2.9 ဗလကထာ
သာဝတ္ထိနိဒါနံ. “ပဉ္စိမာနိ, ဘိက္ခဝေ, ဗလာနိ. ကတမာနိ ပဉ္စ? သဒ္ဓါဗလံ, ဝီရိယဗလံ, သတိဗလံ, သမာဓိဗလံ, ပညာဗလံ— ဣမာနိ ခေါ, ဘိက္ခဝေ, ပဉ္စ ဗလာနိ.
အပိ စ အဋ္ဌသဋ္ဌိ ဗလာနိ— သဒ္ဓါဗလံ, ဝီရိယဗလံ, သတိဗလံ, သမာဓိဗလံ, ပညာဗလံ, ဟိရိဗလံ, ဩတ္တပ္ပဗလံ, ပဋိသင်္ခါနဗလံ, ဘာဝနာဗလံ, အနဝဇ္ဇဗလံ, သင်္ဂဟဗလံ, ခန္တိဗလံ, ပညတ္တိဗလံ, နိဇ္ဈတ္တိဗလံ, ဣဿရိယဗလံ, အဓိဋ္ဌာနဗလံ, သမထဗလံ, ဝိပဿနာဗလံ, ဒသ သေခဗလာနိ, ဒသ အသေခဗလာနိ, ဒသ ခီဏာသဝဗလာနိ, ဒသ ဣဒ္ဓိဗလာနိ, ဒသ တထာဂတဗလာနိ”.
ကတမံ သဒ္ဓါဗလံ? အဿဒ္ဓိယေ န ကမ္ပတီတိ— သဒ္ဓါဗလံ. သဟဇာတာနံ ဓမ္မာနံ ဥပတ္ထမ္ဘနဋ္ဌေန သဒ္ဓါဗလံ, ကိလေသာနံ ပရိယာဒါနဋ္ဌေန သဒ္ဓါဗလံ, ပဋိဝေဓာဒိဝိသောဓနဋ္ဌေန သဒ္ဓါဗလံ, စိတ္တဿ အဓိဋ္ဌာနဋ္ဌေန သဒ္ဓါဗလံ, စိတ္တဿ ဝေါဒါနဋ္ဌေန သဒ္ဓါဗလံ, ဝိသေသာဓိဂမဋ္ဌေန သဒ္ဓါဗလံ, ဥတ္တရိပဋိဝေဓဋ္ဌေန သဒ္ဓါဗလံ, သစ္စာဘိသမယဋ္ဌေန သဒ္ဓါဗလံ, နိရောဓေ ပတိဋ္ဌာပကဋ္ဌေန သဒ္ဓါဗလံ. ဣဒံ သဒ္ဓါဗလံ. (1)
ကတမံ ဝီရိယဗလံ? ကောသဇ္ဇေ န ကမ္ပတီတိ— ဝီရိယဗလံ. သဟဇာတာနံ ဓမ္မာနံ ဥပတ္ထမ္ဘနဋ္ဌေန ဝီရိယဗလံ, ကိလေသာနံ ပရိယာဒါနဋ္ဌေန ဝီရိယဗလံ, ပဋိဝေဓာဒိဝိသောဓနဋ္ဌေန ဝီရိယဗလံ, စိတ္တဿ အဓိဋ္ဌာနဋ္ဌေန ဝီရိယဗလံ, စိတ္တဿ ဝေါဒါနဋ္ဌေန ဝီရိယဗလံ, ဝိသေသာဓိဂမဋ္ဌေန ဝီရိယဗလံ, ဥတ္တရိပဋိဝေဓဋ္ဌေန ဝီရိယဗလံ, သစ္စာဘိသမယဋ္ဌေန ဝီရိယဗလံ, နိရောဓေ ပတိဋ္ဌာပကဋ္ဌေန ဝီရိယဗလံ. ဣဒံ ဝီရိယဗလံ. (2)
ကတမံ သတိဗလံ? ပမာဒေ န ကမ္ပတီတိ— သတိဗလံ. သဟဇာတာနံ ဓမ္မာနံ ဥပတ္ထမ္ဘနဋ္ဌေန သတိဗလံ …ပေ… နိရောဓေ ပတိဋ္ဌာပကဋ္ဌေန သတိဗလံ. ဣဒံ သတိဗလံ. (3)
ကတမံ သမာဓိဗလံ? ဥဒ္ဓစ္စေ န ကမ္ပတီတိ— သမာဓိဗလံ. သဟဇာတာနံ ဓမ္မာနံ ဥပတ္ထမ္ဘနဋ္ဌေန သမာဓိဗလံ …ပေ… နိရောဓေ ပတိဋ္ဌာပကဋ္ဌေန သမာဓိဗလံ. ဣဒံ သမာဓိဗလံ. (4)
ကတမံ ပညာဗလံ? အဝိဇ္ဇာယ န ကမ္ပတီတိ— ပညာဗလံ. သဟဇာတာနံ ဓမ္မာနံ ဥပတ္ထမ္ဘနဋ္ဌေန ပညာဗလံ …ပေ… နိရောဓေ ပတိဋ္ဌာပကဋ္ဌေန ပညာဗလံ. ဣဒံ ပညာဗလံ. (5)
