3.3 အဘိသမယကထာ
အဘိသမယော တိ. ကေန အဘိသမေတိ? စိတ္တေန အဘိသမေတိ.
ဟဉ္စိ စိတ္တေန အဘိသမေတိ, တေန ဟိ အညာဏီ အဘိသမေတိ? န အညာဏီ အဘိသမေတိ. ဉာဏေန အဘိသမေတိ.
ဟဉ္စိ ဉာဏေန အဘိသမေတိ, တေန ဟိ အစိတ္တေန စ ဉာဏေန စ အစိတ္တကော အဘိသမေတိ? န အစိတ္တကော အဘိသမေတိ. စိတ္တေန စ ဉာဏေန စ အဘိသမေတိ.
ဟဉ္စိ စိတ္တေန စ ဉာဏေန စ အဘိသမေတိ, တေန ဟိ ကာမာဝစရစိတ္တေန စ ဉာဏေန စ အဘိသမေတိ? န ကာမာဝစရစိတ္တေန စ ဉာဏေန စ အဘိသမေတိ.
တေန ဟိ ရူပါဝစရစိတ္တေန စ ဉာဏေန စ အဘိသမေတိ? န ရူပါဝစရစိတ္တေန စ ဉာဏေန စ အဘိသမေတိ.
တေန ဟိ အရူပါဝစရစိတ္တေန စ ဉာဏေန စ အဘိသမေတိ? န အရူပါဝစရစိတ္တေန စ ဉာဏေန စ အဘိသမေတိ.
တေန ဟိ ကမ္မဿကတစိတ္တေန စ ဉာဏေန စ အဘိသမေတိ? န ကမ္မဿကတစိတ္တေန စ ဉာဏေန စ အဘိသမေတိ.
တေန ဟိ သစ္စာနုလောမိကစိတ္တေန စ ဉာဏေန စ အဘိသမေတိ? န သစ္စာနုလောမိကစိတ္တေန စ ဉာဏေန စ အဘိသမေတိ.
တေန ဟိ အတီတစိတ္တေန စ ဉာဏေန စ အဘိသမေတိ? န အတီတစိတ္တေန စ ဉာဏေန စ အဘိသမေတိ.
တေန ဟိ အနာဂတစိတ္တေန စ ဉာဏေန စ အဘိသမေတိ? န အနာဂတစိတ္တေန စ ဉာဏေန စ အဘိသမေတိ.
တေန ဟိ ပစ္စုပ္ပန္နလောကိယစိတ္တေန စ ဉာဏေန စ အဘိသမေတိ? န ပစ္စုပ္ပန္နလောကိယစိတ္တေန စ ဉာဏေန စ အဘိသမေတိ. လောကုတ္တရမဂ္ဂက္ခဏေ ပစ္စုပ္ပန္နစိတ္တေန စ ဉာဏေန စ အဘိသမေတိ.
ကထံ လောကုတ္တရမဂ္ဂက္ခဏေ ပစ္စုပ္ပန္နစိတ္တေန စ ဉာဏေန စ အဘိသမေတိ? လောကုတ္တရမဂ္ဂက္ခဏေ ဥပ္ပါဒါဓိပတေယျံ စိတ္တံ ဉာဏဿ ဟေတု ပစ္စယော စ တံသမ္ပယုတ္တံ နိရောဓဂေါစရံ ဒဿနာဓိပတေယျံ ဉာဏံ စိတ္တဿ ဟေတု ပစ္စယော စ တံသမ္ပယုတ္တံ ဉာဏံ နိရောဓဂေါစရံ. ဧဝံ လောကုတ္တရမဂ္ဂက္ခဏေ ပစ္စုပ္ပန္နစိတ္တေန စ ဉာဏေန စ အဘိသမေတိ.
