2.5 ဝိရာဂကထာ
ဝိရာဂေါ မဂ္ဂေါ, ဝိမုတ္တိ ဖလံ. ကထံ ဝိရာဂေါ မဂ္ဂေါ? သောတာပတ္တိမဂ္ဂက္ခဏေ ဒဿနဋ္ဌေန သမ္မာဒိဋ္ဌိ မိစ္ဆာဒိဋ္ဌိယာ ဝိရဇ္ဇတိ, တဒနုဝတ္တကကိလေသေဟိ စ ခန္ဓေဟိ စ ဝိရဇ္ဇတိ, ဗဟိဒ္ဓါ စ သဗ္ဗနိမိတ္တေဟိ ဝိရဇ္ဇတိ. ဝိရာဂေါ ဝိရာဂါရမ္မဏော ဝိရာဂဂေါစရော ဝိရာဂေ သမုဒါဂတော ဝိရာဂေ ဌိတော ဝိရာဂေ ပတိဋ္ဌိတော.
ဝိရာဂေါ တိ ဒွေ ဝိရာဂါ— နိဗ္ဗာနဉ္စ ဝိရာဂေါ, ယေ စ နိဗ္ဗာနာရမ္မဏတာဇာတာ ဓမ္မာ သဗ္ဗေ ဝိရာဂါ ဟောန္တီတိ— ဝိရာဂါ. သဟဇာတာနိ သတ္တင်္ဂါနိ ဝိရာဂံ ဂစ္ဆန္တီတိ— ဝိရာဂေါ မဂ္ဂေါ. ဧတေန မဂ္ဂေန ဗုဒ္ဓါ စ သာဝကာ စ အဂတံ ဒိသံ နိဗ္ဗာနံ ဂစ္ဆန္တီတိ— အဋ္ဌင်္ဂိကော မဂ္ဂေါ. ယာဝတာ ပုထုသမဏဗြာဟ္မဏာနံ ပရပ္ပဝါဒါနံ မဂ္ဂါ, အယမေဝ အရိယော အဋ္ဌင်္ဂိကော မဂ္ဂေါ အဂ္ဂေါ စ သေဋ္ဌော စ ပါမောက္ခော စ ဥတ္တမော စ ပဝရော စာတိ— မဂ္ဂါနံ အဋ္ဌင်္ဂိကော သေဋ္ဌော.
အဘိနိရောပနဋ္ဌေန သမ္မာသင်္ကပ္ပေါ မိစ္ဆာသင်္ကပ္ပါ ဝိရဇ္ဇတိ. ပရိဂ္ဂဟဋ္ဌေန သမ္မာဝါစာ မိစ္ဆာဝါစာယ ဝိရဇ္ဇတိ. သမုဋ္ဌာနဋ္ဌေန သမ္မာကမ္မန္တော မိစ္ဆာကမ္မန္တာ ဝိရဇ္ဇတိ. ဝေါဒါနဋ္ဌေန သမ္မာအာဇီဝေါ မိစ္ဆာအာဇီဝါ ဝိရဇ္ဇတိ. ပဂ္ဂဟဋ္ဌေန သမ္မာဝါယာမော မိစ္ဆာဝါယာမာ ဝိရဇ္ဇတိ. ဥပဋ္ဌာနဋ္ဌေန သမ္မာသတိ မိစ္ဆာသတိယာ ဝိရဇ္ဇတိ. အဝိက္ခေပဋ္ဌေန သမ္မာသမာဓိ မိစ္ဆာသမာဓိတော ဝိရဇ္ဇတိ. တဒနုဝတ္တကကိလေသေဟိ စ ခန္ဓေဟိ စ ဝိရဇ္ဇတိ. ဗဟိဒ္ဓါ စ သဗ္ဗနိမိတ္တေဟိ ဝိရဇ္ဇတိ. ဝိရာဂေါ ဝိရာဂါရမ္မဏော ဝိရာဂဂေါစရော ဝိရာဂေ သမုဒါဂတော ဝိရာဂေ ဌိတော ဝိရာဂေ ပတိဋ္ဌိတော.
