2.7.1 သစ္စဝါရ
ဧကံ သမယံ ဘဂဝါ ဗာရာဏသိယံ ဝိဟရတိ …ပေ… ဣတိ ဟိဒံ အာယသ္မတော ကောဏ္ဍညဿ “အညာသိကောဏ္ဍညော” တွေဝ နာမံ အဟောသိ.
“ဣဒံ ဒုက္ခံ အရိယသစ္စန်”တိ ပုဗ္ဗေ အနနုဿုတေသု ဓမ္မေသု စက္ခုံ ဥဒပါဒိ, ဉာဏံ ဥဒပါဒိ, ပညာ ဥဒပါဒိ, ဝိဇ္ဇာ ဥဒပါဒိ, အာလောကော ဥဒပါဒိ.
စက္ခုံ ဥဒပါဒီတိ— ကေနဋ္ဌေန? ဉာဏံ ဥဒပါဒီတိ— ကေနဋ္ဌေန? ပညာ ဥဒပါဒီတိ— ကေနဋ္ဌေန? ဝိဇ္ဇာ ဥဒပါဒီတိ— ကေနဋ္ဌေန? အာလောကော ဥဒပါဒီတိ— ကေနဋ္ဌေန? စက္ခုံ ဥဒပါဒီ တိ— ဒဿနဋ္ဌေန. ဉာဏံ ဥဒပါဒီ တိ— ဉာတဋ္ဌေန. ပညာ ဥဒပါဒီ တိ— ပဇာနနဋ္ဌေန. ဝိဇ္ဇာ ဥဒပါဒီ တိ— ပဋိဝေဓဋ္ဌေန. အာလောကော ဥဒပါဒီ တိ— ဩဘာသဋ္ဌေန.
စက္ခုံ ဓမ္မော, ဒဿနဋ္ဌော အတ္ထော. ဉာဏံ ဓမ္မော, ဉာတဋ္ဌော အတ္ထော. ပညာ ဓမ္မော, ပဇာနနဋ္ဌော အတ္ထော. ဝိဇ္ဇာ ဓမ္မော, ပဋိဝေဓဋ္ဌော အတ္ထော. အာလောကော ဓမ္မော, ဩဘာသဋ္ဌော အတ္ထော. ဣမေ ပဉ္စ ဓမ္မာ ပဉ္စ အတ္ထာ ဒုက္ခဝတ္ထုကာ သစ္စဝတ္ထုကာ သစ္စာရမ္မဏာ သစ္စဂေါစရာ သစ္စသင်္ဂဟိတာ သစ္စပရိယာပန္နာ သစ္စေ သမုဒါဂတာ သစ္စေ ဌိတာ သစ္စေ ပတိဋ္ဌိတာ.
ဓမ္မစက္ကန် တိ ကေနဋ္ဌေန ဓမ္မစက္ကံ? ဓမ္မဉ္စ ပဝတ္တေတိ စက္ကဉ္စာတိ— ဓမ္မစက္ကံ. စက္ကဉ္စ ပဝတ္တေတိ ဓမ္မဉ္စာတိ— ဓမ္မစက္ကံ. ဓမ္မေန ပဝတ္တေတီတိ— ဓမ္မစက္ကံ. ဓမ္မစရိယာယ ပဝတ္တေတီတိ— ဓမ္မစက္ကံ. ဓမ္မေ ဌိတော ပဝတ္တေတီတိ— ဓမ္မစက္ကံ. ဓမ္မေ ပတိဋ္ဌိတော ပဝတ္တေတီတိ— ဓမ္မစက္ကံ. ဓမ္မေ ပတိဋ္ဌာပေန္တော ပဝတ္တေတီတိ— ဓမ္မစက္ကံ. ဓမ္မေ ဝသိပ္ပတ္တော ပဝတ္တေတီတိ— ဓမ္မစက္ကံ. ဓမ္မေ ဝသိံ ပါပေန္တော ပဝတ္တေတီတိ— ဓမ္မစက္ကံ. ဓမ္မေ ပါရမိပ္ပတ္တော ပဝတ္တေတီတိ— ဓမ္မစက္ကံ. ဓမ္မေ ပါရမိံ ပါပေန္တော ပဝတ္တေတီတိ— ဓမ္မစက္ကံ. ဓမ္မေ ဝေသာရဇ္ဇပ္ပတ္တော ပဝတ္တေတီတိ— ဓမ္မစက္ကံ. ဓမ္မေ ဝေသာရဇ္ဇံ ပါပေန္တော ပဝတ္တေတီတိ— ဓမ္မစက္ကံ. ဓမ္မံ သက္ကရောန္တော ပဝတ္တေတီတိ— ဓမ္မစက္ကံ. ဓမ္မံ ဂရုံ ကရောန္တော ပဝတ္တေတီတိ— ဓမ္မစက္ကံ. ဓမ္မံ မာနေန္တော ပဝတ္တေတီတိ— ဓမ္မစက္ကံ. ဓမ္မံ ပူဇေန္တော ပဝတ္တေတီတိ— ဓမ္မစက္ကံ. ဓမ္မံ အပစာယမာနော ပဝတ္တေတီတိ— ဓမ္မစက္ကံ. ဓမ္မဒ္ဓဇော ပဝတ္တေတီတိ— ဓမ္မစက္ကံ. ဓမ္မကေတု ပဝတ္တေတီတိ— ဓမ္မစက္ကံ. ဓမ္မာဓိပတေယျော ပဝတ္တေတီတိ— ဓမ္မစက္ကံ. တံ ခေါ ပန ဓမ္မစက္ကံ အပ္ပဋိဝတ္တိယံ သမဏေန ဝါ ဗြာဟ္မဏေန ဝါ ဒေဝေန ဝါ မာရေန ဝါ ဗြဟ္မုနာ ဝါ ကေနစိ ဝါ လောကသ္မိန္တိ— ဓမ္မစက္ကံ.
