2.8 စူဠသေဋ္ဌိပေတဝတ္ထု
“နဂ္ဂေါ ကိသော ပဗ္ဗဇိတောသိ ဘန္တေ,
ရတ္တိံ ကုဟိံ ဂစ္ဆသိ ကိဿ ဟေတု;
အာစိက္ခ မေ တံ အပိ သက္ကုဏေမု,
သဗ္ဗေန ဝိတ္တံ ပဋိပါဒယေ တုဝန်”တိ.
“ဗာရာဏသီ နဂရံ ဒူရဃုဋ္ဌံ,
တတ္ထာဟံ ဂဟပတိ အဍ္ဎကော အဟု ဒီနော;
အဒါတာ ဂေဓိတမနော အာမိသသ္မိံ,
ဒုဿီလျေန ယမဝိသယမှိ ပတ္တော.
သော သူစိကာယ ကိလမိတော တေဟိ,
တေနေဝ ဉာတီသု ယာမိ အာမိသကိဉ္စိက္ခဟေတု;
အဒါနသီလာ န စ သဒ္ဒဟန္တိ,
ဒါနဖလံ ဟောတိ ပရမှိ လောကေ.
ဓီတာ စ မယှံ လပတေ အဘိက္ခဏံ,
‘ဒဿာမိ ဒါနံ ပိတူနံ ပိတာမဟာနံ’;
တမုပက္ခဋံ ပရိဝိသယန္တိ ဗြာဟ္မဏာ,
‘ယာမိ အဟံ အန္ဓကဝိန္ဒံ ဘောတ္တုန်’”တိ.
တမဝေါစ ရာဇာ “အနုဘဝိယာန တမ္ပိ,
ဧယျာသိ ခိပ္ပံ အဟမပိ ကဿံ ပူဇံ;
အာစိက္ခ မေ တံ ယဒိ အတ္ထိ ဟေတု,
သဒ္ဓါယိတံ ဟေတုဝစော သုဏောမာ”တိ.
“တထာ”တိ ဝတွာ အဂမာသိ တတ္ထ,
ဘုဉ္ဇိံသု ဘတ္တံ န စ ဒက္ခိဏာရဟာ;
ပစ္စာဂမိ ရာဇဂဟံ ပုနာပရံ,
ပါတုရဟောသိ ပုရတော ဇနာဓိပဿ.
ဒိသွာန ပေတံ ပုနဒေဝ အာဂတံ,
ရာဇာ အဝေါစ “အဟမပိ ကိံ ဒဒါမိ;
အာစိက္ခ မေ တံ ယဒိ အတ္ထိ ဟေတု,
ယေန တုဝံ စိရတရံ ပီဏိတော သိယာ”တိ.
“ဗုဒ္ဓဉ္စ သံဃံ ပရိဝိသိယာန ရာဇ,
အန္နေန ပါနေန စ စီဝရေန;
တံ ဒက္ခိဏံ အာဒိသ မေ ဟိတာယ,
ဧဝံ အဟံ စိရတရံ ပီဏိတော သိယာ”တိ.
တတော စ ရာဇာ နိပတိတွာ တာဝဒေ,
ဒါနံ သဟတ္ထာ အတုလံ ဒဒိတွာ သံဃေ;
အာရောစေသိ ပကတံ တထာဂတဿ,
တဿ စ ပေတဿ ဒက္ခိဏံ အာဒိသိတ္ထ.
သော ပူဇိတော အတိဝိယ သောဘမာနော,
ပါတုရဟောသိ ပုရတော ဇနာဓိပဿ;
“ယက္ခောဟမသ္မိ ပရမိဒ္ဓိပတ္တော,
န မယှမတ္ထိ သမာ သဒိသာ မာနုသာ.
ပဿာနုဘာဝံ အပရိမိတံ မမယိဒံ,
တယာနုဒိဋ္ဌံ အတုလံ ဒတွာ သံဃေ;
သန္တပ္ပိတော သတတံ သဒါ ဗဟူဟိ,
ယာမိ အဟံ သုခိတော မနုဿဒေဝါ”တိ.
စူဠသေဋ္ဌိပေတဝတ္ထု အဋ္ဌမံ.
ဘာဏဝါရံ ပဌမံ.