3.4.1 မဂ္ဂင်္ဂနိဒ္ဒေသ
သမ္မာဒိဋ္ဌိယာ ပဉ္စ ဝိဝေကာ, ပဉ္စ ဝိရာဂါ, ပဉ္စ နိရောဓာ, ပဉ္စ ဝေါသဂ္ဂါ, ဒွါဒသ နိဿယာ. သမ္မာသင်္ကပ္ပဿ …ပေ… သမ္မာဝါစာယ… သမ္မာကမ္မန္တဿ… သမ္မာအာဇီဝဿ… သမ္မာဝါယာမဿ… သမ္မာသတိယာ… သမ္မာသမာဓိဿ ပဉ္စ ဝိဝေကာ, ပဉ္စ ဝိရာဂါ, ပဉ္စ နိရောဓာ, ပဉ္စ ဝေါသဂ္ဂါ, ဒွါဒသ နိဿယာ.
သမ္မာဒိဋ္ဌိယာ ကတမေ ပဉ္စ ဝိဝေကာ? ဝိက္ခမ္ဘနဝိဝေကော, တဒင်္ဂဝိဝေကော သမုစ္ဆေဒဝိဝေကော, ပဋိပ္ပဿဒ္ဓိဝိဝေကော, နိဿရဏဝိဝေကော. ဝိက္ခမ္ဘနဝိဝေကော စ နီဝရဏာနံ ပဌမဇ္ဈာနံ ဘာဝယတော, တဒင်္ဂဝိဝေကော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝိဝေကော စ လောကုတ္တရံ ခယဂါမိမဂ္ဂံ ဘာဝယတော, ပဋိပ္ပဿဒ္ဓိဝိဝေကော စ ဖလက္ခဏေ, နိဿရဏဝိဝေကော စ နိရောဓော နိဗ္ဗာနံ. သမ္မာဒိဋ္ဌိယာ ဣမေ ပဉ္စ ဝိဝေကာ. ဣမေသု ပဉ္စသု ဝိဝေကေသု ဆန္ဒဇာတော ဟောတိ သဒ္ဓါဓိမုတ္တော, စိတ္တဉ္စဿ သွာဓိဋ္ဌိတံ.
သမ္မာဒိဋ္ဌိယာ ကတမေ ပဉ္စ ဝိရာဂါ? ဝိက္ခမ္ဘနဝိရာဂေါ, တဒင်္ဂဝိရာဂေါ, သမုစ္ဆေဒဝိရာဂေါ, ပဋိပ္ပဿဒ္ဓိဝိရာဂေါ, နိဿရဏဝိရာဂေါ. ဝိက္ခမ္ဘနဝိရာဂေါ စ နီဝရဏာနံ ပဌမဇ္ဈာနံ ဘာဝယတော, တဒင်္ဂဝိရာဂေါ စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝိရာဂေါ စ လောကုတ္တရံ ခယဂါမိမဂ္ဂံ ဘာဝယတော, ပဋိပ္ပဿဒ္ဓိဝိရာဂေါ စ ဖလက္ခဏေ, နိဿရဏဝိရာဂေါ စ နိရောဓော နိဗ္ဗာနံ. သမ္မာဒိဋ္ဌိယာ ဣမေ ပဉ္စ ဝိရာဂါ. ဣမေသု ပဉ္စသု ဝိရာဂေသု ဆန္ဒဇာတော ဟောတိ သဒ္ဓါဓိမုတ္တော, စိတ္တဉ္စဿ သွာဓိဋ္ဌိတံ.
သမ္မာဒိဋ္ဌိယာ ကတမေ ပဉ္စ နိရောဓာ? ဝိက္ခမ္ဘနနိရောဓော, တဒင်္ဂနိရောဓော, သမုစ္ဆေဒနိရောဓော, ပဋိပ္ပဿဒ္ဓိနိရောဓော, နိဿရဏနိရောဓော. ဝိက္ခမ္ဘနနိရောဓော စ နီဝရဏာနံ ပဌမဇ္ဈာနံ ဘာဝယတော, တဒင်္ဂနိရောဓော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒနိရောဓော စ လောကုတ္တရံ ခယဂါမိမဂ္ဂံ ဘာဝယတော, ပဋိပ္ပဿဒ္ဓိနိရောဓော စ ဖလက္ခဏေ, နိဿရဏနိရောဓော စ အမတာ ဓာတု. သမ္မာဒိဋ္ဌိယာ ဣမေ ပဉ္စ နိရောဓာ. ဣမေသု ပဉ္စသု နိရောဓေသု ဆန္ဒဇာတော ဟောတိ သဒ္ဓါဓိမုတ္တော, စိတ္တဉ္စဿ သွာဓိဋ္ဌိတံ.
