2.1.1 သုတ္တန္တနိဒ္ဒေသ
ကထံ သမထပုဗ္ဗင်္ဂမံ ဝိပဿနံ ဘာဝေတိ? နေက္ခမ္မဝသေန စိတ္တဿ ဧကဂ္ဂတာ အဝိက္ခေပေါ သမာဓိ. တတ္ထ ဇာတေ ဓမ္မေ အနိစ္စတော အနုပဿနဋ္ဌေန ဝိပဿနာ, ဒုက္ခတော အနုပဿနဋ္ဌေန ဝိပဿနာ, အနတ္တတော အနုပဿနဋ္ဌေန ဝိပဿနာ. ဣတိ ပဌမံ သမထော, ပစ္ဆာ ဝိပဿနာ. တေန ဝုစ္စတိ— “သမထပုဗ္ဗင်္ဂမံ ဝိပဿနံ ဘာဝေတီ”တိ. ဘာဝေတီ တိ စတဿော ဘာဝနာ— တတ္ထ ဇာတာနံ ဓမ္မာနံ အနတိဝတ္တနဋ္ဌေန ဘာဝနာ, ဣန္ဒြိယာနံ ဧကရသဋ္ဌေန ဘာဝနာ, တဒုပဂဝီရိယဝါဟနဋ္ဌေန ဘာဝနာ, အာသေဝနဋ္ဌေန ဘာဝနာ.
မဂ္ဂေါ သဉ္ဇာယတီ တိ ကထံ မဂ္ဂေါ သဉ္ဇာယတိ? ဒဿနဋ္ဌေန သမ္မာဒိဋ္ဌိ မဂ္ဂေါ သဉ္ဇာယတိ, အဘိနိရောပနဋ္ဌေန သမ္မာသင်္ကပ္ပေါ မဂ္ဂေါ သဉ္ဇာယတိ, ပရိဂ္ဂဟဋ္ဌေန သမ္မာဝါစာ မဂ္ဂေါ သဉ္ဇာယတိ, သမုဋ္ဌာနဋ္ဌေန သမ္မာကမ္မန္တော မဂ္ဂေါ သဉ္ဇာယတိ, ဝေါဒါနဋ္ဌေန သမ္မာအာဇီဝေါ မဂ္ဂေါ သဉ္ဇာယတိ, ပဂ္ဂဟဋ္ဌေန သမ္မာဝါယာမော မဂ္ဂေါ သဉ္ဇာယတိ, ဥပဋ္ဌာနဋ္ဌေန သမ္မာသတိ မဂ္ဂေါ သဉ္ဇာယတိ, အဝိက္ခေပဋ္ဌေန သမ္မာသမာဓိ မဂ္ဂေါ သဉ္ဇာယတိ— ဧဝံ မဂ္ဂေါ သဉ္ဇာယတိ.
သော တံ မဂ္ဂံ အာသေဝတိ ဘာဝေတိ ဗဟုလီကရောတိ အာသေဝတီ တိ ကထံ အာသေဝတိ? အာဝဇ္ဇန္တော အာသေဝတိ, ဇာနန္တော အာသေဝတိ, ပဿန္တော အာသေဝတိ, ပစ္စဝေက္ခန္တော အာသေဝတိ, စိတ္တံ အဓိဋ္ဌဟန္တော အာသေဝတိ, သဒ္ဓါယ အဓိမုစ္စန္တော အာသေဝတိ, ဝီရိယံ ပဂ္ဂဏှန္တော အာသေဝတိ, သတိံ ဥပဋ္ဌာပေန္တော အာသေဝတိ, စိတ္တံ သမာဒဟန္တော အာသေဝတိ, ပညာယ ပဇာနန္တော အာသေဝတိ, အဘိညေယျံ အဘိဇာနန္တော အာသေဝတိ, ပရိညေယျံ ပရိဇာနန္တော အာသေဝတိ, ပဟာတဗ္ဗံ ပဇဟန္တော အာသေဝတိ, ဘာဝေတဗ္ဗံ ဘာဝေန္တော အာသေဝတိ, သစ္ဆိကာတဗ္ဗံ သစ္ဆိကရောန္တော အာသေဝတိ— ဧဝံ အာသေဝတိ.
