိတော ဝိမောက္ခော? အနိစ္စာနုပဿနဉာဏံ နိစ္စတော ပဏိဓိယာ မုစ္စတီတိ— အပ္ပဏိဟိတော ဝိမောက္ခော. ဒုက္ခာနုပဿနဉာဏံ သုခတော ပဏိဓိ မုစ္စတီတိ— အပ္ပဏိဟိတော ဝိမောက္ခော. အနတ္တာနုပဿနဉာဏံ အတ္တတော ပဏိဓိ မုစ္စတီတိ— အပ္ပဏိဟိတော ဝိမောက္ခော. နိဗ္ဗိဒါနုပဿနဉာဏံ နန္ဒိယာ ပဏိဓိ မုစ္စတီတိ— အပ္ပဏိဟိတော ဝိမောက္ခော. ဝိရာဂါနုပဿနဉာဏံ ရာဂတော ပဏိဓိ မုစ္စတီတိ— အပ္ပဏိဟိတော ဝိမောက္ခော. နိရောဓာနုပဿနဉာဏံ သမုဒယတော ပဏိဓိ မုစ္စတီတိ— အပ္ပဏိဟိတော ဝိမောက္ခော. ပဋိနိဿဂ္ဂါနုပဿနဉာဏံ အာဒါနတော ပဏိဓိ မုစ္စတီတိ— အပ္ပဏိဟိတော ဝိမောက္ခော. အနိမိတ္တာနုပဿနဉာဏံ နိမိတ္တတော ပဏိဓိ မုစ္စတီတိ— အပ္ပဏိဟိတော ဝိမောက္ခော. အပ္ပဏိဟိတာနုပဿနဉာဏံ သဗ္ဗပဏိဓီဟိ မုစ္စတီတိ— အပ္ပဏိဟိတော ဝိမောက္ခော. သုညတာနုပဿနဉာဏံ အဘိနိဝေသတော ပဏိဓိ မုစ္စတီတိ— အပ္ပဏိဟိတော ဝိမောက္ခော.
ရူပေ အနိစ္စာနုပဿနဉာဏံ နိစ္စတော ပဏိဓိ မုစ္စတီတိ— အပ္ပဏိဟိတော ဝိမောက္ခော …ပေ… ရူပေ အပ္ပဏိဟိတာနုပဿနဉာဏံ သဗ္ဗပဏိဓီဟိ မုစ္စတီတိ— အပ္ပဏိဟိတော ဝိမောက္ခော. ရူပေ သုညတာနုပဿနဉာဏံ အဘိနိဝေသတော ပဏိဓိ မုစ္စတီတိ— အပ္ပဏိဟိတော ဝိမောက္ခော. ဝေဒနာယ …ပေ… သညာယ… သင်္ခါရေသု… ဝိညာဏေ… စက္ခုသ္မိံ …ပေ… ဇရာမရဏေ အနိစ္စာနုပဿနဉာဏံ နိစ္စတော ပဏိဓိ မုစ္စတီတိ— အပ္ပဏိဟိတော ဝိမောက္ခော …ပေ… ဇရာမရဏေ အပ္ပဏိဟိတာနုပဿနဉာဏံ သဗ္ဗပဏိဓီဟိ မုစ္စတီတိ— အပ္ပဏိဟိတော ဝိမောက္ခော. ဇရာမရဏေ သုညတာနုပဿနဉာဏံ အဘိနိဝေသတော ပဏိဓိ မုစ္စတီတိ— အပ္ပဏိဟိတော ဝိမောက္ခော. အယံ အပ္ပဏိဟိတော ဝိမောက္ခော. အယံ ဝိမောက္ခော. (1)
ကတမံ မုခံ? ယေ တတ္ထ ဇာတာ အနဝဇ္ဇကုသလာ ဗောဓိပက္ခိယာ ဓမ္မာ, ဣဒံ မုခံ. (2)
ကတမံ ဝိမောက္ခမုခံ? ယံ တေသံ ဓမ္မာနံ အာရမ္မဏံ နိရောဓော နိဗ္ဗာနံ, ဣဒံ ဝိမောက္ခမုခံ. ဝိမောက္ခဉ္စ မုခဉ္စ ဝိမောက္ခမုခံ, ဣဒံ ဝိမောက္ခမုခံ. (3)
ကတမံ ဝိမောက္ခပစ္စနီကံ? တီဏိ အကုသလမူလာနိ ဝိမောက္ခပစ္စနီကာနိ, တီဏိ ဒုစ္စရိတာနိ ဝိမောက္ခပစ္စနီကာနိ, သဗ္ဗေပိ အကုသလာ ဓမ္မာ ဝိမောက္ခပစ္စနီကာ, ဣဒံ ဝိမောက္ခပစ္စနီကံ. (4)
ကတမံ ဝိမောက္ခာနုလောမံ? တီဏိ ကုသလမူလာနိ ဝိမောက္ခာနုလောမာနိ, တီဏိ သုစရိတာနိ ဝိမောက္ခာနုလောမာနိ, သဗ္ဗေပိ ကုသလာ ဓမ္မာ ဝိမောက္ခာနုလောမာ, ဣဒံ ဝိမောက္ခာနုလောမံ. (5)
ကတမော ဝိမောက္ခဝိဝဋ္ဋော? သညာဝိဝဋ္ဋော, စေတောဝိဝဋ္ဋော, စိတ္တဝိဝဋ္ဋော, ဉာဏဝိဝဋ္ဋော, ဝိမောက္ခဝိဝဋ္ဋော, သစ္စဝိဝဋ္ဋော. သဉ္ဇာနန္တော ဝိဝဋ္ဋတီတိ— သညာဝိဝဋ္ဋော. စေတယန္တော ဝိဝဋ္ဋတီတိ— စေတောဝိဝဋ္ဋော. ဝိဇာနန္တော ဝိဝဋ္ဋတီတိ— စိတ္တဝိဝဋ္ဋော. ဉာဏံ ကရောန္တော ဝိဝဋ္ဋတီတိ— ဉာဏဝိဝဋ္ဋော. ဝေါသဇ္ဇန္တော ဝိဝဋ္ဋတီတိ— ဝိမောက္ခဝိဝဋ္ဋော. တထဋ္ဌေန ဝိဝဋ္ဋတီတိ— သစ္စဝိဝဋ္ဋော.