သမ္မာဒိဋ္ဌိယာ ကတမေ ပဉ္စ ဝေါသဂ္ဂါ? ဝိက္ခမ္ဘနဝေါသဂ္ဂေါ, တဒင်္ဂဝေါသဂ္ဂေါ, သမုစ္ဆေဒဝေါသဂ္ဂေါ, ပဋိပ္ပဿဒ္ဓိဝေါသဂ္ဂေါ, နိဿရဏဝေါသဂ္ဂေါ. ဝိက္ခမ္ဘနဝေါသဂ္ဂေါ စ နီဝရဏာနံ ပဌမဇ္ဈာနံ ဘာဝယတော, တဒင်္ဂဝေါသဂ္ဂေါ စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝေါသဂ္ဂေါ စ လောကုတ္တရံ ခယဂါမိမဂ္ဂံ ဘာဝယတော, ပဋိပ္ပဿဒ္ဓိဝေါသဂ္ဂေါ စ ဖလက္ခဏေ, နိဿရဏဝေါသဂ္ဂေါ စ နိရောဓော နိဗ္ဗာနံ. သမ္မာဒိဋ္ဌိယာ ဣမေ ပဉ္စ ဝေါသဂ္ဂါ. ဣမေသု ပဉ္စသု ဝေါသဂ္ဂေသု ဆန္ဒဇာတော ဟောတိ သဒ္ဓါဓိမုတ္တော, စိတ္တဉ္စဿ သွာဓိဋ္ဌိတံ. သမ္မာဒိဋ္ဌိယာ ဣမေ ပဉ္စ ဝိဝေကာ, ပဉ္စ ဝိရာဂါ, ပဉ္စ နိရောဓာ, ပဉ္စ ဝေါသဂ္ဂါ, ဒွါဒသ နိဿယာ.
သမ္မာသင်္ကပ္ပဿ …ပေ… သမ္မာဝါစာယ… သမ္မာကမ္မန္တဿ… သမ္မာအာဇီဝဿ… သမ္မာဝါယာမဿ… သမ္မာသတိယာ… သမ္မာသမာဓိဿ ကတမေ ပဉ္စ ဝိဝေကာ? ဝိက္ခမ္ဘနဝိဝေကော, တဒင်္ဂဝိဝေကော, သမုစ္ဆေဒဝိဝေကော, ပဋိပ္ပဿဒ္ဓိဝိဝေကော, နိဿရဏဝိဝေကော. ဝိက္ခမ္ဘနဝိဝေကော စ နီဝရဏာနံ ပဌမဇ္ဈာနံ ဘာဝယတော, တဒင်္ဂဝိဝေကော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝိဝေကော စ လောကုတ္တရံ ခယဂါမိမဂ္ဂံ ဘာဝယတော, ပဋိပ္ပဿဒ္ဓိဝိဝေကော စ ဖလက္ခဏေ နိဿရဏဝိဝေကော စ နိရောဓော နိဗ္ဗာနံ. သမ္မာသမာဓိဿ ဣမေ ပဉ္စ ဝိဝေကာ. ဣမေသု ပဉ္စသု ဝိဝေကေသု ဆန္ဒဇာတော ဟောတိ သဒ္ဓါဓိမုတ္တော, စိတ္တဉ္စဿ သွာဓိဋ္ဌိတံ.