ကိံ နု ဧတ္တကောယေဝ အဘိသမယောတိ? န ဟိ. လောကုတ္တရမဂ္ဂက္ခဏေ ဒဿနာဘိသမယော သမ္မာဒိဋ္ဌိ, အဘိနိရောပနာဘိသမယော သမ္မာသင်္ကပ္ပေါ, ပရိဂ္ဂဟာဘိသမယော သမ္မာဝါစာ, သမုဋ္ဌာနာဘိသမယော သမ္မာကမ္မန္တော, ဝေါဒါနာဘိသမယော သမ္မာအာဇီဝေါ, ပဂ္ဂဟာဘိသမယော သမ္မာဝါယာမော, ဥပဋ္ဌာနာဘိသမယော သမ္မာသတိ, အဝိက္ခေပါဘိသမယော သမ္မာသမာဓိ; ဥပဋ္ဌာနာဘိသမယော သတိသမ္ဗောဇ္ဈင်္ဂေါ, ပဝိစယာဘိသမယော ဓမ္မဝိစယသမ္ဗောဇ္ဈင်္ဂေါ, ပဂ္ဂဟာဘိသမယော ဝီရိယသမ္ဗောဇ္ဈင်္ဂေါ, ဖရဏာဘိသမယော ပီတိသမ္ဗောဇ္ဈင်္ဂေါ, ဥပသမာဘိသမယော ပဿဒ္ဓိသမ္ဗောဇ္ဈင်္ဂေါ, အဝိက္ခေပါဘိသမယော သမာဓိသမ္ဗောဇ္ဈင်္ဂေါ, ပဋိသင်္ခါနာဘိသမယော ဥပေက္ခာသမ္ဗောဇ္ဈင်္ဂေါ; အဿဒ္ဓိယေ အကမ္ပိယာဘိသမယော သဒ္ဓါဗလံ, ကောသဇ္ဇေ အကမ္ပိယာဘိသမယော ဝီရိယဗလံ, ပမာဒေ အကမ္ပိယာဘိသမယော သတိဗလံ, ဥဒ္ဓစ္စေ အကမ္ပိယာဘိသမယော သမာဓိဗလံ, အဝိဇ္ဇာယ အကမ္ပိယာဘိသမယော ပညာဗလံ; အဓိမောက္ခာဘိသမယော သဒ္ဓိန္ဒြိယံ, ပဂ္ဂဟာဘိသမယော ဝီရိယိန္ဒြိယံ, ဥပဋ္ဌာနာဘိသမယော သတိန္ဒြိယံ, အဝိက္ခေပါဘိသမယော သမာဓိန္ဒြိယံ, ဒဿနာဘိသမယော ပညိန္ဒြိယံ. အာဓိပတေယျဋ္ဌေန ဣန္ဒြိယာဘိသမယော, အကမ္ပိယဋ္ဌေန ဗလာဘိသမယော, နိယျာနဋ္ဌေန ဗောဇ္ဈင်္ဂါဘိသမယော, ဟေတုဋ္ဌေန မဂ္ဂါဘိသမယော, ဥပဋ္ဌာနဋ္ဌေန သတိပဋ္ဌာနာဘိသမယော, ပဒဟဋ္ဌေန သမ္မပ္ပဓာနာဘိသမယော, ဣဇ္ဈနဋ္ဌေန ဣဒ္ဓိပါဒါဘိသမယော, တထဋ္ဌေန သစ္စာဘိသမယော, အဝိက္ခေပဋ္ဌေန သမထာဘိသမယော, အနုပဿနဋ္ဌေန ဝိပဿနာဘိသမယော, ဧကရသဋ္ဌေန သမထဝိပဿနာဘိသမယော, အနတိဝတ္တနဋ္ဌေန ယုဂနဒ္ဓါဘိသမယော, သံဝရဋ္ဌေန သီလဝိသုဒ္ဓိအဘိသမယော, အဝိက္ခေပဋ္ဌေန ဝိသုဒ္ဓိအဘိသမယော, ဒဿနဋ္ဌေန ဒိဋ္ဌိဝိသုဒ္ဓိအဘိသမယော, မုတ္တဋ္ဌေန ဝိမောက္ခာဘိသမယော, ပဋိဝေဓဋ္ဌေန ဝိဇ္ဇာဘိသမယော, ပရိစ္စာဂဋ္ဌေန ဝိမုတ္တိအဘိသမယော, သမုစ္ဆေဒဋ္ဌေန ခယေ ဉာဏံ အဘိသမယော. ဆန္ဒော မူလဋ္ဌေန အဘိသမယော, မနသိကာရော သမုဋ္ဌာနဋ္ဌေန အဘိသမယော, ဖဿော သမောဓာနဋ္ဌေန အဘိသမယော, ဝေဒနာ သမောသရဏဋ္ဌေန အဘိသမယော, သမာဓိ ပမုခဋ္ဌေန အဘိသမယော, သတိ အာဓိပတေယျဋ္ဌေန အဘိသမယော, ပညာ တဒုတ္တရဋ္ဌေန အဘိသမယော, ဝိမုတ္တိ သာရဋ္ဌေန အဘိသမယော, အမတောဂဓံ နိဗ္ဗာနံ ပရိယောသာနဋ္ဌေန အဘိသမယော.