ဘာဝေတီ တိ ကထံ ဘာဝေတိ? အာဝဇ္ဇန္တော ဘာဝေတိ, ဇာနန္တော ဘာဝေတိ, ပဿန္တော ဘာဝေတိ, ပစ္စဝေက္ခန္တော ဘာဝေတိ, စိတ္တံ အဓိဋ္ဌဟန္တော ဘာဝေတိ, သဒ္ဓါယ အဓိမုစ္စန္တော ဘာဝေတိ, ဝီရိယံ ပဂ္ဂဏှန္တော ဘာဝေတိ, သတိံ ဥပဋ္ဌာပေန္တော ဘာဝေတိ, စိတ္တံ သမာဒဟန္တော ဘာဝေတိ, ပညာယ ပဇာနန္တော ဘာဝေတိ, အဘိညေယျံ အဘိဇာနန္တော ဘာဝေတိ, ပရိညေယျံ ပရိဇာနန္တော ဘာဝေတိ, ပဟာတဗ္ဗံ ပဇဟန္တော ဘာဝေတိ, ဘာဝေတဗ္ဗံ ဘာဝေန္တော ဘာဝေတိ, သစ္ဆိကာတဗ္ဗံ သစ္ဆိကရောန္တော ဘာဝေတိ— ဧဝံ ဘာဝေတိ.
ဗဟုလီကရောတီ တိ ကထံ ဗဟုလီကရောတိ? အာဝဇ္ဇန္တော ဗဟုလီကရောတိ, ဇာနန္တော ဗဟုလီကရောတိ, ပဿန္တော ဗဟုလီကရောတိ, ပစ္စဝေက္ခန္တော ဗဟုလီကရောတိ, စိတ္တံ အဓိဋ္ဌဟန္တော ဗဟုလီကရောတိ, သဒ္ဓါယ အဓိမုစ္စန္တော ဗဟုလီကရောတိ, ဝီရိယံ ပဂ္ဂဏှန္တော ဗဟုလီကရောတိ, သတိံ ဥပဋ္ဌာပေန္တော ဗဟုလီကရောတိ, စိတ္တံ သမာဒဟန္တော ဗဟုလီကရောတိ, ပညာယ ပဇာနန္တော ဗဟုလီကရောတိ, အဘိညေယျံ အဘိဇာနန္တော ဗဟုလီကရောတိ, ပရိညေယျံ ပရိဇာနန္တော ဗဟုလီကရောတိ, ပဟာတဗ္ဗံ ပဇဟန္တော ဗဟုလီကရောတိ, ဘာဝေတဗ္ဗံ ဘာဝေန္တော ဗဟုလီကရောတိ, သစ္ဆိကာတဗ္ဗံ သစ္ဆိကရောန္တော ဗဟုလီကရောတိ— ဧဝံ ဗဟုလီကရောတိ.
တဿ တံ မဂ္ဂံ အာသေဝတော ဘာဝယတော ဗဟုလီကရောတော သညောဇနာနိ ပဟီယန္တိ အနုသယာ ဗျန္တီဟောန္တီ တိ ကထံ သညောဇနာနိ ပဟီယန္တိ, အနုသယာ ဗျန္တီဟောန္တိ? သောတာပတ္တိမဂ္ဂေန, သက္ကာယဒိဋ္ဌိ, ဝိစိကိစ္ဆာ, သီလဗ္ဗတပရာမာသော— ဣမာနိ တီဏိ သညောဇနာနိ ပဟီယန္တိ; ဒိဋ္ဌာနုသယော, ဝိစိကိစ္ဆာနုသယော— ဣမေ ဒွေ အနုသယာ ဗျန္တီဟောန္တိ. သကဒါဂါမိမဂ္ဂေန ဩဠာရိကံ ကာမရာဂသညောဇနံ, ပဋိဃသညောဇနံ— ဣမာနိ ဒွေ သညောဇနာနိ ပဟီယန္တိ; ဩဠာရိကော ကာမရာဂါနုသယော, ပဋိဃာနုသယော— ဣမေ ဒွေ အနုသယာ ဗျန္တီဟောန္တိ. အနာဂါမိမဂ္ဂေန အနုသဟဂတံ ကာမရာဂသညောဇနံ, ပဋိဃသညောဇနံ— ဣမာနိ ဒွေ သညောဇနာနိ ပဟီယန္တိ; အနုသဟဂတော ကာမရာဂါနုသယော, ပဋိဃာနုသယော— ဣမေ ဒွေ အနုသယာ ဗျန္တီဟောန္တိ. အရဟတ္တမဂ္ဂေန ရူပရာဂေါ, အရူပရာဂေါ, မာနော, ဥဒ္ဓစ္စံ, အဝိဇ္ဇာ— ဣမာနိ ပဉ္စ သညောဇနာနိ ပဟီယန္တိ; မာနာနုသယော, ဘဝရာဂါနုသယော, အဝိဇ္ဇာနုသယော— ဣမေ တယော အနုသယာ ဗျန္တီဟောန္တိ. ဧဝံ သညောဇနာနိ ပဟီယန္တိ, အနုသယာ ဗျန္တီဟောန္တိ.