သမ္မာသမာဓိဿ ကတမေ ပဉ္စ ဝိရာဂါ? ဝိက္ခမ္ဘနဝိရာဂေါ, တဒင်္ဂဝိရာဂေါ, သမုစ္ဆေဒဝိရာဂေါ, ပဋိပ္ပဿဒ္ဓိဝိရာဂေါ, နိဿရဏဝိရာဂေါ. ဝိက္ခမ္ဘနဝိရာဂေါ စ နီဝရဏာနံ ပဌမဇ္ဈာနံ ဘာဝယတော, တဒင်္ဂဝိရာဂေါ စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝိရာဂေါ စ လောကုတ္တရံ ခယဂါမိမဂ္ဂံ ဘာဝယတော, ပဋိပ္ပဿဒ္ဓိဝိရာဂေါ စ ဖလက္ခဏေ, နိဿရဏဝိရာဂေါ စ နိရောဓော နိဗ္ဗာနံ. သမ္မာသမာဓိဿ ဣမေ ပဉ္စ ဝိရာဂါ. ဣမေသု ပဉ္စသု ဝိရာဂေသု ဆန္ဒဇာတော ဟောတိ သဒ္ဓါဓိမုတ္တော, စိတ္တဉ္စဿ သွာဓိဋ္ဌိတံ.
သမ္မာသမာဓိဿ ကတမေ ပဉ္စ နိရောဓာ? ဝိက္ခမ္ဘနနိရောဓော, တဒင်္ဂနိရောဓော, သမုစ္ဆေဒနိရောဓော, ပဋိပ္ပဿဒ္ဓိနိရောဓော, နိဿရဏနိရောဓော. ဝိက္ခမ္ဘနနိရောဓော စ နီဝရဏာနံ ပဌမဇ္ဈာနံ ဘာဝယတော, တဒင်္ဂနိရောဓော စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒနိရောဓော စ လောကုတ္တရံ ခယဂါမိမဂ္ဂံ ဘာဝယတော, ပဋိပ္ပဿဒ္ဓိနိရောဓော စ ဖလက္ခဏေ, နိဿရဏနိရောဓော စ အမတာ ဓာတု. သမ္မာသမာဓိဿ ဣမေ ပဉ္စ နိရောဓာ. ဣမေသု ပဉ္စသု နိရောဓေသု ဆန္ဒဇာတော ဟောတိ သဒ္ဓါဓိမုတ္တော, စိတ္တဉ္စဿ သွာဓိဋ္ဌိတံ.
သမ္မာသမာဓိဿ ကတမေ ပဉ္စ ဝေါသဂ္ဂါ? ဝိက္ခမ္ဘနဝေါသဂ္ဂေါ, တဒင်္ဂဝေါသဂ္ဂေါ, သမုစ္ဆေဒဝေါသဂ္ဂေါ, ပဋိပ္ပဿဒ္ဓိဝေါသဂ္ဂေါ, နိဿရဏဝေါသဂ္ဂေါ. ဝိက္ခမ္ဘနဝေါသဂ္ဂေါ စ နီဝရဏာနံ ပဌမဇ္ဈာနံ ဘာဝယတော, တဒင်္ဂဝေါသဂ္ဂေါ စ ဒိဋ္ဌိဂတာနံ နိဗ္ဗေဓဘာဂိယံ သမာဓိံ ဘာဝယတော, သမုစ္ဆေဒဝေါသဂ္ဂေါ စ လောကုတ္တရံ ခယဂါမိမဂ္ဂံ ဘာဝယတော, ပဋိပ္ပဿဒ္ဓိဝေါသဂ္ဂေါ စ ဖလက္ခဏေ, နိဿရဏဝေါသဂ္ဂေါ စ နိရောဓော နိဗ္ဗာနံ. သမ္မာသမာဓိဿ ဣမေ ပဉ္စ ဝေါသဂ္ဂါ. ဣမေသု ပဉ္စသု ဝေါသဂ္ဂေသု ဆန္ဒဇာတော ဟောတိ သဒ္ဓါဓိမုတ္တော, စိတ္တဉ္စဿ သွာဓိဋ္ဌိတံ. သမ္မာသမာဓိဿ ဣမေ ပဉ္စ ဝိဝေကာ, ပဉ္စ ဝိရာဂါ, ပဉ္စ နိရောဓာ, ပဉ္စ ဝေါသဂ္ဂါ, ဒွါဒသ နိဿယာ.