ကိံ နု ဧတ္တကောယေဝ အဘိသမယောတိ? န ဟိ. သောတာပတ္တိမဂ္ဂက္ခဏေ ဒဿနာဘိသမယော သမ္မာဒိဋ္ဌိ …ပေ… အမတောဂဓံ နိဗ္ဗာနံ ပရိယောသာနဋ္ဌေန အဘိသမယော.
ကိံ နု ဧတ္တကောယေဝ အဘိသမယောတိ? န ဟိ. သောတာပတ္တိဖလက္ခဏေ ဒဿနာဘိသမယော သမ္မာဒိဋ္ဌိ …ပေ… ပဋိပ္ပဿဒ္ဓဋ္ဌေန အနုပ္ပါဒေ ဉာဏံ အဘိသမယော. ဆန္ဒော မူလဋ္ဌေန အဘိသမယော …ပေ… အမတောဂဓံ နိဗ္ဗာနံ ပရိယောသာနဋ္ဌေန အဘိသမယော.
ကိံ နု ဧတ္တကောယေဝ အဘိသမယောတိ? န ဟိ. သကဒါဂါမိမဂ္ဂက္ခဏေ …ပေ… သကဒါဂါမိဖလက္ခဏေ… အနာဂါမိမဂ္ဂက္ခဏေ… အနာဂါမိဖလက္ခဏေ… အရဟတ္တမဂ္ဂက္ခဏေ …ပေ… အရဟတ္တဖလက္ခဏေ ဒဿနာဘိသမယော သမ္မာဒိဋ္ဌိ, အဘိနိရောပနာဘိသမယော သမ္မာသင်္ကပ္ပေါ …ပေ… ပဋိပ္ပဿဒ္ဓဋ္ဌေန အနုပ္ပါဒေ ဉာဏံ အဘိသမယော. ဆန္ဒော မူလဋ္ဌေန အဘိသမယော …ပေ… အမတောဂဓံ နိဗ္ဗာနံ ပရိယောသာနဋ္ဌေန အဘိသမယော.
ယွာယံ ကိလေသေ ပဇဟတိ, အတီတေ ကိလေသေ ပဇဟတိ …ပေ… အနာဂတေ ကိလေသေ ပဇဟတိ, ပစ္စုပ္ပန္နေ ကိလေသေ ပဇဟတိ, အတီတေ ကိလေသေ ပဇဟတီတိ. ဟဉ္စိ အတီတေ ကိလေသေ ပဇဟတိ, တေန ဟိ ခီဏံ ခေပေတိ, နိရုဒ္ဓံ နိရောဓေတိ, ဝိဂတံ ဝိဂမေတိ, အတ္ထင်္ဂတံ အတ္ထင်္ဂမေတိ, အတီတံ ယံ န အတ္ထိ တံ ပဇဟတီတိ? န အတီတေ ကိလေသေ ပဇဟတီတိ. အနာဂတေ ကိလေသေ ပဇဟတီတိ. ဟဉ္စိ အနာဂတေ ကိလေသေ ပဇဟတိ, တေန ဟိ အဇာတံ ပဇဟတိ, အနိဗ္ဗတ္တံ ပဇဟတိ, အနုပ္ပန္နံ ပဇဟတိ, အပါတုဘူတံ ပဇဟတိ, အနာဂတံ ယံ န အတ္ထိ တံ ပဇဟတီတိ? န အနာဂတေ ကိလေသေ ပဇဟတီတိ. ပစ္စုပ္ပန္နေ ကိလေသေ ပဇဟတီတိ. ဟဉ္စိ ပစ္စုပ္ပန္နေ ကိလေသေ ပဇဟတိ, တေန ဟိ ရတ္တော ရာဂံ ပဇဟတိ, ဒုဋ္ဌော ဒေါသံ ပဇဟတိ, မူဠှော မောဟံ ပဇဟတိ, ဝိနိဗဒ္ဓေါ မာနံ ပဇဟတိ, ပရာမဋ္ဌော ဒိဋ္ဌိံ ပဇဟတိ, ဝိက္ခေပဂတော ဥဒ္ဓစ္စံ ပဇဟတိ, အနိဋ္ဌင်္ဂတော ဝိစိကိစ္ဆံ ပဇဟတိ, ထာမဂတော အနုသယံ ပဇဟတိ, ကဏှသုက္ကဓမ္မာ ယုဂနဒ္ဓါ သမမေဝ ဝတ္တန္တိ, သံကိလေသိကာ မဂ္ဂဘာဝနာ ဟောတိ?