အဗျာပါဒဝသေန စိတ္တဿ ဧကဂ္ဂတာ အဝိက္ခေပေါ သမာဓိ …ပေ… အာလောကသညာဝသေန စိတ္တဿ ဧကဂ္ဂတာ အဝိက္ခေပေါ သမာဓိ …ပေ… ပဋိနိဿဂ္ဂါနုပဿီ အဿာသဝသေန ပဋိနိဿဂ္ဂါနုပဿီ ပဿာသဝသေန စိတ္တဿ ဧကဂ္ဂတာ အဝိက္ခေပေါ သမာဓိ. တတ္ထ ဇာတေ ဓမ္မေ အနိစ္စတော အနုပဿနဋ္ဌေန ဝိပဿနာ, ဒုက္ခတော အနုပဿနဋ္ဌေန ဝိပဿနာ, အနတ္တတော အနုပဿနဋ္ဌေန ဝိပဿနာ. ဣတိ ပဌမံ သမထော, ပစ္ဆာ ဝိပဿနာ. တေန ဝုစ္စတိ— “သမထပုဗ္ဗင်္ဂမံ ဝိပဿနံ ဘာဝေတီ”တိ. ဘာဝေတီ တိ စတဿော ဘာဝနာ— တတ္ထ ဇာတာနံ ဓမ္မာနံ အနတိဝတ္တနဋ္ဌေန ဘာဝနာ, ဣန္ဒြိယာနံ ဧကရသဋ္ဌေန ဘာဝနာ, တဒုပဂဝီရိယဝါဟနဋ္ဌေန ဘာဝနာ, အာသေဝနဋ္ဌေန ဘာဝနာ.
မဂ္ဂေါ သဉ္ဇာယတီ တိ ကထံ မဂ္ဂေါ သဉ္ဇာယတိ? ဒဿနဋ္ဌေန သမ္မာဒိဋ္ဌိ မဂ္ဂေါ သဉ္ဇာယတိ, အဘိနိရောပနဋ္ဌေန သမ္မာသင်္ကပ္ပေါ မဂ္ဂေါ သဉ္ဇာယတိ …ပေ… အဝိက္ခေပဋ္ဌေန သမ္မာသမာဓိ မဂ္ဂေါ သဉ္ဇာယတိ. ဧဝံ မဂ္ဂေါ သဉ္ဇာယတိ.
သော တံ မဂ္ဂံ အာသေဝတိ ဘာဝေတိ ဗဟုလီကရောတိ အာသေဝတီ တိ ကထံ အာသေဝတိ? အာဝဇ္ဇန္တော အာသေဝတိ …ပေ… သစ္ဆိကာတဗ္ဗံ သစ္ဆိကရောန္တော အာသေဝတိ, ဧဝံ အာသေဝတိ. ဘာဝေတီ တိ ကထံ ဘာဝေတိ? အာဝဇ္ဇန္တော ဘာဝေတိ, ဇာနန္တော ဘာဝေတိ …ပေ… သစ္ဆိကာတဗ္ဗံ သစ္ဆိကရောန္တော ဘာဝေတိ, ဧဝံ ဘာဝေတိ. ဗဟုလီကရောတီ တိ ကထံ ဗဟုလီကရောတိ? အာဝဇ္ဇန္တော ဗဟုလီကရောတိ, ဇာနန္တော ဗဟုလီကရောတိ …ပေ… သစ္ဆိကာတဗ္ဗံ သစ္ဆိကရောန္တော ဗဟုလီကရောတိ, ဧဝံ ဗဟုလီကရောတိ.