ကတမံ ဟိရိဗလံ? နေက္ခမ္မေန ကာမစ္ဆန္ဒံ ဟိရီယတီတိ— ဟိရိဗလံ. အဗျာပါဒေန ဗျာပါဒံ ဟိရီယတီတိ— ဟိရိဗလံ. အာလောကသညာယ ထိနမိဒ္ဓံ ဟိရီယတီတိ— ဟိရိဗလံ. အဝိက္ခေပေန ဥဒ္ဓစ္စံ ဟိရီယတီတိ— ဟိရိဗလံ. ဓမ္မဝဝတ္ထာနေန ဝိစိကိစ္ဆံ ဟိရီယတီတိ— ဟိရိဗလံ. ဉာဏေန အဝိဇ္ဇံ ဟိရီယတီတိ— ဟိရိဗလံ. ပါမောဇ္ဇေန အရတိံ ဟိရီယတီတိ— ဟိရိဗလံ. ပဌမေန ဈာနေန နီဝရဏေ ဟိရီယတီတိ— ဟိရိဗလံ …ပေ… အရဟတ္တမဂ္ဂေန သဗ္ဗကိလေသေ ဟိရီယတီတိ— ဟိရိဗလံ. ဣဒံ ဟိရိဗလံ. (6)
ကတမံ ဩတ္တပ္ပဗလံ? နေက္ခမ္မေန ကာမစ္ဆန္ဒံ ဩတ္တပ္ပတီတိ— ဩတ္တပ္ပဗလံ. အဗျာပါဒေန ဗျာပါဒံ ဩတ္တပ္ပတီတိ— ဩတ္တပ္ပဗလံ. အာလောကသညာယ ထိနမိဒ္ဓံ ဩတ္တပ္ပတီတိ— ဩတ္တပ္ပဗလံ. အဝိက္ခေပေန ဥဒ္ဓစ္စံ ဩတ္တပ္ပတီတိ— ဩတ္တပ္ပဗလံ. ဓမ္မဝဝတ္ထာနေန ဝိစိကိစ္ဆံ ဩတ္တပ္ပတီတိ— ဩတ္တပ္ပဗလံ. ဉာဏေန အဝိဇ္ဇံ ဩတ္တပ္ပတီတိ— ဩတ္တပ္ပဗလံ. ပါမောဇ္ဇေန အရတိံ ဩတ္တပ္ပတီတိ— ဩတ္တပ္ပဗလံ. ပဌမေန ဈာနေန နီဝရဏေ ဩတ္တပ္ပတီတိ— ဩတ္တပ္ပဗလံ …ပေ… အရဟတ္တမဂ္ဂေန သဗ္ဗကိလေသေ ဩတ္တပ္ပတီတိ— ဩတ္တပ္ပဗလံ. ဣဒံ ဩတ္တပ္ပဗလံ. (7)
ကတမံ ပဋိသင်္ခါနဗလံ? နေက္ခမ္မေန ကာမစ္ဆန္ဒံ ပဋိသင်္ခါတီတိ— ပဋိသင်္ခါနဗလံ. အဗျာပါဒေန ဗျာပါဒံ ပဋိသင်္ခါတီတိ— ပဋိသင်္ခါနဗလံ. အာလောကသညာယ ထိနမိဒ္ဓံ ပဋိသင်္ခါတီတိ— ပဋိသင်္ခါနဗလံ. အဝိက္ခေပေန ဥဒ္ဓစ္စံ ပဋိသင်္ခါတီတိ— ပဋိသင်္ခါနဗလံ. ဓမ္မဝဝတ္ထာနေန ဝိစိကိစ္ဆံ ပဋိသင်္ခါတီတိ— ပဋိသင်္ခါနဗလံ. ဉာဏေန အဝိဇ္ဇံ ပဋိသင်္ခါတီတိ— ပဋိသင်္ခါနဗလံ. ပါမောဇ္ဇေန အရတိံ ပဋိသင်္ခါတီတိ— ပဋိသင်္ခါနဗလံ. ပဌမေန ဈာနေန နီဝရဏေ ပဋိသင်္ခါတီတိ— ပဋိသင်္ခါနဗလံ …ပေ… အရဟတ္တမဂ္ဂေန သဗ္ဗကိလေသေ ပဋိသင်္ခါတီတိ— ပဋိသင်္ခါနဗလံ. ဣဒံ ပဋိသင်္ခါနဗလံ. (8)
ကတမံ ဘာဝနာဗလံ? ကာမစ္ဆန္ဒံ ပဇဟန္တော နေက္ခမ္မံ ဘာဝေတီတိ— ဘာဝနာဗလံ. ဗျာပါဒံ ပဇဟန္တော အဗျာပါဒံ ဘာဝေတီတိ— ဘာဝနာဗလံ. ထိနမိဒ္ဓံ ပဇဟန္တော အာလောကသညံ ဘာဝေတီတိ— ဘာဝနာဗလံ. ဥဒ္ဓစ္စံ ပဇဟန္တော အဝိက္ခေပံ ဘာဝေတီတိ— ဘာဝနာဗလံ. ဝိစိကိစ္ဆံ ပဇဟန္တော ဓမ္မဝဝတ္ထာနံ ဘာဝေတီတိ— ဘာဝနာဗလံ. အဝိဇ္ဇံ ပဇဟန္တော ဉာဏံ ဘာဝေတီတိ— ဘာဝနာဗလံ. အရတိံ ပဇဟန္တော ပါမောဇ္ဇံ ဘာဝေတီတိ— ဘာဝနာဗလံ. နီဝရဏေ ပဇဟန္တော ပဌမံ ဈာနံ ဘာဝေတီတိ— ဘာဝနာဗလံ …ပေ… သဗ္ဗကိလေသေ ပဇဟန္တော အရဟတ္တမဂ္ဂံ ဘာဝေတီတိ— ဘာဝနာဗလံ. ဣဒံ ဘာဝနာဗလံ. (9)