န ဟိ အတီတေ ကိလေသေ ပဇဟတိ, န အနာဂတေ ကိလေသေ ပဇဟတိ, န ပစ္စုပ္ပန္နေ ကိလေသေ ပဇဟတီတိ. ဟဉ္စိ န အတီတေ ကိလေသေ ပဇဟတိ, န အနာဂတေ …ပေ… န ပစ္စုပ္ပန္နေ ကိလေသေ ပဇဟတိ, တေန ဟိ နတ္ထိ မဂ္ဂဘာဝနာ, နတ္ထိ ဖလသစ္ဆိကိရိယာ, နတ္ထိ ကိလေသပ္ပဟာနံ, နတ္ထိ ဓမ္မာဘိသမယောတိ? အတ္ထိ မဂ္ဂဘာဝနာ, အတ္ထိ ဖလသစ္ဆိကိရိယာ, အတ္ထိ ကိလေသပ္ပဟာနံ, အတ္ထိ ဓမ္မာဘိသမယော. ယထာ ကထံ ဝိယ? သေယျထာပိ တရုဏော ရုက္ခော အဇာတဖလော. တမေနံ ပုရိသော မူလံ ဆိန္ဒေယျ. ယေ တဿ ရုက္ခဿ အဇာတဖလာ, တေ အဇာတာယေဝ န ဇာယန္တိ, အနိဗ္ဗတ္တာယေဝ န နိဗ္ဗတ္တန္တိ, အနုပ္ပန္နာယေဝ န ဥပ္ပဇ္ဇန္တိ, အပါတုဘူတာယေဝ န ပါတုဘဝန္တိ. ဧဝမေဝံ ဥပ္ပါဒေါ ဟေတု, ဥပ္ပါဒေါ ပစ္စယော ကိလေသာနံ နိဗ္ဗတ္တိယာတိ. ဥပ္ပါဒေ အာဒီနဝံ ဒိသွာ အနုပ္ပါဒေ စိတ္တံ ပက္ခန္ဒတိ. အနုပ္ပါဒေ စိတ္တဿ ပက္ခန္ဒတ္တာ ယေ ဥပ္ပါဒပစ္စယာ ကိလေသာ နိဗ္ဗတ္တေယျုံ, တေ အဇာတာယေဝ န ဇာယန္တိ, အနိဗ္ဗတ္တာယေဝ န နိဗ္ဗတ္တန္တိ, အနုပ္ပန္နာယေဝ န ဥပ္ပဇ္ဇန္တိ, အပါတုဘူတာယေဝ န ပါတုဘဝန္တိ. ဧဝံ ဟေတုနိရောဓာ ဒုက္ခနိရောဓော. ပဝတ္တံ ဟေတု, နိမိတ္တံ ဟေတု, အာယူဟနာ ဟေတု. အာယူဟနာ ပစ္စယော ကိလေသာနံ နိဗ္ဗတ္တိယာတိ. အာယူဟနေ အာဒီနဝံ ဒိသွာ အနာယူဟနေ စိတ္တံ ပက္ခန္ဒတိ. အနာယူဟနေ စိတ္တဿ ပက္ခန္ဒတ္တာ, ယေ အာယူဟနပစ္စယာ ကိလေသာ နိဗ္ဗတ္တေယျုံ, တေ အဇာတာယေဝ န ဇာယန္တိ, အနိဗ္ဗတ္တာယေဝ န နိဗ္ဗတ္တန္တိ, အနုပ္ပန္နာယေဝ န ဥပ္ပဇ္ဇန္တိ, အပါတုဘူတာယေဝ န ပါတုဘဝန္တိ. ဧဝံ ဟေတုနိရောဓာ ဒုက္ခနိရောဓော. ဧဝံ အတ္ထိ မဂ္ဂဘာဝနာ, အတ္ထိ ဖလသစ္ဆိကိရိယာ, အတ္ထိ ကိလေသပ္ပဟာနံ, အတ္ထိ ဓမ္မာဘိသမယောတိ.
အဘိသမယကထာ နိဋ္ဌိတာ.