“သေယျထာပိ, ဘိက္ခဝေ, ယေ ကေစိ ဗလကရဏီယာ ကမ္မန္တာ ကရီယန္တိ, သဗ္ဗေ တေ ပထဝိံ နိဿာယ ပထဝိယံ ပတိဋ္ဌာယ ဧဝမေတေ ဗလကရဏီယာ ကမ္မန္တာ ကရီယန္တိ; ဧဝမေဝံ ခေါ, ဘိက္ခဝေ, ဘိက္ခု သီလံ နိဿာယ သီလေ ပတိဋ္ဌာယ သတ္တ ဗောဇ္ဈင်္ဂေ ဘာဝေတိ, သတ္တ ဗောဇ္ဈင်္ဂေ ဗဟုလီကရောတိ …ပေ… သတ္တ ဗောဇ္ဈင်္ဂေ ဘာဝေန္တော သတ္တ ဗောဇ္ဈင်္ဂေ ဗဟုလီကရောန္တော ဝုဒ္ဓိံ ဝိရူဠှိံ ဝေပုလ္လံ ပါပုဏာတိ ဓမ္မေသု …ပေ… ပဉ္စ ဗလာနိ ဘာဝေတိ, ပဉ္စ ဗလာနိ ဗဟုလီကရောတိ …ပေ… ပဉ္စ ဗလာနိ ဘာဝေန္တော ပဉ္စ ဗလာနိ ဗဟုလီကရောန္တော ဝုဒ္ဓိံ ဝိရူဠှိံ ဝေပုလ္လံ ပါပုဏာတိ ဓမ္မေသု …ပေ… ပဉ္စိန္ဒြိယာနိ ဘာဝေတိ, ပဉ္စိန္ဒြိယာနိ ဗဟုလီကရောတိ …ပေ… .
သေယျထာပိ, ဘိက္ခဝေ, ယေ ကေစိ ဗီဇဂါမဘူတဂါမာ ဝုဒ္ဓိံ ဝိရူဠှိံ ဝေပုလ္လံ အာပဇ္ဇန္တိ, သဗ္ဗေ တေ ပထဝိံ နိဿာယ ပထဝိယံ ပတိဋ္ဌာယ ဧဝမေတေ ဗီဇဂါမဘူတဂါမာ ဝုဒ္ဓိံ ဝိရူဠှိံ ဝေပုလ္လံ အာပဇ္ဇန္တိ; ဧဝမေဝံ ခေါ, ဘိက္ခဝေ, ဘိက္ခု သီလံ နိဿာယ သီလေ ပတိဋ္ဌာယ ပဉ္စိန္ဒြိယာနိ ဘာဝေန္တော ပဉ္စိန္ဒြိယာနိ ဗဟုလီကရောန္တော ဝုဒ္ဓိံ ဝိရူဠှိံ ဝေပုလ္လံ ပါပုဏာတိ ဓမ္မေသု.
ကထဉ္စ, ဘိက္ခဝေ, ဘိက္ခု သီလံ နိဿာယ သီလေ ပတိဋ္ဌာယ ပဉ္စိန္ဒြိယာနိ ဘာဝေန္တော ပဉ္စိန္ဒြိယာနိ ဗဟုလီကရောန္တော ဝုဒ္ဓိံ ဝိရူဠှိံ ဝေပုလ္လံ ပါပုဏာတိ ဓမ္မေသု? ဣဓ, ဘိက္ခဝေ, ဘိက္ခု သဒ္ဓိန္ဒြိယံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါသဂ္ဂပရိဏာမိံ. ဝီရိယိန္ဒြိယံ ဘာဝေတိ …ပေ… သတိန္ဒြိယံ ဘာဝေတိ …ပေ… သမာဓိန္ဒြိယံ ဘာဝေတိ …ပေ… ပညိန္ဒြိယံ ဘာဝေတိ ဝိဝေကနိဿိတံ ဝိရာဂနိဿိတံ နိရောဓနိဿိတံ ဝေါသဂ္ဂပရိဏာမိံ. ဧဝံ ခေါ, ဘိက္ခဝေ, ဘိက္ခု သီလံ နိဿာယ …ပေ… ပါပုဏာတိ ဓမ္မေသူ”တိ.