ကတမံ အနဝဇ္ဇဗလံ? ကာမစ္ဆန္ဒဿ ပဟီနတ္တာ နေက္ခမ္မေ နတ္ထိ ကိဉ္စိ ဝဇ္ဇန္တိ— အနဝဇ္ဇဗလံ. ဗျာပါဒဿ ပဟီနတ္တာ အဗျာပါဒေ နတ္ထိ ကိဉ္စိ ဝဇ္ဇန္တိ— အနဝဇ္ဇဗလံ. ထိနမိဒ္ဓဿ ပဟီနတ္တာ အာလောကသညာယ နတ္ထိ ကိဉ္စိ ဝဇ္ဇန္တိ— အနဝဇ္ဇဗလံ. ဥဒ္ဓစ္စဿ ပဟီနတ္တာ အဝိက္ခေပေ နတ္ထိ ကိဉ္စိ ဝဇ္ဇန္တိ— အနဝဇ္ဇဗလံ. ဝိစိကိစ္ဆာယ ပဟီနတ္တာ ဓမ္မဝဝတ္ထာနေ နတ္ထိ ကိဉ္စိ ဝဇ္ဇန္တိ— အနဝဇ္ဇဗလံ. အဝိဇ္ဇာယ ပဟီနတ္တာ ဉာဏေ နတ္ထိ ကိဉ္စိ ဝဇ္ဇန္တိ— အနဝဇ္ဇဗလံ. အရတိယာ ပဟီနတ္တာ ပါမောဇ္ဇေ နတ္ထိ ကိဉ္စိ ဝဇ္ဇန္တိ အနဝဇ္ဇဗလံ. နီဝရဏာနံ ပဟီနတ္တာ ပဌမဇ္ဈာနေ နတ္ထိ ကိဉ္စိ ဝဇ္ဇန္တိ— အနဝဇ္ဇဗလံ …ပေ… သဗ္ဗကိလေသာနံ ပဟီနတ္တာ အရဟတ္တမဂ္ဂေ နတ္ထိ ကိဉ္စိ ဝဇ္ဇန္တိ— အနဝဇ္ဇဗလံ. ဣဒံ အနဝဇ္ဇဗလံ. (10)
ကတမံ သင်္ဂဟဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ သင်္ဂဏှာတီတိ— သင်္ဂဟဗလံ. ဗျာပါဒံ ပဇဟန္တော အဗျာပါဒဝသေန စိတ္တံ သင်္ဂဏှာတီတိ— သင်္ဂဟဗလံ. ထိနမိဒ္ဓံ ပဇဟန္တော အာလောကသညာဝသေန စိတ္တံ သင်္ဂဏှာတီတိ— သင်္ဂဟဗလံ …ပေ… သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ သင်္ဂဏှာတီတိ— သင်္ဂဟဗလံ. ဣဒံ သင်္ဂဟဗလံ. (11)
ကတမံ ခန္တိဗလံ? ကာမစ္ဆန္ဒဿ ပဟီနတ္တာ နေက္ခမ္မံ ခမတီတိ— ခန္တိဗလံ. ဗျာပါဒဿ ပဟီနတ္တာ အဗျာပါဒေါ ခမတီတိ— ခန္တိဗလံ. ထိနမိဒ္ဓဿ ပဟီနတ္တာ အာလောကသညာ ခမတီတိ— ခန္တိဗလံ. ဥဒ္ဓစ္စဿ ပဟီနတ္တာ အဝိက္ခေပေါ ခမတီတိ— ခန္တိဗလံ. ဝိစိကိစ္ဆာယ ပဟီနတ္တာ ဓမ္မဝဝတ္ထာနံ ခမတီတိ— ခန္တိဗလံ. အဝိဇ္ဇာယ ပဟီနတ္တာ ဉာဏံ ခမတီတိ— ခန္တိဗလံ. အရတိယာ ပဟီနတ္တာ ပါမောဇ္ဇံ ခမတီတိ— ခန္တိဗလံ. နီဝရဏာနံ ပဟီနတ္တာ ပဌမံ ဈာနံ ခမတီတိ— ခန္တိဗလံ …ပေ… သဗ္ဗကိလေသာနံ ပဟီနတ္တာ အရဟတ္တမဂ္ဂေါ ခမတီတိ— ခန္တိဗလံ. ဣဒံ ခန္တိဗလံ. (12)
