3.2 ဣဒ္ဓိကထာ
ကာ ဣဒ္ဓိ? ကတိ ဣဒ္ဓိယော? ဣဒ္ဓိယာ ကတိ ဘူမိယော, ကတိ ပါဒါ, ကတိ ပဒါနိ, ကတိ မူလာနိ? ကာ ဣဒ္ဓီ တိ? ဣဇ္ဈနဋ္ဌေန ဣဒ္ဓိ. ကတိ ဣဒ္ဓိယော တိ? ဒသ ဣဒ္ဓိယော. ဣဒ္ဓိယာ ကတိ ဘူမိယော တိ? ဣဒ္ဓိယာ စတဿော ဘူမိယော, စတ္တာရော ပါဒါ, အဋ္ဌ ပဒါနိ, သောဠသ မူလာနိ.
ကတမာ ဒသ ဣဒ္ဓိယော? အဓိဋ္ဌာနာ ဣဒ္ဓိ, ဝိကုဗ္ဗနာ ဣဒ္ဓိ, မနောမယာ ဣဒ္ဓိ, ဉာဏဝိပ္ဖါရာ ဣဒ္ဓိ, သမာဓိဝိပ္ဖါရာ ဣဒ္ဓိ, အရိယာ ဣဒ္ဓိ, ကမ္မဝိပါကဇာ ဣဒ္ဓိ, ပုညဝတော ဣဒ္ဓိ, ဝိဇ္ဇာမယာ ဣဒ္ဓိ, တတ္ထ တတ္ထ သမ္မာပယောဂပစ္စယာ ဣဇ္ဈနဋ္ဌေန ဣဒ္ဓိ.
ဣဒ္ဓိယာ ကတမာ စတဿော ဘူမိယော? ဝိဝေကဇာဘူမိ ပဌမံ ဈာနံ, ပီတိသုခဘူမိ ဒုတိယံ ဈာနံ, ဥပေက္ခာသုခဘူမိ တတိယံ ဈာနံ, အဒုက္ခမသုခါဘူမိ စတုတ္ထံ ဈာနံ. ဣဒ္ဓိယာ ဣမာ စတဿော ဘူမိယော ဣဒ္ဓိလာဘာယ ဣဒ္ဓိပဋိလာဘာယ ဣဒ္ဓိဝိကုဗ္ဗနတာယ ဣဒ္ဓိဝိသဝိတာယ ဣဒ္ဓိဝသီဘာဝါယ ဣဒ္ဓိဝေသာရဇ္ဇာယ သံဝတ္တန္တီတိ.
ဣဒ္ဓိယာ ကတမေ စတ္တာရော ပါဒါ? ဣဓ ဘိက္ခု ဆန္ဒသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ, စိတ္တသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ, ဝီရိယသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ, ဝီမံသာသမာဓိပဓာနသင်္ခါရသမန္နာဂတံ ဣဒ္ဓိပါဒံ ဘာဝေတိ. ဣဒ္ဓိယာ ဣမေ စတ္တာရော ပါဒါ ဣဒ္ဓိလာဘာယ ဣဒ္ဓိပဋိလာဘာယ ဣဒ္ဓိဝိကုဗ္ဗနတာယ ဣဒ္ဓိဝိသဝိတာယ ဣဒ္ဓိဝသီဘာဝါယ ဣဒ္ဓိဝေသာရဇ္ဇာယ သံဝတ္တန္တီတိ.