တဿ တံ မဂ္ဂံ အာသေဝတော ဘာဝယတော ဗဟုလီကရောတော သညောဇနာနိ ပဟီယန္တိ, အနုသယာ ဗျန္တီဟောန္တီ တိ ကထံ သညောဇနာ ပဟီယန္တိ, အနုသယာ ဗျန္တီဟောန္တိ? သောတာပတ္တိမဂ္ဂေန သက္ကာယဒိဋ္ဌိ ဝိစိကိစ္ဆာ သီလဗ္ဗတပရာမာသော— ဣမာနိ တီဏိ သညောဇနာနိ ပဟီယန္တိ; ဒိဋ္ဌာနုသယော, ဝိစိကိစ္ဆာနုသယော— ဣမေ ဒွေ အနုသယာ ဗျန္တီဟောန္တိ. သကဒါဂါမိမဂ္ဂေန ဩဠာရိကံ ကာမရာဂသညောဇနံ, ပဋိဃသညောဇနံ— ဣမာနိ ဒွေ သညောဇနာနိ ပဟီယန္တိ; ဩဠာရိကော ကာမရာဂါနုသယော ပဋိဃာနုသယော— ဣမေ ဒွေ အနုသယာ ဗျန္တီဟောန္တိ. အနာဂါမိမဂ္ဂေန အနုသဟဂတံ ကာမရာဂသညောဇနံ, ပဋိဃသညောဇနံ— ဣမာနိ ဒွေ သညောဇနာနိ ပဟီယန္တိ; အနုသဟဂတော ကာမရာဂါနုသယော, ပဋိဃာနုသယော— ဣမေ ဒွေ အနုသယာ ဗျန္တီဟောန္တိ. အရဟတ္တမဂ္ဂေန ရူပရာဂေါ, အရူပရာဂေါ, မာနော, ဥဒ္ဓစ္စံ, အဝိဇ္ဇာ— ဣမာနိ ပဉ္စ သညောဇနာနိ ပဟီယန္တိ; မာနာနုသယော, ဘဝရာဂါနုသယော, အဝိဇ္ဇာနုသယော— ဣမေ တယော အနုသယာ ဗျန္တီဟောန္တိ. ဧဝံ သညောဇနာနိ ပဟီယန္တိ, အနုသယာ ဗျန္တီဟောန္တိ. ဧဝံ သမထပုဗ္ဗင်္ဂမံ ဝိပဿနံ ဘာဝေတိ.
ကထံ ဝိပဿနာပုဗ္ဗင်္ဂမံ သမထံ ဘာဝေတိ? အနိစ္စတော အနုပဿနဋ္ဌေန ဝိပဿနာ, ဒုက္ခတော အနုပဿနဋ္ဌေန ဝိပဿနာ, အနတ္တတော အနုပဿနဋ္ဌေန ဝိပဿနာ. တတ္ထ ဇာတာနံ ဓမ္မာနဉ္စ ဝေါသဂ္ဂါရမ္မဏတာ စိတ္တဿ ဧကဂ္ဂတာ အဝိက္ခေပေါ. သမာဓိ ဣတိ ပဌမံ ဝိပဿနာ, ပစ္ဆာ သမထော. တေန ဝုစ္စတိ— “ဝိပဿနာပုဗ္ဗင်္ဂမံ သမထံ ဘာဝေတီ”တိ. ဘာဝေတီ တိ စတဿော ဘာဝနာ— အာသေဝနဋ္ဌေန ဘာဝနာ …ပေ… မဂ္ဂေါ သဉ္ဇာယတီ တိ ကထံ မဂ္ဂေါ သဉ္ဇာယတိ …ပေ… ဧဝံ မဂ္ဂေါ သဉ္ဇာယတိ. ဧဝံ သညောဇနာနိ ပဟီယန္တိ, အနုသယာ ဗျန္တီဟောန္တိ.