ကတမံ ပညတ္တိဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ ပညာပေတီတိ— ပညတ္တိဗလံ. ဗျာပါဒံ ပဇဟန္တော အဗျာပါဒဝသေန စိတ္တံ ပညာပေတီတိ— ပညတ္တိဗလံ. ထိနမိဒ္ဓံ ပဇဟန္တော အာလောကသညာဝသေန စိတ္တံ ပညာပေတီတိ— ပညတ္တိဗလံ …ပေ… သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ ပညာပေတီတိ— ပညတ္တိဗလံ. ဣဒံ ပညတ္တိဗလံ. (13)
ကတမံ နိဇ္ဈတ္တိဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ နိဇ္ဈာပေတီတိ— နိဇ္ဈတ္တိဗလံ. ဗျာပါဒံ ပဇဟန္တော အဗျာပါဒဝသေန စိတ္တံ နိဇ္ဈာပေတီတိ— နိဇ္ဈတ္တိဗလံ. ထိနမိဒ္ဓံ ပဇဟန္တော အာလောကသညာဝသေန စိတ္တံ နိဇ္ဈာပေတီတိ— နိဇ္ဈတ္တိဗလံ …ပေ… သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ နိဇ္ဈာပေတီတိ— နိဇ္ဈတ္တိဗလံ. ဣဒံ နိဇ္ဈတ္တိဗလံ. (14)
ကတမံ ဣဿရိယဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ ဝသံ ဝတ္တေတီတိ— ဣဿရိယဗလံ. ဗျာပါဒံ ပဇဟန္တော အဗျာပါဒဝသေန စိတ္တံ ဝသံ ဝတ္တေတီတိ— ဣဿရိယဗလံ. ထိနမိဒ္ဓံ ပဇဟန္တော အာလောကသညာဝသေန စိတ္တံ ဝသံ ဝတ္တေတီတိ— ဣဿရိယဗလံ …ပေ… သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ ဝသံ ဝတ္တေတီတိ— ဣဿရိယဗလံ. ဣဒံ ဣဿရိယဗလံ. (15)
ကတမံ အဓိဋ္ဌာနဗလံ? ကာမစ္ဆန္ဒံ ပဇဟန္တော နေက္ခမ္မဝသေန စိတ္တံ အဓိဋ္ဌာတီတိ— အဓိဋ္ဌာနဗလံ. ဗျာပါဒံ ပဇဟန္တော အဗျာပါဒဝသေန စိတ္တံ အဓိဋ္ဌာတီတိ— အဓိဋ္ဌာနဗလံ. ထိနမိဒ္ဓံ ပဇဟန္တော အာလောကသညာဝသေန စိတ္တံ အဓိဋ္ဌာတီတိ— အဓိဋ္ဌာနဗလံ …ပေ… သဗ္ဗကိလေသေ ပဇဟန္တော အရဟတ္တမဂ္ဂဝသေန စိတ္တံ အဓိဋ္ဌာတီတိ— အဓိဋ္ဌာနဗလံ. ဣဒံ အဓိဋ္ဌာနဗလံ. (16)
ကတမံ သမထဗလံ? နေက္ခမ္မဝသေန စိတ္တဿ ဧကဂ္ဂတာ အဝိက္ခေပေါ သမထဗလံ, အဗျာပါဒဝသေန စိတ္တဿ ဧကဂ္ဂတာ အဝိက္ခေပေါ သမထဗလံ, အာလောကသညာဝသေန စိတ္တဿ ဧကဂ္ဂတာ အဝိက္ခေပေါ သမထဗလံ …ပေ… ပဋိနိဿဂ္ဂါနုပဿီ အဿာသဝသေန စိတ္တဿ ဧကဂ္ဂတာ အဝိက္ခေပေါ သမထဗလံ, ပဋိနိဿဂ္ဂါနုပဿီ ပဿာသဝသေန စိတ္တဿ ဧကဂ္ဂတာ အဝိက္ခေပေါ သမထဗလံ.
