2.10 ဥတ္တရမာတုပေတိဝတ္ထု
ဒိဝါဝိဟာရဂတံ ဘိက္ခုံ,
ဂင်္ဂါတီရေ နိသိန္နကံ;
တံ ပေတီ ဥပသင်္ကမ္မ,
ဒုဗ္ဗဏ္ဏာ ဘီရုဒဿနာ.
ကေသာ စဿာ အတိဒီဃာ,
ယာဝဘူမာဝလမ္ဗရေ;
ကေသေဟိ သာ ပဋိစ္ဆန္နာ,
သမဏံ ဧတဒဗြဝိ.
“ပဉ္စပဏ္ဏာသဝဿာနိ,
ယတော ကာလင်္ကတာ အဟံ;
နာဘိဇာနာမိ ဘုတ္တံ ဝါ,
ပီတံ ဝါ ပန ပါနိယံ;
ဒေဟိ တွံ ပါနိယံ ဘန္တေ,
တသိတာ ပါနိယာယ မေ”တိ.
“အယံ သီတောဒိကာ ဂင်္ဂါ,
ဟိမဝန္တတော သန္ဒတိ;
ပိဝ ဧတ္တော ဂဟေတွာန,
ကိံ မံ ယာစသိ ပါနိယန်”တိ.
“သစာဟံ ဘန္တေ ဂင်္ဂါယ,
သယံ ဂဏှာမိ ပါနိယံ;
လောဟိတံ မေ ပရိဝတ္တတိ,
တသ္မာ ယာစာမိ ပါနိယန်”တိ.
“ကိံ နု ကာယေန ဝါစာယ,
မနသာ ဒုက္ကဋံ ကတံ;
ကိဿ ကမ္မဝိပါကေန,
ဂင်္ဂါ တေ ဟောတိ လောဟိတန်”တိ.
“ပုတ္တော မေ ဥတ္တရော နာမ,
သဒ္ဓေါ အာသိ ဥပါသကော;
သော စ မယှံ အကာမာယ,
သမဏာနံ ပဝေစ္ဆတိ.
စီဝရံ ပိဏ္ဍပါတဉ္စ,
ပစ္စယံ သယနာသနံ;
တမဟံ ပရိဘာသာမိ,
မစ္ဆေရေန ဥပဒ္ဒုတာ.
ယံ တွံ မယှံ အကာမာယ,
သမဏာနံ ပဝေစ္ဆသိ;
စီဝရံ ပိဏ္ဍပါတဉ္စ,
ပစ္စယံ သယနာသနံ.
ဧတံ တေ ပရလောကသ္မိံ,
လောဟိတံ ဟောတု ဥတ္တရ;
တဿ ကမ္မဿ ဝိပါကေန,
ဂင်္ဂါ မေ ဟောတိ လောဟိတန်”တိ.
ဥတ္တရမာတုပေတိဝတ္ထု ဒသမံ.