4.10 ဂဏပေတဝတ္ထု
“နဂ္ဂါ ဒုဗ္ဗဏ္ဏရူပါတ္ထ,
ကိသာ ဓမနိသန္ထတာ;
ဥပ္ဖါသုလိကာ ကိသိကာ,_
ကေ နု တုမှေတ္ထ မာရိသာ”တိ.
“မယံ ဘဒန္တေ ပေတာမှာ,
ဒုဂ္ဂတာ ယမလောကိကာ;
ပါပကမ္မံ ကရိတွာန,
ပေတလောကံ ဣတော ဂတာ”တိ.
“ကိံ နု ကာယေန ဝါစာယ,
မနသာ ဒုက္ကဋံ ကတံ;
ကိဿ ကမ္မဝိပါကေန,
ပေတလောကံ ဣတော ဂတာ”တိ.
“အနာဝဋေသု တိတ္ထေသု,
ဝိစိနိမှဒ္ဓမာသကံ;
သန္တေသု ဒေယျဓမ္မေသု,
ဒီပံ နာကမှ အတ္တနော.
နဒိံ ဥပေမ တသိတာ,
ရိတ္တကာ ပရိဝတ္တတိ;
ဆာယံ ဥပေမ ဥဏှေသု,
အာတပေါ ပရိဝတ္တတိ.
အဂ္ဂိဝဏ္ဏော စ နော ဝါတော,
ဍဟန္တော ဥပဝါယတိ;
ဧတဉ္စ ဘန္တေ အရဟာမ,
အညဉ္စ ပါပကံ တတော.
အပိ ယောဇနာနိ ဂစ္ဆာမ,
ဆာတာ အာဟာရဂေဓိနော;
အလဒ္ဓါဝ နိဝတ္တာမ,
အဟော နော အပ္ပပုညတာ.
ဆာတာ ပမုစ္ဆိတာ ဘန္တာ,
ဘူမိယံ ပဋိသုမ္ဘိတာ;
ဥတ္တာနာ ပဋိကိရာမ,_
အဝကုဇ္ဇာ ပတာမသေ.
တေ စ တတ္ထေဝ ပတိတာ,
ဘူမိယံ ပဋိသုမ္ဘိတာ;
ဥရံ သီသဉ္စ ဃဋ္ဋေမ,_
အဟော နော အပ္ပပုညတာ.
ဧတဉ္စ ဘန္တေ အရဟာမ,
အညဉ္စ ပါပကံ တတော;
သန္တေသု ဒေယျဓမ္မေသု,
ဒီပံ နာကမှ အတ္တနော.
တေ ဟိ နူန ဣတော ဂန္တွာ,
ယောနိံ လဒ္ဓါန မာနုသိံ;
ဝဒညူ သီလသမ္ပန္နာ,
ကာဟာမ ကုသလံ ဗဟုန်”တိ.
ဂဏပေတဝတ္ထု ဒသမံ.