ဝိရာဂေါ တိ ဒွေ ဝိရာဂါ— နိဗ္ဗာနဉ္စ ဝိရာဂေါ, ယေ စ နိဗ္ဗာနာရမ္မဏတာဇာတာ ဓမ္မာ သဗ္ဗေ ဝိရာဂါ ဟောန္တီတိ— ဝိရာဂါ. သဟဇာတာနိ သတ္တင်္ဂါနိ ဝိရာဂံ ဂစ္ဆန္တီတိ— ဝိရာဂေါ မဂ္ဂေါ. ဧတေန မဂ္ဂေန ဗုဒ္ဓါ စ သာဝကာ စ အဂတံ ဒိသံ နိဗ္ဗာနံ ဂစ္ဆန္တီတိ— အဋ္ဌင်္ဂိကော မဂ္ဂေါ. ယာဝတာ ပုထုသမဏဗြာဟ္မဏာနံ ပရပ္ပဝါဒါနံ မဂ္ဂါ, အယမေဝ အရိယော အဋ္ဌင်္ဂိကော မဂ္ဂေါ အဂ္ဂေါ စ သေဋ္ဌော စ ပါမောက္ခော စ ဥတ္တမော စ ပဝရော စာတိ— မဂ္ဂါနံ အဋ္ဌင်္ဂိကော သေဋ္ဌော.
သကဒါဂါမိမဂ္ဂက္ခဏေ ဒဿနဋ္ဌေန သမ္မာဒိဋ္ဌိ …ပေ… အဝိက္ခေပဋ္ဌေန သမ္မာသမာဓိ ဩဠာရိကာ ကာမရာဂသညောဇနာ ပဋိဃသညောဇနာ ဩဠာရိကာ ကာမရာဂါနုသယာ ပဋိဃာနုသယာ ဝိရဇ္ဇတိ, တဒနုဝတ္တကကိလေသေဟိ စ ခန္ဓေဟိ စ ဝိရဇ္ဇတိ, ဗဟိဒ္ဓါ စ သဗ္ဗနိမိတ္တေဟိ ဝိရဇ္ဇတိ. ဝိရာဂေါ ဝိရာဂါရမ္မဏော ဝိရာဂဂေါစရော ဝိရာဂေ သမုဒါဂတော ဝိရာဂေ ဌိတော ဝိရာဂေ ပတိဋ္ဌိတော.
ဝိရာဂေါ တိ ဒွေ ဝိရာဂါ— နိဗ္ဗာနဉ္စ ဝိရာဂေါ, ယေ စ နိဗ္ဗာနာရမ္မဏတာဇာတာ ဓမ္မာ သဗ္ဗေ ဝိရာဂါ ဟောန္တီတိ— ဝိရာဂါ. သဟဇာတာနိ သတ္တင်္ဂါနိ ဝိရာဂံ ဂစ္ဆန္တီတိ— ဝိရာဂေါ မဂ္ဂေါ. ဧတေန မဂ္ဂေန ဗုဒ္ဓါ စ သာဝကာ စ အဂတံ ဒိသံ နိဗ္ဗာနံ ဂစ္ဆန္တီတိ— အဋ္ဌင်္ဂိကော မဂ္ဂေါ. ယာဝတာ ပုထုသမဏဗြာဟ္မဏာနံ ပရပ္ပဝါဒါနံ မဂ္ဂါ. အယမေဝ အရိယော အဋ္ဌင်္ဂိကော မဂ္ဂေါ အဂ္ဂေါ စ သေဋ္ဌော စ ပါမောက္ခော စ ဥတ္တမော စ ပဝရော စာတိ— မဂ္ဂါနံ အဋ္ဌင်္ဂိကော သေဋ္ဌော.
အနာဂါမိမဂ္ဂက္ခဏေ ဒဿနဋ္ဌေန သမ္မာဒိဋ္ဌိ …ပေ… အဝိက္ခေပဋ္ဌေန သမ္မာသမာဓိ အနုသဟဂတာ ကာမရာဂသညောဇနာ ပဋိဃသညောဇနာ အနုသဟဂတာ ကာမရာဂါနုသယာ ပဋိဃာနုသယာ ဝိရဇ္ဇတိ, တဒနုဝတ္တကကိလေသေဟိ စ ခန္ဓေဟိ စ ဝိရဇ္ဇတိ, ဗဟိဒ္ဓါ စ သဗ္ဗနိမိတ္တေဟိ ဝိရဇ္ဇတိ. ဝိရာဂေါ ဝိရာဂါရမ္မဏော …ပေ… မဂ္ဂါနံ အဋ္ဌင်္ဂိကော သေဋ္ဌော.