ယတ္ထ သညာဝိဝဋ္ဋော တတ္ထ စေတောဝိဝဋ္ဋော, ယတ္ထ စေတောဝိဝဋ္ဋော တတ္ထ သညာဝိဝဋ္ဋော, ယတ္ထ သညာဝိဝဋ္ဋော စေတောဝိဝဋ္ဋော တတ္ထ စိတ္တဝိဝဋ္ဋော, ယတ္ထ စိတ္တဝိဝဋ္ဋော တတ္ထ သညာဝိဝဋ္ဋော စေတောဝိဝဋ္ဋော. ယတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော တတ္ထ ဉာဏဝိဝဋ္ဋော, ယတ္ထ ဉာဏဝိဝဋ္ဋော တတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော. ယတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော တတ္ထ ဝိမောက္ခဝိဝဋ္ဋော, ယတ္ထ ဝိမောက္ခဝိဝဋ္ဋော တတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော. ယတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော ဝိမောက္ခဝိဝဋ္ဋော တတ္ထ သစ္စဝိဝဋ္ဋော, ယတ္ထ သစ္စဝိဝဋ္ဋော တတ္ထ သညာဝိဝဋ္ဋော စေတောဝိဝဋ္ဋော စိတ္တဝိဝဋ္ဋော ဉာဏဝိဝဋ္ဋော ဝိမောက္ခဝိဝဋ္ဋော. အယံ ဝိမောက္ခဝိဝဋ္ဋော. (6)
ကတမာ ဝိမောက္ခဘာဝနာ? ပဌမဿ ဈာနဿ အာသေဝနာ ဘာဝနာ ဗဟုလီကမ္မံ, ဒုတိယဿ ဈာနဿ အာသေဝနာ ဘာဝနာ ဗဟုလီကမ္မံ, တတိယဿ ဈာနဿ အာသေဝနာ ဘာဝနာ ဗဟုလီကမ္မံ, စတုတ္ထဿ ဈာနဿ အာသေဝနာ ဘာဝနာ ဗဟုလီကမ္မံ, အာကာသာနဉ္စာယတနသမာပတ္တိယာ အာသေဝနာ ဘာဝနာ ဗဟုလီကမ္မံ, ဝိညာဏဉ္စာယတနသမာပတ္တိယာ …ပေ… အာကိဉ္စညာယတနသမာပတ္တိယာ… နေဝသညာနာသညာယတနသမာပတ္တိယာ အာသေဝနာ ဘာဝနာ ဗဟုလီကမ္မံ, သောတာပတ္တိမဂ္ဂဿ အာသေဝနာ ဘာဝနာ ဗဟုလီကမ္မံ, သကဒါဂါမိမဂ္ဂဿ အာသေဝနာ ဘာဝနာ ဗဟုလီကမ္မံ, အနာဂါမိမဂ္ဂဿ အာသေဝနာ ဘာဝနာ ဗဟုလီကမ္မံ, အရဟတ္တမဂ္ဂဿ အာသေဝနာ ဘာဝနာ ဗဟုလီကမ္မံ, အယံ ဝိမောက္ခဘာဝနာ. (7)
ကတမာ ဝိမောက္ခပ္ပဋိပ္ပဿဒ္ဓိ? ပဌမဿ ဈာနဿ ပဋိလာဘော ဝါ ဝိပါကော ဝါ, ဒုတိယဿ ဈာနဿ ပဋိလာဘော ဝါ ဝိပါကော ဝါ, တတိယဿ ဈာနဿ …ပေ… စတုတ္ထဿ ဈာနဿ… အာကာသာနဉ္စာယတနသမာပတ္တိယာ… ဝိညာဏဉ္စာယတနသမာပတ္တိယာ… အာကိဉ္စညာယတနသမာပတ္တိယာ… နေဝသညာနာသညာယတနသမာပတ္တိယာ ပဋိလာဘော ဝါ ဝိပါကော ဝါ, သောတာပတ္တိမဂ္ဂဿ သောတာပတ္တိဖလံ, သကဒါဂါမိမဂ္ဂဿ သကဒါဂါမိဖလံ, အနာဂါမိမဂ္ဂဿ အနာဂါမိဖလံ, အရဟတ္တမဂ္ဂဿ အရဟတ္တဖလံ, အယံ ဝိမောက္ခပ္ပဋိပ္ပဿဒ္ဓီတိ. (8)
ဝိမောက္ခကထာ နိဋ္ဌိတာ.
တတိယဘာဏဝါရော.