ရူပံ အနိစ္စတော အနုပဿနဋ္ဌေန ဝိပဿနာ, ရူပံ ဒုက္ခတော အနုပဿနဋ္ဌေန ဝိပဿနာ, ရူပံ အနတ္တတော အနုပဿနဋ္ဌေန ဝိပဿနာ. တတ္ထ ဇာတာနံ ဓမ္မာနဉ္စ ဝေါသဂ္ဂါရမ္မဏတာ စိတ္တဿ ဧကဂ္ဂတာ အဝိက္ခေပေါ သမာဓိ. ဣတိ ပဌမံ ဝိပဿနာ, ပစ္ဆာ သမထော. တေန ဝုစ္စတိ— “ဝိပဿနာပုဗ္ဗင်္ဂမံ သမထံ ဘာဝေတီ”တိ. ဘာဝေတီ တိ စတဿော ဘာဝနာ— အာသေဝနဋ္ဌေန ဘာဝနာ …ပေ… မဂ္ဂေါ သဉ္ဇာယတီ တိ ကထံ မဂ္ဂေါ သဉ္ဇာယတိ …ပေ… ဧဝံ မဂ္ဂေါ သဉ္ဇာယတိ. ဧဝံ သညောဇနာနိ ပဟီယန္တိ, အနုသယာ ဗျန္တီဟောန္တိ.
ဝေဒနံ …ပေ… သညံ… သင်္ခါရေ… ဝိညာဏံ… စက္ခုံ …ပေ… ဇရာမရဏံ အနိစ္စတော အနုပဿနဋ္ဌေန ဝိပဿနာ, ဇရာမရဏံ ဒုက္ခတော …ပေ… အနတ္တတော အနုပဿနဋ္ဌေန ဝိပဿနာ. တတ္ထ ဇာတာနံ ဓမ္မာနဉ္စ ဝေါသဂ္ဂါရမ္မဏတာ စိတ္တဿ ဧကဂ္ဂတာ အဝိက္ခေပေါ သမာဓိ. ဣတိ ပဌမံ ဝိပဿနာ, ပစ္ဆာ သမထော. တေန ဝုစ္စတိ— “ဝိပဿနာပုဗ္ဗင်္ဂမံ သမထံ ဘာဝေတီ”တိ. ဘာဝေတီ တိ စတဿော ဘာဝနာ— အာသေဝနဋ္ဌေန ဘာဝနာ …ပေ… မဂ္ဂေါ သဉ္ဇာယတီ တိ ကထံ မဂ္ဂေါ သဉ္ဇာယတိ …ပေ… ဧဝံ မဂ္ဂေါ သဉ္ဇာယတိ. ဧဝံ သညောဇနာနိ ပဟီယန္တိ, အနုသယာ ဗျန္တီဟောန္တိ. ဧဝံ ဝိပဿနာပုဗ္ဗင်္ဂမံ သမထံ ဘာဝေတိ.
ကထံ သမထဝိပဿနံ ယုဂနဒ္ဓံ ဘာဝေတိ? သောဠသဟိ အာကာရေဟိ သမထဝိပဿနံ ယုဂနဒ္ဓံ ဘာဝေတိ. အာရမ္မဏဋ္ဌေန ဂေါစရဋ္ဌေန ပဟာနဋ္ဌေန ပရိစ္စာဂဋ္ဌေန ဝုဋ္ဌာနဋ္ဌေန ဝိဝဋ္ဋနဋ္ဌေန သန္တဋ္ဌေန ပဏီတဋ္ဌေန ဝိမုတ္တဋ္ဌေန အနာသဝဋ္ဌေန တရဏဋ္ဌေန အနိမိတ္တဋ္ဌေန အပ္ပဏိဟိတဋ္ဌေန သုညတဋ္ဌေန ဧကရသဋ္ဌေန အနတိဝတ္တနဋ္ဌေန ယုဂနဒ္ဓဋ္ဌေန.
