2.11 သုတ္တပေတဝတ္ထု
“အဟံ ပုရေ ပဗ္ဗဇိတဿ ဘိက္ခုနော,
သုတ္တံ အဒါသိံ ဥပသင်္ကမ္မ ယာစိတာ;
တဿ ဝိပါကော ဝိပုလဖလူပလဗ္ဘတိ,
ဗဟုကာ စ မေ ဥပ္ပဇ္ဇရေ ဝတ္ထကောဋိယော.
ပုပ္ဖါဘိကိဏ္ဏံ ရမိတံ ဝိမာနံ,
အနေကစိတ္တံ နရနာရိသေဝိတံ;
သာဟံ ဘုဉ္ဇာမိ စ ပါရုပါမိ စ,
ပဟူတဝိတ္တာ န စ တာဝ ခီယတိ.
တဿေဝ ကမ္မဿ ဝိပါကမနွယာ,
သုခဉ္စ သာတဉ္စ ဣဓူပလဗ္ဘတိ;
သာဟံ ဂန္တွာ ပုနဒေဝ မာနုသံ,
ကာဟာမိ ပုညာနိ နယယျပုတ္တ မန်”တိ.
“သတ္တ တုဝံ ဝဿသတာ ဣဓာဂတာ,
ဇိဏ္ဏာ စ ဝုဍ္ဎာ စ တဟိံ ဘဝိဿသိ;
သဗ္ဗေဝ တေ ကာလကတာ စ ဉာတကာ,
ကိံ တတ္ထ ဂန္တွာန ဣတော ကရိဿသီ”တိ.
“သတ္တေဝ ဝဿာနိ ဣဓာဂတာယ မေ,
ဒိဗ္ဗဉ္စ သုခဉ္စ သမပ္ပိတာယ;
သာဟံ ဂန္တွာန ပုနဒေဝ မာနုသံ,
ကာဟာမိ ပုညာနိ နယယျပုတ္တ မန်”တိ.
သော တံ ဂဟေတွာန ပသယှ ဗာဟာယံ,
ပစ္စာနယိတွာန ထေရိံ သုဒုဗ္ဗလံ;
“ဝဇ္ဇေသိ အညမ္ပိ ဇနံ ဣဓာဂတံ,
‘ကရောထ ပုညာနိ သုခူပလဗ္ဘတိ’.
ဒိဋ္ဌာ မယာ အကတေန သာဓုနာ,
ပေတာ ဝိဟညန္တိ တထေဝ မနုဿာ;
ကမ္မဉ္စ ကတွာ သုခဝေဒနီယံ,
ဒေဝါ မနုဿာ စ သုခေ ဌိတာ ပဇာ”တိ.
သုတ္တပေတဝတ္ထု ဧကာဒသမံ.