အရဟတ္တမဂ္ဂက္ခဏေ ဒဿနဋ္ဌေန သမ္မာဒိဋ္ဌိ …ပေ… အဝိက္ခေပဋ္ဌေန သမ္မာသမာဓိ ရူပရာဂါ အရူပရာဂါ မာနာ ဥဒ္ဓစ္စာ အဝိဇ္ဇာယ မာနာနုသယာ ဘဝရာဂါနုသယာ အဝိဇ္ဇာနုသယာ ဝိရဇ္ဇတိ, တဒနုဝတ္တကကိလေသေဟိ စ ခန္ဓေဟိ စ ဝိရဇ္ဇတိ, ဗဟိဒ္ဓါ စ သဗ္ဗနိမိတ္တေဟိ ဝိရဇ္ဇတိ ဝိရာဂေါ ဝိရာဂါရမ္မဏော ဝိရာဂဂေါစရော ဝိရာဂေ သမုဒါဂတော ဝိရာဂေ ဌိတော ဝိရာဂေ ပတိဋ္ဌိတော.
ဝိရာဂေါ တိ ဒွေ ဝိရာဂါ— နိဗ္ဗာနဉ္စ ဝိရာဂေါ, ယေ စ နိဗ္ဗာနာရမ္မဏတာဇာတာ ဓမ္မာ သဗ္ဗေ ဝိရာဂါ ဟောန္တီတိ— ဝိရာဂါ. သဟဇာတာနိ သတ္တင်္ဂါနိ ဝိရာဂံ ဂစ္ဆန္တီတိ— ဝိရာဂေါ မဂ္ဂေါ. ဧတေန မဂ္ဂေန ဗုဒ္ဓါ စ သာဝကာ စ အဂတံ ဒိသံ နိဗ္ဗာနံ ဂစ္ဆန္တီတိ— အဋ္ဌင်္ဂိကော မဂ္ဂေါ. ယာဝတာ ပုထုသမဏဗြာဟ္မဏာနံ ပရပ္ပဝါဒါနံ မဂ္ဂါ. အယမေဝ အရိယော အဋ္ဌင်္ဂိကော မဂ္ဂေါ အဂ္ဂေါ စ သေဋ္ဌော စ ပါမောက္ခော စ ဥတ္တမော စ ပဝရော စာတိ— မဂ္ဂါနံ အဋ္ဌင်္ဂိကော သေဋ္ဌော.
ဒဿနဝိရာဂေါ သမ္မာဒိဋ္ဌိ. အဘိနိရောပနဝိရာဂေါ သမ္မာသင်္ကပ္ပေါ. ပရိဂ္ဂဟဝိရာဂေါ သမ္မာဝါစာ. သမုဋ္ဌာနဝိရာဂေါ သမ္မာကမ္မန္တော. ဝေါဒါနဝိရာဂေါ သမ္မာအာဇီဝေါ. ပဂ္ဂဟဝိရာဂေါ သမ္မာဝါယာမော. ဥပဋ္ဌာနဝိရာဂေါ သမ္မာသတိ. အဝိက္ခေပဝိရာဂေါ သမ္မာသမာဓိ. ဥပဋ္ဌာနဝိရာဂေါ သတိသမ္ဗောဇ္ဈင်္ဂေါ. ပဝိစယဝိရာဂေါ ဓမ္မဝိစယသမ္ဗောဇ္ဈင်္ဂေါ. ပဂ္ဂဟဝိရာဂေါ ဝီရိယသမ္ဗောဇ္ဈင်္ဂေါ. ဖရဏဝိရာဂေါ ပီတိသမ္ဗောဇ္ဈင်္ဂေါ. ဥပသမဝိရာဂေါ ပဿဒ္ဓိသမ္ဗောဇ္ဈင်္ဂေါ. အဝိက္ခေပဝိရာဂေါ သမာဓိသမ္ဗောဇ္ဈင်္ဂေါ. ပဋိသင်္ခါနဝိရာဂေါ ဥပေက္ခာသမ္ဗောဇ္ဈင်္ဂေါ. အဿဒ္ဓိယေ အကမ္ပိယဝိရာဂေါ သဒ္ဓါဗလံ. ကောသဇ္ဇေ အကမ္ပိယဝိရာဂေါ ဝီရိယဗလံ. ပမာဒေ အကမ္ပိယဝိရာဂေါ သတိဗလံ. ဥဒ္ဓစ္စေ အကမ္ပိယဝိရာဂေါ သမာဓိဗလံ. အဝိဇ္ဇာယ အကမ္ပိယဝိရာဂေါ ပညာဗလံ. အဓိမောက္ခဝိရာဂေါ သဒ္ဓိန္ဒြိယံ. ပဂ္ဂဟဝိရာဂေါ ဝီရိယိန္ဒြိယံ. ဥပဋ္ဌာနဝိရာဂေါ သတိန္ဒြိယံ. အဝိက္ခေပဝိရာဂေါ သမာဓိန္ဒြိယံ. ဒဿနဝိရာဂေါ ပညိန္ဒြိယံ. အာဓိပတေယျဋ္ဌေန ဣန္ဒြိယာနိ ဝိရာဂေါ. အကမ္ပိယဋ္ဌေန ဗလံ ဝိရာဂေါ. နိယျာနဋ္ဌေန ဗောဇ္ဈင်္ဂါ ဝိရာဂေါ. ဟေတုဋ္ဌေန မဂ္ဂေါ ဝိရာဂေါ. ဥပဋ္ဌာနဋ္ဌေန သတိပဋ္ဌာနာ ဝိရာဂေါ. ပဒဟနဋ္ဌေန သမ္မပ္ပဓာနာ ဝိရာဂေါ. ဣဇ္ဈနဋ္ဌေန ဣဒ္ဓိပါဒါ ဝိရာဂေါ. တထဋ္ဌေန သစ္စာ ဝိရာဂေါ. အဝိက္ခေပဋ္ဌေန သမထော ဝိရာဂေါ. အနုပဿနဋ္ဌေန ဝိပဿနာ ဝိရာဂေါ. ဧကရသဋ္ဌေန သမထဝိပဿနာ ဝိရာဂေါ. အနတိဝတ္တနဋ္ဌေန ယုဂနဒ္ဓံ ဝိရာဂေါ. သံဝရဋ္ဌေန သီလဝိသုဒ္ဓိ ဝိရာဂေါ. အဝိက္ခေပဋ္ဌေန စိတ္တဝိသုဒ္ဓိ ဝိရာဂေါ. ဒဿနဋ္ဌေန ဒိဋ္ဌိဝိသုဒ္ဓိ ဝိရာဂေါ. ဝိမုတ္တဋ္ဌေန ဝိမောက္ခော ဝိရာဂေါ. ပဋိဝေဓဋ္ဌေန ဝိဇ္ဇာ ဝိရာဂေါ. ပရိစ္စာဂဋ္ဌေန ဝိမုတ္တိ ဝိရာဂေါ. သမုစ္ဆေဒဋ္ဌေန ခယေ ဉာဏံ ဝိရာဂေါ. ဆန္ဒော မူလဋ္ဌေန ဝိရာဂေါ. မနသိကာရော သမုဋ္ဌာနဋ္ဌေန ဝိရာဂေါ. ဖဿော သမောဓာနဋ္ဌေန ဝိရာဂေါ. ဝေဒနာ သမောသရဏဋ္ဌေန ဝိရာဂေါ. သမာဓိ ပမုခဋ္ဌေန ဝိရာဂေါ. သတိ အာဓိပတေယျဋ္ဌေန ဝိရာဂေါ. ပညာ တဒုတ္တရဋ္ဌေန ဝိရာဂေါ. ဝိမုတ္တိ သာရဋ္ဌေန ဝိရာဂေါ. အမတောဂဓံ နိဗ္ဗာနံ ပရိယောသာနဋ္ဌေန မဂ္ဂေါ.
ဒဿနမဂ္ဂေါ သမ္မာဒိဋ္ဌိ, အဘိနိရောပနမဂ္ဂေါ သမ္မာသင်္ကပ္ပေါ …ပေ… အမတောဂဓံ နိဗ္ဗာနံ ပရိယောသာနဋ္ဌေန မဂ္ဂေါ. ဧဝံ ဝိရာဂေါ မဂ္ဂေါ.