ကထံ အာရမ္မဏဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စံ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ နိရောဓာရမ္မဏော, အဝိဇ္ဇံ ပဇဟတော အနုပဿနဋ္ဌေန ဝိပဿနာ နိရောဓာရမ္မဏာ. ဣတိ အာရမ္မဏဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “အာရမ္မဏဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. ဘာဝေတီ တိ စတဿော ဘာဝနာ— အာသေဝနဋ္ဌေန ဘာဝနာ …ပေ… မဂ္ဂေါ သဉ္ဇာယတီ တိ ကထံ မဂ္ဂေါ သဉ္ဇာယတိ …ပေ… ဧဝံ မဂ္ဂေါ သဉ္ဇာယတိ. ဧဝံ သညောဇနာနိ ပဟီယန္တိ, အနုသယာ ဗျန္တီဟောန္တိ. ဧဝံ အာရမ္မဏဋ္ဌေန သမထဝိပဿနံ ယုဂနဒ္ဓံ ဘာဝေတိ. (1)
ကထံ ဂေါစရဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စံ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ နိရောဓဂေါစရော, အဝိဇ္ဇံ ပဇဟတော အနုပဿနဋ္ဌေန ဝိပဿနာ နိရောဓဂေါစရာ. ဣတိ ဂေါစရဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “ဂေါစရဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (2)
ကထံ ပဟာနဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စသဟဂတကိလေသေ စ ခန္ဓေ စ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ နိရောဓဂေါစရော, အဝိဇ္ဇာသဟဂတကိလေသေ စ ခန္ဓေ စ ပဇဟတော အနုပဿနဋ္ဌေန ဝိပဿနာ နိရောဓဂေါစရာ. ဣတိ ပဟာနဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “ပဟာနဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (3)
ကထံ ပရိစ္စာဂဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စသဟဂတကိလေသေ စ ခန္ဓေ စ ပရိစ္စဇတော စိတ္တဿ ဧကဂ္ဂတာ အဝိက္ခေပေါ သမာဓိ နိရောဓဂေါစရော, အဝိဇ္ဇာသဟဂတကိလေသေ စ ခန္ဓေ စ ပရိစ္စဇတော အနုပဿနဋ္ဌေန ဝိပဿနာ နိရောဓဂေါစရာ. ဣတိ ပရိစ္စာဂဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “ပရိစ္စာဂဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (4)
ကထံ ဝုဋ္ဌာနဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စသဟဂတကိလေသေဟိ စ ခန္ဓေဟိ စ ဝုဋ္ဌဟတော စိတ္တဿ ဧကဂ္ဂတာ အဝိက္ခေပေါ သမာဓိ နိရောဓဂေါစရော, အဝိဇ္ဇာသဟဂတကိလေသေဟိ စ ခန္ဓေဟိ စ ဝုဋ္ဌဟတော အနုပဿနဋ္ဌေန ဝိပဿနာ နိရောဓဂေါစရာ. ဣတိ ဝုဋ္ဌာနဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “ဝုဋ္ဌာနဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (5)
ကထံ ဝိဝဋ္ဋနဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စသဟဂတကိလေသေဟိ စ ခန္ဓေဟိ စ ဝိဝဋ္ဋတော စိတ္တဿ ဧကဂ္ဂတာ အဝိက္ခေပေါ သမာဓိ နိရောဓဂေါစရော, အဝိဇ္ဇာသဟဂတကိလေသေဟိ စ ခန္ဓေဟိ စ ဝိဝဋ္ဋတော အနုပဿနဋ္ဌေန ဝိပဿနာ နိရောဓဂေါစရာ. ဣတိ ဝိဝဋ္ဋနဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “ဝိဝဋ္ဋနဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (6)
ကထံ သန္တဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စံ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ သန္တော ဟောန္တိ နိရောဓဂေါစရော, အဝိဇ္ဇံ ပဇဟတော အနုပဿနဋ္ဌေန ဝိပဿနာ သန္တာ ဟောတိ နိရောဓဂေါစရာ. ဣတိ သန္တဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “သန္တဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (7)