သဒ္ဓိန္ဒြိယံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဝီရိယိန္ဒြိယံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သတိန္ဒြိယံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမာဓိန္ဒြိယံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ပညိန္ဒြိယံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သဒ္ဓါဗလံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဝီရိယဗလံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သတိဗလံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမာဓိဗလံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ပညာဗလံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သတိသမ္ဗောဇ္ဈင်္ဂေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဓမ္မဝိစယသမ္ဗောဇ္ဈင်္ဂေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဝီရိယသမ္ဗောဇ္ဈင်္ဂေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ပီတိသမ္ဗောဇ္ဈင်္ဂေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ပဿဒ္ဓိသမ္ဗောဇ္ဈင်္ဂေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမာဓိသမ္ဗောဇ္ဈင်္ဂေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဥပေက္ခာသမ္ဗောဇ္ဈင်္ဂေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမ္မာဒိဋ္ဌိ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမ္မာသင်္ကပ္ပေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမ္မာဝါစာ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမ္မာကမ္မန္တော ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမ္မာအာဇီဝေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမ္မာဝါယာမော ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမ္မာသတိ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမ္မာသမာဓိ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ.
အာဓိပတေယျဋ္ဌေန ဣန္ဒြိယံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. အကမ္ပိယဋ္ဌေန ဗလံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. နိယျာနိကဋ္ဌေန ဗောဇ္ဈင်္ဂေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဟေတုဋ္ဌေန မဂ္ဂေါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဥပဋ္ဌာနဋ္ဌေန သတိပဋ္ဌာနာ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ပဒဟနဋ္ဌေန သမ္မပ္ပဓာနာ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဣဇ္ဈနဋ္ဌေန ဣဒ္ဓိပါဒါ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. တထဋ္ဌေန သစ္စာ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. အဝိက္ခေပဋ္ဌေန သမထော ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. အနုပဿနဋ္ဌေန ဝိပဿနာ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဧကရသဋ္ဌေန သမထဝိပဿနာ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. အနတိဝတ္တနဋ္ဌေန ယုဂနဒ္ဓံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သံဝရဋ္ဌေန သီလဝိသုဒ္ဓိ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. အဝိက္ခေပဋ္ဌေန စိတ္တဝိသုဒ္ဓိ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဒဿနဋ္ဌေန ဒိဋ္ဌိဝိသုဒ္ဓိ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. မုတ္တဋ္ဌေန ဝိမောက္ခော ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ပဋိဝေဓဋ္ဌေန ဝိဇ္ဇာ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ပရိစ္စာဂဋ္ဌေန ဝိမုတ္တိ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမုစ္ဆေဒဋ္ဌေန ခယေ ဉာဏံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ပဋိပ္ပဿဒ္ဓဋ္ဌေန အနုပ္ပါဒေ ဉာဏံ ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဆန္ဒော မူလဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. မနသိကာရော သမုဋ္ဌာနဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဖဿော သမောဓာနဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဝေဒနာ သမောသရဏဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သမာဓိ ပမုခဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. သတိ အာဓိပတေယျဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ပညာ တဒုတ္တရဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. ဝိမုတ္တိ သာရဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ. အမတောဂဓံ နိဗ္ဗာနံ ပရိယောသာနဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ.
“တံ ခေါ ပနိဒံ ဒုက္ခံ အရိယသစ္စံ ပရိညေယျန်”တိ …ပေ… ပရိညာတန္တိ ပုဗ္ဗေ အနနုဿုတေသု ဓမ္မေသု စက္ခုံ ဥဒပါဒိ …ပေ… အာလောကော ဥဒပါဒိ.