ကထံ ဝိမုတ္တိ ဖလံ? သောတာပတ္တိဖလက္ခဏေ ဒဿနဋ္ဌေန သမ္မာဒိဋ္ဌိ မိစ္ဆာဒိဋ္ဌိယာ ဝိမုတ္တာ ဟောတိ, တဒနုဝတ္တကကိလေသေဟိ စ ခန္ဓေဟိ စ ဝိမုတ္တာ ဟောတိ, ဗဟိဒ္ဓါ စ သဗ္ဗနိမိတ္တေဟိ ဝိမုတ္တာ ဟောတိ, ဝိမုတ္တိ ဝိမုတ္တာရမ္မဏာ ဝိမုတ္တိဂေါစရာ ဝိမုတ္တိယာ သမုဒါဂတာ ဝိမုတ္တိယာ ဌိတာ ဝိမုတ္တိယာ ပတိဋ္ဌိတာ. ဝိမုတ္တီ တိ ဒွေ မုတ္တိယော— နိဗ္ဗာနဉ္စ ဝိမုတ္တိ, ယေ စ နိဗ္ဗာနာရမ္မဏတာဇာတာ ဓမ္မာ သဗ္ဗေ စ ဝိမုတ္တာ ဟောန္တီတိ— ဝိမုတ္တိ ဖလံ.
အဘိနိရောပနဋ္ဌေန သမ္မာသင်္ကပ္ပေါ မိစ္ဆာသင်္ကပ္ပါ ဝိမုတ္တော ဟောတိ, တဒနုဝတ္တကကိလေသေဟိ စ ခန္ဓေဟိ စ ဝိမုတ္တော ဟောတိ, ဗဟိဒ္ဓါ စ သဗ္ဗနိမိတ္တေဟိ ဝိမုတ္တော ဟောတိ, ဝိမုတ္တိ ဝိမုတ္တာရမ္မဏာ ဝိမုတ္တိဂေါစရာ ဝိမုတ္တိယာ သမုဒါဂတာ ဝိမုတ္တိယာ ဌိတာ ဝိမုတ္တိယာ ပတိဋ္ဌိတာ. ဝိမုတ္တီ တိ ဒွေ ဝိမုတ္တိယော— နိဗ္ဗာနဉ္စ ဝိမုတ္တိ, ယေ စ နိဗ္ဗာနာရမ္မဏတာဇာတာ ဓမ္မာ သဗ္ဗေ ဝိမုတ္တာ ဟောန္တီတိ— ဝိမုတ္တိ ဖလံ.
ပရိဂ္ဂဟဋ္ဌေန သမ္မာဝါစာ မိစ္ဆာဝါစာယ ဝိမုတ္တာ ဟောတိ, သမုဋ္ဌာနဋ္ဌေန သမ္မာကမ္မန္တော မိစ္ဆာကမ္မန္တာ ဝိမုတ္တော ဟောတိ, ဝေါဒါနဋ္ဌေန သမ္မာအာဇီဝေါ မိစ္ဆာအာဇီဝါ ဝိမုတ္တော ဟောတိ, ပဂ္ဂဟဋ္ဌေန သမ္မာဝါယာမော မိစ္ဆာဝါယာမာ ဝိမုတ္တော ဟောတိ, ဥပဋ္ဌာနဋ္ဌေန သမ္မာသတိ မိစ္ဆာသတိယာ ဝိမုတ္တာ ဟောတိ, အဝိက္ခေပဋ္ဌေန သမ္မာသမာဓိ မိစ္ဆာသမာဓိတော ဝိမုတ္တော ဟောတိ, တဒနုဝတ္တကကိလေသေဟိ စ ခန္ဓေဟိ စ ဝိမုတ္တော ဟောတိ, ဗဟိဒ္ဓါ စ သဗ္ဗနိမိတ္တေဟိ ဝိမုတ္တော ဟောတိ, ဝိမုတ္တိ ဝိမုတ္တာရမ္မဏာ ဝိမုတ္တိဂေါစရာ ဝိမုတ္တိယာ သမုဒါဂတာ ဝိမုတ္တိယာ ဌိတာ ဝိမုတ္တိယာ ပတိဋ္ဌိတာ. ဝိမုတ္တီ တိ ဒွေ ဝိမုတ္တိယော— နိဗ္ဗာနဉ္စ ဝိမုတ္တိ, ယေ စ နိဗ္ဗာနာရမ္မဏတာဇာတာ ဓမ္မာ သဗ္ဗေ ဝိမုတ္တာ ဟောန္တီတိ— ဝိမုတ္တိ ဖလံ.