ဣဒ္ဓိယာ ကတမာနိ အဋ္ဌ ပဒါနိ? ဆန္ဒဉ္စေ ဘိက္ခု နိဿာယ လဘတိ သမာဓိံ, လဘတိ စိတ္တဿ ဧကဂ္ဂတံ. ဆန္ဒော န သမာဓိ, သမာဓိ န ဆန္ဒော. အညော ဆန္ဒော, အညော သမာဓိ. ဝီရိယဉ္စေ ဘိက္ခု နိဿာယ လဘတိ သမာဓိံ, လဘတိ စိတ္တဿ ဧကဂ္ဂတံ. ဝီရိယံ န သမာဓိ, သမာဓိ န ဝီရိယံ. အညံ ဝီရိယံ, အညော သမာဓိ. စိတ္တဉ္စေ ဘိက္ခု နိဿာယ လဘတိ သမာဓိံ, လဘတိ စိတ္တဿ ဧကဂ္ဂတံ. စိတ္တံ န သမာဓိ, သမာဓိ န စိတ္တံ. အညံ စိတ္တံ, အညော သမာဓိ. ဝီမံသဉ္စေ ဘိက္ခု နိဿာယ လဘတိ သမာဓိံ, လဘတိ စိတ္တဿ ဧကဂ္ဂတံ. ဝီမံသာ န သမာဓိ, သမာဓိ န ဝီမံသာ. အညာ ဝီမံသာ, အညော သမာဓိ. ဣဒ္ဓိယာ ဣမာနိ အဋ္ဌ ပဒါနိ ဣဒ္ဓိလာဘာယ ဣဒ္ဓိပဋိလာဘာယ ဣဒ္ဓိဝိကုဗ္ဗနတာယ ဣဒ္ဓိဝိသဝိတာယ ဣဒ္ဓိဝသီဘာဝါယ ဣဒ္ဓိဝေသာရဇ္ဇာယ သံဝတ္တန္တီတိ.
ဣဒ္ဓိယာ ကတမာနိ သောဠသ မူလာနိ? အနောနတံ စိတ္တံ ကောသဇ္ဇေ န ဣဉ္ဇတီတိ— အာနေဉ္ဇံ. အနုန္နတံ စိတ္တံ ဥဒ္ဓစ္စေ န ဣဉ္ဇတီတိ— အာနေဉ္ဇံ. အနဘိနတံ စိတ္တံ ရာဂေ န ဣဉ္ဇတီတိ— အာနေဉ္ဇံ. အနပနတံ စိတ္တံ ဗျာပါဒေ န ဣဉ္ဇတီတိ— အာနေဉ္ဇံ. အနိဿိတံ စိတ္တံ ဒိဋ္ဌိယာ န ဣဉ္ဇတီတိ— အာနေဉ္ဇံ. အပ္ပဋိဗဒ္ဓံ စိတ္တံ ဆန္ဒရာဂေ န ဣဉ္ဇတီတိ— အာနေဉ္ဇံ. ဝိပ္ပမုတ္တံ စိတ္တံ ကာမရာဂေ န ဣဉ္ဇတီတိ— အာနေဉ္ဇံ. ဝိသညုတ္တံ စိတ္တံ ကိလေသေ န ဣဉ္ဇတီတိ— အာနေဉ္ဇံ. ဝိမရိယာဒိကတံ စိတ္တံ ကိလေသမရိယာဒေ န ဣဉ္ဇတီတိ— အာနေဉ္ဇံ. ဧကတ္တဂတံ စိတ္တံ နာနတ္တကိလေသေဟိ န ဣဉ္ဇတီတိ— အာနေဉ္ဇံ. သဒ္ဓါယ ပရိဂ္ဂဟိတံ စိတ္တံ အဿဒ္ဓိယေ န ဣဉ္ဇတီတိ— အာနေဉ္ဇံ. ဝီရိယေန ပရိဂ္ဂဟိတံ စိတ္တံ ကောသဇ္ဇေ န ဣဉ္ဇတီတိ— အာနေဉ္ဇံ. သတိယာ ပရိဂ္ဂဟိတံ စိတ္တံ ပမာဒေ န ဣဉ္ဇတီတိ— အာနေဉ္ဇံ. သမာဓိနာ ပရိဂ္ဂဟိတံ စိတ္တံ ဥဒ္ဓစ္စေ န ဣဉ္ဇတီတိ— အာနေဉ္ဇံ. ပညာယ ပရိဂ္ဂဟိတံ စိတ္တံ အဝိဇ္ဇာယ န ဣဉ္ဇတီတိ— အာနေဉ္ဇံ. ဩဘာသဂတံ စိတ္တံ အဝိဇ္ဇန္ဓကာရေ န ဣဉ္ဇတီတိ— အာနေဉ္ဇံ. ဣဒ္ဓိယာ ဣမာနိ သောဠသ မူလာနိ ဣဒ္ဓိလာဘာယ ဣဒ္ဓိပဋိလာဘာယ ဣဒ္ဓိဝိကုဗ္ဗနတာယ ဣဒ္ဓိဝိသဝိတာယ ဣဒ္ဓိဝသီဘာဝါယ ဣဒ္ဓိဝေသာရဇ္ဇာယ သံဝတ္တန္တီတိ.