သမထဗလန် တိ ကေနဋ္ဌေန သမထဗလံ? ပဌမေန ဈာနေန နီဝရဏေ န ကမ္ပတီတိ— သမထဗလံ. ဒုတိယေန ဈာနေန ဝိတက္ကဝိစာရေ န ကမ္ပတီတိ— သမထဗလံ. တတိယေန ဈာနေန ပီတိယာ န ကမ္ပတီတိ— သမထဗလံ. စတုတ္ထေန ဈာနေန သုခဒုက္ခေ န ကမ္ပတီတိ— သမထဗလံ. အာကာသာနဉ္စာယတနသမာပတ္တိယာ ရူပသညာယ ပဋိဃသညာယ နာနတ္တသညာယ န ကမ္ပတီတိ— သမထဗလံ. ဝိညာဏဉ္စာယတနသမာပတ္တိယာ အာကာသာနဉ္စာယတနသညာယ န ကမ္ပတီတိ— သမထဗလံ. အာကိဉ္စညာယတနသမာပတ္တိယာ ဝိညာဏဉ္စာယတနသညာယ န ကမ္ပတီတိ— သမထဗလံ. နေဝသညာနာသညာယတနသမာပတ္တိယာ အာကိဉ္စညာယတနသညာယ န ကမ္ပတီတိ— သမထဗလံ. ဥဒ္ဓစ္စေ စ ဥဒ္ဓစ္စသဟဂတကိလေသေ စ ခန္ဓေ စ န ကမ္ပတိ န စလတိ န ဝေဓတီတိ— သမထဗလံ. ဣဒံ သမထဗလံ. (17)
ကတမံ ဝိပဿနာဗလံ ? အနိစ္စာနုပဿနာ ဝိပဿနာဗလံ, ဒုက္ခာနုပဿနာ ဝိပဿနာဗလံ …ပေ… ပဋိနိဿဂ္ဂါနုပဿနာ ဝိပဿနာဗလံ, ရူပေ အနိစ္စာနုပဿနာ ဝိပဿနာဗလံ, ရူပေ ဒုက္ခာနုပဿနာ ဝိပဿနာဗလံ …ပေ… ရူပေ ပဋိနိဿဂ္ဂါနုပဿနာ ဝိပဿနာဗလံ, ဝေဒနာယ …ပေ… သညာယ… သင်္ခါရေသု… ဝိညာဏေ… စက္ခုသ္မိံ …ပေ… ဇရာမရဏေ အနိစ္စာနုပဿနာ ဝိပဿနာဗလံ, ဇရာမရဏေ ဒုက္ခာနုပဿနာ ဝိပဿနာဗလံ …ပေ… ဇရာမရဏေ ပဋိနိဿဂ္ဂါနုပဿနာ ဝိပဿနာဗလံ. ဝိပဿနာဗလန် တိ ကေနဋ္ဌေန ဝိပဿနာဗလံ? အနိစ္စာနုပဿနာယ နိစ္စသညာယ န ကမ္ပတီတိ— ဝိပဿနာဗလံ. ဒုက္ခာနုပဿနာယ သုခသညာယ န ကမ္ပတီတိ— ဝိပဿနာဗလံ. အနတ္တာနုပဿနာယ အတ္တသညာယ ကမ္ပတီတိ— ဝိပဿနာဗလံ. နိဗ္ဗိဒါနုပဿနာယ နန္ဒိယာ န ကမ္ပတီတိ— ဝိပဿနာဗလံ. ဝိရာဂါနုပဿနာယ ရာဂေ န ကမ္ပတီတိ— ဝိပဿနာဗလံ. နိရောဓာနုပဿနာယ သမုဒယေ န ကမ္ပတီတိ— ဝိပဿနာဗလံ. ပဋိနိဿဂ္ဂါနုပဿနာယ အာဒါနေ န ကမ္ပတီတိ— ဝိပဿနာဗလံ. အဝိဇ္ဇာယ စ အဝိဇ္ဇာသဟဂတကိလေသေ စ ခန္ဓေ စ န ကမ္ပတိ န စလတိ န ဝေဓတီတိ— ဝိပဿနာဗလံ. ဣဒံ ဝိပဿနာဗလံ. (18:18)
ကတမာနိ ဒသ သေခဗလာနိ, ဒသ အသေခဗလာနိ? သမ္မာဒိဋ္ဌိံ သိက္ခတီတိ— သေခဗလံ. တတ္ထ သိက္ခိတတ္တာ အသေခဗလံ. သမ္မာသင်္ကပ္ပံ သိက္ခတီတိ— သေခဗလံ. တတ္ထ သိက္ခိတတ္တာ— အသေခဗလံ. သမ္မာဝါစံ …ပေ… သမ္မာကမ္မန္တံ… သမ္မာအာဇီဝံ… သမ္မာဝါယာမံ… သမ္မာသတိံ… သမ္မာသမာဓိံ… သမ္မာဉာဏံ …ပေ… သမ္မာဝိမုတ္တိံ သိက္ခတီတိ— သေခဗလံ. တတ္ထ သိက္ခိတတ္တာ— အသေခဗလံ. ဣမာနိ ဒသ သေခဗလာနိ, ဒသ အသေခဗလာနိ. (1–20:38)