သကဒါဂါမိဖလက္ခဏေ ဒဿနဋ္ဌေန သမ္မာဒိဋ္ဌိ …ပေ… အဝိက္ခေပဋ္ဌေန သမ္မာသမာဓိ ဩဠာရိကာ ကာမရာဂသညောဇနာ ပဋိဃသညောဇနာ ဩဠာရိကာ ကာမရာဂါနုသယာ ပဋိဃာနုသယာ ဝိမုတ္တော ဟောတိ, တဒနုဝတ္တကကိလေသေဟိ စ ခန္ဓေဟိ စ ဝိမုတ္တော ဟောတိ, ဗဟိဒ္ဓါ စ သဗ္ဗနိမိတ္တေဟိ ဝိမုတ္တော ဟောတိ, ဝိမုတ္တိ ဝိမုတ္တာရမ္မဏာ ဝိမုတ္တိဂေါစရာ ဝိမုတ္တိယာ သမုဒါဂတာ ဝိမုတ္တိယာ ဌိတာ ဝိမုတ္တိယာ ပတိဋ္ဌိတာ. ဝိမုတ္တီ တိ ဒွေ ဝိမုတ္တိယော— နိဗ္ဗာနဉ္စ ဝိမုတ္တိ, ယေ စ နိဗ္ဗာနာရမ္မဏတာဇာတာ ဓမ္မာ သဗ္ဗေ ဝိမုတ္တာ ဟောန္တီတိ— ဝိမုတ္တိ ဖလံ.
အနာဂါမိဖလက္ခဏေ ဒဿနဋ္ဌေန သမ္မာဒိဋ္ဌိ …ပေ… အဝိက္ခေပဋ္ဌေန သမ္မာသမာဓိ အနုသဟဂတာ ကာမရာဂသညောဇနာ ပဋိဃသညောဇနာ အနုသဟဂတာ ကာမရာဂါနုသယာ ပဋိဃာနုသယာ ဝိမုတ္တော ဟောတိ, တဒနုဝတ္တကကိလေသေဟိ စ ခန္ဓေဟိ စ ဝိမုတ္တော ဟောတိ, ဗဟိဒ္ဓါ စ သဗ္ဗနိမိတ္တေဟိ ဝိမုတ္တော ဟောတိ, ဝိမုတ္တိ ဝိမုတ္တာရမ္မဏာ ဝိမုတ္တိဂေါစရာ ဝိမုတ္တိယာ သမုဒါဂတာ ဝိမုတ္တိယာ ဌိတာ ဝိမုတ္တိယာ ပတိဋ္ဌိတာ …ပေ… .
အရဟတ္တဖလက္ခဏေ ဒဿနဋ္ဌေန သမ္မာဒိဋ္ဌိ …ပေ… အဝိက္ခေပဋ္ဌေန သမ္မာသမာဓိ ရူပရာဂါ အရူပရာဂါ မာနာ ဥဒ္ဓစ္စာ အဝိဇ္ဇာယ မာနာနုသယာ ဘဝရာဂါနုသယာ အဝိဇ္ဇာနုသယာ ဝိမုတ္တော ဟောတိ, တဒနုဝတ္တကကိလေသေဟိ စ ခန္ဓေဟိ စ ဝိမုတ္တော ဟောတိ, ဗဟိဒ္ဓါ စ သဗ္ဗနိမိတ္တေဟိ ဝိမုတ္တော ဟောတိ, ဝိမုတ္တိ ဝိမုတ္တာရမ္မဏာ ဝိမုတ္တိဂေါစရာ ဝိမုတ္တိယာ သမုဒါဂတာ ဝိမုတ္တိယာ ဌိတာ ဝိမုတ္တိယာ ပတိဋ္ဌိတာ. ဝိမုတ္တီ တိ ဒွေ ဝိမုတ္တိယော— နိဗ္ဗာနဉ္စ ဝိမုတ္တိ, ယေ စ နိဗ္ဗာနာရမ္မဏတာဇာတာ ဓမ္မာ သဗ္ဗေ ဝိမုတ္တာ ဟောန္တီတိ— ဝိမုတ္တိ ဖလံ.
