2.3 မတ္တာပေတိဝတ္ထု
“နဂ္ဂါ ဒုဗ္ဗဏ္ဏရူပါသိ,
ကိသာ ဓမနိသန္ထတာ;
ဥပ္ဖါသုလိကေ ကိသိကေ,_
ကာ နု တွံ ဣဓ တိဋ္ဌသီ”တိ.
“အဟံ မတ္တာ တုဝံ တိဿာ,
သပတ္တီ တေ ပုရေ အဟုံ;
ပါပကမ္မံ ကရိတွာန,
ပေတလောကံ ဣတော ဂတာ”တိ.
“ကိံ နု ကာယေန ဝါစာယ,
မနသာ ဒုက္ကဋံ ကတံ;
ကိဿ ကမ္မဝိပါကေန,
ပေတလောကံ ဣတော ဂတာ”တိ.
“စဏ္ဍီ စ ဖရုသာ စာသိံ,
ဣဿုကီ မစ္ဆရီ သဌာ;_
တာဟံ ဒုရုတ္တံ ဝတွာန,
ပေတလောကံ ဣတော ဂတာ”တိ.
“သဗ္ဗံ အဟမ္ပိ ဇာနာမိ,
ယထာ တွံ စဏ္ဍိကာ အဟု;
အညဉ္စ ခေါ တံ ပုစ္ဆာမိ,
ကေနာသိ ပံသုကုန္ထိတာ”တိ.
“သီသံနှာတာ တုဝံ အာသိ,
သုစိဝတ္ထာ အလင်္ကတာ;
အဟဉ္စ ခေါ အဓိမတ္တံ,
သမလင်္ကတတရာ တယာ.
တဿာ မေ ပေက္ခမာနာယ,
သာမိကေန သမန္တယိ;
တတော မေ ဣဿာ ဝိပုလာ,
ကောဓော မေ သမဇာယထ.
တတော ပံသုံ ဂဟေတွာန,
ပံသုနာ တံ ဟိ ဩကိရိံ;
တဿ ကမ္မဝိပါကေန,
တေနမှိ ပံသုကုန္ထိတာ”တိ.
“သဗ္ဗံ အဟမ္ပိ ဇာနာမိ,
ပံသုနာ မံ တွမောကိရိ;
အညဉ္စ ခေါ တံ ပုစ္ဆာမိ,
ကေန ခဇ္ဇသိ ကစ္ဆုယာ”တိ.
“ဘေသဇ္ဇဟာရီ ဥဘယော,
ဝနန္တံ အဂမိမှသေ;
တွဉ္စ ဘေသဇ္ဇမာဟရိ,
အဟဉ္စ ကပိကစ္ဆုနော.
တဿာ တျာဇာနမာနာယ,
သေယျံ တျာဟံ သမောကိရိံ;
တဿ ကမ္မဝိပါကေန,
တေန ခဇ္ဇာမိ ကစ္ဆုယာ”တိ.
“သဗ္ဗံ အဟမ္ပိ ဇာနာမိ,
သေယျံ မေ တွံ သမောကိရိ;
အညဉ္စ ခေါ တံ ပုစ္ဆာမိ,
ကေနာသိ နဂ္ဂိယာ တုဝန်”တိ.
“သဟာယာနံ သမယော အာသိ,
ဉာတီနံ သမိတီ အဟု;
တွဉ္စ အာမန္တိတာ အာသိ,
သသာမိနီ နော စ ခေါ အဟံ.
တဿာ တျာဇာနမာနာယ,
ဒုဿံ တျာဟံ အပါနုဒိံ;
တဿ ကမ္မဝိပါကေန,
တေနမှိ နဂ္ဂိယာ အဟန်”တိ.
“သဗ္ဗံ အဟမ္ပိ ဇာနာမိ,
ဒုဿံ မေ တွံ အပါနုဒိ;
အညဉ္စ ခေါ တံ ပုစ္ဆာမိ,
ကေနာသိ ဂူထဂန္ဓိနီ”တိ.
“တဝ ဂန္ဓဉ္စ မာလဉ္စ,
ပစ္စဂ္ဃဉ္စ ဝိလေပနံ;
ဂူထကူပေ အတာရေသိံ,
တံ ပါပံ ပကတံ မယာ;
တဿ ကမ္မဝိပါကေန,
တေနမှိ ဂူထဂန္ဓိနီ”တိ.
“သဗ္ဗံ အဟမ္ပိ ဇာနာမိ,
တံ ပါပံ ပကတံ တယာ;
အညဉ္စ ခေါ တံ ပုစ္ဆာမိ,
ကေနာသိ ဒုဂ္ဂတာ တုဝန်”တိ.
“ဥဘိန္နံ သမကံ အာသိ,
ယံ ဂေဟေ ဝိဇ္ဇတေ ဓနံ;
သန္တေသု ဒေယျဓမ္မေသု,
ဒီပံ နာကာသိမတ္တနော;
တဿ ကမ္မဝိပါကေန,
တေနမှိ ဒုဂ္ဂတာ အဟံ.