ကတမာနိ ဒသ ခီဏာသဝဗလာနိ? ဣဓ ခီဏာသဝဿ ဘိက္ခုနော အနိစ္စတော သဗ္ဗေ သင်္ခါရာ ယထာဘူတံ သမ္မပ္ပညာယ သုဒိဋ္ဌာ ဟောန္တိ. ယမ္ပိ ခီဏာသဝဿ ဘိက္ခုနော အနိစ္စတော သဗ္ဗေ သင်္ခါရာ ယထာဘူတံ သမ္မပ္ပညာယ သုဒိဋ္ဌာ ဟောန္တိ, ဣဒမ္ပိ ခီဏာသဝဿ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝေါ ဘိက္ခု အာသဝါနံ ခယံ ပဋိဇာနာတိ— “ခီဏာ မေ အာသဝါ”တိ. (1)
ပုန စပရံ ခီဏာသဝဿ ဘိက္ခုနော အင်္ဂါရကာသူပမာ ကာမာ ယထာဘူတံ သမ္မပ္ပညာယ သုဒိဋ္ဌာ ဟောန္တိ. ယမ္ပိ ခီဏာသဝဿ ဘိက္ခုနော အင်္ဂါရကာသူပမာ ကာမာ ယထာဘူတံ သမ္မပ္ပညာယ သုဒိဋ္ဌာ ဟောန္တိ, ဣဒမ္ပိ ခီဏာသဝဿ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝေါ ဘိက္ခု အာသဝါနံ ခယံ ပဋိဇာနာတိ— “ခီဏာ မေ အာသဝါ”တိ. (2)
ပုန စပရံ ခီဏာသဝဿ ဘိက္ခုနော ဝိဝေကနိန္နံ စိတ္တံ ဟောတိ ဝိဝေကပေါဏံ ဝိဝေကပဗ္ဘာရံ ဝိဝေကဋ္ဌံ နေက္ခမ္မာဘိရတံ ဗျန္တီဘူတံ သဗ္ဗသော အာသဝဋ္ဌာနိယေဟိ ဓမ္မေဟိ. ယမ္ပိ ခီဏာသဝဿ ဘိက္ခုနော ဝိဝေကနိန္နံ စိတ္တံ ဟောတိ ဝိဝေကပေါဏံ ဝိဝေကပဗ္ဘာရံ ဝိဝေကဋ္ဌံ နေက္ခမ္မာဘိရတံ ဗျန္တီဘူတံ သဗ္ဗသော အာသဝဋ္ဌာနိယေဟိ ဓမ္မေဟိ, ဣဒမ္ပိ ခီဏာသဝဿ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝေါ ဘိက္ခု အာသဝါနံ ခယံ ပဋိဇာနာတိ— “ခီဏာ မေ အာသဝါ”တိ. (3)
ပုန စပရံ ခီဏာသဝဿ ဘိက္ခုနော စတ္တာရော သတိပဋ္ဌာနာ ဘာဝိတာ ဟောန္တိ သုဘာဝိတာ. ယမ္ပိ ခီဏာသဝဿ ဘိက္ခုနော စတ္တာရော သတိပဋ္ဌာနာ ဘာဝိတာ ဟောန္တိ သုဘာဝိတာ, ဣဒမ္ပိ ခီဏာသဝဿ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝေါ ဘိက္ခု အာသဝါနံ ခယံ ပဋိဇာနာတိ— “ခီဏာ မေ အာသဝါ”တိ. (4)
ပုန စပရံ ခီဏာသဝဿ ဘိက္ခုနော စတ္တာရော သမ္မပ္ပဓာနာ ဘာဝိတာ ဟောန္တိ သုဘာဝိတာ …ပေ… စတ္တာရော ဣဒ္ဓိပါဒါ ဘာဝိတာ ဟောန္တိ သုဘာဝိတာ… ပဉ္စိန္ဒြိယာနိ ဘာဝိတာနိ ဟောန္တိ သုဘာဝိတာနိ… ပဉ္စ ဗလာနိ ဘာဝိတာနိ ဟောန္တိ သုဘာဝိတာနိ… သတ္တ ဗောဇ္ဈင်္ဂါ ဘာဝိတာ ဟောန္တိ သုဘာဝိတာ …ပေ… အရိယော အဋ္ဌင်္ဂိကော မဂ္ဂေါ ဘာဝိတော ဟောတိ သုဘာဝိတော. ယမ္ပိ ခီဏာသဝဿ ဘိက္ခုနော အဋ္ဌင်္ဂိကော မဂ္ဂေါ ဘာဝိတော ဟောတိ သုဘာဝိတော, ဣဒမ္ပိ ခီဏာသဝဿ ဘိက္ခုနော ဗလံ ဟောတိ, ယံ ဗလံ အာဂမ္မ ခီဏာသဝေါ ဘိက္ခု အာသဝါနံ ခယံ ပဋိဇာနာတိ— “ခီဏာ မေ အာသဝါ”တိ. ဣမာနိ ဒသ ခီဏာသဝဗလာနိ. (5–10:48)