ဒဿနဝိမုတ္တိ သမ္မာဒိဋ္ဌိ …ပေ… အဝိက္ခေပဝိမုတ္တိ သမ္မာသမာဓိ, ဥပဋ္ဌာနဝိမုတ္တိ သတိသမ္ဗောဇ္ဈင်္ဂေါ, ပဋိသင်္ခါနဝိမုတ္တိ ဥပေက္ခာသမ္ဗောဇ္ဈင်္ဂေါ. အဿဒ္ဓိယေ အကမ္ပိယဝိမုတ္တိ သဒ္ဓါဗလံ …ပေ… အဝိဇ္ဇာယ အကမ္ပိယဝိမုတ္တိ ပညာဗလံ. အဓိမောက္ခဝိမုတ္တိ သဒ္ဓိန္ဒြိယံ …ပေ… ဒဿနဝိမုတ္တိ ပညိန္ဒြိယံ.
အာဓိပတေယျဋ္ဌေန ဣန္ဒြိယာ ဝိမုတ္တိ. အကမ္ပိယဋ္ဌေန ဗလာ ဝိမုတ္တိ, နိယျာနဋ္ဌေန ဗောဇ္ဈင်္ဂါ ဝိမုတ္တိ, ဟေတုဋ္ဌေန မဂ္ဂေါ ဝိမုတ္တိ, ဥပဋ္ဌာနဋ္ဌေန သတိပဋ္ဌာနာ ဝိမုတ္တိ, ပဒဟနဋ္ဌေန သမ္မပ္ပဓာနာ ဝိမုတ္တိ, ဣဇ္ဈနဋ္ဌေန ဣဒ္ဓိပါဒါ ဝိမုတ္တိ, တထဋ္ဌေန သစ္စာ ဝိမုတ္တိ, အဝိက္ခေပဋ္ဌေန သမထော ဝိမုတ္တိ, အနုပဿနဋ္ဌေန ဝိပဿနာ ဝိမုတ္တိ, ဧကရသဋ္ဌေန သမထဝိပဿနာ ဝိမုတ္တိ, အနတိဝတ္တနဋ္ဌေန ယုဂနဒ္ဓံ ဝိမုတ္တိ, သံဝရဋ္ဌေန သီလဝိသုဒ္ဓိ ဝိမုတ္တိ, အဝိက္ခေပဋ္ဌေန စိတ္တဝိသုဒ္ဓိ ဝိမုတ္တိ, ဒဿနဋ္ဌေန ဒိဋ္ဌိဝိသုဒ္ဓိ ဝိမုတ္တိ, ဝိမုတ္တဋ္ဌေန ဝိမောက္ခော ဝိမုတ္တိ, ပဋိဝေဓဋ္ဌေန ဝိဇ္ဇာ ဝိမုတ္တိ, ပရိစ္စာဂဋ္ဌေန ဝိမုတ္တိ ဝိမုတ္တိ, ပဋိပ္ပဿဒ္ဓိယဋ္ဌေန အနုပ္ပါဒေ ဉာဏံ ဝိမုတ္တိ, ဆန္ဒော မူလဋ္ဌေန ဝိမုတ္တိ, မနသိကာရော သမုဋ္ဌာနဋ္ဌေန ဝိမုတ္တိ, ဖဿော သမောဓာနဋ္ဌေန ဝိမုတ္တိ, ဝေဒနာ သမောသရဏဋ္ဌေန ဝိမုတ္တိ, သမာဓိ ပမုခဋ္ဌေန ဝိမုတ္တိ, သတိ အာဓိပတေယျဋ္ဌေန ဝိမုတ္တိ, ပညာ တဒုတ္တရဋ္ဌေန ဝိမုတ္တိ, ဝိမုတ္တိ သာရဋ္ဌေန ဝိမုတ္တိ, အမတောဂဓံ နိဗ္ဗာနံ ပရိယောသာနဋ္ဌေန ဝိမုတ္တိ. ဧဝံ ဝိမုတ္တိ ဖလံ. ဧဝံ ဝိရာဂေါ မဂ္ဂေါ, ဝိမုတ္တိ ဖလန္တိ.
ဝိရာဂကထာ နိဋ္ဌိတာ.