2.6.7 သစ္စဝါရ
Review
36.
1612
“‘ယာဝတာ ဒုက္ခဿ ဒုက္ခဋ္ဌော, ဉာတော ဒိဋ္ဌော ဝိဒိတော သစ္ဆိကတော ဖဿိတော ပညာယ. အဖဿိတော ပညာယ ဒုက္ခဋ္ဌော နတ္ထီ’တိ— စက္ခုံ ဥဒပါဒိ, ဉာဏံ ဥဒပါဒိ, ပညာ ဥဒပါဒိ, ဝိဇ္ဇာ ဥဒပါဒိ, အာလောကော ဥဒပါဒိ”. ဒုက္ခဿ ဒုက္ခဋ္ဌေ ပဉ္စဝီသတိ ဓမ္မာ, ပဉ္စဝီသတိ အတ္ထာ, ပညာသံ နိရုတ္တိယော, သတံ ဉာဏာနိ.
1613
“‘ယာဝတာ သမုဒယဿ သမုဒယဋ္ဌော …ပေ… ယာဝတာ နိရောဓဿ နိရောဓဋ္ဌော …ပေ… ယာဝတာ မဂ္ဂဿ မဂ္ဂဋ္ဌော ဉာတော ဒိဋ္ဌော ဝိဒိတော သစ္ဆိကတော ဖဿိတော ပညာယ. အဖဿိတော ပညာယ မဂ္ဂဋ္ဌော နတ္ထီ’တိ— စက္ခုံ ဥဒပါဒိ …ပေ… အာလောကော ဥဒပါဒိ”. မဂ္ဂဿ မဂ္ဂဋ္ဌေ ပဉ္စဝီသတိ ဓမ္မာ, ပဉ္စဝီသတိ အတ္ထာ, ပညာသံ နိရုတ္တိယော, သတံ ဉာဏာနိ.
1614
စတူသု အရိယသစ္စေသု သတံ ဓမ္မာ, သတံ အတ္ထာ, ဒွေ နိရုတ္တိသတာနိ, စတ္တာရိ ဉာဏသတာနိ.