ကတမာနိ ဒသ ဣဒ္ဓိဗလာနိ? အဓိဋ္ဌာနာ ဣဒ္ဓိ, ဝိကုဗ္ဗနာ ဣဒ္ဓိ, မနောမယာ ဣဒ္ဓိ, ဉာဏဝိပ္ဖါရာ ဣဒ္ဓိ, သမာဓိဝိပ္ဖါရာ ဣဒ္ဓိ, အရိယာ ဣဒ္ဓိ, ကမ္မဝိပါကဇာ ဣဒ္ဓိ, ပုညဝတော ဣဒ္ဓိ, ဝိဇ္ဇာမယာ ဣဒ္ဓိ, တတ္ထ တတ္ထ သမ္မာ ပယောဂပ္ပစ္စယာ ဣဇ္ဈနဋ္ဌေန ဣဒ္ဓိ— ဣမာနိ ဒသ ဣဒ္ဓိဗလာနိ. (1–10:58)
ကတမာနိ ဒသ တထာဂတဗလာနိ? ဣဓ တထာဂတော ဌာနဉ္စ ဌာနတော အဋ္ဌာနဉ္စ အဋ္ဌာနတော ယထာဘူတံ ပဇာနာတိ. ယမ္ပိ တထာဂတော ဌာနဉ္စ ဌာနတော အဋ္ဌာနဉ္စ အဋ္ဌာနတော ယထာဘူတံ ပဇာနာတိ, ဣဒမ္ပိ တထာဂတဿ တထာဂတဗလံ ဟောတိ, ယံ ဗလံ အာဂမ္မ တထာဂတော အာသဘံ ဌာနံ ပဋိဇာနာတိ ပရိသာသု သီဟနာဒံ နဒတိ, ဗြဟ္မစက္ကံ ပဝတ္တေတိ. (1)
ပုန စပရံ တထာဂတော အတီတာနာဂတပစ္စုပ္ပန္နာနံ ကမ္မသမာဒါနာနံ ဌာနသော ဟေတုသော ဝိပါကံ ယထာဘူတံ ပဇာနာတိ. ယမ္ပိ တထာဂတော အတီတာနာဂတပစ္စုပ္ပန္နာနံ ကမ္မသမာဒါနာနံ ဌာနသော ဟေတုသော ဝိပါကံ ယထာဘူတံ ပဇာနာတိ, ဣဒမ္ပိ တထာဂတဿ တထာဂတဗလံ ဟောတိ, ယံ ဗလံ အာဂမ္မ တထာဂတော အာသဘံ ဌာနံ ပဋိဇာနာတိ, ပရိသာသု သီဟနာဒံ, နဒတိ, ဗြဟ္မစက္ကံ ပဝတ္တေတိ. (2)
ပုန စပရံ တထာဂတော သဗ္ဗတ္ထဂါမိနိံ ပဋိပဒံ ယထာဘူတံ ပဇာနာတိ. ယမ္ပိ တထာဂတော သဗ္ဗတ္ထဂါမိနိံ ပဋိပဒံ ယထာဘူတံ ပဇာနာတိ, ဣဒမ္ပိ တထာဂတဿ တထာဂတဗလံ ဟောတိ, ယံ ဗလံ အာဂမ္မ တထာဂတော အာသဘံ ဌာနံ ပဋိဇာနာတိ, ပရိသာသု သီဟနာဒံ နဒတိ, ဗြဟ္မစက္ကံ ပဝတ္တေတိ. (3)
ပုန စပရံ တထာဂတော အနေကဓာတုံ နာနာဓာတုံ လောကံ ယထာဘူတံ ပဇာနာတိ. ယမ္ပိ တထာဂတော အနေကဓာတုံ နာနာဓာတုံ လောကံ ယထာဘူတံ ပဇာနာတိ, ဣဒမ္ပိ တထာဂတဿ …ပေ… . (4)
ပုန စပရံ တထာဂတော သတ္တာနံ နာနာဓိမုတ္တိကတံ ယထာဘူတံ ပဇာနာတိ. ယမ္ပိ တထာဂတော သတ္တာနံ နာနာဓိမုတ္တိကတံ ယထာဘူတံ ပဇာနာတိ, ဣဒမ္ပိ တထာဂတဿ …ပေ… . (5)
ပုန စပရံ တထာဂတော ပရသတ္တာနံ ပရပုဂ္ဂလာနံ ဣန္ဒြိယပရောပရိယတ္တံ ယထာဘူတံ ပဇာနာတိ. ယမ္ပိ တထာဂတော ပရသတ္တာနံ ပရပုဂ္ဂလာနံ ဣန္ဒြိယပရောပရိယတ္တံ ယထာဘူတံ ပဇာနာတိ, ဣဒမ္ပိ တထာဂတဿ …ပေ… . (6)
ပုန စပရံ တထာဂတော ဈာနဝိမောက္ခသမာဓိသမာပတ္တီနံ သံကိလေသံ ဝေါဒါနံ ဝုဋ္ဌာနံ ယထာဘူတံ ပဇာနာတိ. ယမ္ပိ တထာဂတော ဈာနဝိမောက္ခသမာဓိသမာပတ္တီနံ သံကိလေသံ ဝေါဒါနံ ဝုဋ္ဌာနံ ယထာဘူတံ ပဇာနာတိ, ဣဒမ္ပိ တထာဂတဿ …ပေ… . (7)