တဒေဝ မံ တွံ အဝစ,
‘ပါပကမ္မံ နိသေဝသိ;
န ဟိ ပါပေဟိ ကမ္မေဟိ,
သုလဘာ ဟောတိ သုဂ္ဂတီ’”တိ.
“ဝါမတော မံ တွံ ပစ္စေသိ,
အထောပိ မံ ဥသူယသိ;
ပဿ ပါပါနံ ကမ္မာနံ,
ဝိပါကော ဟောတိ ယာဒိသော.
တေ ဃရာ တာ စ ဒါသိယော,
တာနေဝါဘရဏာနိမေ;
တေ အညေ ပရိစာရေန္တိ,
န ဘောဂါ ဟောန္တိ သဿတာ.
ဣဒါနိ ဘူတဿ ပိတာ,_
အာပဏာ ဂေဟမေဟိတိ;
အပ္ပေဝ တေ ဒဒေ ကိဉ္စိ,
မာ သု တာဝ ဣတော အဂါ”တိ.
“နဂ္ဂါ ဒုဗ္ဗဏ္ဏရူပါမှိ,
ကိသာ ဓမနိသန္ထတာ;
ကောပီနမေတံ ဣတ္ထီနံ,
မာ မံ ဘူတပိတာဒ္ဒသာ”တိ.
“ဟန္ဒ ကိံ ဝါ တျာဟံ ဒမ္မိ,
ကိံ ဝါ တေဓ ကရောမဟံ;
ယေန တွံ သုခိတာ အဿ,
သဗ္ဗကာမသမိဒ္ဓိနီ”တိ.
“စတ္တာရော ဘိက္ခူ သံဃတော,
စတ္တာရော ပန ပုဂ္ဂလေ;
အဋ္ဌ ဘိက္ခူ ဘောဇယိတွာ,
မမ ဒက္ခိဏမာဒိသ;
တဒါဟံ သုခိတာ ဟေဿံ,
သဗ္ဗကာမသမိဒ္ဓိနီ”တိ.
သာဓူတိ သာ ပဋိဿုတွာ,
ဘောဇယိတွာဋ္ဌ ဘိက္ခဝေါ;
ဝတ္ထေဟစ္ဆာဒယိတွာန,
တဿာ ဒက္ခိဏမာဒိသီ.
သမနန္တရာနုဒ္ဒိဋ္ဌေ,
ဝိပါကော ဥဒပဇ္ဇထ;
ဘောဇနစ္ဆာဒနပါနီယံ,
ဒက္ခိဏာယ ဣဒံ ဖလံ.
တတော သုဒ္ဓါ သုစိဝသနာ,
ကာသိကုတ္တမဓာရိနီ;
ဝိစိတ္တဝတ္ထာဘရဏာ,
သပတ္တိံ ဥပသင်္ကမိ.
“အဘိက္ကန္တေန ဝဏ္ဏေန,
ယာ တွံ တိဋ္ဌသိ ဒေဝတေ;
ဩဘာသေန္တီ ဒိသာ သဗ္ဗာ,
ဩသဓီ ဝိယ တာရကာ.
ကေန တေတာဒိသော ဝဏ္ဏော,
ကေန တေ ဣဓ မိဇ္ဈတိ;
ဥပ္ပဇ္ဇန္တိ စ တေ ဘောဂါ,_
ယေ ကေစိ မနသော ပိယာ.
ပုစ္ဆာမိ တံ ဒေဝိ မဟာနုဘာဝေ,
မနုဿဘူတာ ကိမကာသိ ပုညံ;
ကေနာသိ ဧဝံ ဇလိတာနုဘာဝါ,
ဝဏ္ဏော စ တေ သဗ္ဗဒိသာ ပဘာသတီ”တိ.
“အဟံ မတ္တာ တုဝံ တိဿာ,
သပတ္တီ တေ ပုရေ အဟုံ;
ပါပကမ္မံ ကရိတွာန,
ပေတလောကံ ဣတော ဂတာ.
တဝ ဒိန္နေန ဒါနေန,
မောဒါမိ အကုတောဘယာ;
စိရံ ဇီဝါဟိ ဘဂိနိ,
သဟ သဗ္ဗေဟိ ဉာတိဘိ;
အသောကံ ဝိရဇံ ဌာနံ,
အာဝါသံ ဝသဝတ္တိနံ.
ဣဓ ဓမ္မံ စရိတွာန,_
ဒါနံ ဒတွာန သောဘနေ;
ဝိနေယျ မစ္ဆေရမလံ သမူလံ,
အနိန္ဒိတာ သဂ္ဂမုပေဟိ ဌာနန်”တိ.
မတ္တာပေတိဝတ္ထု တတိယံ.