ကထံ ပဏီတဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စံ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ ပဏီတော ဟောတိ နိရောဓဂေါစရော, အဝိဇ္ဇံ ပဇဟတော အနုပဿနဋ္ဌေန ဝိပဿနာ ပဏီတာ ဟောတိ နိရောဓဂေါစရာ. ဣတိ ပဏီတဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “ပဏီတဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (8)
ကထံ ဝိမုတ္တဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စံ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ ကာမာသဝါ ဝိမုတ္တော ဟောတိ နိရောဓဂေါစရော, အဝိဇ္ဇံ ပဇဟတော အနုပဿနဋ္ဌေန ဝိပဿနာ အဝိဇ္ဇာသဝါ ဝိမုတ္တာ ဟောတိ နိရောဓဂေါစရာ. ဣတိ ရာဂဝိရာဂါ စေတောဝိမုတ္တိ အဝိဇ္ဇာဝိရာဂါ ပညာဝိမုတ္တိ ဝိမုတ္တဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “ဝိမုတ္တဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (9)
ကထံ အနာသဝဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စံ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ ကာမာသဝေန အနာသဝေါ ဟောတိ နိရောဓဂေါစရော, အဝိဇ္ဇံ ပဇဟတော အနုပဿနဋ္ဌေန ဝိပဿနာ အဝိဇ္ဇာသဝေန အနာသဝါ ဟောတိ နိရောဓဂေါစရာ. ဣတိ အနာသဝဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “အနာသဝဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (10)
ကထံ တရဏဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စသဟဂတကိလေသေ စ ခန္ဓေ စ တရတော စိတ္တဿ ဧကဂ္ဂတာ အဝိက္ခေပေါ သမာဓိ နိရောဓဂေါစရော, အဝိဇ္ဇာသဟဂတကိလေသေ စ ခန္ဓေ စ တရတော အနုပဿနဋ္ဌေန ဝိပဿနာ နိရောဓဂေါစရာ. ဣတိ တရဏဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “တရဏဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (11)
ကထံ အနိမိတ္တဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စံ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ သဗ္ဗနိမိတ္တေဟိ အနိမိတ္တော ဟောတိ နိရောဓဂေါစရော, အဝိဇ္ဇံ ပဇဟတော အနုပဿနဋ္ဌေန ဝိပဿနာ သဗ္ဗနိမိတ္တေဟိ အနိမိတ္တာ ဟောတိ နိရောဓဂေါစရာ. ဣတိ အနိမိတ္တဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “အနိမိတ္တဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (12)
ကထံ အပ္ပဏိဟိတဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စံ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ သဗ္ဗပဏိဓီဟိ အပ္ပဏိဟိတော ဟောတိ နိရောဓဂေါစရော, အဝိဇ္ဇံ ပဇဟတော အနုပဿနဋ္ဌေန ဝိပဿနာ သဗ္ဗပဏိဓီဟိ အပ္ပဏိဟိတာ ဟောတိ နိရောဓဂေါစရာ. ဣတိ အပ္ပဏိဟိတဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “အပ္ပဏိဟိတဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. (13)
ကထံ သုညတဋ္ဌေန သမထဝိပဿနံ ယုဂနဒ္ဓံ ဘာဝေတိ? ဥဒ္ဓစ္စံ ပဇဟတော စိတ္တဿ ဧကဂ္ဂတာ အဝိက္ခေပေါ သမာဓိ သဗ္ဗာဘိနိဝေသေဟိ သုညော ဟောတိ နိရောဓဂေါစရော, အဝိဇ္ဇံ ပဇဟတော အနုပဿနဋ္ဌေန ဝိပဿနာ သဗ္ဗာဘိနိဝေသေဟိ သုညာ ဟောတိ နိရောဓဂေါစရာ. ဣတိ သုညတဋ္ဌေန သမထဝိပဿနာ ဧကရသာ ဟောန္တိ, ယုဂနဒ္ဓါ ဟောန္တိ, အညမညံ နာတိဝတ္တန္တီတိ. တေန ဝုစ္စတိ— “သုညတဋ္ဌေန သမထဝိပဿနံ ယုဂနဒ္ဓံ ဘာဝေတီ”တိ. ဘာဝေတီ တိ စတဿော ဘာဝနာ— အာသေဝနဋ္ဌေန ဘာဝနာ …ပေ… မဂ္ဂေါ သဉ္ဇာယတီ တိ ကထံ မဂ္ဂေါ သဉ္ဇာယတိ …ပေ… ဧဝံ မဂ္ဂေါ သဉ္ဇာယတိ. ဧဝံ သညောဇနာနိ ပဟီယန္တိ, အနုသယာ ဗျန္တီဟောန္တိ. ဧဝံ သုညတဋ္ဌေန သမထဝိပဿနံ ယုဂနဒ္ဓံ ဘာဝေတိ. ဣမေဟိ သောဠသဟိ အာကာရေဟိ သမထဝိပဿနံ ယုဂနဒ္ဓံ ဘာဝေတိ, ဧဝံ သမထဝိပဿနံ ယုဂနဒ္ဓံ ဘာဝေတိ. (14)
သုတ္တန္တနိဒ္ဒေသော.