စက္ခုံ ဥဒပါဒီတိ— ကေနဋ္ဌေန …ပေ… အာလောကော ဥဒပါဒီတိ— ကေနဋ္ဌေန? စက္ခုံ ဥဒပါဒီ တိ— ဒဿနဋ္ဌေန …ပေ… အာလောကော ဥဒပါဒီ တိ— ဩဘာသဋ္ဌေန. စက္ခုံ ဓမ္မော, ဒဿနဋ္ဌော အတ္ထော …ပေ… အာလောကော ဓမ္မော, ဩဘာသဋ္ဌော အတ္ထော. ဣမေ ပဉ္စ ဓမ္မာ ပဉ္စ အတ္ထာ ဒုက္ခဝတ္ထုကာ သစ္စဝတ္ထုကာ သစ္စာရမ္မဏာ သစ္စဂေါစရာ သစ္စသင်္ဂဟိတာ သစ္စပရိယာပန္နာ သစ္စေ သမုဒါဂတာ သစ္စေ ဌိတာ သစ္စေ ပတိဋ္ဌိတာ.
ဓမ္မစက္ကန် တိ ကေနဋ္ဌေန ဓမ္မစက္ကံ? ဓမ္မဉ္စ ပဝတ္တေတိ စက္ကဉ္စာတိ— ဓမ္မစက္ကံ. စက္ကဉ္စ ပဝတ္တေတိ ဓမ္မဉ္စာတိ— ဓမ္မစက္ကံ. ဓမ္မေန ပဝတ္တေတီတိ— ဓမ္မစက္ကံ. ဓမ္မစရိယာယ ပဝတ္တေတီတိ— ဓမ္မစက္ကံ. ဓမ္မေ ဌိတော ပဝတ္တေတီတိ— ဓမ္မစက္ကံ. ဓမ္မေ ပတိဋ္ဌိတော ပဝတ္တေတီတိ— ဓမ္မစက္ကံ …ပေ… အမတောဂဓံ နိဗ္ဗာနံ ပရိယောသာနဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ.
“ဣဒံ ဒုက္ခသမုဒယံ အရိယသစ္စန်”တိ ပုဗ္ဗေ အနနုဿုတေသု ဓမ္မေသု စက္ခုံ ဥဒပါဒိ …ပေ… အာလောကော ဥဒပါဒိ …ပေ… “တံ ခေါ ပနိဒံ ဒုက္ခသမုဒယံ အရိယသစ္စံ ပဟာတဗ္ဗန်”တိ …ပေ… “ပဟီနန်”တိ ပုဗ္ဗေ အနနုဿုတေသု ဓမ္မေသု စက္ခုံ ဥဒပါဒိ …ပေ… အာလောကော ဥဒပါဒိ.
စက္ခုံ ဥဒပါဒီတိ— ကေနဋ္ဌေန …ပေ… အာလောကော ဥဒပါဒီတိ— ကေနဋ္ဌေန? စက္ခုံ ဥဒပါဒီ တိ— ဒဿနဋ္ဌေန …ပေ… အာလောကော ဥဒပါဒီ တိ— ဩဘာသဋ္ဌေန.
စက္ခုံ ဓမ္မော, ဒဿနဋ္ဌော အတ္ထော …ပေ… အာလောကော ဓမ္မော, ဩဘာသဋ္ဌော အတ္ထော. ဣမေ ပဉ္စ ဓမ္မာ ပဉ္စ အတ္ထာ သမုဒယဝတ္ထုကာ သစ္စဝတ္ထုကာ …ပေ… နိရောဓဝတ္ထုကာ သစ္စဝတ္ထုကာ …ပေ… မဂ္ဂဝတ္ထုကာ သစ္စဝတ္ထုကာ သစ္စာရမ္မဏာ သစ္စဂေါစရာ သစ္စသင်္ဂဟိတာ သစ္စပရိယာပန္နာ သစ္စေ သမုဒါဂတာ သစ္စေ ဌိတာ သစ္စေ ပတိဋ္ဌိတာ.
ဓမ္မစက္ကန် တိ ကေနဋ္ဌေန ဓမ္မစက္ကံ? ဓမ္မဉ္စ ပဝတ္တေတိ စက္ကဉ္စာတိ— ဓမ္မစက္ကံ. စက္ကဉ္စ ပဝတ္တေတိ ဓမ္မဉ္စာတိ— ဓမ္မစက္ကံ. ဓမ္မေန ပဝတ္တေတီတိ— ဓမ္မစက္ကံ. ဓမ္မစရိယာယ ပဝတ္တေတီတိ— ဓမ္မစက္ကံ. ဓမ္မေ ဌိတော ပဝတ္တေတီတိ— ဓမ္မစက္ကံ. ဓမ္မေ ပတိဋ္ဌိတော ပဝတ္တေတီတိ— ဓမ္မစက္ကံ …ပေ… အမတောဂဓံ နိဗ္ဗာနံ ပရိယောသာနဋ္ဌေန ဓမ္မော တံ ဓမ္မံ ပဝတ္တေတီတိ— ဓမ္မစက္ကံ.