ပုန စပရံ တထာဂတော အနေကဝိဟိတံ ပုဗ္ဗေနိဝါသံ အနုဿရတိ, သေယျထိဒံ— ဧကမ္ပိ ဇာတိံ ဒွေပိ ဇာတိယော …ပေ… ဣတိ သာကာရံ သော်ဒ္ဒေသံ အနေကဝိဟိတံ ပုဗ္ဗေနိဝါသံ အနုဿရတိ. ယမ္ပိ တထာဂတော အနေကဝိဟိတံ ပုဗ္ဗေနိဝါသံ အနုဿရတိ. သေယျထိဒံ— ဧကမ္ပိ ဇာတိံ ဒွေပိ ဇာတိယော …ပေ… ဣဒမ္ပိ တထာဂတဿ …ပေ… . (8)
ပုန စပရံ တထာဂတော ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန သတ္တေ ပဿတိ စဝမာနေ ဥပပဇ္ဇမာနေ …ပေ… ယမ္ပိ တထာဂတော ဒိဗ္ဗေန စက္ခုနာ ဝိသုဒ္ဓေန အတိက္ကန္တမာနုသကေန သတ္တေ ပဿတိ စဝမာနေ ဥပပဇ္ဇမာနေ …ပေ… ဣဒမ္ပိ တထာဂတဿ …ပေ… . (9)
ပုန စပရံ တထာဂတော အာသဝါနံ ခယာ အနာသဝံ စေတောဝိမုတ္တိံ ပညာဝိမုတ္တိံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရတိ. ယမ္ပိ တထာဂတော အာသဝါနံ ခယာ အနာသဝံ စေတောဝိမုတ္တိံ ပညာဝိမုတ္တိံ ဒိဋ္ဌေဝ ဓမ္မေ သယံ အဘိညာ သစ္ဆိကတွာ ဥပသမ္ပဇ္ဇ ဝိဟရတိ, ဣဒမ္ပိ တထာဂတဿ တထာဂတဗလံ ဟောတိ, ယံ ဗလံ အာဂမ္မ တထာဂတော အာသဘံ ဌာနံ ပဋိဇာနာတိ, ပရိသာသု သီဟနာဒံ နဒတိ, ဗြဟ္မစက္ကံ ပဝတ္တေတိ. ဣမာနိ ဒသ တထာဂတဗလာနိ. (10:68)
ကေနဋ္ဌေန သဒ္ဓါဗလံ? ကေနဋ္ဌေန ဝီရိယဗလံ? ကေနဋ္ဌေန သတိဗလံ? ကေနဋ္ဌေန သမာဓိဗလံ? ကေနဋ္ဌေန ပညာဗလံ? ကေနဋ္ဌေန ဟိရိဗလံ? ကေနဋ္ဌေန ဩတ္တပ္ပဗလံ? ကေနဋ္ဌေန ပဋိသင်္ခါနဗလံ …ပေ… ကေနဋ္ဌေန တထာဂတဗလံ?
အဿဒ္ဓိယေ အကမ္ပိယဋ္ဌေန သဒ္ဓါဗလံ. ကောသဇ္ဇေ အကမ္ပိယဋ္ဌေန ဝီရိယဗလံ. ပမာဒေ အကမ္ပိယဋ္ဌေန သတိဗလံ. ဥဒ္ဓစ္စေ အကမ္ပိယဋ္ဌေန သမာဓိဗလံ. အဝိဇ္ဇာယ အကမ္ပိယဋ္ဌေန ပညာဗလံ. ဟိရီယတိ ပါပကေ အကုသလေ ဓမ္မေတိ— ဟိရိဗလံ. ဩတ္တပ္ပတိ ပါပကေ အကုသလေ ဓမ္မေတိ— ဩတ္တပ္ပဗလံ. ဉာဏေန ကိလေသေ ပဋိသင်္ခါတီတိ— ပဋိသင်္ခါနဗလံ. တတ္ထ ဇာတာ ဓမ္မာ ဧကရသာ ဟောန္တီတိ— ဘာဝနာဗလံ. တတ္ထ နတ္ထိ ကိဉ္စိ ဝဇ္ဇန္တိ— အနဝဇ္ဇဗလံ. တေန စိတ္တံ သင်္ဂဏှာတီတိ— သင်္ဂဟဗလံ. တံ တဿ ခမတီတိ— ခန္တိဗလံ. တေန စိတ္တံ ပညပေတီတိ— ပညတ္တိဗလံ. တေန စိတ္တံ နိဇ္ဈာပေတီတိ— နိဇ္ဈတ္တိဗလံ. တေန စိတ္တံ ဝသံ ဝတ္တေတီတိ— ဣဿရိယဗလံ. တေန စိတ္တံ အဓိဋ္ဌာတီတိ— အဓိဋ္ဌာနဗလံ. တေန စိတ္တံ ဧကဂ္ဂန္တိ— သမထဗလံ. တတ္ထ ဇာတေ ဓမ္မေ အနုပဿတီတိ— ဝိပဿနာဗလံ. တတ္ထ သိက္ခတီတိ— သေခဗလံ. တတ္ထ သိက္ခိတတ္တာ— အသေခဗလံ. တေန အာသဝါ ခီဏာတိ— ခီဏာသဝဗလံ. တဿ ဣဇ္ဈတီတိ— ဣဒ္ဓိဗလံ. အပ္ပမေယျဋ္ဌေန တထာဂတဗလန္တိ.
ဗလကထာ နိဋ္ဌိတာ.