1.11 နာဂပေတဝတ္ထု
“ပုရတောဝ သေတေန ပလေတိ ဟတ္ထိနာ,
မဇ္ဈေ ပန အဿတရီရထေန;
ပစ္ဆာ စ ကညာ သိဝိကာယ နီယတိ,
ဩဘာသယန္တီ ဒသ သဗ္ဗသော ဒိသာ.
တုမှေ ပန မုဂ္ဂရဟတ္ထပါဏိနော,
ရုဒမ္မုခါ ဆိန္နပဘိန္နဂတ္တာ;
မနုဿဘူတာ ကိမကတ္ထ ပါပံ,
ယေနညမညဿ ပိဝါထ လောဟိတန်”တိ.
“ပုရတောဝ ယော ဂစ္ဆတိ ကုဉ္ဇရေန,
သေတေန နာဂေန စတုက္ကမေန;
အမှာက ပုတ္တော အဟု ဇေဋ္ဌကော သော,
ဒါနာနိ ဒတွာန သုခီ ပမောဒတိ.
ယော သော မဇ္ဈေ အဿတရီရထေန,
စတုဗ္ဘိ ယုတ္တေန သုဝဂ္ဂိတေန;
အမှာက ပုတ္တော အဟု မဇ္ဈိမော သော,
အမစ္ဆရီ ဒါနဝတီ ဝိရောစတိ.
ယာ သာ စ ပစ္ဆာ သိဝိကာယ နီယတိ,
နာရီ သပညာ မိဂမန္ဒလောစနာ;
အမှာက ဓီတာ အဟု သာ ကနိဋ္ဌိကာ,
ဘာဂဍ္ဎဘာဂေန သုခီ ပမောဒတိ.
ဧတေ စ ဒါနာနိ အဒံသု ပုဗ္ဗေ,
ပသန္နစိတ္တာ သမဏဗြာဟ္မဏာနံ;
မယံ ပန မစ္ဆရိနော အဟုမှ,
ပရိဘာသကာ သမဏဗြာဟ္မဏာနံ;
ဧတေ စ ဒတွာ ပရိစာရယန္တိ,
မယဉ္စ သုဿာမ နဠောဝ ဆိန္နော”တိ.
“ကိံ တုမှာကံ ဘောဇနံ ကိံ သယာနံ,
ကထဉ္စ ယာပေထ သုပါပဓမ္မိနော;
ပဟူတဘောဂေသု အနပ္ပကေသု,
သုခံ ဝိရာဓာယ ဒုက္ခဇ္ဇ ပတ္တာ”တိ.
“အညမညံ ဝဓိတွာန,
ပိဝါမ ပုဗ္ဗလောဟိတံ;
ဗဟုံ ပိတွာ န ဓာတာ ဟောမ,
နစ္ဆာဒိမှသေ မယံ.
ဣစ္စေဝ မစ္စာ ပရိဒေဝယန္တိ,_
အဒါယကာ ပေစ္စ ယမဿ ဌာယိနော;
ယေ တေ ဝိဒိစ္စ အဓိဂမ္မ ဘောဂေ,
န ဘုဉ္ဇရေ နာပိ ကရောန္တိ ပုညံ.
တေ ခုပ္ပိပါသူပဂတာ ပရတ္ထ,
ပစ္ဆာ စိရံ ဈာယရေ ဍယှမာနာ;
ကမ္မာနိ ကတွာန ဒုခုဒြာနိ,
အနုဘောန္တိ ဒုက္ခံ ကဋုကပ္ဖလာနိ.
ဣတ္တရံ ဟိ ဓနံ ဓညံ,_
ဣတ္တရံ ဣဓ ဇီဝိတံ;_
ဣတ္တရံ ဣတ္တရတော ဉတွာ,_
ဒီပံ ကယိရာထ ပဏ္ဍိတော.
ယေ တေ ဧဝံ ပဇာနန္တိ,
နရာ ဓမ္မဿ ကောဝိဒါ;
တေ ဒါနေ နပ္ပမဇ္ဇန္တိ,
သုတွာ အရဟတံ ဝစော”တိ.
နာဂပေတဝတ္ထု ဧကာဒသမံ.