1.6 ပဉ္စပုတ္တခါဒပေတိဝတ္ထု
“နဂ္ဂါ ဒုဗ္ဗဏ္ဏရူပါသိ,
ဒုဂ္ဂန္ဓာ ပူတိ ဝါယသိ;
မက္ခိကာဟိ ပရိကိဏ္ဏာ,
ကာ နု တွံ ဣဓ တိဋ္ဌသီ”တိ.
“အဟံ ဘဒန္တေ ပေတီမှိ,
ဒုဂ္ဂတာ ယမလောကိကာ;
ပါပကမ္မံ ကရိတွာန,
ပေတလောကံ ဣတော ဂတာ.
ကာလေန ပဉ္စ ပုတ္တာနိ,
သာယံ ပဉ္စ ပုနာပရေ;
ဝိဇာယိတွာန ခါဒါမိ,
တေပိ နာ ဟောန္တိ မေ အလံ.
ပရိဍယှတိ ဓူမာယတိ,
ခုဒါယ ဟဒယံ မမ;
ပါနီယံ န လဘေ ပါတုံ,
ပဿ မံ ဗျသနံ ဂတန်”တိ.
“ကိံ နု ကာယေန ဝါစာယ,
မနသာ ဒုက္ကဋံ ကတံ;
ကိဿ ကမ္မဝိပါကေန,
ပုတ္တမံသာနိ ခါဒသီ”တိ.
“သပတီ မေ ဂဗ္ဘိနီ အာသိ,
တဿာ ပါပံ အစေတယိံ;
သာဟံ ပဒုဋ္ဌမနသာ,
အကရိံ ဂဗ္ဘပါတနံ.
တဿာ ဒွေမာသိကော ဂဗ္ဘော,
လောဟိတညေဝ ပဂ္ဃရိ;
တဒဿာ မာတာ ကုပိတာ,
မယှံ ဉာတီ သမာနယိ;
သပထဉ္စ မံ ကာရေသိ,
ပရိဘာသာပယီ စ မံ.
သာဟံ ဃောရဉ္စ သပထံ,
မုသာဝါဒံ အဘာသိသံ;
ပုတ္တမံသာနိ ခါဒါမိ,
သစေ တံ ပကတံ မယာ.
တဿ ကမ္မဿ ဝိပါကေန,
မုသာဝါဒဿ စူဘယံ;
ပုတ္တမံသာနိ ခါဒါမိ,
ပုဗ္ဗလောဟိတမက္ခိတာ”တိ.
ပဉ္စပုတ္တခါဒပေတိဝတ္ထု ဆဋ္ဌံ.